20–26 Sepitema

Tokāteline mo e Ngaahi Fuakava 106–108

“Ke Fakaava Mai … ʻa e Ngaahi Langí”

Fakalaulauloto ki he meʻa ʻokú ke ʻilo fekauʻaki mo e fānau ʻokú ke akoʻí. Ko e hā e faʻahinga ʻekitivitī te ne ʻomi kinautolu ke ofi ange ki he Fakamoʻuí? Manatuʻi, ʻe lava pē ke liliu e ngaahi ʻekitivitī ʻi he fokotuʻutuʻu ko ʻení maʻá e fānau iiki angé ki he fānau lalahi angé pea mo e ngaahi ʻekitivitī maʻá e fānau lalahi angé ki he fānau iiki angé.

Lekooti Hoʻo Ngaahi Ongó

Fakaafeʻi e Feʻinasiʻakí

Fakaʻaliʻali ki he fānaú ha ngaahi fakatātā ʻo e kau taki ʻo e Siasí, hangē ko e palōfitá, kau ʻAposetoló, ko e Kau Palesitenisī Lahi ʻo e Palaimelí, mo e kau Taki mo e ʻŌfisa Māʻolunga kehé. Fakaafeʻi e fānaú ke nau talanoa fekauʻaki mo e meʻa ʻoku fai ʻe he kau taki ko ʻení mo e ʻuhinga ʻoku nau houngaʻia ai ʻiate kinautolú.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 107:18–20, 42–56

ʻOku tāpuekina au koeʻuhí ko e lakanga fakataulaʻeikí.

ʻE lava ke maʻu ʻe he fānau kotoa ʻa e Tamai Hēvaní e ngaahi tāpuaki ʻoku maʻu mei he lakanga fakataulaʻeikí. Fakakaukau ki ha ngaahi founga te ke lava ʻo tokoni ai ki he fānau ʻokú ke akoʻí ke nau ongoʻi houngaʻia he ngaahi tāpuaki ko iá.

Ngaahi ʻEkitivitī ʻe Ala Fakahokó

• Tā ʻi he palakipoé ha fakatātā ke fakafofongaʻi hono “fakaava mai kiate [kitautolu] ʻa e ngaahi langí” (Tokāteline mo e Ngaahi Fuakava 107:19) koeʻuhí ko e lakanga fakataulaʻeikí (hangē ko e maama mai ʻa e ngaahi hueló ʻi ha konga ʻao). ʻOange ki he fānaú ha ngaahi fakatātā ʻokú ne fakafofongaʻi e ngaahi tāpuaki ʻoku maʻu mei he lakanga fakataulaʻeikí, hangē ko e papitaisó, sākalamēnití, mo e temipalé. Fakaafeʻi kinautolu ke vahevahe e ʻuhinga ʻoku nau houngaʻia ai he ngaahi tāpuaki ʻi heʻenau fakatātaá, pea tuku ke nau fakapipiki ʻenau fakatātaá ʻi he ngaahi huelo ʻi he palakipoé. Fakahoko hoʻo fakamooní te tau lava ʻo maʻu e ngaahi tāpuaki ko iá koeʻuhí naʻe fakafoki mai ʻe he Tamai Hēvaní e lakanga fakataulaʻeikí.

• Tā ha foʻi hala ʻi he falikí, pea ʻoange ki he fānaú ha ngaahi fakatātā ʻo e ngaahi ouau ʻo e lakanga fakataulaʻeikí ʻa ia te nau fie maʻu kae lava ke nau muimui ʻi he hala ke foki ki he Tamai Hēvaní (vakai, Tohi Fakatātā ʻo e Ongoongoleleí, fika 103–8, 119–20). Tokoni ki he fānaú ke fokotuʻu fakahokohoko e ngaahi ouaú ʻi he foʻi halá.

• Fakaʻaliʻali ha fakatātā ʻo ʻĀtama mo ʻIvi mo hona fāmilí (vakai ki he peesi ʻekitivitī ʻo e uike ní pe Tohi Fakatātā ʻo e Ongoongoleleí, fika 5). ʻI he vakai ʻa e fānaú ki he fakatātaá, ʻeke ange pe ko e hā e ongo ne maʻu ʻe ʻĀtama mo ʻIvi ki hona fāmilí. Fakaʻaongaʻi e Tokāteline mo e Ngaahi Fuakava 107:53–56 ke vahevahe mo e fānaú e meʻa ne fai ʻe ʻĀtama ke fakahaaʻi ʻene ʻofa hono fāmilí. Fakahoko hoʻo fakamoʻoní ki he founga kuo tāpuekina ai koe mo ho fāmilí ʻe he lakanga fakataulaʻeikí.

• Fakalau e kau mēmipa ʻo e fāmilí naʻe fakanofo ʻe ʻĀtama ki he lakanga fakataulaʻeikí, ʻo fakatatau ki he Tokāteline mo e Ngaahi Fuakava 107:42–50, pea kole ki he fānaú ke nau lau pe ko e kakai ʻe toko fiha naʻá ne fakanofó. Tokoniʻi ke mahino kiate kinautolu e ʻuhinga ne mei fie maʻu ai ʻe ʻĀtama ke maʻu ʻe he kau mēmipa kotoa hono fāmilí e lakanga fakataulaʻeikí. Fakaafeʻi e fānaú ke talanoa fekauʻaki mo e ngaahi taimi naʻa nau maʻu ai pe ko honau fāmilí ha ngaahi tāpuaki ʻo fakafou he lakanga fakataulaʻeikí.

