Tā fakatātā ʻo e hā ʻa Kalaisi ki he kakai Nīfaí ʻe Andrew Bosley

ʻAho 12–18 ʻo ʻOkatopá

3 Nīfai 20–26

“Ko e Fānau ʻAkimoutolu ‘o e Fuakavá”

Tuku ke tataki ʻe he Laumālié hoʻo ako ʻo e 3 Nīfai 20–26. Te Ne tokoni ke ke ʻilo e ngaahi tefitoʻi moʻoni ʻe mātuʻaki mahuʻinga ki he kakai ʻokú ke akoʻí.

Lekooti ʻa e Ngaahi Ongo ʻOkú ke Maʻú

Fakaafeʻi e Feʻinasiʻakí

Hili hoʻomou lau fakataha e ngaahi folofola ʻa e Fakamoʻuí ʻi he 3 Nīfai 23:1, te ke lava ʻo ʻeke ki he kau mēmipa ʻo e kalasí pe ko e hā naʻa nau fekumi ki aí ʻi heʻenau lau e ngaahi folofoloa ki he uike ní. Ko e hā e meʻa naʻa nau maʻú?

Akoʻi e Tokāteliné

3 Nīfai 20:25–41; 21:9–11, 22–29

ʻE fakahoko ʻe he ʻOtuá ʻi he ngaahi ʻaho kimui ní ha ngāue lahi mo fakaofo.

• Naʻe folofola ʻa e Fakamoʻuí ki ha “fuʻu ngāue maʻongoʻonga mo fakaofo” (3 Nīfai 21:9) ʻe fakahoko ʻe Heʻene Tamaí ʻi he ngaahi ʻaho fakaʻosí. Mahalo naʻa lava ʻo vahevahe ʻe he kau mēmipa ʻo e kalasí ʻa e meʻa naʻa nau ako fekauʻaki mo e ngāue ko iá ʻi heʻenau ako e ngaahi vahe ko ʻení ʻi ʻapí. ʻE lava ʻe he ngaahi fehuʻi hangē ko ʻení ke langaki ha fealēleaʻaki: Ko e hā naʻe folofola ʻaki ʻe he Fakamoʻuí ʻe hoko ʻi ha ʻaho he kahaʻú? (vakai tautautefito ki he 3 Nīfai 20:30–32, 39–41; 21:22–29). Ko e hā ʻokú Ne ui ai e ngaahi meʻa ko ʻení ʻoku “maʻongoʻonga” mo “fakaofó”? Ko e hā ha fakamoʻoni ʻoku tau mamata ai ʻoku hoko ʻa e ngāue ko ʻení? ʻOku tau kau fēfē ki aí?

• Ke tokoni ke ʻilo ʻe he kau mēmipa ʻo e kalasí ʻa e founga hono tokoniʻi ʻe he Palōfita ko Siosefa Sāmitá ke fakahoko e ngāue maʻongoʻonga mo fakaofo ʻa e ʻEikí, te ke lava ʻo fakaʻaliʻali ha fakatātā ʻo e Palōfitá pea fakaafeʻi e kalasí ke nau lau e 3 Nīfai 21:9–11, ʻo kumi ha ngaahi foʻi lea mo ha ngaahi kupuʻi lea ʻoku nau fakamanatu ange ʻa e moʻui mo e ngāue ʻa Siosefa Sāmitá. Hangē ko ‘ení, naʻe founga fēfē hono “tuku kiate ia [ʻe he ʻEikí] ʻa e mālohi ke ne fakahā [‘a e ongoongoleleí] ki he kau Senitailé”? (veesi 11). Ko e hā ʻoku mahuʻinga ai ke ʻilo naʻe tomuʻa fakahā e ngāue ʻa Siosefa Sāmitá ʻe he Fakamoʻuí? (vakai foki, 2 Nīfai 3).

