20–26 Sepitema

Tokāteline mo e Ngaahi Fuakava 106–108

“Ke Fakaava Mai … ʻa e Ngaahi Langí”

ʻI hoʻo ako ʻa e Tokāteline mo e Ngaahi Fuakava 106–8, fakakaukau ki he ngaahi aʻusia fakalaumālie ʻoku maʻu ʻe he kau mēmipa ʻo hoʻo kalasí ʻi heʻenau ako ʻa e ngaahi vahe ko ʻení. ʻI hoʻo teuteu ke akoʻi kinautolú, mahalo naʻa ala tokoni ke ke fekumi ki he meʻa ne nau maʻu ʻoku ʻuhingamālie kiate kinautolú kimuʻa pea mou fakatahá.

Lekooti Hoʻo Ngaahi Ongó

Fakaafeʻi e Feʻinasiʻakí

Fakaafeʻi e kau mēmipa ʻo e kalasí ke nau vahevahe ha veesi mei he ngaahi vahe ko ʻení ʻoku akoʻi ai ha tefitoʻi moʻoni ʻe lava ke ne fakamālohia ha taha ʻi heʻene ngāue ʻi he Siasí.

Akoʻi ʻa e Tokāteliné

Tokāteline mo e Ngaahi Fuakava 106; 108

ʻOku fakahinohinoʻi, poupouʻi mo tokoniʻi ʻe he ʻEikí ʻa kinautolu ʻokú Ne ui ke ngāué.

• ʻI hono ako ʻe he kau mēmipa ʻo e kalasí ʻa e Tokāteline mo e Ngaahi Fuakava 106 mo e 108 he uike ní, mahalo ne nau maʻu ha ngaahi kupuʻi lea ʻe ala tokoni ki he niʻihi ʻoku ngāue ʻi ha ngaahi uiuiʻi ʻi he Siasí (vakai, lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Fakakaukau ke tuku ha taimi ki he kau mēmipa ʻo e kalasí ke nau hiki ha kupuʻi lea ne nau maʻu ʻi he ongo vahe ko ʻení ʻi he palakipoé pea kole ange ke nau vahevahe ʻenau ʻiló. Ko e hā ha ngaahi aʻusia ne nau maʻu ʻoku felāveʻi pe fakatātaaʻi ʻa e ngaahi kupuʻi lea ko ʻení?

Tokāteline mo e Ngaahi Fuakava 107

ʻOku tataki ʻe he ʻEikí ʻa Hono Siasí ʻo fakafou ʻi he mafai ʻo e lakanga fakataulaʻeikí.

• Te ke lava ʻo kamata ha fealeaʻaki fekauʻaki mo e ngaahi tuʻunga ʻo e lakanga fakataulaʻeikí ʻaki hano fakaafeʻi ʻa e kalasí ke nau faʻu ha lisi ʻo e ngaahi ʻuhinga ʻoku ʻomi ai ʻe he ʻEikí ʻa e kau palōfitá, kau ʻaposetoló mo e kau taki kehe ʻo e Siasí. Mahalo naʻa lava ke tānaki atu ʻe he kau mēmipa ʻo e kalasí ki heʻenau lisí hili ʻenau lau ʻa e Tokāteline mo e Ngaahi Fuakava 107:18–20. Hili iá ʻe lava ke mou tuku taimi ke toe vakaiʻi ʻa e ngaahi fatongia ʻoku foaki ʻe he ʻEikí kiate kinautolu ʻoku nau maʻu e ngaahi lakanga ko ʻení: Kau Palesitenisī ʻUluakí (veesi 9, 21–22, 65–66, 91–92), Kau ʻAposetolo ʻe Toko Hongofulu Mā Uá (veesi 23–24, 33–35, 38, 58), Kau Fitungofulú (veesi 25–26, 34, 93–97), mo e kau pīsopé (veesi 13–17, 68–76, 87–88). Ko e hā ha meʻa ʻe lava ke tau fai ke poupouʻi hotau kau takí ʻaki ʻetau “falalá, tuí, mo e [ngaahi] lotú”? (veesi 22).

• Te tau tali fēfē nai kapau ʻe fehuʻi mai ʻe ha kaungāmeʻa ʻoku ʻikai ke tau tui tatau ʻo pehē, “Ko e hā ʻa e lakanga fakataulaʻeiki?” pe “Ko e hā ʻa e ngaahi kī ʻo e lakanga fakataulaʻeikí?” ʻE liliu fēfē nai ʻetau ngaahi talí ʻe he ngaahi akonaki ʻi he “Ngaahi Maʻuʻanga Tokoni Kehé”? ʻE lava foki ke maʻu ʻe he kau mēmipa ʻo e kalasí ha ngaahi ʻilo ʻe ala tokoni ʻi he Tokāteline mo e Ngaahi Fuakava 107:1–4, 18–20 (vakai foki, Tuʻu Maʻu ʻI He Tuí, 94–99). ʻOku tokoni fēfē ʻa e lakanga fakataulaʻeikí ke tau maʻu ʻa e “ngaahi meʻa lilo ʻo e puleʻanga ʻo e langí” pea “fakaava mai kiate [kitautolu] ʻa e ngaahi langí”? ʻOku tokoni fēfē ia ke tau “maʻu ʻa e fiefia ʻo e feohi mo e lotolotonga ʻo e ʻOtua ko e Tamaí, mo Sīsuú”? (veesi 19).

Tokāteline mo e Ngaahi Fuakava 107:27–31, 85

ʻOku puleʻi ʻe he ʻEikí ʻa Hono puleʻangá ʻo fakafou ʻi he ngaahi fakataha alēleá.

