“30 ʻAokosi–5 Sepitema. Tokāteline mo e Ngaahi Fuakava 94–97: ‘Ki Hono Fakamoʻui ʻo Saioné,’” Haʻu, ʻo Muimui ʻIate Au—Maʻá e Lautohi Faka-Sāpaté: Tokāteline mo e Ngaahi Fuakava 2021 (2020)
“30 ʻAokosi–5 Sepitema. Tokāteline mo e Ngaahi Fuakava 94–97,” Haʻu, ʻo Muimui ʻIate Au—Maʻá e Lautohi Faka-Sāpaté: 2021
Temipale Ketilaní, tā ʻe Al Rounds
30 ʻAokosi–5 Sepitema
Tokāteline mo e Ngaahi Fuakava 94–97
“Ki Hono Fakamoʻui ʻo Saioné”
ʻE founga fēfē haʻo tokoniʻi lelei taha ʻa e kau mēmipa ʻo e kalasí ke nau maʻu ʻa e ngaahi tāpuaki ne talaʻofa mai ʻi he Tokāteline mo e Ngaahi Fuakava 94–97?
Lekooti Hoʻo Ngaahi Ongó
Fakaafeʻi e Feʻinasiʻakí
Mahalo naʻa lava ke vahevahe ʻe he kau mēmipa ʻo e kalasí ha meʻa ne nau maʻu ʻi he Tokāteline mo e Ngaahi Fuakava 94–97 ʻokú ne ueʻi kinautolu ke nau ʻalu maʻu pē ki he temipalé. Pe te nau vahevahe ha ngaahi pōpoaki kehe naʻá ne ueʻi kinautolu ʻi heʻenau lau ʻa e ngaahi vahe ko ʻení.
Akoʻi ʻa e Tokāteliné
Tokāteline mo e Ngaahi Fuakava 95:8; 97:10–17
ʻOku tāpuekina ʻe he ʻOtuá ʻa Hono kakaí ʻi he temipalé.
-
Te ke fakaʻaongaʻi fēfē ʻa e ngaahi moʻoni ʻoku akoʻi ʻi he Tokāteline mo e Ngaahi Fuakava 95 mo e 97 ke ueʻi ʻa e kau mēmipa ʻo e kalasí ke nau fekumi faivelenga ange ki he ngaahi tāpuaki ʻo e temipalé? Ko ha founga ʻe taha ko e fokotuʻu ha laʻitā ʻo e temipalé ʻi loto mālie he palakipoé pea fehuʻi ki he kau mēmipa ʻo e kalasí pe ʻoku nau pehē ko e hā ʻoku fekau ai ʻe he ʻEikí ki Heʻene Kāingalotú ke nau langa ha ngaahi temipalé. ʻE lava ke fekumi ʻe he kau mēmipa ʻo e kalasí ʻi he Tokāteline mo e Ngaahi Fuakava 95:8; 97:10–17 ki ha ngaahi tali pea hiki ʻa e meʻa ne nau maʻú ʻi he palakipoé ʻo takatakai ʻi he laʻitā ʻo e temipalé. (Te nau lava ʻo kumi ha ngaahi tali kehe ʻi he “ʻUhinga ʻOku Langa Temipale ai e Kau Māmongá” [temples.ChurchofJesusChrist.org].) Kuo fakahoko fēfē ʻa e ngaahi taumuʻa ko ʻení ʻi heʻetau moʻuí? Ko e hā ha founga ʻe lava ke hoko ai ʻa e temipalé ko ha konga mahuʻinga ange ʻi heʻetau moʻuí?
Tokāteline mo e Ngaahi Fuakava 97:8–9
ʻE lava ke tali kitautolu ʻe he ʻEikí.
-
Ko e hā ʻoku tau ako mei he Tokāteline mo e Ngaahi Fuakava 97:8 fekauʻaki mo e ʻuhinga ke tali ʻe he ʻEikí? ʻOku kehekehe fēfē nai ia mei he ngaahi founga ʻoku tau faʻa fekumi ai ke tali kitautolu ʻe he māmaní? Ko e hā ʻa e ngaahi tāpuaki ʻoku talaʻofa mai ʻi he veesi 9 maʻanautolu ʻoku tali ʻe he ʻEikí? ʻE lava foki ke toe vakaiʻi ʻe he kau mēmipa ʻo e kalasí ʻa e pōpoaki ʻa ʻEletā ʻĒliki W. Kopisikī “Ko Hono Tali Kita ʻe he ʻEikí” (Ensign pe Liahona, Mē 2013, 104–6) pea vahevahe ʻa e founga ʻoku tokoni ai ke mahino kiate kinautolu ʻa e ngaahi veesi ko ʻení. ʻOku kau ʻi he fakamatala ʻi he “Ngaahi Maʻuʻanga Tokoni Kehé” ʻa e fakaafe ʻa ʻEletā Kopisikī ke tau fekumi ke tali kitautolu ʻe he ʻEikí ʻi heʻetau moʻuí.
