O le a Ou Toe Aumai Outou Mai le Loloto, saunia e Jonathan Arthur Clarke

16–22 Novema

Eteru 6–11

“Ina ia Aveesea le Leaga”

Manatua o faamaumauga i le Tusi a Mamona na tusia mo o tatou aso. A o saunia e aoao atu, vaai i nei tala faatusi paia mo mataupu faavae na e mafai ona faamalosia tagata o le vasega ia feagai ma luitau i o latou olaga.

Tusi faamaumau Ou Lagona Uunai

Valaaulia le Fefaasoaai

Ina ia fesoasoani i tagata o le vasega e faasoa mai ni mea na latou maua e taua i le Eteru 6–11, e mafai ona e valaaulia i latou e vaai faalemafaufau i nei mataupu pe a faia ai se vitio; o le a le fuaitau mai le Eteru 6–11 o le a e fautuaina o se autu? Tuu atu ia lava se taimi mo i latou e mafaufau ai e uiga i lenei mea, ona valaaulia lea o i latou e faasoa mai a latou autu ma faamatala pe aisea ua latou filifilia ai.

Aoao Atu le Aoaoga Faavae

Eteru 6:1–12

O le a taiala i tatou e le Alii i la tatou faigamalaga faitino.

• O le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga o loo fautuaina ai le faatusatusa o le faigamalaga a sa Iareto i le sami i la tatou faigamalaga i le olaga faitino. Fesili i tagata o le vasega na faatinoina lenei gaoioiga i le fale e faasoa mai ni manatu na latou maua mai lenei tala faatusa. Ina ia fesoasoani i tagata o le vasega ia faia nisi faatusatusaga i le vasega, valaaulia i latou e vaavaai i le Eteru 6: 1–12 mo faamatalaga e uiga i le malaga na e mafai ona i ai uiga faafaailoga (e pei o maa susulu, o vaa, ma le matagi) ma lisi i le laupapa. Ona faaalu lea e le vasega sina taimi e galulue ai taitoalua pe i ni vaega toalaiti e suesue fuaiupu ma talanoaina po o a mea e suitulaga ai nei faailoga i o tatou olaga. Mo se faataitaiga, o le a le “laueleele na folafolaina”? (fuaiupu 8). O faapefea ona taialaina i tatou e le Atua i la tatou malaga?

• E mafai ona e faaaogaina Eteru 6:1–12 e uunaia ai se talanoaga e uiga i le ala e liliu atu ai i le Atua e fesoasoani ia i tatou e tuputupu ae i o tatou tofotofoga. Mo se faataitaiga, o le upusii i le “Punaoa Faaopoopo” e mafai ona fesoasoani i le vasega e faatusatusa le “matagi malosi” o loo taua i fuaiupu 5–8 i faigata o le olaga. O le a le mea na fai e sa Iareto ina ua “siomiaina faataamilo i latou e vai e tele”? (fuaiupu 7). E mafai e tagata o le vasega ona fefaasoaai aafiaga ia na uunaia ai i latou i luma e faigata. Na faapefea e le ala na latou tali atu ai io latou puapuaga ona fesoasoani ia i latou ia alualu i luma agai i lo latou “laueleele na folafolaina”? Na faapefea ona fesoasoani le Alii ia i latou i o latou taimi faigata? Uunai i latou e vaai i upu ma fuaitau mai le Eteru 6 ao latou faasoa mai o latou aafiaga ma manatu.

  

  Malaga a sa Iareto i le isi itu o Asia, saunia e Minerva Teichert

Eteru 6:7–18, 30; 9:28–35; 10:1–2

E faamanuiaina i tatou e le Alii pe a tatou lotomaualalo.

• E ui lava o le tele o le tala i sa Iareto ua faaalia ai taunuuga le lelei o le faamaualuga ma le amioleaga, ae aofia ai foi vaitau o le lolomaualalo ma le faamanuiaina lea e mafai ona tatou aoao mai ai. Ina ia fesoasoani i tagata o le vasega e aoao mai nei faataitaiga lelei, e mafai ona e vaevae le vasega i ni vaega se lua ma totofi le tasi vaega e faitau le Eteru 6:7–18 ma le 30 ao faitau e le isi vaega le Eteru 9:28–35 ma le 10:1–2. Fai ia i latou e vaavaai i nei fuaiupu mo faamaoniga faapea na lotomaualalo sa Iareto lava ia—pe na faalotomaualaloina e o latou tulaga—ma le ala na faamanuiaina ai i latou e le Alii o se taunuuga. A uma ua lava se taimi o le vasega, ona valaaulia lea o sui mai vaega taitasi e faasoa mai mea sa latou aoaoina. E faapefea e le lotomaualalo ona fesoasoani ia i tatou e faalatalata atili atu ai i le Atua? Usu pe faalogologo i se viiga e uiga i le lotomaualalo, e pei o le “Ua Naunau ia te Oe” (Viiga, nu. 57), e mafai ona faaopoopo i lenei gaoioiga.

Eteru 7–11

O taitai amiotonu e taitaia tagata i le Atua.

