Sa Iareto ua Tuua Papelu, saunia e Albin Veselka

9–15 Novema

Eteru 1–5

“Saeia Lena Veli o le le Talitonu”

O a upumoni na e aoaoina i le taimi o lau suesuega patino o le Eteru 1-5 e mafai ona e faasoa atu ia i latou o loo e aoaoina? O a avanoa e mafai ona e tuuina atu ia i latou e faasoa mai ai mea na latou aoaoina?

Tusi faamaumau Ou Lagona Uunai

Valaaulia le Fefaasoaai

Mafaufau i lenei ala fou e valaaulia ai le fefaasoaai: Tufa atu ni maa i tagata o le vasega e 16, ma valaaulia nisi o i latou e faasoa mai se upumoni latou te manatua mai a latou suesuega patino pe faaleaiga o le Eteru 1-5. O le a se mea o le a latou faia ona o mea na latou aoaoina?

Aoao Atu le Aoaoga Faavae

Eteru 1-3; 4:8-19

A o tatou faaauau ona valaau atu i le Alii, o le a Ia faaali mai Lona finagalo.

• O i tatou uma lava na tauivi e sue se tali i se faafitauli po o se fesili. E mafai faapefea e aafiaga o le uso o Iareto ona fesoasoani ia i latou o loo e aoaoina e saili le fesoasoani mai le Alii? Atonu e mafai ona e tusia se ata i le laupapa o ni koluma e faaigoaina O le fesili a le uso o Iareto, O le faatinoga a le uso o Iareto, ma O le tali a le Alii. Ona mafai lea ona e vavaeina le vasega i ni vaega se tolu ma tofi i ai se koluma i vaega taitasi. E mafai e vaega taitasi ona galulue faatasi e saili vave le Eteru 1:33-43 ma le 2:16-3:6 ma tusi mea latou te maua i a latou koluma na tofi i ai. Ona mafai lea ona talanoaina mulimuli ane e le vasega fesili e pei o nei: O le a se mea ua tatou aoaoina e uiga i auala eseese e ono filifili le Alii e fesoasoani ai ia i tatou? O le a se mea ua tatou aoao e uiga i la tatou matafaioi i le faagasologa o le mauaina o faaaliga? Atonu e mafai e tagata o le vasega ona faasoa mai ni faataitaiga mai tusitusiga paia o loo aoaoina ai nei lava mataupu faavae. O le saunoaga a Elder Richard G. Scott i le “Punaoa Faaopoopo” ua maua ai nisi manatu e uiga i le ala e tali mai ai le Alii i tatalo.

• O le tatalo a le uso o Iareto i le Eteru 3:1-5 e mafai ona uunaia ai tagata o le vasega e faavasega a latou tatalo patino. Atonu e mafai e tagata o le vasega ona vaai faalemafaufau faapea o loo latou tuuina atu fautuaga i se tasi o lea faatoa aoao e tatalo. O le a se fautuaga o le a latou tuuina atu? Ona mafai lea ona latou sailia le Eteru 3:1-5 ma otooto mai fuaiupu taitasi i se manatu se tasi pe lua po o mataupu faavae e uiga i le ala e fai ai tatalo aoga. Mafaufau e tuuina atu i tagata o le vasega ni nai minute e mafaufau ai e uiga i a latou lava tatalo ma le ala e mafai ai ona latou mulimuli i le faataitaiga a le uso o Iareto ina ia faia a latou tatalo ia sili atu le uiga.

• A uma ona faasoa atu le aafiaga faafaaaliga a le uso o Iareto i le Eteru 3, na tuuina mai e Moronae le fautuaga i le Eteru 4 e uiga i le ala e mafai ai ona tatou maua faaaliga mai le Alii. Ina ia fesoasoani i tagata o le vasega e aoao mai lenei fautuaga, e mafai ona e faaali atu se ata o Iesu Keriso ma valaaulia tagata o le vasega e suesue le Eteru 4:8-10 mo mea e mafai ona taofia i tatou mai le mauaina o faaaliga po o upumoni mai le Alii. A o faasoa mai e tagata o le vasega mea ua latou maua, e mafai ona e ufiufiina lemu le ata o Iesu i se fasi ieie po o se fasi pepa. E mafai faapefea ona tatou aloese mai nei papupuni i o tatou olaga? Ona, mafai lea ona suesue e tagata o le vasega le Eteru 4: 7, 11-15, ma vaavaai pe faapefea ona tatou agavaa e maua upumoni mai le Alii. A o faasoa mai e tagata o le vasega mea sa latou maua, aveese le fasi ieie po o le fasi pepa. O le a le uiga o le “faatino le faatuatua i le Alii, e pei ona faia e le uso o Iareto”?(Eteru 4:7; tagai foi Eteru 3: 1-9). O le a le uiga ia “saeia [le] veli o le le talitonu” i o tatou olaga?(Eteru 4:15). E faapefea ona tatou fesoasoani atu i isi ia faia nei lava mea? E mafai foi e tagata o le vasega ona vaai mo upumoni e uiga i faaaliga patino i le savali a Peresitene Russell M. Nelson “Faaaliga mo le Ekalesia, Faaaliga mo o Tatou Olaga” (Ensign po o le Liahona, Me 2018, 93–96).

Eteru 2:14–15

E ala mai i Lana faamamaina, ua valaaulia i tatou e le Alii ia salamo ma o mai ia te Ia.

