Ether ej deļo̧n̄e juon bōke

Ether ej Tilekek ilo Ro̧n̄in Dekā eo, jān Gary Ernest Smith

Nobōm̧ba 23–29

Ether 12–15

“Kōn Tōmak Men Otemjeļo̧k Rej Kūrm̧ool”

Jibadbad eo an laajrak in ejjab n̄an kōmeļeļeiki ta eo enaaj waļo̧k ilo kūlaaj. Ej juon jipan̄ n̄an—jab juon pinej jenkwan n̄an—revelesōn eo an juon make. Kōm̧m̧an bwe Jetōb eo en tōl katak eo am̧ make im m̧aanjabpopo, innām lale eļan̄n̄e m̧akūtkūt ko ilo laajrak eo remaron̄ jipan̄ ro uwaan kūlaaj eo loe im kwaļo̧k pedped ko raorōk ilo Ether 12–15.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

N̄an jipan̄ ro uwaan kūlaaj eo kwaļo̧k ta eo rekar ekkatak jān ekkatak jān jeje ko rekwojarjar aer make ak an baam̧le, komaron̄ je ioon boot eo naan kein āinwōt “Ikar ekkatak bwe …” “Ewōr juon aō naan in kam̧ool an …” im “Ikar en̄jake …” kajjitōk ippān ro uwaan kūlaaj eo n̄an kwaļo̧k juon men jān Ether 12–15 me emaron̄ kam̧ōj juon iaan ennaan ko ioon boot eo.

pija ej bōk jikin katakin

Katakin Katak ko

Ether 12:2–22

Jemaron̄ bōk juon kam̧ool kōn m̧ool eo ilo ad kōjerbal tōmak ilo Jisōs Kraist.

• N̄an jipan̄ ro uwaan kūlaaj eo kejōkļo̧kjeņ kōn ta meļeļein n̄an kōjerbale tōmak ilo Jisōs Kraist, komaron̄ kajjitōk ippāer ta pija ak naan ko rej itok n̄an kōļmenļo̧kjeņ n̄e rej ron̄ naan eo kōjerbal. (Komaron̄ bōlen aikuj in pukote naan eo ilo juon tikjinede.) Ta eo ej jelet ānbwin eo n̄e jej kōmourur? Ewi wāween ad maron̄ kōjerbal pedped in n̄an tōmak? Ilo wāween ta jemaron̄ “kōjerbal tōmak” ilo Kraist? Ro uwaan kūlaaj eo remaron̄ etale Ether 12:2–22 im ekōnono kōn wāween an waļo̧k an armej ilo eoon kein kōjerbal tōmak. Ewi wāween ad maron̄ in ļoor waanjon̄ak ko aer? Ekkar n̄an eoon kein, ta waļo̧k ko itok wōt jān kōjerbal tōmak ilo Jisōs Kraist?

• Waanjon̄ak ko an tōmak ilo Ether 12:7–22 rej letok juon etale an bwebwenato ko rem̧m̧an kwaar ekkatak kaki ippān ilo Bok in Mormon. Bōlen ro uwaan kūlaaj eo remaron̄ in kwaļo̧k waanjon̄ak ko jet kōn tōmak im ta eo rej ekkatak jāni (ko jet remaron̄ in loi ilo Hibru 11). Remaron̄ barāinwōt kwaļo̧k waanjon̄ak in tiljek ko jān bwebwenato an baam̧le eo aer ak mour ko aer make. Ewi wāween an waanjon̄ak ko kōkajoorļo̧k tōmak eo aer ilo Jisōs Kraist im Jemedwōj Ilan̄?

• Ether 12 ej obrak kōn meļeļe ko im m̧ool ko kōn tōmak. Ro uwaan kūlaaj eo remaron̄ pukot eoon ko ilo jebta in me ej katakin er kōn tōmak. Remaron̄ je ioon boot eo ta eo rej loe.

Ether 12:1–9, 28, 32

Tōmak ej tōlļo̧k n̄an “kōjatdikdik kōn juon laļ em̧m̧anļo̧k.”

