ulo ʻa e laʻaá ʻi he ngaahi ʻaó

20–26 Sepitema

Tokāteline mo e Ngaahi Fuakava 106–108

“Ke Fakaava Mai … ʻa e Ngaahi Langí”

Naʻe akonaki ʻa ʻEletā ʻUlaisesi Soalesi ʻo pehē, “ʻOku fie maʻu ke tau nofo [ʻi he Fakamoʻuí], fakaʻutumauku ʻi he folofolá, fiefia ʻi ai, ako ʻEne tokāteliné, pea feinga ko ia ke moʻui ʻi he founga naʻá Ne moʻui ʻakí” (“ ʻE Mahino Fēfē Kiate Au?” Ensign pe Liahona Mē 2019, 7). ʻI hoʻo fakaʻutumauku ʻi he Tokāteline mo e Ngaahi Fuakava 106–8, hiki ha ngaahi founga te ke lava ʻo fāifeinga ai ke moʻui ʻaki e ngaahi moʻoni ʻokú ke ʻiló.

Lekooti e Ngaahi Ongo ʻOkú ke Maʻú

ʻI he fuofua vakai ki he Tokāteline mo e Ngaahi Fuakava 107 hangē ʻoku fekauʻaki pē ia mo hono fokotuʻu ʻo e ngaahi lakanga ʻo e lakanga fakataulaʻeikí ki ha faʻunga fakatakimuʻa ki he Siasi ʻo e ʻEikí. Ko hono moʻoní, ʻi he taimi naʻe pulusi ai e fakahā ko ʻení, naʻe ʻosi tokolahi ange e kāingalotu ʻo e Siasí ʻi he kau taki toko siʻi ne ʻosi fokotuʻú. Ko ia naʻe ʻaonga mo tokoni moʻoni hono fakaʻauliliki e ngaahi fatongia mo e ngafa ʻo e Kau Palesitenisī ʻUluaki, Kōlomu ʻo e Toko Hongofulu Mā Uá, Kau Fitungofulú, kau pīsopé, mo e kau palesitenisī ʻo e kōlomú. Ka naʻe mahulu atu e fakahinohino fakalangi ʻi he vahe 107 ʻi hono fakahinohinoʻi pē e founga ke fokotuʻu ʻaki e ngaahi lakanga mo e ngaahi kōlomu ʻo e lakanga fakataulaʻeikí. ʻOku akoʻi heni ʻe he ʻEikí fekauʻaki mo ha founga fakakuongamuʻa ʻo e lakanga fakataulaʻeikí “naʻe fokotuʻu … ʻi he ngaahi ʻaho ʻo ʻĀtamá” (veesi 41). Ko hono taumuʻá mei he kamataʻangá ke malava e fānau ʻa e ʻOtuá—kau ai koe—ʻo maʻu e ngaahi ouau fakamoʻui ʻo e ongoongoleleí pea fiefia ʻi he “ngaahi tāpuaki fakalaumālie kotoa pē ʻo e siasí—ke maʻu ʻa e faingamālie ʻo hono maʻu ʻo e ngaahi meʻa lilo ʻo e puleʻanga ʻo e langí, pea ke fakaava mai kiate kinautolu ʻa e ngaahi langí” (veesi 18–19).

fakaʻilonga ʻo e ako fakatāutahá

Ngaahi Fakakaukau ki Hono Ako Fakataautaha ʻo e Folofolá

Tokāteline mo e Ngaahi Fuakava 106; 108

ʻOku fakahinohinoʻi, fakalotolahiʻi, mo poupouʻi ʻe he ʻEikí ʻa kinautolu ʻokú Ne ui ki he ngāué.

Naʻe ʻomi ʻe he ʻEikí ʻi he Tokāteline mo e Ngaahi Fuakava 106 mo e 108, ha faleʻi mo e ngaahi talaʻofa ki ha toko ua ne uiuiʻi ke ngāue ʻi he Siasí. Ko e hā ha ngaahi kupuʻi lea ʻi he fakahā ko ʻení ʻokú ne fakalotolahiʻi mo ʻoatu ha ngaahi fakakaukau ki hoʻo ngāue ʻi he puleʻanga ʻo e ʻOtuá? Ko ha meʻa ʻeni ʻe ua ke fakakaukau ki ai:

• Kuó ke maʻu fēfē ʻa e “ʻofa mo e tui pau” ke ke malava ai ʻo “tuʻu”? (Tokāteline mo e Ngaahi Fuakava 106:8).

• Te ke lava fēfē ʻo “tokanga lahi ange ʻo fai atu mei heni ʻi he tauhi hoʻo ngaahi fuakavá”? (Tokāteline mo e Ngaahi Fuakava 108:3).

