Mormon Ej Kalbwin Pileej ko, jān Tom Lovell

Oktoba 26–Nobōm̧ba 1

Mormon 1–6

“Ikōņaan Bwe In Maron̄ Kareel Aolep … n̄an Ukeļo̧k”

Ilo am̧ riiti Mormon 1–6, pukot m̧ool ko me remaron̄ jipan̄ membōr ro an kūlaaj eo am̧ tiljek ilo iien ko renana, āinwōt an Mormon kar kōm̧m̧ane.

Je En̄jake ko Rej Im̧we Eok

Kajjitōk bwe ren Kwaļo̧k

Jet iien membōr ro rej jenliktak jān aer kwaļo̧k ļōmņak ko aer kōnke ejjeļo̧k aer iien n̄an karōk ļōmņak ko aer. N̄an jipan̄ er kōn menin, leļo̧k aer jejjo minit ko bwe ren je ļōm̧nak ko aer rekar būki jān ekkatak Mormon 1–6 ilo m̧weo; innām kajjitōk ippāer n̄an kwaļo̧ki.

Katakin Katak ko

Mormon 1–6

Jemaron̄ mour jim̧we men̄e men ko renana rej jepooļe kōj.

• Elōn̄ iaan ro uwan kūlaaj eo remaron̄ meļeļe en̄jake eo an Mormon kajjieon̄ mour jim̧we ilo juon laļ enana. Bōlen remaron̄ kwaļo̧k ta eo rekar ekkatak jān waanjon̄ak eo an Mormon. N̄an jipan̄ kōjekiik ekōnono in, komaron̄ in kajjitōk ippān ro uwaan kūlaaj eo n̄an pukot eoon ko me rej kalikkar bōnjen ko rem̧m̧an an Mormon im kōm̧m̧ane juon laajrak in bōnjen kein rem̧m̧an ioon boot eo (lale, n̄an waanjon̄ak, Mormon 1:2–3, 15–16; 2:1, 23–24; 3:1–3, 12, 17–22). Ewi wāween an bōnjen kein rem̧m̧an naaj kar jipan̄ Mormon kajoor wōt ilo jetōb? Ewi wāween aer jipan̄ kōj eļapļo̧k im āinwōt Mormon?

  

  Tariņae, jān Jorge Cocco

• Mormon emakijkij an jeje iooktok armej ro ilo raan kein ad. Ta eo jemaron̄ ekkatak jān naan ko an n̄an kōj ilo Mormon 3:17–22 and 5:10–24? Ļeļo̧k n̄an kajjojo ro uwaan kūlaaj eo juon peba ippān naan in “Ko̧o̧njeļ eo an Mormon n̄an Kōj” je ilōn̄tata, im rōjan̄ er pukot ennaan ko ilo eoon kein me rej ekkar n̄an raan kein ad. Ewi wāween ad maron̄ kōjerbal ko̧o̧njeļ eo an Mormon n̄an jipan̄ kōj pād im kajoor wōt ilo jetōb ilo laļ in rainin?

• Eļan̄n̄e kwoj katakin jodikdik ro, komaron̄ kōjerbale waanjon̄ak eo an Mormon n̄an jipan̄ er meļeļe bwe remaron̄ ritōl ro rejim̧we n̄e rej em̧m̧an dettāer. Eļan̄n̄e kwoj katakin rūtto ro, komaron̄ in kōjerbal waanjon̄ak eo an n̄an im̧we juon ekōnono kōn iien ko rem̧m̧an n̄an jipan̄ jodikdik ro erom̧ ritōl ro rem̧m̧an. N̄an jino ekōnono eo, komaron̄ kajjitōk ippān jet uwaan kūlaaj eo n̄an etale Mormon 1 im ro jet n̄an etale Mormon 2, je iien ko rem̧m̧an Mormon ekar būki n̄an tōl ilo iien ko ej dik ilo mour eo an. Ta bōnjen ko rem̧m̧an ewōr ippān im rekar kōm̧m̧an bwe juon ritōl eļap? Ro uwaan kūlaaj eo remaron̄ kwaļo̧k waanjon̄ak ko rekar loi jān kareel eo ekajoor an ajri ro rejim̧we im jodikdik ro. Remaron̄ barāinwōt ekōnono kōn iien ko rem̧m̧an er—ak jodikdik ro rejeļā kajjeer—rekar erom̧ ritōl ro ewōr bōnjen ko rem̧m̧an āinwōt kar Mormon.

Mormon 2:10–15

Ukweļo̧k ej aikuji juon bōro erub im juon jetōb ettā.

