C. C. A. Christensen (1831–1912), Saints Driven from Jackson County Missouri, (Kāingalotu Ne Tuli mei he Vahefonua Siakisoni Mīsulí) fakafuofua ki he 1878, tā ʻaki e vali temipela ʻi he tupenu māsilini, ʻinisi ʻe 77 ¼ × 113. Musiume ʻo e Tā Fakatātaá ʻUnivēsiti Pilikihami ʻIongí, meʻaʻofa ʻa e makapuna ʻo C. C. A. Christensen, 1970

6–12 Sepitema

Tokāteline mo e Ngaahi Fuakava 98–101

“Ke Mou Fakalongolongo, pea ʻIloʻi ko e ʻOtuá Au”

Ko e hā ha ngaahi faingataʻa pe ngaahi ʻahiʻahi ʻoku aʻusia ʻe he kau mēmipa ʻo hoʻo kalasí? Ko e hā ha ngaahi lea akonaki mo fakafiemālie ʻi he Tokāteline mo e Ngaahi Fuakava 98–101 ʻe ala tokoni kiate kinautolu?

Lekooti Hoʻo Ngaahi Ongó

Fakaafeʻi e Feʻinasiʻakí

Te ke lava ʻo fakaafeʻi ʻa e kau mēmipa ʻo e kalasí ke nau vahevahe ha meʻa ne nau ako mei he Tokāteline mo e Ngaahi Fuakava 98–101 naʻá ne tokoniʻi kinautolu ʻi ha ʻahiʻahi pe faingataʻa ne nau fehangahangai mo ia.

Akoʻi ʻa e Tokāteliné

Tokāteline mo e Ngaahi Fuakava 98:1–3, 11–16, 23–30, 37; 101:2–5, 9–16

ʻE lava ke fengāueʻaki fakataha hotau ngaahi ʻahiʻahí maʻa ʻetau leleí.

• Mahalo ʻoku kehekehe ʻa e fakatanga pe fakafepaki ʻoku tau fehangahangai mo ia he ʻaho ní mei he meʻa naʻe fehangahangai mo e Kāingalotú ʻi Mīsuli ʻi he 1833, ka ʻoku kei fakaʻaongaʻi pē ʻa e akonaki ʻa e ʻEikí ʻi he Tokāteline mo e Ngaahi Fuakava 98. Ke tokoni ke ako ʻa e kau mēmipa ʻo e kalasí mei he akonaki ko ʻení, fakakaukau ke hiki ha ngaahi fehuʻi hangē ko ʻení ʻi he palakipoé: Ko e hā ʻa e ngaahi founga ʻoku finangalo ʻa e ʻEikí ke fakakaukau ʻaki Heʻene Kāingalotú ki he fakafepakí? Ko e hā ʻa e founga ʻoku finangalo ʻa e ʻEikí ke tau tali ʻaki ʻa e fakatangá? ʻE lava ke ngāue ʻa e kau mēmipa ʻo e kalasí ʻi ha ngaahi kulupu iiki ke maʻu ʻa e ngaahi talí ʻi he Tokāteline mo e Ngaahi Fuakava 98:1–3, 11–16, 23–30 hili iá pea aleaʻi leva ʻa e meʻa ʻoku nau akó. Ko e hā ha ngaahi moʻoni ʻoku tau maʻu ʻe ala tokoni ke tau hoko ai ko ha kau ākonga lelei ange ʻo Sīsū Kalaisi? ʻE ala ʻaonga ʻa e ongo fakamatala ʻi he “Ngaahi Maʻuʻanga Tokoni Kehé” ki he fealeaʻaki ko ʻení.

• ʻI he ngaahi taimi ʻo e fakatangá pe ngaahi ʻahiʻahí, ʻe ala tokoni ʻa e pōpoaki ko ʻeni mei he vahe 98 mo e 101: ʻe tokoniʻi kitautolu ʻe he ʻEikí kapau ʻoku tau loto-fiemālie ke falala kiate Ia. Ke tokoni ki he kau mēmipa ʻo e kalasí ke nau ʻiloʻi ʻa e pōpoaki ko ʻení, te ke lava ʻo hiki ʻa e ʻū veesi ko ʻení ʻi he palakipoé pea fakaafeʻi ʻa e kau mēmipa ʻo e kalasí ke nau fili ha veesi ʻe niʻihi ʻo lau: Tokāteline mo e Ngaahi Fuakava 98:1–3, 11–12, 37; 101:2–5, 9–16. Kole ange ke nau vahevahe ʻa e meʻa ne nau maʻu ʻokú ne poupouʻi kinautolu ke nau falala ki he ʻEikí. Ko e hā ʻoku akoʻi mai ʻe he ngaahi veesi ko ʻení fekauʻaki mo e founga ke tau falala ai ki he ʻEikí? (Vakai foki, Linda S. Reeves, “Maʻu e Ngaahi Tāpuaki Hoʻo Fuakavá,” Ensign pe Liahona, Nōvema 2013, 118–20.)

Tokāteline mo e Ngaahi Fuakava 101:1–8, 43–62

ʻOku tokoni ʻa e muimui ki he akonaki ʻa e ʻOtuá ke tau malu ai.