Ko e hā mo ha toe ngaahi kupuʻi lea kehe ʻi he vahe 106 mo e 108 ʻoku mahuʻinga kiate koe?

Vakai foki, Russell M. Nelson, “Ko e Ngāue Fakaetauhi ʻi he Mālohi mo e Mafai ʻo e ʻOtuá,” Ensign pe Liahona, Mē 2018, 68–75.

Tokāteline mo e Ngaahi Fuakava 107

ʻOku tataki ʻe he ʻEikí ʻa Hono Siasí ʻo fakafou ʻi he mafai ʻo e lakanga fakataulaʻeikí.

ʻI hoʻo ako ki hono Fakafoki Mai ʻo e ongoongoleleí, mahalo naʻá ke fakatokangaʻi ʻoku ʻikai faʻa fakamatalaʻi kakato ʻe he ʻEikí ha tokāteline ʻi ha fakahā ʻe taha. Ka ʻokú Ne fakahā mai ʻa e ngaahi meʻá ʻi he “ʻotu lea ki he ʻotu lea” (Tokāteline mo e Ngaahi Fuakava 98:12) ʻi he taimi ʻoku fie maʻu ai ki he ngaahi tūkungá. Neongo naʻe ʻomi ʻe he ʻEikí kimuʻa ha fakahinohino fekauʻaki mo e lakanga fakataulaʻeikí ʻo kamata ʻi he 1829 (vakai ki ha sīpinga, vahe 20 mo e 84), ka naʻá Ne toe ʻomi ha fakahinohino ki he Kāingalotú ʻi he 1835 fekauʻaki mo e ngaahi lakanga pau ʻo e lakanga fakataulaʻeikí ne fie maʻu ke puleʻi mo tataki ʻaki ʻEne tākanga ne fakautuutu honau tokolahí.

ʻI hoʻo lau fekauʻaki mo e ngaahi lakanga ko ʻeni ʻo e lakanga fakataulaʻeikí, fakakaukau ki he founga te ke lava ai ʻo poupouʻi ʻa kinautolu ʻoku ngāue ʻi he ngaahi fatongiá ni ʻaki hoʻo “falala, tui, mo e (ngaahi) lotú” (Tokāteline mo e Ngaahi Fuakava 107:22).

• Kau Palesitenisī ʻUluakí mo e Palesiteni ʻo e Siasí (veesi 9, 21–22, 65–66, 91–92)

• Kau ʻAposetolo ʻe Toko Hongofulu Mā Uá (veesi 23–24, 33–35, 38, 58)

• Kau Fitungofulú (veesi 25–26, 34, 93–97)

• Kau pīsopé (veesi 13–17, 68–76, 87–88)

Tokāteline mo e Ngaahi Fuakava 107:1–20

‘Oku ʻomi ʻe he ngaahi ouau ʻo e lakanga fakataulaʻeikí ha ngaahi tāpuaki fakalaumālie mo fakatuʻasino ki he fānau kotoa ʻa e Tamai Hēvaní.

Naʻe akonaki ʻa ʻEletā Nila L. ʻEnitasoni ʻo pehē: “Ko e lakanga fakataulaʻeikí ko e mālohi mo e mafai ia ʻo e ʻOtuá naʻe ʻomi ke fakamoʻui mo tāpuekina ʻaki e taha kotoa—ʻa e tangata, fefine, mo e fānau. … ʻI heʻetau moʻui tāú, ʻoku fakalahi ʻe he lakanga fakataulaʻeikí ʻetau moʻuí ʻi he māmaní pea teuteuʻi kitautolu ki he ngaahi talaʻofa nāunauʻia ʻo e maama ka hokó” (“Mālohi ʻi he Lakanga Fakataulaʻeikí,” Ensign pe Liahona, Nōvema 2013, 92). ʻI hoʻo lau e Tokāteline mo e Ngaahi Fuakava 107:1–20 (vakai tautautefito ki he veesi 18–20) mo e toenga ʻo e pōpoaki ʻa ʻEletā ʻEnitasoní, fakakaukau ke hiki ʻa e ngaahi ongo ʻokú ke maʻu fekauʻaki mo e founga ʻoku fakaleleiʻi ai ʻe he mālohi ʻo e ʻOtuá ʻa hoʻo moʻui ʻi he māmaní mo teuteuʻi koe ki he nofo taʻengatá. Ko e hā ʻokú ke fai ke maʻu kakato ange ai—mo tokoniʻi e niʻihi kehé ke nau maʻu—e ngaahi tāpuaki ko iá?

Vakai foki, Tokāteline mo e Ngaahi Fuakava 84:19–27; Dallin H. Oaks, “Ko e Ngaahi Kī mo e Mafai ʻo e Lakanga Fakataulaʻeikí,” Ensign pe Liahona, Mē 2014, 49–52.

