“2–8 Novema. Mamona 7–9: “Faauta, Ou te Tautala Atu ia te Outou e Peiseai o Outou Faatasi Mai” Sau, Mulimuli Mai ia te A’u—Mo Le Aoga Sa: Tusi a Mamona 2020 (2020)
“2–8 Novema. Mamona 7–9,” Sau, Mulimuli Mai ia te A’u—Mo Le Aoga Sa: 2020
O Moronae o loo tusitusi i luga o Papatusi Auro, saunia e Dale Kilborn
2-8 Novema
Mamona 7–9
“Faauta, Ou te Tautala Atu ia te Outou e Peiseai o Outou Faatasi Mai”
Iloilo lagona na e faamaumauina i le taimi o lau suesuega patino o le Mamona 7-9 i lenei vaiaso. O a fuaitau mai nei mataupu e te lagonaina o le a sili ona taua e iloiloina faatasi ma lau vasega?
Tusifaamaumau Ou Lagona Uunai
Valaaulia le Fefaasoaai
Ina ia maua e tagata o le vasega se avanoa e faasoa mai ai se mea sa latou aoaoina mai a latou suesuega faaletagata lava ia pe faaleaiga, e mafai ona e uunaia i latou e vaai faavave i le Mamona 7-9 ma faasoa mai se fuaiupu (po o se fuaitau) latou te faafetai ai ona sa filifili Mamona po o Moronae e faaaofia i papatusi.
Aoao Atu le Aoaoga Faavae
Mamona 7:8–10; 8:12–22; 9:31–37
O le Tusi a Mamona e sili le taua.
-
O se tasi o ala e amata ai se talanoaga e uiga i le sili o le taua o le Tusi a Mamona o le talanoa lea e uiga i le ala tatou te filifili ai le taua o se mea. E faapefea e le iloaina o le taua o se mea ona suia ai le ala tatou te faaaogaina ai? E mafai e tagata o le vasega ona suesue le Mamona 8:12-22 ma faasoa mai mea na fai atu ai Moronae e uiga i le taua o le Tusi a Mamona (“lenei talafaamaumau”). E mafai foi ona latou faasoa mai ni aafiaga patino na faaalia ia i latou le taua o le Tusi a Mamona. E faapefea ona tatou faʻaali atu tatou te faatauaina le Tusi a Mamona?
Atakopi o le Tusi a Mamona i gagana eseeseUa faamanino mai e le Tusi a Mamona aoaoga faavae o loo aoaoina i le Tusi Paia.
-
Ina ia fesoasoani i tagata o le vasega ia iloa pe faapefea ona lagolagoina e le Tusi a Mamona ma le Tusi Paia le isi, e mafai ona e valaaulia i latou e faitau le Mamona 7:8-10 ma otooto le faamatalaina e Mamona o tala faamaumau e lua i a latou lava upu (“le tala faamaumau foi lea o le a oo atu i Nuuese mai tagata Iutaia,” e faatatau i le Tusi Paia). Mafaufau e tusi ni lio se lua e felavasai i le laupapa ma faaigoa le tasi o le Tusi Paia ma le isi o le Tusi a Mamona. E mafai e le vasega ona lisi ni mea e tutusa ai tusi e lua o tusitusiga paia i le vaega lea e felavasai ma eseesega i isi vaega. (O le vitio “Bible and Book of Mormon” i luga o le ChurchofJesusChrist.org e maua ai ni manatu.) E mafai foi, ona mafaufau e lisi ni nai upumoni o le talalelei i le laupapa ma valaaulia tagata o le vasega e vaavaai i le Taiala i Tusitusiga Paia e maua ai fuaiupu mai le Tusi a Mamona ma le Tusi Paia e fesoasoani ia i latou e malamalama ai i upumoni.
E mafai ona tatou faatuatua e tusa lava pe ua na o i tatou.