• Te ke toe lava foki ʻo tokoni ki he kau mēmipa ʻo e kalasí ke mahino kiate kinautolu ʻa e founga ʻoku nau hoko ai ko e konga ʻo e ngāue maʻongoʻonga ko ia naʻe tomuʻa kikiteʻi ʻi he ngaahi vahe ko ʻení ʻaki haʻanau lau fakataha ʻa e 3 Nīfai 20:25–27. Kapau ‘e fie maʻu, te ke lava ʻo fakamahinoʻi ange ko e taimi ʻoku tau fai ai ha fuakava mo e ʻEikí, ʻoku tau hoko ai ko e hako ʻo ʻĒpalahame. Te tau lava fēfē, ʻe kitautolu ko e hako ʻo ʻĒpalahamé ke faitāpuekina e “ngaahi faʻahinga kotoa pē ‘o e māmaní”? (veesi 25). ʻE lava ke fakalaulauloto ʻa e kau mēmipa ʻo e kalasí ki he fehuʻi ko ʻení, ʻi heʻenau lau e fakamatala ʻa Palesiteni Lāsolo M. Nalesoni ʻi he “Ngaahi Maʻuʻanga Tokoni Kehé” pea vahevahe ʻenau ngaahi fakakaukaú.

3 Nīfai 23; 26:1–12

ʻOku finangalo ʻa e Fakamoʻuí ke tau fakatotolo ʻi he ngaahi folofolá.

• Ko e hā ʻoku fakahā mai ʻe he fengāueʻaki ʻa e Fakamoʻuí mo e kau Nīfaí fekauʻaki mo e anga ʻo ʻEne ongo ki he ngaahi folofolá? Ke tokoni ke ʻilo ʻe he kau mēmipa ʻo e kalasí, te ke lava ʻo kole ange ki hanau vaeua ke nau lau ʻa e 3 Nīfai 23 pea ki he vaeua ʻe taha ke nau lau e 3 Nīfai 26:1–12; hili ia pea te nau lava leva ke fevahevaheʻaki e meʻa ne nau maʻú. Te nau toe lava foki ke vahevahe ha ngaahi fakakaukau ʻoku nau maʻu fekauʻaki mo e founga ke fakahaaʻi ai ki he ʻEikí ʻoku mahuʻinga e folofolá kiate kitautolu. Hangē ko ʻení, ko e hā hono faikehekehe ʻo e fakatotolo ʻi he ngaahi folofolá mo hono lau pē kinautolú? (vakai, 3 Nīfai 23:1).

3 Nīfai 24:1–6

ʻOku tatau ʻa e ʻEikí mo e afi ʻa e tangata fakamaʻa ukameá.

• ʻE ala fakalahi hoʻomou aleaʻi ʻa e 3 Nīfai 24:1–6 ʻe ha ngaahi nāunau tokoni ki he sió. Hangē ko ‘ení, te ke lava ʻo fakaʻaliʻali ha foʻi paʻanga siliva pe foʻi koa he lolotonga hono lau ʻe he kau mēmipa ʻo e kalasí ʻa e ngaahi vēsí ke ʻiloʻi e founga ʻoku fekauʻaki ai ʻa e ngaahi meʻa ko ʻení mo e Fakamoʻuí mo Hono misioná. Te ke lava foki ke vahevahe mo e kalasí ʻa e fakamatala ki hono fakamaʻa ʻo e silivá mo e koa fakamaʻa ʻa e kau foó ʻi he “Ngaahi Maʻuʻanga Tokoni Kehé.” Pe te ke huluʻi ʻa e foʻi vitiō “Ko e Afi ʻa e Tangata Fakamaʻa Ukameá” (ChurchofJesusChrist.org). ʻOku tatau fēfē ʻa e ʻEikí mo e “afi ʻa e tangata fakamaʻa ukameá, pe tatau mo e koa fakamaʻa ʻa e kau foó”? (veesi 2). Ko e hā ʻoku akoʻi mai ʻe he ngaahi sīpingá ni ʻo kau ki he founga hono fakamaʻa kitautolu ʻe he Fakamoʻuí?

3 Nīfai 24:7–18

‘Oku mohu ʻaloʻofa ʻa e ʻOtuá kiate kinautolu ʻoku foki mai kiate Iá.

• Te ke ala fakamahinoʻi ange ko e ngaahi akonaki fekauʻaki mo e vahehongofulú ʻi he 3 Nīfai 24:8–12 ko e tali ia ki he fehuʻi ʻi he veesi 7: “Ko e hā te mau fai ke mau tafoki atu ai [ki he ‘Eikí]?” Ko e hā e fekauʻaki ʻo e “[tafoki] ki [he ‘Eikí]” mo e totongi vahehongofulú? ʻE lava ke vahevahe ʻe he kau mēmipa ʻo e kalasí ʻa e founga kuo nau maʻu ai ʻa e ngaahi tāpuaki ʻoku hiki ʻi he veesi 10–12 ʻi heʻenau totongi vahehongofulú. ʻE tokoni fēfē ʻa e ngaahi moʻoni ko ʻení ki ha taha ʻoku fai feinga ke totongi vahehongofulu?