• E oo lava ia i latou e lei umia lava ni tulaga taitai aloaia e mafai ona aoao mai faataitaiga o le amiotonu ma le amioleaga o tupu sa Iareto; o nei tala e mafai ona fesoasoani ia i tatou ia avea o ni taitai sili atu i o tatou aiga, i o tatou nuu, ma i le ekalesia. E mafai ona e amataina se talanoaga e uiga i nei fuaiupu i lenei autu e ala i le fai atu i tagata o le vasega e mafaufau i se tasi latou te manatu o se taitai lelei. Valaaulia i latou e faasoa faapuupuu mai ni uiga o lena tagata, ma fai se lisi i le laupapa. Ona mafai lea ona e tofi atu tagata taitoatasi o le vasega e aoao e uiga i se tasi o tupu sa Iareto i le Eteru 7-11. (O se lisi o tupu, faatasi ma mau fesootai e faamatala ai la latou nofoaiga, e maua i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga.) E mafai e tagata o le vasega ona faasoa mai mea na latou aoaoina mai nei tupu e uiga i le tulaga faataitai, ma faaopoopo atu isi uiga latou te maua i le lisi i luga o le laupapa. O isi uiga lelei faaletaitaiga ua lisiina i le “Punaoa Faaopoopo.” E faapefea ona tatou atiina ae nei uiga ma avea ma taitai, e tusa lava pe tatou te le o umia se tofiga faaletaitai faapitoa?

Fautuaina le Aoaoina i le Aiga

Ina ia uunaia le fiafia o le vasega i le faitauina o le Eteru 12–15, e mafai ona e taua faapea i nei mataupu ua taua ai e Moronae nisi o ona popolega e uiga i faamaumauga na ia tausia. O le tali a le Alii e mafai ona fesoasoani ia i tatou pe a i ai foi ni o tatou lagona faapea o le le mautonu.

Punaoa Faaopoopo

O o tatou puapuaga e saunia i tatou ia maua le ola e faavavau.

Na saunoa i se konafesi aoao i le taimi o tausaga faigata o le Taua o le Lalolagi ll, Elder Charles A. Callis o le Korama a Aposetolo e Toasefululua: “Ua taua mai ia i tatou faapea ina ua amata malaga atu sa Iareto i totonu o o latou vaa mo lenei laueleele folafolaina, na oso mai matagi matautia ma malolosi. Na agi mai matagi ma na latou i ai i se tulaga pagatia i le taimi atoa i lena malaga faigata. Na tausia i latou e le Atua. Ma ua tatou faitau faapea e ui lava ina faaauau pea nei matagi malolosi, na oo mai ai le pagatia ia i latou, ae na faaauau ona uunaia ai agai i le Laueleele Folafolaina. Ma o nei faigata o loo tatou oo i ai, nei taua matautia ma mea leaga uma o loo tutupu, o loo i ai i le mana o le Atua. E mafai ona Ia taofia uma pe a Ia filifili i ai, pe a faataunuuina Ona faamoemoega paia. Ae aua nei tatou faagaloina e ala mai i lenei sami o faigata, o tatou puapuaga, aafiaga o loo tatou feagai ma o le a faia e le Atua mo lo tatou lelei, pe afai tatou e usiusitai ia te Ia—o nei mea uma o loo uunaia i tatou i luma i le nofoaga o le malologa, i se lumanai mamalu, i le ola e faavavau” (i le Ripoti o le Konafesi, Apr. 1943, 62).

Uiga o taitai amiotonu.

I le malo o le Atua, o le sili ma; e tulaga faataitai o lona uiga o le vaai atu i isi i o latou tulaga moni lava—e pei ona silasila mai i ai le Atua ia i latou—ona aapa atu lea ma auauna atu ia i latou. O lona uiga o le olioli faatasi ma i latou o e fiafia, fetagisi faatasi ma e faanoanoa, sii i luga i latou o atuatuvale, ma alolofa atu i o tatou tuaoi e pei ona alofa mai Keriso ia i tatou. …

“… O le taitaiga i le Ekalesia e le o faatatau tele i le faatonuina o isi e pei o lo tatou naunautaiga ina ia faatonuina i tatou e le Atua.” (Dieter F. Uchtdorf, “O Le Sili ia te Outou,” Ensign po o le Liahona, Me 2017, 79–80).

“E na o tagata faamaoni ua i ai le malosi e siitia ma uunaia ai le tasi ma le isi i auaunaga sili atu, i mea sili atu e ausiaina, i malosiaga sili atu” (Aoaoga a Peresitene o le Ekalesia: Ezra Taft Benson [2014], 274).

“Ua aoao mai le lalolagi ina ia malolosi taitai; ua aoao mai le Alii ina ia latou agamalu. E maua e taitai faalelalolagi le malosi ma le potomasani e ala ia latou taleni, tomai, ma le oa. E maua e taitai faaKeriso le mana ma le potomasani i le “faatauanau, i le tali-tiga, i le agamaualalo ma le agamalu, ma le alofa faamaoni’ [MFF 121:41]” (Stephen W. Owen, “O Taitai Sili o loo Sili Ia,” Ensign po o le Liahona Me 2016, 75).

Faaleleia o Lo Tatou Aoao Atu

Uunaia se siosiomaga faaaloalogia. Pe o e lagonaina o loo lagolelei tagata uma i le vasega i le faaalia o o latou manatu ma lagona? “Fesoasoani i tagata o lau vasega ia malamalama o i latou taitoatasi e aafia ai le agaga o le vasega. Faamalosiau ia i latou e fesoasoani ia te oe e fausia se siosiomaga faamaoni, alofagia, ma faaaloalogia ina ia lagona e tagata uma le saogalemu e faasoa o latou aafiaga, fesili, ma molimau” (Aoao Atu i le Ala a le Faaola,15).