• Juon armej ilo kūlaaj eo am̧ emaron̄ ke kōmeļeļeiki etke juon ankō ej aorōk n̄an juon wa? Komaron̄ kwaļo̧k juon pija in juon tim̧a im juon an̄kō (ak jikaiki juon ioon boot eo) im ekōnono kake ta eo enaaj waļo̧k n̄an juon tim̧a eo ejjeļo̧k an an̄kō. Ta eo ej waļo̧k n̄an kōj n̄e ejjeļo̧k ad an̄kō? Ro uwaan kūlaaj eo remaron̄ riiti Ether 12:4 im kōnono kōn wāween an kōjatdikdik āinwōt “juon an̄kō n̄an [jetōb] ko ad.” Remaron̄ bar riiti Ether 12:1–9, 28, im 32 im kwaļo̧k kōļmenļo̧kjeņ ko rej būki kōn kōjatdikdik. Ta eo jej aikuj kōjatdikdik kake? (lale Ether 12:4; Moronai 7:41; lale barāinwōt Jon 16:33).

Ether 12:23–29

Jān tūriam̧o eo an Jisōs Kraist, men ko remōjņo̧ remaron̄ erom̧ kajoor.

• N̄an jipan̄ ro uwaan kōjerbale m̧ool ko Moronai ekar ekkatak kōn m̧ōjņo̧ im kajoor ilo Ether 12, komaron̄ kajjitōk ippān ro uwaan kūlaaj eo n̄an ļōmņak kōn juon armej eo emaron̄ kar en̄jake ebbeer kōnke m̧ōjņo̧. Innām kōketak ro uwaan kūlaaj eo n̄an etale Ether 12:23–29 n̄an pukote ennaan ko me remaron̄ jipan̄ armej eo. Eļan̄n̄e Moronai ekar pād ijin rainin, ta eo emaron̄ kar ba n̄an rōjan̄ ļeo ak lio? Ro uwaan kūlaaj eo remaron̄ barāinwōt kwaļo̧k en̄jake ko jān mour ko aer make ilo an kar Rilo̧mo̧o̧r jipan̄ “kōm̧m̧an mennin m̧ōjņo̧ ko ren erom kajoor n̄an er” (Ether 12:27). Ewi wāween an menin oktak jān kijejeto in kōkōm̧anm̧anļo̧k juon make bwe juon armej en maron̄ kōm̧m̧ane ilo an jab pedped ioon Rilo̧mo̧o̧r eo? N̄an eļapļo̧k meļeļe kōn unin kōnono in, lale ennaan eo jān Būreejtōn Henry B. Eyring ilo “Kein Jipan̄ ko Jet.”

• En̄jake ko an Moronai ej juon iaan ko rellōn̄ ilo jeje ko rekwojarjar me rej kwaļo̧k tūriam̧o eo an Rilo̧mo̧o̧r eo im emaron̄ ukōt mejņo̧ ko ad n̄an kajoor. Emaron̄ jipan̄ n̄an ajeje kūlaaj eo n̄an ruo kūrub ko, jitōn̄ kajjojo kūrub ko n̄an kāālet juon armej ilo jeje ko rekwojarjar eo ekar wōr an m̧ōjņo̧, im ekōnono kōn wāween an Irooj kar kōm̧m̧an an armej in kajoor. Waanjon̄ak ko jet rej waļo̧k ilo “Kein Jipan̄ ko Jet.” Komaron̄ barāinwōt kwaļo̧k bwe ro uwaan kūlaaj eo ren etale meļeļe eo an tūriam̧o ilo Bible Dictionary ak True to the Faith (peij 77–78). Ewi wāween an waanjon̄ak ko ilo eoon ko rej katak jāne kōmeļeļeiki kajoor eo an tūriam̧o eo an Rilo̧mo̧o̧r eo? Elmen ad karuwaineneiktok kajoor in n̄an mour ko ad?

• Ekkā wōt keidi m̧ōjņo̧ ko ad n̄an kajoor eo an ro jet, aaet Moronai ekar en̄jake kar keidi n̄an ļeo jein Jared (lale Ether 12:24). Etke ekauwōtata n̄an keidi kōj make n̄an ro jet? Ekkar n̄an Ether 12:26–27, ewi wāween an Irooj kōņaan loe m̧ōjņo̧ ko ad? (barāinwōt lale ennaan eo an Būreejtōn Henry B. Eyring ilo “Kein Jipan̄ ko Jet”). Ewi wāween An kōņaan bwe jen loe m̧ōjņo̧ ko an ro jet? (lale Ether 12:26).

Ether 13–15

M̧akoko in bōk rikanaan ro ej bōktok kauwōtata n̄an jetōb eo.