• N̄an ekkatak kōn oktak eo ikōtaan būrom̧ōj eo ej tōlļo̧k n̄an ukweļo̧k im bōrom̧ōj eo ejjab, ļōmņak im riiti Mormon 2:10–15 ippān doon im ekōnono kōn kajjitōk ko āinwōt kein: Ta eddo eo an “būrom̧ōj” ilo ukweļo̧k? Ta oktak eo ikōtaan “būrom̧ōj … n̄an ukweļo̧k” im “būrom̧ōj an riatajinemjen”? Ta bōnjen im m̧wil ko remaron̄ jipan̄ kōj bōk “bōro erub im jetōb ettā”?

Mormon 3:12

Jemaron̄ iakwe doon, men̄e eļan̄n̄e jejjab errā kōn kāālet ko aer.

• Āinwōt Mormon, elōn̄ membōr ro jān ro uwaan kūlaaj eo am̧ rej epaake armej ro rejjab kwaļo̧k tōmak ko aer. Elmen am̧ nej kōjerbal en̄jake eo an Mormon n̄an katakin ro uwaan kūlaaj eo kōn iakwe ro jet mekarta oktak ko aer? Ļōmņak in riiti Mormon 3:12 ippān doon im ekōnono kōn iien ko ke Mormon ekar kwaļo̧k iakwe n̄an ro otemjej rej m̧akoko in ron̄jake naan eo an im m̧ōņōņō in jum̧ae Anij (lale, kōn wāween in, Mormon 1:16–17; 2:12). Ta en̄jake ko ro uwaan kūlaaj eo remaron̄ in kwaļo̧ki jān mour ko aer make kōn iakwe ro rejjab kwaļo̧k tōmak ko aer ak aorōk ko? Ennaan in jān Būreejtōn Dallin H. Oaks ilo “Kein Jipan̄ ko Jet” ej letok bar jet ko̧o̧njeļ ko.

Mormon 6:17

Jisōs Kraist ej jutak kōn pā ko repeļļo̧k n̄an bōk kōj.

• N̄an ro otemjej emaron̄ ejjeļo̧k aer kōjatdikdik bwe remaron̄ in bōk jeorļo̧k bōd kōn jerawiwi ko aer, meļeļe eo an Mormon kōn an Rilo̧mo̧o̧r eo jutak “kōn pā ko repeļļo̧k n̄an bōk eok” emaron̄ letok kōjatdikdik. Ļōmņak in riiti Mormon 6:17 ippān doon im kwaļo̧k juon pija an Jisōs erļo̧ketok pein (āinwōt Gospel Art Book, no. 66). Ta eo eoon in ej katak kōn an Rilo̧mo̧o̧r eo kijerjer in jipan̄ kōj? Komaron̄ barāinwōt ļōmņak in al juon al in jar ippān doon eo ej katakin ejja ennaan in wōt, āinwōt “Come unto Jesus” (Hymns, no. 117). Komaron̄ barāinwōt kwaļo̧k en̄jake eo an Būreejtōn Russell M. Nelson ilo “Kein Jipan̄ ko Jet” im kajjitōk ippān ro uwaan kūlaaj eo n̄an ekōnono kōn ewi wāween ad maron̄ jipan̄ ro jet kile bwe ukweļo̧k emaron̄ tōprak.

Kōketak Ekkatak ilo Mweo

Komaron̄ in kajjitōk ippān ro uwaan kūlaaj eo n̄an ļōmņak kōn ta eo renaaj kar je ilo juon leta n̄an armej ro ilju im jekļaj. Ilo Mormon 7–9 jej riiti ta eo Mormon im Moronai rekar je, epepen ko etto, n̄an armej ro ilo raan kein ad.

Kein Jipan̄ ko jet

Iakwe ro jet eoktak aer tōmak.

Būreejtōn Dallin H. Oaks ekar kōmeļeļeik:

“Jej aikuj ļoor katak ko an gospel eo n̄an iakwe ro rūturir im jab kōm̧m̧an iakweleel. Rikaļoor ro an Kraist rej aikuij in waanjon̄ak in makūtkūt im̧aan mejān armej. Jej aikuij in iakwe aolep armej, ro em̧m̧an aer ron̄jake, im kwaļo̧k ad lōmņak kōn tōmak ko aer. Jekdoon n̄e jemaron̄ jab errā, Jejjab aikuij in kwaļo̧k ad jab errā. Pen eo ad ilo kōnono ko ad ilo unin kōnono ko rejelet mour an armej rejjab aikuij in iakwāālel. Jej aikuij in meletlet ilo ad kōmleleik im kōttōpar ijo jej jutak ie im ilo ad kōjerbal kajoor in kareel ko ipped. Ilo ad kōm̧m̧ane men in, jej kajjitōk bwe ro jet rejjab maron̄ in inepata jen mwilaļ in tōmak ko ad im anemkwoj in kōjerbal tōmak ko ad. Jej kōkketak aoleped wōj n̄an kamineneik kien eo eaorōk tata an Rilo̧mo̧o̧r eo: “Innām men otemjej jabdewōt komij kōnan bwe armej ren kōm̧anm̧an n̄an kom, en āindein ami kōm̧anm̧an n̄an er’ (Matu 7:12).