Tokāteline mo e Ngaahi Fuakava 107:41–57

ʻOku faitāpuekina ʻe he lakanga fakataulaʻeikí ʻa e ngaahi fāmilí.

Naʻe loto ʻa ʻĀtama ke faitāpuekina hono hakó ʻaki e lakanga fakataulaʻeikí. Ko e hā e ngaahi talaʻofa naʻá ne maʻú? (vakai, veesi 42, 55). ‘I hoʻo lau fekauʻaki mo e meʻa naʻe fakahoko ʻe ʻĀtamá, fakakaukau ki hoʻo ngaahi holi ke fiefia ho fāmilí ʻi he ngaahi tāpuaki ʻo e lakanga fakataulaʻeikí. Ko e hā ʻokú ne ueʻi koe ke ke fai ke tokoni ke maʻu ʻe hoʻo fāmilí e ngaahi tāpuaki ko ʻení?

Ko e tāpuakiʻi ʻe ʻĀtama hono hakó

Adam Blessing His Posterity, tā ʻe Clark Kelley Price

fakaʻilonga ʻo e ako fakafāmilí

Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí

Tokāteline mo e Ngaahi Fuakava 106:6.Ko e hā ʻe lava hotau fāmilí ʻo fai ke fakatupu ai ʻa e “fiefia ʻi he langí”?

Tokāteline mo e Ngaahi Fuakava 107:22.Ko e hā ʻoku tau fai ke poupouʻi hotau kau takí ʻi he “falala, tui, mo e lotu”?

Tokāteline mo e Ngaahi Fuakava 107:27–31, 85.ʻE lava foki ʻe he ngaahi tefitoʻi moʻoni ʻokú ne tataki e ngaahi fakataha alēlea ʻa e Siasí ʻo tokoniʻi kitautolu ʻi heʻetau fealēleaʻaki fakataha fakafāmilí. Ko e hā ha ngaahi tefitoʻi moʻoni ʻi he ngaahi vēsí ni te tau lava ʻo fakaʻaongaʻi ʻi heʻetau fakataha alēlea fakafāmilí? (Vakai, M. Russell Ballard, “Ngaahi Fakataha Alēlea Fakafāmilí,” Ensign pe Liahona, Mē 2016, 63–65.)

Tokāteline mo e Ngaahi Fuakava 107:99–100.‘Oange ki ha mēmipa ʻo e fāmilí ha ngaahi fakahinohino kuo tohi ki ha ngāue fakaʻapi, pea fakaafeʻi ia ke ne fili e founga ke fakahoko ʻaki e ngāué: faivelenga, fakapikopiko, pe ʻikai lau e ngaahi fakahinohinó. Tuku ke mamata e toenga ʻo e fāmilí ki heʻene fakahoko e ngāué pea mateʻi e founga naʻe fili ʻe he mēmipa ʻo e fāmilí. Tuku ange leva ki he toenga ʻo e kau mēmipa ʻo e fāmilí ke nau fakahoko ha ngāue. Ko e hā ʻoku fie maʻu ai ʻe he ʻEikí ke tau fakatou ako hotau ngaahi fatongiá mo fakahoko faivelenga kotoa kinautolú? (Vakai, Becky Craven, “Tokangá mo e Fakavaʻivaʻingá,” Ensign pe Liahona, Mē 2019, 9–11.)

Tokāteline mo e Ngaahi Fuakava 108:7.Te tau lava fēfē ʻo fefakamālohiaʻaki ʻi heʻetau fepōtalanoaʻakí? ʻi heʻetau lotú? ʻi heʻetau valokí, pe fakalotolahí? ʻi heʻetau ngaahi ngāue kotoa pē? Te mou lava ʻo fili ha taha ʻo e ngaahi meʻá ni ke mou ngāue fakafāmili ki ai.

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu fakalēsoni ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Hiva ʻoku fokotuʻu atú: “Mou Omi ʻo Fanongoa,” Ngaahi Himí,fika 12.

Fakatupulaki e Ako Fakatāutahá

Lekooti ʻo e ngaahi ongó. ʻI he taimi ʻokú ke maʻu ai e ngaahi ongo pe fakakaukau fakalaumālié, lekooti kinautolu. ‘I hoʻo fai iá, ʻokú ke fakahā ai ki he ʻEikí ʻokú ke mahuʻingaʻia Heʻene fakahinohinó. (Vakai, Ko e Faiako ʻi he Founga ʻa e Fakamoʻuí, 12, 30.)

ʻOku tāpuakiʻi ʻe Melekisēteki ʻa ʻEpalame

Melchizedek Blesses Abram, tā ʻe Walter Rane