-
Atonu e lagona e nisi tagata i lau vasega le tuua toatasi ia latou taumafaiga e ola i le talalelei. O a ni mea e mafai ona latou aoaoina mai le faataitaiga a Moronae e mafai ona fesoasoani ia i latou? Mafaufau e valaaulia tagata o le vasega e faitau le Mamona 8:1-11 ma mafaufau i fesili latou te fia fai atu ia Moronae ia aoao ai e uiga i le ala na ia tumau ai i le faatuatua e ui lava i ona tulaga faigata. O a mea ua uunaia ai i latou e uiga i lana faataitaiga? Ao latou faasoa mai o latou manatu, uunaia tagata o le vasega e faasoa mai ni aafiaga patino ina ua latou tumau i le faatuatua poo isi foi, e ui lava na latou lagona le tuua toatasi. Na faapefea ona fesoasoani le Alii ia i latou?
O le Tusi a Mamona na tusia mo o tatou aso.
-
Ao e lalata atu i le faaiuga o lenei tausaga i le suesueina o le Tusi a Mamona, atonu e mafai e tagata o le vasega ona toe mafaufau pe aisea latou te lagona ai o lenei tusi na tusia mo o tatou aso. E mafai ona e amata le talanoaga i le faitauina o le saunoaga a Peresitene Ezra Taft Benson i le “Punaoa Faaopoopo.” Ona mafai lea e tagata o le vasega ona faaaoga fesili a Peresitene Benson i le Mamona 8:26–41. Aisea na uunaia ai e le Alii Moronae e faaaofia nei upu i le tala faamaumau? E faapefea ona fesoasoani ia i tatou i o tatou aso?
-
E pei ona aoaoina i le otootoga o lenei vaiaso i le Sau Mulimuli Mai ia te Au—Mo Tagata Taitoatasi ma Aiga, o loo maua i le Mamona 9:1–30 le savali a Moronae e tali atu ai i le le talitonu ia Iesu Keriso i o tatou aso. Atonu e mafai ona e vaevae le vasega i ni vaega se tolu ma valaaulia vaega taitasi e sue le fautuaga e fesoasoani ia i latou i fuaiupu nei: 1-6 (o taunuuga o le le talitonu ia Keriso), 7-20 (o le taua o le talitonu i se Atua o faaaliga ma vavega), ma le 21-30 (fautuaga a Moronae ia i tatou).
-
E ui lava na tusia le Mamona 9:1-6 ia i “latou o e ua le talitonu ia Keriso,” e fesoasoani ia i tatou uma lava le vaai faalemafaufau i le tutu i luma o le Atua i se aso ia faamasinoina. Fai atu i tagata o le vasega e iloilo nei fuaiupu, ma vaavaai mo upu po o fasifuaitau o loo faamatala ai pe faapei lagona o e amioleaga i lena aso. O le a se mea e mafai ona tatou faia e aloese ai mai nei lagona? Atonu e maua e tagata o le vasega ni manatu aoga i le tala sa saunoa i ai Peresitene Boyd K. Packer i le “Punaoa Faaopoopo.”
-
E toatele tagata o aso nei e talitonu ua le toe i ai ni vavega. E mafai faapefea ona e faaaogaina aoaoga a Moronae e fesoasoani ai i tagata o lau vasega ia talitonu i se “Atua o vavega”? Atonu e te amataina i le fai atu i tagata o le vasega e toe iloilo le Mamona 9:7-26 ma vaavaai mo vavega na uunaia e Moronae i tatou ia talitonu i ai. O le a se mea ua tatou aoaoina mai nei fuaiupu e faatatau i le Atua ma Lana galuega i o tatou aso? O le a le mea e ao ona tatou faia ina ia faia ai e le Atua ni vavega? (tagai Mamona 9:20–21). O a vavega ua tatou vaaia?
Fautuaina le Aoaoina i le Aiga
Pe na mafaufau muamua tagata o lau vasega pe faapefea ona faateleina lo latou faatuatua i le Tama Faalelagi ma Iesu Keriso? Afai o lea, valaaulia i latou e suesue le Eteru 1-5 mo auala e fesoasoani e faatupulaia ai lo latou faatuatua.