• Ko e hā ha ngaahi angafai ʻoku fakamatalaʻi ʻi he 3 Nīfai 24:13–15 ʻoku faʻa fakatokangaʻi ʻi he māmani ʻo e ʻaho ní? Poupouʻi e kau mēmipa ʻo e kalasí ke nau vahevahe ha meʻa naʻa nau lea ʻaki ki ha taha ʻokú ne ʻongoʻi ʻoku faingofua ange pe lelei ange ʻa e moʻuí kiate kinautolu ʻoku ʻikai ke nau tauhi e ngaahi fekaú. Fakatatau mo e 3 Nīfai 24, ʻoku tāpuakiʻi fēfē ʻe he ʻEikí ʻakinautolu ʻoku tauhi kiate Iá? Te ke ala poupouʻi foki kinautolu ke nau kumi ha ngaahi sīpinga ʻi he 3 Nīfai 22. (Vakai foki, Mōsaia 2:41; ‘Alamā 41:10.)

3 Nīfai 25:5–6

ʻOku totonu ke liliu hotau lotó ki heʻetau ngaahi kuí.

• Ke fakatātaaʻi e foʻi fakakaukau ʻo e liliu hotau lotó ki heʻetau ngaahi kuí, te ke lava ʻo fakaafeʻi ha mēmipa ʻo e kalasí ke hanga kehe mei he kalasí peá ne fakamatalaʻi ʻa e kau mēmipa ʻo e kalasí mei heʻene fakakaukaú (ʻa e feituʻu ʻoku nau tangutu aí, vala ʻoku nau tuí, mo e ngaahi ʻalā meʻa peheé). Hili ia peá ne tafoki ki he kalasí ʻo toe fakahoko pē meʻa tatau. Ko e hā ʻe lava ke akoʻi mai ʻe he sīpinga ko ʻení kiate kitautolu fekauʻaki mo e liliu hotau lotó ki heʻetau ngaahi kuí ʻi he ngāue fakatemipalé mo e hisitōlia fakafāmilí? Hili hono lau e 3 Nīfai 25:5–6, mahalo naʻa lava ke vahevahe ʻe he kau mēmipa ʻo e kalasí ʻa e founga kuo liliu ai honau lotó ki heʻenau ngaahi kuí. Te ke toe lava foki ke fakaafeʻi ha taha faleʻi ki he temipalé mo e hisitōlia fakafāmilí ʻi he uōtí ke ne fakataukeiʻi kinautolu ki ha niʻihi ʻo e ngaahi meʻangāue ʻi he hisitōlia fakafāmilí. ʻOku fekauʻaki fēfē ʻa e ngāué ni mo e tānaki ʻo ʻIsilelí ʻa ia ʻoku fakamatalaʻi ʻe Palesiteni Lāsolo M. Nalesoni ʻi he “Ngaahi Maʻuʻanga Tokoni Kehé”?

Poupouʻi e Ako ʻi ʻApí

ʻOku tau lau ʻi he 3 Nīfai 27–4 Nīfai fekauʻaki mo e “kakai [fiefia taha] ‘i he kakai kotoa pē kuo fakatupu ‘e he toʻukupu ʻo e ʻOtuá” (4 Nīfai 1:16). Fokotuʻu ange ki he kalasí ʻe lava ʻo tokoni hano lau ʻo e ngaahi vahe ko ʻení ke tau ʻilo ai e founga ke maʻu ai ʻa e fiefiá maʻatautolu pea mo hotau ngaahi fāmilí.

Ngaahi Maʻuʻanga Tokoni Kehé

Te ke lava ʻo hoko ko ha konga ʻo ha meʻa maʻongoʻonga.