Tokāteline mo e Ngaahi Fuakava 97:18–28
Ko Saioné “ko e loto-maʻa.”
-
Ke tokoni ki he kau mēmipa hoʻo kalasí ke nau fakakaukau fekauʻaki mo Saioné, mahalo te ke tohiʻi ʻi he palakipoé Ko e hā ʻa e Saione? pea fakaafeʻi kinautolu ke nau kumi ʻa e ngaahi talí ʻi he Tokāteline mo e Ngaahi Fuakava 97:19 mo e 21 (vakai foki, Mōsese 7:18 Mahalo naʻa tokoni ke mou aleaʻi ʻa e founga ʻoku tokoni ai ʻa e Fakamoʻuí ke tau “loto-maʻá.” Ko e hā ʻa e meʻa ʻoku tau ongoʻi ʻoku ueʻi kitautolu ke tau fai ke langa hake ʻa Saione ʻi heʻetau moʻuí? ʻi hotau uōtí pe koló? ʻi hotau tukui koló?
ʻĪmisiTemipale KetilaníNaʻe hoko hono langa ʻo e Temipale Ketilaní ke “loto-maʻa” ange ai ʻa e Kāingalotú.
-
Naʻe akoʻi ʻe he ʻEikí fekauʻaki mo Saione hili hono tomuʻa fekau ki he Kāingalotú ke nau langa ha temipale “ki hono fakamoʻui ʻo Saioné” (vakai, Tokāteline mo e Ngaahi Fuakava 97:12, 18–28). Ko e hā ʻoku hoko ai ʻa e temipalé ko ha konga mahuʻinga ʻo hono langa hake ʻo Saioné? Kuo fakahoko fēfē ʻa e ngaahi talaʻofa naʻe fai ʻe he ʻEikí fekauʻaki mo Saione ʻi he veesi 18–28 ʻi hotau kuongá?
Ngaahi Maʻuʻanga Tokoni Kehé
Ko hono tali kita ʻe he ʻEikí.
ʻI he fakamatala ʻa ʻEletā ʻĒliki W. Kopisikī ki he “sīpinga faingofua” naʻe akoʻi ʻi he Tokāteline mo e Ngaahi Fuakava 97:8, naʻá ne akonaki ai ʻo pehē:
“ʻOku fakaiku ʻa e fekumi pea mo hono tali ʻe he ʻEikí, ki he ʻilo kuó Ne fili mo faitāpuekina kitautolú. Te tau maʻu ha loto falala lahi ange te Ne tataki mo fakahinohino kitautolu ki he leleí. ʻE hāsino ʻEne ʻaloʻofa ongongofuá ʻi hotau lotó, ʻi heʻetau moʻuí, pea ʻi hotau fāmilí.
“ʻOku ou fakaafeʻi kimoutolu ʻaki hoku lotó kotoa ke mou feinga ke tali kimoutolu ʻe he ʻEikí mo maʻu ʻEne ngaahi tāpuaki kuo ʻosi talaʻofa maí. ʻI heʻetau muimui he sīpinga faingofua kuo fokotuʻu ʻe he ʻEikí, te tau ʻilo kuo tali kitautolu ʻe he ʻEikí, neongo pe ko e hā hotau fatongiá, tuʻungá, pe ngaahi fakangatangata fakamatelié” (“Ko Hono Tali Kita ʻe he ʻEikí,” Ensign pe Liahona, Mē 2013, 106).
Fakatupulaki ʻEtau Founga Akoʻí
Feinga ke ke ʻiloʻi ʻa kinautolu ʻokú ke akoʻí. Ko e tokotaha kotoa pē ʻokú ke akoʻí ʻoku makehe ʻene ngaahi aʻusiá, ngaahi fakakaukaú, mo e ngaahi talēnití. Lotua ke ke ʻiloʻi ʻa e founga ʻe lava ke hoko ai e ngaahi tokoni ʻa e tokotaha kotoa pē ko ha tāpuaki ki he kalasí hono kotoa. (Vakai, Ko e Faiako ʻi he Founga ʻa e Fakamoʻuí, 7.)