« ការប្រើប្រាស់សៀវភៅ ចូរមកតាមខ្ញុំ—សម្រាប់សាលាថ្ងៃអាទិត្យ » ចូរមកតាមខ្ញុំ—សម្រាប់សាលាថ្ងៃអាទិត្យ » ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ការប្រើប្រាស់សៀវភៅ ចូរមកតាមខ្ញុំ—សម្រាប់សាលាថ្ងៃអាទិត្យ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២០

ការប្រើប្រាស់សៀវភៅ ចូរមកតាមខ្ញុំ—សម្រាប់សាលាថ្ងៃអាទិត្យ

ការរៀបចំខ្លួនបង្រៀនក្នុងសាលាថ្ងៃអាទិត្យ

ការសិក្សាផ្ទាល់ខ្លួន និងជាគ្រួសារនៅឯគេហដ្ឋានគួរជាមជ្ឈមណ្ឌលនៃការរៀនសូត្រដំណឹងល្អ ។ រឿងនេះ គឺជារឿងពិតចំពោះអ្នក និងចំពោះមនុស្សដែលអ្នកបង្រៀន ។ នៅពេលអ្នករៀបចំខ្លួនបង្រៀន សូមចាប់ផ្ដើមដោយមានបទពិសោធន៍ផ្ទាល់ខ្លួននៅក្នុងបទគម្ពីរ ។ ការរៀបចំខ្លួនដ៏សំខាន់បំផុតរបស់អ្នកនឹងកើតឡើង នៅពេលអ្នកស្រាវជ្រាវបទគម្ពីរ ហើយស្វែងរកការបំផុសគំនិតមកពីព្រះវិញ្ញាណបរិសុទ្ធ ។

ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ គឺជាផ្នែកដ៏សំខាន់មួយសម្រាប់ទាំងការសិក្សាផ្ទាល់ខ្លួនរបស់អ្នក និងការរៀបចំខ្លួនរបស់អ្នកដើម្បីបង្រៀន ។ វានឹងជួយអ្នកឲ្យទទួលបានការយល់ដឹងដ៏ស៊ីជម្រៅអំពីគោលការណ៍នៃគោលលទ្ធិទាំងឡាយដែលមាននៅក្នុងបទគម្ពីរ ។ អ្នកក៏នឹងអាចមានការបំផុសគំនិត ហើយអញ្ជើញសិស្សឲ្យប្រើសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ដើម្បីបង្កើនការសិក្សាព្រះគម្ពីរផ្ទាល់ខ្លួន និងជាគ្រួសាររបស់ពួកគេ ( សម្រាប់ជំនួយនៅក្នុងធ្វើកិច្ចការនេះ សូមមើល « គំនិតសម្រាប់ការលើកទឹកចិត្តឲ្យមានការសិក្សាផ្ទាល់ខ្លួន និងជាគ្រួសារ » នៅក្នុងធនធាននេះ ) ។ នៅពេលអ្នកធ្វើដូច្នេះ សូមប្រុងប្រយ័ត្នចំពោះសិស្សដែលស្ថានភាពគ្រួសាររបស់ពួកគេប្រហែលជាពុំអនុញ្ញាតឲ្យមានការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារឲ្យបានទៀងទាត់ ។

នៅក្នុងការរៀបចំខ្លួនរបស់អ្នក គំនិត និងអារម្មណ៍ទាំងឡាយនឹងកើតមានដល់អ្នកអំពីមនុស្សដែលអ្នកបង្រៀន របៀបដែលគោលការណ៍ទាំងឡាយនៅក្នុងបទគម្ពីរនឹងប្រទានពរដល់ជីវិតរបស់ពួកគេ និងរបៀបដែលអ្នកអាចបំផុសគំនិតពួកគេឲ្យស្វែងរកគោលលទ្ធិទាំងនោះ នៅពេលពួកគេសិក្សាព្រះគម្ពីរសម្រាប់ខ្លួនឯងនោះ ។

គំនិតសម្រាប់ការបង្រៀន

ខណៈអ្នករៀបចំខ្លួនបង្រៀន នោះអ្នកអាចទទួលបានការបំផុសគំនិតបន្ថែមដោយការមើលឃើញពីគម្រោងនៃការបង្រៀននៅក្នុងធនធាននេះ ។ សូមកុំចាត់ទុកថាគំនិតទាំងនេះគឺជាសេចក្ដីណែនាំលម្អិតឡើយ ប៉ុន្តែផ្ទុយទៅវិញសូមចាត់ទុកវាជាយោបល់ដើម្បី បង្កើតការបំផុសគំនិតផ្ទាល់របស់អ្នក ។ អ្នកស្គាល់ពីសិស្សរបស់អ្នក ហើយអ្នកនឹងស្គាល់ពួកគេកាន់តែច្រើនទៀត នៅពេលអ្នករៀនជាមួយគ្នានៅក្នុងថ្នាក់ ។ ព្រះអម្ចាស់ស្គាល់ពួកគេផងដែរ ហើយទ្រង់នឹងបំផុសគំនិតដល់អ្នកនូវរបៀបដ៏ល្អបំផុតដើម្បីជួយសិស្សឲ្យស្ថាបនាលើការរៀនសូត្រដំណឹងល្អដែលពួកគេកំពុងធ្វើនៅក្នុងគេហដ្ឋាន ។