• Te ke tokoniʻi fēfē ʻa e kau mēmipa ʻo e kalasí ke nau ʻiloʻi ʻa e maluʻanga ʻoku maʻu mei he “tokanga ki he leʻo ʻo e ʻEikí”? (veesi 7). ʻE lava ke ke fakaafeʻi ha niʻihi ʻo e kau mēmipa ʻo e kalasí ke nau fakatātaaʻi ʻa e tala fakatātā ʻi he Tokāteline mo e Ngaahi Fuakava 101:43–62 lolotonga hano lau leʻolahi ia ʻe ha mēmipa kehe ʻo e kalasí. Te mou lava leva ʻo aleaʻi ʻa e ngaahi fehuʻi hangē ko ʻení: Ko e hā ʻa e meʻa ʻoku fakafofongaʻi ʻe he ngaahi ʻelemēniti kehekehe ʻo e talanoa fakatātaá? Ko e hā ʻa e meʻa naʻá ne fakatupunga ke mole ʻa e ngoue vainé mei he kau tamaioʻeikí? Ko e hā ha ngaahi lēsoni ʻoku tau ako mei he ngaahi angafai ʻa e kau tamaioʻeikí? Ko e hā ʻoku tau ako fekauʻaki mo e ʻEikí mei he ngaahi tōʻonga ʻa e ʻeiki [ʻi he talanoá]? ʻE tokoni foki ke fakahoa ʻa e veesi 1–8 mo e veesi 47–51 pea aleaʻi ʻa e founga ʻe lava ke tau “faivelenga mo fakapotopoto” ai ʻi heʻetau ngaahi feinga ke langa ʻa Saione ʻi heʻetau moʻui fakafoʻituituí, ʻi hotau ngaahi ʻapí, pea ʻi heʻetau hoko ko ha Siasí.

  

  Fakaikiikí mei he Christ and the Rich Young Ruler [Kalaisi mo e Talavou Koloaʻiá], tā ʻa Heinrich Hofmann

Ngaahi Maʻuʻanga Tokoni Kehé

ʻOku fie maʻu ʻa e loto-toʻa faka-Kalaisí kae fulihi hake mo e kouʻahe ʻe tahá.

Naʻe akonaki ʻa ʻEletā Lōpeti D. Heili ʻo pehē:

“ʻOku maʻu hala ha kakai ʻo nau pehē ʻoku tau foʻi pe vaivai ʻi heʻetau fakalongolongó, angamaluú, fakamolemolé, mo fakamoʻoni ʻi he loto fakatōkilaló. Ka ke ‘ʻofa ki [hotau] ngaahi filí, tāpuakiʻi ʻa kinautolu ʻoku kapeʻi ʻa [kitautolú], fai lelei kiate kinautolu ʻoku fehiʻa kiate [kitautolú], pea hūfia ʻa kinautolu ʻoku fai kovi mo fakatangaʻi [kitautolú]’ (Mātiu 5:44) pea ʻe toki lava pē ia ʻi he tuí, mālohí, kae meʻa tēpuú ko e loto-toʻa faka-Kalaisí. …

“ʻI he taimi ʻoku ʻikai ke tau fakafepaki aí—ʻi heʻetau fulihi atu ʻa e kouʻahe ʻe tahá pea mapukepuke ʻetau ongoʻi ʻitá—ʻoku tau kau foki ai mo e Fakamoʻuí. ʻOku tau fakahaaʻi atu ʻEne ʻofá, ʻa e mālohi pē ko ia ʻe taha te ne lava ke ikuʻi ʻa e filí pea ʻikai fetūkuaki mo hotau kau tukuakiʻí. ʻOku ʻikai lau ia ko e vaivai. Ko e loto-toʻa faka-Kalaisí ia” (“Loto-toʻa Faka-Kalaisí: Ko e Fiemaʻu Kae Hoko ko e Ākongá,”Ensign pe Liahona, Nōvema 2008, 72).

Ko e fakamolemoleʻí ʻoku ʻikai ko hano tali.

Naʻe pehē ʻe ʻEletā Kēvini R. Tangikeni: “ʻE kāinga, ʻoua muʻa naʻa mou maʻuhala. Ko e fakamolemoleʻí ʻoku ʻikai ko hano tali. ʻOku ʻikai ke tau kumi ʻuhinga ʻi he tōʻonga koví pe tuku ke ngaohikovia kitautolu ʻe ha taha koeʻuhí ko ʻenau ngaahi faingataʻaʻiá, mamahí pe vaivaí. Ka ʻoku tau lava ʻo maʻu ha mahino mo ha nonga lahi ange ʻi heʻetau sio ʻaki ha fakakaukau ʻoku fālahi angé. … Ko ha tefitoʻi moʻoni nāunauʻia mo faifakamoʻui ʻa e fakamolemolé. ʻOku ʻikai fie maʻu ke tuʻo ua ʻetau hoko ko e tokotaha mamahí. ʻE lava ke tau fakamolemoleʻi” (“Ko e Faitoʻo Faifakamoʻui ʻo e Fakamolemolé,” Ensign pe Liahona, Mē 2016, 35).

Fakatupulaki ʻEtau Founga Akoʻí

Fakakau ʻa kinautolu ʻoku faingataʻaʻiá. Taimi ʻe niʻihi ʻoku fie maʻu pē ʻe he kau mēmipa ia ʻo e kalasí ʻoku faingataʻaʻiá ke fakakau kinautolu kae lava ke nau ongoʻi ʻoku ʻofaʻi kinautolu. Fakakaukau ke kole ange ke nau tali ha fatongia ʻi he lēsoni hokó, fakaafeʻi kinautolu ki he kalasí, pe fakapapauʻi ʻoku ʻi ai ha founga ke nau aʻu mai ki he lotú. ʻOua naʻá ke loto-foʻi ʻo ka ʻikai ke nau tali hoʻo ngaahi fuofua feingá (vakai, Ko e Faiako ʻi he Founga ʻa e Fakamoʻuí, 8–9).