• Naʻe pehē ʻe Palesiteni M. Lāsolo Pālati: “ʻOku ou ʻiloʻi ko e fakataha alēleá ko e founga ia ʻa e ʻEikí pea naʻá ne fakatupu ʻa e meʻa kotoa pē ʻi he ʻunivēsí ʻo fakafou ʻi ha fakataha alēlea fakalangi” (“Ngaahi Fakataha Alēlea Fakafāmilí,” Ensign pe Liahona, Mē 2016, 63). Te ke tokoni fēfē ke mahino ki he niʻihi ʻokú ke akoʻí ʻa e founga ke fealēleaʻaki fakataha ai ʻi ʻapí pea mo e lotú? ʻE lava ke ke kole ki ha kau mēmipa ʻe niʻihi ke nau haʻu mateuteu ke vahevahe ʻenau aʻusia ʻi he lotú pe ʻi ʻapí ʻa ia ne nau fakaʻaongaʻi ai ʻa e ngaahi tefitoʻi moʻoni ʻo e fealēleaʻakí ʻi he Tokāteline mo e Ngaahi Fuakava 107:27–31, 85 (pe ʻi he lea ʻa Palesiteni Pālati naʻe lave ki ai ʻi ʻolungá). Fakakaukau ke fakaafeʻi ʻa e kau mēmipa ʻo e kalasí he lolotonga ʻo e uiké ke nau haʻu ki he kalasí ʻoku nau mateuteu ke vahevahe ha ngaahi fakakaukau ki he meʻa ʻokú ne ʻai ha fakataha alēlea ke ola lelei. Poupouʻi e kau mēmipa ʻo e kalasí ke nau fakahaaʻi e ngaahi tefitoʻi moʻoni ʻoku nau ako mei he fealeaʻaki ko ʻení ʻe tokoni ke ola lelei ange ʻenau kau ki he ngaahi fakataha alēlea he kahaʻú ʻi ʻapi pea mo e lotú.

  

  Ko e fealēleaʻaki fakatahá ko ha founga ia ʻe taha ʻoku fakahoko ʻaki ʻe he ʻEikí ʻa ʻEne ngāué.

Ngaahi Maʻuʻanga Tokoni Kehé

Mafai ʻo e lakanga fakataulaʻeikí.

Naʻe akoʻi ʻe Palesiteni Tāleni H. ʻOakesi ʻo pehē:

“ʻOku ʻikai ke tau anga ʻi he lea ki he houʻeiki fafiné ʻoku nau maʻu e mafai ʻo e lakanga fakataulaʻeikí ʻi honau uiuiʻi faka-Siasí, ka ko e toe mafai fē ia? Ko e taimi ʻoku vaheʻi ai ha fefine—kei talavou pe toulekeleka—ke ne malanga ʻaki ʻa e ongoongoleleí ko ha faifekau taimi kakató, ʻoku foaki kiate ia ʻa e mafai ʻo e lakanga fakataulaʻeikí ke ne fakahoko ha fatongia ʻo e lakanga fakataulaʻeikí. ʻOku tatau pē mo ha fefine ʻoku vaheʻi ke ngāue ko ha ʻōfisa pe faiako ʻi ha houalotu ʻa e Siasí ʻi he malumalu ʻo e tataki ʻa ha taha ʻokú ne maʻu ʻa e ngaahi kī ʻo e lakanga fakataulaʻeikí. Ko hai pē ʻoku ngāue ʻi ha tuʻunga pe uiuiʻi ne maʻu mei ha taha ʻokú ne maʻu ʻa e ngaahi kií, ʻokú ne ngāue ʻaki ʻe ia e mafai ʻo e lakanga fakataulaʻeikí ʻi hono fakahoko hono ngaahi fatongia kuo vahe angé” (“Ko e Ngaahi Kī mo e Mafai ʻo e Lakanga Fakataulaʻeikí,” Ensign pe Liahona,Mē 2014, 50–51).

Naʻe pehē ʻe Palesiteni M. Lāsolo Pālati:

“ʻOku mohu ʻaloʻofa ʻetau Tamai Hēvaní ʻaki Hono mālohí. ʻOku lava ke maʻu ʻe he kakai tangata mo e houʻeiki fafine kotoa e mālohi ko ʻení ke tokoni ʻi heʻenau moʻuí. ʻE lava ke maʻu ʻe kinautolu kotoa kuo nau fai e fuakava toputapu mo e ʻEikí pea fakaʻapaʻapaʻi e ngaahi fuakava ko iá ha fakahā fakataautaha, ke faitāpuekina ʻi he tauhi mai ʻa e kau ʻāngeló, ke fefolofolai mo e ʻOtuá, ke maʻu ʻa e kakato ʻo e ongoongoleleí, pea ko hono tumutumú, ke hoko ʻa e kau ʻea-hoko fakataha mo Sīsū Kalaisí, ki he meʻa kotoa ʻoku ʻa ʻetau Tamaí” (“Men and Women in the Work of the Lord,” New Era, Apr. 2014, 4–5).

Fakatupulaki ʻEtau Founga Akoʻí

Tokoni ke felangakihakeʻaki ʻa e kau akó. “Ko e tokotaha fakafoʻituitui kotoa pē ʻi hoʻo kalasí ko ha maʻuʻanga tokoni fungani ia ʻo e fakamoʻoní, ʻiló, mo e taukei ʻi hono moʻui ʻaki e ongoongoleleí. Fakaafeʻi kinautolu ke nau vahevahe atu pea mou felangakihakeʻaki” (Ko e Faiako ʻi he Founga ʻa e Fakamoʻuí, 5).