Punaoa Faaopoopo
O le Tusi a Mamona na tusia mo o tatou aso.
Na saunoa mai Peresitene Ezra Taft Benson:
“Sa lei maua e Sa Nifae lenei tusi; faapea foi Sa Lamana anamua. Sa faatatau mo i tatou. …
“Ua molimau mai tusitala autu taitoatasi o le Tusi a Mamona sa latou tusia lenei tusi mo tupulaga o le lumanai. …[tagai 2 Nifae 25:21; Iakopo 1:3; Mamona 7:1; 8:34–35]. …
“Afai na latou vaai i o tatou aso, ma latou filifili mea e sili ona taua mo i tatou, pe le o se pogai sili ea lena ona taua e tatau ai ona tatou suesue ma aoao i le Tusi a Mamona? E tatau ona tatou fesili pea lava pea ia i tatou lava ‘O le a le pogai na musuia ai Mamona e le Alii (po o Moronae po o Alema) ia tuu lena mea i lana tusi? O le a se lesona e mafai ona ou aoaoina mai lena mea e fesoasoani ia te au ou te ola ai i nei aso ma nei ona po?’”(“O le Tusi a Mamona—O le Maaauau o lo Tatou Faatuatuaga,” Liahona, Ian. 1987, 6).
E mafai ona tatou le pona.
Na faamatala e Peresitene Boyd K. Packer le malaga ai mo aso e ono o se alii talavou faatasi ma se au militeri i se nofoaafi vevela, tumu i le asu, ma le leai o se auala e taele ai pe suia lavalava. I se malologa a le nofoaafi, na o atu le aumalaga fiaai i se faleaiga.
“Sa tumu, o lea sa matou o atu ai ma tutu i se laina umi e faatalitali e nonofo i lalo. O au sa muamua, i tua tonu mai lava o ni tamaitai lavalava lelei. E ui lava e lei faliu mai o ia i tua, ae sa le pine ae iloa e le tamaitai malualii sa i o’u luma o loo matou tutu ai iina.
“Sa faliu mai o ia ma tilotilo mai ia i matou. Ona toe faliu mai lea ma tilotilo mai e amata mai lo’u ulu e oo i o’u tamai vae. Sa ou tutu iina i se ofu toniga susu i le afu, eleelea, lefulefua, ma maanuminumi. Na faapea mai o ia ma se leo inoino, ‘Tafefe e, matua eleelea nei tamaloloa!’ Sa tau fai tilotilo mai uma tagata ia i matou.
“E le tau masalomia na moomoo o ia ina ia matou le i ai iina; sa ou moomoo foi faapena. Sa ou lagona lo’u eleelea aua na ou palapala, ma le lelei la’u faalogona ma sa ou maasiasi.”
Ona sii mai lea e Peresitene Packer le Mamona 9:4 ma faatusatusa lona aafiaga i le eleelea faaleagaga i le afioaga o le Atua. Ma molimau mai faapea ua na o le Togiola a Iesu Keriso le ala e mafai ai ona ia mama faaleagaga, ona ia saunoa mai lea:
“Pe mafai ona e vaai faalemafaufau i ou lagona ina ua ou mafai ona vaai mulimuli ane faapea afai ou te mulimuli i soo se tulaga ua faatuina e le Faaola, ou te le onosaia lava le tiga o le le mama faaleagaga? Vaai faalemafaufau i le mafanafana, saolotoga, lagona o le faaeaina lena e oo mai ia te oe pe a e vaai i le moni o le Togiola ma le taua o le faatinoga i aso uma ia te oe lava ia” (“Washed Clean,” Ensign, May 1997, 9–10).
Faaleleia o Lo Tatou Aoao Atu
Tatalo mo tagata o lau vasega. Pe o tauivi se tasi o lau vasega? E pei lava ona sa tatalo le Faaola mo Peteru (tagai Luka 22:31-32), e mafai ona e tatalo mo i latou o loo e aoaoina ina ia faamalosia (tagai Aoao Atu i le Ala a le Faaola, 6).