Naʻe pehē ʻe Palesiteni Lāsolo M. Nalesoni:

“Ko e moʻoni ko e ngaahi ʻaho fakaʻosí ʻeni, pea ʻoku fakavaveʻi ʻe he ʻEikí ʻEne ngāué ke tānaki ʻa ʻIsileli. Ko e tānaki ko iá, ʻa e meʻa mahuʻinga taha ʻoku hoko ʻi he māmaní ʻi he ʻaho ní. ʻOku ʻikai ha toe meʻa te ne fakatataua hono mālohí, ʻikai ha toe meʻa te ne fakatataua hono mahuʻingá, ʻikai ha toe meʻa te ne fakatataua hono fakaʻeiʻeikí. Pea kapau te ke fili ki ai, kapau ʻokú ke loto ki ai, te ke hoko ko hano konga kāfakafa. Te ke lava ʻo hoko ko ha konga kāfakafa ʻo ha meʻa ʻoku lahi, fakaofo, mo ha meʻa fakaʻeiʻeiki!

“ʻI heʻetau talanoa ko ia ki he tānakí, ko ʻetau pehē ia ko e foʻi moʻoni mahuʻingá ni: ʻoku ʻi ai e totonu ʻa e fānau kotoa pē ʻa ʻetau Tamai Hēvaní, ʻi he ongo tafaʻaki fakatouʻosi ʻo e veilí, ke fanongo ki he pōpoaki ʻo e ongoongolelei kuo fakafoki mai ʻo Sīsū Kalaisí. …

“… Fakakaukau ki ai! ʻI he kakai kotoa kuo moʻui ʻi he palanite ko māmaní, ko kitautolu ʻa e kakai ʻe kau ʻi he tānaki fakaʻosi mo maʻongoʻonga ko ʻení. Hono ʻikai fakafiefia e meʻa ko iá!

“ʻOku totonu ke mahuʻinga taha ʻa e tānaki ko ʻení kiate koe. Ko e misiona ʻeni naʻe fekauʻi mai ai kimoutolu ki māmaní” (“ ʻAmanakiʻanga ʻo ʻIsilelí” ([fakataha lotu fakamāmani lahi maʻá e toʻutupú, ‘aho 3 ʻo Sune, 2018], broadcasts.ChurchofJesusChrist.org).

Ko hono fakamaʻá mo e fakahaohaoaʻí.

ʻOku maʻu ʻa e silivá ʻoku fio mo ha ngaahi minulolo kehe ʻi ha ngaahi maka ukamea. ʻI he kuonga muʻá, naʻe fakamavaheʻi ʻe he tangata fakamaʻa silivá ʻa e silivá ʻaki haʻane ʻai ʻa e maka ukameá (ore) ki ha fōnise afi kuo tafu ‘o aʻu ki ha tuʻunga vela ʻaupito. ʻE lava ke fakatupu ʻe he meʻá ni ha toloasi (ngaahi minulolo ʻuli mo ʻikai fie maʻu) ke ʻasi ʻi he tafaʻaki ki tuʻa ʻo e ukamea kuo vaiá. Naʻe vauvau ʻe he tangata fakamaʻa ukameá ʻa e toloasí, kae tuku pē ʻa e siliva haohaoá, ʻa ia ʻoku lava ʻo tala ʻi hono ngingila makehé.

Ko e tokotaha foó ko ha taha ʻokú ne fakamaʻa mo fakahinehina ʻa e tupenú. ʻE fakavai ʻa e tupenú ki he loto vai kuo fio mo e “koa fakamaʻa ‘a e kau foó,” naʻe ʻosi ngaohi ke ne toʻo ʻa e loló mo e ʻulí. Lolotonga hono fakavai ʻo e tupenú, ʻe tā ia mo molomoloki ʻe he tokotaha foó ke toʻo ʻa e ʻulí. (Vakai “Refinerʻs Fire and Fullerʻs Soap,” New Era, June 2016, 6–7)

Fakatupulaki ʻEtau Founga Akoʻí

Akoʻi ʻa e kakaí, kae ʻikai ko e lēsoní. “ʻOku mahuʻinga tatau pē hoʻo meʻa ʻoku fai ki he kakaí mo e meʻa ʻokú ke akoʻi kiate kinautolú. Taimi ʻe niʻihi ʻoku tau fuʻu femoʻuekina hono fai ʻo ha lēsoni pea ʻikai lava ke tau fakahaaʻi ʻetau ʻofá ki he niʻihi ʻoku tau akoʻí. Kapau ʻoku hoko ʻeni kiate koe, fakakaukau pe ʻe founga fēfē haʻo tokanga ki he ngaahi meʻa ʻoku mahuʻinga tahá”(Ko e Faiako ʻi he Founga ʻa e Fakamoʻuí, 6).