• E oo lava i se perofeta e sili e pei o le uso o Iareto na mauaina le faamamaina mai le Alii. O le mea moni, o se vaega o le mea na sili ai o ia o le ala na ia tali atu ai i le faamamaina. Ina ia fesoasoani i tagata o le vasega e aoao mai le faataitaiga a le uso o Iareto, e mafai ona e valaaulia i latou e faitau le Eteru 2:14-15 faatasi i ni paga. Ona fai lea ia i latou ia faafoliga o se tasi o i latou o le uso o Iareto ae o le isi o se tasi faatoa mauaina lava le faamamaina mai se taitai o le Ekalesia po o se matua. Tuu atu ia i latou e talanoaina pe faatino po o le a le mea e ono tau atu e le uso o Iareto e uiga i lona lava aafiaga e fesoasoani i lenei tagata. O le a se fautuaga na te ono tuuina mai? O a lesona ua tatou aoao mai o le a fesoasoani ia i tatou e latalata atili atu ai i le Tama Faalelagi? E mafai foi ona e talanoaina le ala na faamamaina ai ma le ala na tali atu ai le uso o Iareto atonu na mafai ona fesoasoani e saunia ai o ia mo le aafiaga na ia oo i ai i le Eteru 3:1-20. O isi punaoa ia e mafai ona fesoasoani: Savali a Elder D. Todd Christofferson “O le Toatele Ou Te Alofa i ai, Ou te Aoaia ma Faamamaina” (Ensign po o le Liahona, Me 2011, 97–100) po o le vaega ua faaautu “Aoaia” i le savali a Elder Lynn G. Robbins “O le Faamasino Amiotonu” (Ensign po o Liahona, Nov. 2016, 96–97).

Eteru 5

Ua molimau mai molimau e toatolu i le moni o le Tusi a Mamona.

• O le aoao atili e uiga i le valoaga a Moronae i Molimau e Toatolu e mafai ona faamalosia ai molimau a tagata o le vasega i le Tusi a Mamona. Atonu e mafai ona faitau e le afa o le vasega le Eteru 5 ae faitau e le isi afa le “O le Mau a Molimau e Toatolu” (i le amataga o le Tusi a Mamona) ma faasoa i le tasi ma le isi o latou lagona i le faamoemoega a le Alii i le faatagaina o Molimau e Toatolu e vaai i se agelu ma papatusi. E mafai foi ona latou faitauina isi vaega ia na faatulaga ai e le tele o molimau le upumoni (tagai, mo se faataitaiga, Mataio 3:13–17; 18:15–16; Ioane 5:31–47; MFF 128:3). O a molimau i o tatou olaga na uunaia i tatou ia talitonu? Na faapefea e le “mana o le Atua ma lana afioga foi” ona “faaali atu” ia i tatou i le Tusi a Mamona?(Eteru 5:4).

Fautuaina le Aoaoina i le Aiga

Valaaulia tagata o le vasega e vaai faalemafaufau faapea o o latou taitai faalemalo ua faaauau pea ona tapue ma fasiotia le tasi ma le isi. I le Eteru 6–11, o le a latou faitau ai e uiga i le ala na tupu ai lenei mea i tupuaga o Iareto ma lona uso. O le a latou maua ai foi ni lapataiga o le a fesoasoani ia i latou e aloese mai faafitauli na feagai ma sa Iareto.

Punaoa Faaopoopo

O le iloaina o tali i tatalo.

Sa aoao mai Elder Richard G. Scott:

“Afai tatou te faamatalaina se faafitauli ma tuuina atu se fofo, o nisi taimi e tali mai o Ia i le ioe, o isi taimi o le leai. E masani ona Ia taofia se tali, e le faapea o le leai o se popole, ae ona e alofa o Ia ia i tatou—ma le atoatoa. E finagalo o Ia ia tatou faaaoga upumoni ua Ia tuuina mai ia i tatou. Ina ia tatou tuputupu ae, e ao ona tatou talitonuina o tatou gafatia e faia ai faaiuga sao. E tatau ona tatou faia mea tatou te lagona e sao. I se taimi, o le a Ia tali mai. O le a Ia le faagaloina i tatou. …

“…Na te finagalo ia tatou faia ni galuega e maua ai le malamalama tatou te manaomia:

“Pe a tali mai o Ia ioe, o le tuuina mai lea ia i tatou o le faamaoniga.

“Pe a tali mai o Ia e leai, o le puipuia lea o i tatou mai le sese.

“Pe a Ia taofia le tali, o le faatupuina lea o i tatou e ala i le faatuatua ia te Ia, usiusitai i Ana poloaiga, ma le lotomalie e saili le mea moni. Ua fuafuaina o le a faamasinoina i tatou e tusa ma a tatou filifiliga ina ia tusa ai ma Ana aoaoga, e aunoa ma le muai tuuina mai o se faamaoniga. E le tatau ona tatou nonofo ma faatalitali, po o le muimui ona ua le fetalai mai le Alii. E tatau ona tatou galulue” (“Aoao ia Iloa Tali i Tatalo,” Ensign, Nov. 1989, 31–32).

Faaleleia o Lo Tatou Aoao Atu

Alu muamua i tusitusiga paia. E tatau ona avea tusitusiga paia ma punaoa autu mo au suesuega ma tapenapenaga. Aua nei galo e mafai e tuleiga a perofeta i ona po nei ona faaopoopo atu i tusitusiga faavae ma o tusitusiga paia foi (tagai Aoao Atu i le Ala a le Faaola, 17-18).