• Leļo̧k m̧ool ko raorōk kar katakin ilo Ether 12, komaron̄ jab kāālet n̄an joļo̧k eļap iien ilo kūlaaj eo ilo jebta 13–15. Ijoke, emaron̄ lukkuun jipan̄ n̄an kajjitōk ippān juon uwaan kūlaaj eo n̄an kōkaduduik ta eo ekar waļo̧k ilo jebta kein. N̄an jipan̄ ro uwaan kūlaaj eo loe ennaan ko raorōk ilo bwebwenato in, komaron̄ kajjitōk ippāer n̄an kamōje ennaan eo “āindein jej lo …”kōn juon katak rej ekkatak jān wōtlo̧k eo an Rijared ro. Ewi wāween wōtlo̧k eo aer an āinwōt wōtlo̧k eo an Rinipai ro? (lale, n̄an waanjon̄ak, Ether 15:19 im Moronai 8:28). Ta eo Irooj ekōņaan bwe jen ekkatak jān bwebwenato kein, im ta eo jemaron̄ kōm̧m̧ane n̄an jab kōtļo̧k an jako eo an Rijared ro? Ro uwaan kūlaaj eo remaron̄ barāinwōt etale jem̧ļo̧kin bok eo an Ether im ekkejelļo̧k ippān Omnai 1:19–22; Mosaia 8:8; im Mosaia 28:11–18.

pija ej bōk jikin ekkatak

Kōketak Ekkatak ilo Mweo

Wiik in tok ro uwaan kūlaaj eo renaaj ekkatak kōn bok in Moronai. Remaron̄ loe bwe ekalimomo n̄an jeļā bwe Moronai ekar jab karōk n̄an an jeje jabdewōt men ālkin bok eo an Ether, ak ekar aitokļo̧k an mour jān jon̄an eo ekar kōtmāne. Wiik in renaaj jino riiti ennaan ko āliktata me Moronai ekar im̧we n̄an je m̧okta jān an kar mej.

pija ej bōk jikin kein jipan̄ ko

Kein Jipan̄ ko jet

Jetōb eo ej eddōkļo̧k ej aikuj in loe m̧ōjņo̧ ko ad.

Būrejtōn Henry B. Eyring, ekar jeje Ether 12:27, kar katakin: “Moronai ekar ba bwe ke ‘ekar ron̄ naan kein,’ ekar ‘aenōm̧m̧an’ (Ether 12:29). Ren maron̄ erom juon kaenōm̧m̧an n̄an kōj aolep. Ro rejjab lo m̧ōjņo̧ ko aer rejjab eddōkļo̧k. Ami kile m̧ōjņo̧ eo ami ej juon kōjeraam̧m̧an, kōnke ej jipan̄ kom̧ pād wōt ilo ettā im dāpij wōt ami kōjaalļo̧k wōt kom̧ n̄an Rilo̧mo̧o̧r eo, eo ewōr kajoor ippān n̄an kōkajoorļo̧k kom̧. Jetōb eo ejjab wōt kaenōm̧m̧an eok, ak E ej barāinwōt rijerbal eo bwe Pinmuur eo en jerbale juon oktak ilo aolepān mour eo am̧. Innām men in m̧ōjņo̧ ko rej erom̧ kajoor” (““Aō Aenōm̧m̧an Ij Lewōj n̄an Kom̧”,” Ensign ak Liaona, Māe 2017, 16).

Waanjon̄ak ko: Mōjņo̧ eo ej kōm̧m̧an kajoor.

• Inōk (Moses 6:31–34; 7:13)

• Moses (Exodus 4:10–12; 14:31)

• Gideon (Ri Ekajet ro 6:12–16; 8:22–23)

• Piter (Luk 5:8–10; 22:55–62; Jerbal 4:13–21)

• Moronai (Ether 12:23–29)

• Josep Smith (Josep Smith—Bwebwenato 1:28; KB 35:17; 135:3)

Kōkōm̧anm̧anļo̧k Ad Katakin

Katakin “etke.” “jet iien rūkatak ro—eļaptata jodikdik ro—rej ļōmņak ewi wāween an pedped in katak ko iookļo̧k er ak etke rej aikuj in pokake jet kien ko. Ijoke, eļan̄n̄e rej meļeļe karōk indeeo eo an Jemedwōj Ilan̄ n̄an m̧ōņōņō eo an ajri ro Nejin, uwaak ko n̄an pedped ko an gospel eo im kien ko remaron̄ alikkarļo̧k im ikdeleel n̄an eļapļo̧k pokaki” (Teaching in the Savior’s Way, 20).