អ្នកមានធនធានជាច្រើនផ្សេងទៀតដែលអ្នកអាចប្រើ នៅពេលអ្នករៀបចំខ្លួន រួមបញ្ចូលទាំងគំនិតនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ និងទស្សនាវដ្ដីសាសនាចក្រផងដែរ ។ សម្រាប់ព័ត៌មានបន្ថែមអំពីធនធានទាំងនេះ និងធនធានផ្សេងទៀត សូមមើលវគ្គដែលមានចំណងជើងថា « ធនធានបន្ថែមទាំងឡាយ »នៅក្នុងធនធាននេះ ។

រឿងមួយចំនួនដែលត្រូវចងចាំ

គេហដ្ឋានគឺជាមជ្ឈដ្ឋានដ៏ល្អបំផុតសម្រាប់ការរៀនសូត្រដំណឹងល្អ ។ ក្នុងនាមជាគ្រូបង្រៀនម្នាក់ អ្នកមានការទទួលខុសត្រូវដ៏សំខាន់មួយដើម្បីគាំទ្រ លើកទឹកចិត្ត ហើយបន្ថែមទៅលើការរៀនសូត្រដំណឹងល្អនៅក្នុងគេហដ្ឋានរបស់សិស្ស ។
ការប្រែចិត្តជឿរបស់សិស្សចំពោះដំណឹងល្អនៃព្រះយេស៊ូវគ្រីស្ទនឹងមានភាពស៊ីជម្រៅ នៅពេលពួកគេយល់ ហើយអនុវត្តគោលលទ្ធិពិត ។ សូមលើកទឹកចិត្តពួកគេឲ្យកត់ត្រា ហើយធ្វើតាមការបំផុសគំនិតដែលពួកគេទទួលបានមកពីព្រះវិញ្ញាណបរិសុទ្ធ ។
ការបង្រៀនគឺលើសពីការបង្រៀនមេរៀនទៅទៀត ប៉ុន្តែវាក៏លើសពីការគ្រាន់តែដឹកនាំការពិភាក្សាមួយផងដែរ ។ ផ្នែកមួយនៃតួនាទីរបស់អ្នកគឺដើម្បីលើកទឹកចិត្តឲ្យមានការចូលរួមដែលស្អាងឡើង ហើយផ្អែកលើបទគម្ពីរ ។ អ្នកក៏គួរចែកចាយការយល់ដឹងដ៏បំផុសគំនិតដែលអ្នកបានទទួល នៅពេលអ្នកបានសិក្សាព្រះគម្ពីរផងដែរ ។
ព្រះវរបិតាសួគ៌សព្វព្រះទ័យឲ្យអ្នកទទួលបានជោគជ័យក្នុងនាមជាគ្រូបង្រៀនម្នាក់ ។ ទ្រង់បានប្រទានធនធានជាច្រើនដើម្បីជួយអ្នក រួមបញ្ចូលទាំងការប្រជុំក្រុមប្រឹក្សាគ្រូបង្រៀនផងដែរ ។ នៅក្នុងការប្រជុំទាំងនេះ អ្នកអាចប្រឹក្សាជាមួយនឹងគ្រូបង្រៀនផ្សេងទៀតអំពីឧបសគ្គដែលអ្នកជួបប្រទះ ។ អ្នកក៏អាចពិភាក្សា ហើយអនុវត្តគោលការណ៍ទាំងឡាយនៃការបង្រៀនដូចជាព្រះគ្រីស្ទ ។
មនុស្សរៀនបានល្អ បំផុតនៅពេលពួកគេមានឱកាសបង្រៀន ។ ម្ដងម្កាល សូមពិចារណាអនុញ្ញាតឲ្យសិស្ស រួមទាំងយុវវ័យផងដែរឲ្យបង្រៀនផ្នែកមួយនៃមេរៀន ។ សូមធ្វើការសម្រេចចិត្តនេះដោយផ្អែកលើសេចក្ដីត្រូវការ និងលទ្ធភាពរបស់សិស្ស ។ ប្រសិនបើអ្នកពិតជាអញ្ជើញសិស្សឲ្យបង្រៀន សូមចំណាយពេលជួយគាត់ឲ្យរៀបចំខ្លួនជាមុនដោយប្រើគំនិតដែលមាននៅក្នុងធនធាននេះ និងនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ សូមចងចាំថា ក្នុងនាមជាគ្រូបង្រៀនដែលបានហៅឲ្យបម្រើ នោះអ្នកមានការទទួលខុសត្រូវទាំងស្រុងចំពោះអ្វីដែលត្រូវបង្រៀននៅក្នុងថ្នាក់ ។
ធនធាននេះរួមមាននូវគម្រោងមេរៀនរាល់សប្ដាហ៍សម្រាប់ឆ្នាំនោះលើកលែងតែពីរសប្ដាហ៍ពេលមានសន្និសីទទូទៅ ។ នៅថ្ងៃអាទិត្យ ពេលគ្មានសាលាថ្ងៃអាទិត្យដោយសារតែមានសន្និសីទស្តេក ឬហេតុផលណាមួយផ្សេងទៀត ក្រុមគ្រួសារអាចបន្តអានព្រះគម្ពីរមរមននៅឯគេហដ្ឋានយោងតាមកាលវិភាគដែលបានគ្រោងនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ ដើម្បីធ្វើឲ្យសាលាថ្ងៃអាទិត្យរបស់អ្នកត្រូវតាមកាលវិភាគ អ្នកអាចជ្រើសរំលងមេរៀនមួយ ឬដាក់មេរៀនពីរបញ្ចូលគ្នា ។ ដើម្បីចៀសវាងការភាន់ច្រឡំ ប្រធានសាលាថ្ងៃអាទិត្យគួរណែនាំគ្រូបង្រៀនសាលាថ្ងៃអាទិត្យអំពីការកែប្រែទាំងនេះទុកជាមុន ។