““N̄e ļōmņak ko ad rejjab anjo̧, jej aikuj in būki waļo̧k ko rejjab em̧m̧an ilo m̧ōņōņō im kōjerbal meanwōd ilo apan̄ ko ad” (“Loving Others and Living with Differences,” Ensign ak Liaona, Nov. 2014, 27).

Ukweļo̧k emaron̄ tōprak.

Būreejtōn Russell M. Nelson ekar kwaļo̧k laajrak in en̄jake in:

“Iiō eo ļo̧k ke Elder David S. Baxter im n̄a kōm̧ro kar ettōrļo̧k juon kweilo̧k eļap an stake, kōm̧ro kar bōjrak ilo juon restaurant. Tokālik ke kōm̧ro ej jepļaakļo̧k n̄an wa eo waam̧, kōm̧ro kar jibadōkļo̧k juon kōrā eo ekar lamōjeļo̧k kōm̧. … Liin ekar kajjitōk eļan̄n̄e kōm̧ kar elder ro ilo Kabun̄ in. Kōm̧ kar uwaak aaet. Enan̄in jab dāpiji, liin ekar jiron̄ kōn bwebwenato eo an ekabūrom̧ōjm̧ōj, libobo kōn jerawiwi. Kiiō, 28 wōt iiō rūtto in, liin ekar jab m̧ōņōņō. Liin ekar en̄jake an jab aorōk, ejjeļo̧k juon un n̄an an mour. Ke ekar kōnono, em̧m̧an eo an jetōb eo an ekar waļo̧k. Akweļap ilo jan̄, ekar kajjitōk eļan̄n̄e ewōr jabdewōt kōjatdikdik kōn e, jabdewōt iaļ an diwōjļo̧k jān ebbeer eo an.

“‘Aaet,’ kōm̧ kar uwaak, ‘ewōr kōjatdikdik. Kōjatdikdik ej ekkejļo̧k ippān ukweļo̧k. Komaron̄ oktak. “Komaron̄ “itok n̄an Kraist, im weppān ilo E” (Moronai 10:32 Kōm̧ kar rōjan̄ e n̄an jab aibadbad [lale Alma 13:27; 34:33]. Ekar m̧ōtato im lukkuun kam̧m̧oolol kōm̧.

“Ke Elder Baxter im n̄a kōm̧ro ej etal wōt ilo iaļ eo am, kōm̧ kar kejōkļo̧kjeņ kōn en̄jake in. Kōm̧ kar keememej ko̧o̧njeļ eo kar letok n̄an juon jetōb ebbeer jān Aaron, eo ekar ba, ‘Eļan̄n̄e kwōnaaj ukeļo̧k jān aolep jero̧wiwi ko am̧, naaj bun̄ badik im̧aan Anij, im kūr ioon Etan, … innām kwōnaaj bōk kōjatdikdik eo kwōj kōņaan’ [Alma 22:16]. …

“… N̄an kōrā in 28 an iiō rūttoon eddo kōn lo̧pidodo in jerawiwi, im n̄an kōj kajjojo, ij kwaļo̧k kōjeraam̧m̧an eo em̧m̧an an ukweļo̧k im epidodo. Ej itok kōn lukkuun oktakļo̧k n̄an Irooj im jerbal eo An ekwojarjar.”

Ilo kakobaba, Būreejtōn Nelson ekar ba: “Jej barāinwōt keememej armej ro rejerawiwi ium̧win kea eo an ritōl ro reinebata, Mormon, eo ekar je, ‘Eaar jako aō kōjatdikdik, bwe iaar jeļā ekajet ko an Irooj ko renaaj itok ioer; a raar kakkōt kōn mour ko aer im jab kūr ioon Eo eaar kōm̧anm̧an er’ (Mormon 5:2)” (“Repentance and Conversion,” Ensign ak Liahona, May 2007, 102, 104).

Kōkōm̧anm̧anļo̧k Ad Katakin

Eddōkļo̧k ilo Jetōb ej waļo̧k ilo m̧weo. Ro uwaan kūlaaj eo am̧ rej joļo̧k 165 awa ko kajjojo wiik itulikin m̧ōnjar eo. Ilo iien in, ewōr aer make en̄jake ko ilo jetōb me ej katakin er kōn gospel eo. Kajjitōk kajjitōk ko me rej kōketak rūkkatak ro n̄an kwaļo̧k men ko rekar ekkatak ilo wiik eo im ippān baam̧le ko aer (lale Teaching in the Savior’s Way, 18).