Tokāteline mo e Ngaahi Fuakava 108:7

Te u lava ʻo fakamālohia e niʻihi kehé.

Naʻa mo e fānau īkí, te nau lava ʻo muimui he faleʻi ke fakamālohia e niʻihi kehé “ʻi [heʻenau] ngaahi lea kotoa pē, pea ʻi [heʻenau] ngaahi lotu kotoa pē, … pea ʻi [heʻenau] ngaahi ngāue kotoa pē.”

Ngaahi ʻEkitivitī ʻe Ala Fakahokó

• Tā ha tokotaha ʻi he palakipoé, pea kole ki he fānaú ke nau talaatu ha ngaahi meʻa ʻe lava ʻe he tokotahá ʻo fakahoko ke mālohi fakatuʻasino ange ai. (Te ke lava ʻo tā ha ngaahi uoua lalahi ange ʻi he tokotahá ʻi hono talaatu ʻe he fānaú e ngaahi meʻá). Lau e Tokāteline mo e Ngaahi Fuakava 108:7, pea kole ki he fānaú ke nau fakafanongo ki ha ngaahi founga te tau lava ai ʻo “fakamālohia [hotau] kāingá.” Fakamatalaʻi ha faʻahinga foʻi lea pē ʻe ngali faingataʻa.

• Tokoni ki he fānaú ke nau fakakaukau ki ha kakai ʻoku nau ʻilo te nau ala fie maʻu ke fakamālohia kinautolú. Ko e hā te tau lava ʻo lea ʻaki pe fai maʻanautolú? Ngāue fakataha ke faʻu ha ngaahi kaati maʻá e kakai ko ʻení, pe poupouʻi e fānaú ke nau manatuʻi kinautolu ʻi heʻenau ngaahi lotu fakataautaha mo fakafāmilí.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 107:1–8, 13–14, 18–20

ʻE tokoni mai e lakanga fakataulaʻeikí ke u foki ki he Tamai Hēvaní.

Naʻe fakafoki mai e Lakanga Taulaʻeiki Faka-Melekisētekí mo e Faka-ʻĒloné ke tokoni ke fakafoki e fānau ʻa e ʻOtuá kiate Ia. Tokoni ke mahino ki he fānau ʻokú ke akoʻí e ngaahi fatongia kehekehe ʻo e lakanga fakataulaʻeikí mo e founga ʻoku nau tokoni mai ai ke tau foki ki he ʻOtuá.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau fekumi ʻi he Tokāteline mo e Ngaahi Fuakava 107:1–8, 13–14, 18–20 ki ha ngaahi foʻi lea mo ha kupuʻi lea mahuʻinga ʻokú ne akoʻi kinautolu fekauʻaki mo e lakanga fakataulaʻeikí. Ko e hā ha ngaahi fatongia ʻoku maʻu ʻe he kau maʻu lakanga fakataulaʻeikí? ʻOku tokoniʻi fēfē nai kitautolu ʻe he lakanga fakataulaʻeikí ke tau foki ki he ʻOtuá?

• Hiki e ngaahi fehuʻi ʻe lava ʻo tali ʻi he Tokāteline mo e Ngaahi Fuakava 107:1–8, 13–14, 18–20, hangē ko e “Ko e hā ha hingoa ʻe taha ki he Lakanga Taulaʻeiki Faka-Melekisēteki??” Tuku ange ki he fānaú ha ngaahi miniti siʻi ke nau kumi ʻi he ngaahi vēsí e ngaahi tali ki he lahi taha ʻo e ngaahi fehuʻi te nau ala lavá. Vahevahe mo e fānaú e ngaahi tāpuaki kuó ke maʻu ne fakafou mai ʻi he lakanga fakataulaʻeikí.

• Laukonga mo e fānaú fekauʻaki mo Melekisēteki ʻi he Fakahinohino ki he Ngaahi Folofolá (scriptures.ChurchofJesusChrist.org). Ko e hā ʻoku tau ako mei heʻene moʻuí fekauʻaki mo e ʻuhinga ke ngāue ʻaki e mafai ʻo e lakanga fakataulaʻeikí?

Tokāteline mo e Ngaahi Fuakava 107:21–26, 33–35, 65–66

ʻOku taki ʻe he kau tamaioʻeiki ʻa e ʻEikí kuo filí, ʻa Hono Siasí.

Ko e hā ha ngaahi aʻusia kuó ne fakatupulaki hoʻo fakamoʻoni ki he kau taki ʻo e Siasí? Te ke tokoni fēfē ki he fānaú ke fakatupulaki ʻenau ngaahi fakamoʻoní?

ʻOku akoʻi mai ʻe he palōfitá ʻa e meʻa ʻoku finangalo e ʻOtuá ke tau ʻiloʻí.

Ngaahi ʻEkitivitī ʻe Ala Fakahokó

• Fakaʻaliʻali he palakipoé ha fakatātā ʻo e Kau Taki mo e Kau ʻŌfisa Māʻolungá mei ha pulusinga ʻo ha konifelenisi kimuí ni mai ʻi he Liahoná. ʻI hono lau ʻe he fānaú e Tokāteline mo e Ngaahi Fuakava 107:21–26, 33–35, 65–66, fakaafeʻi kinautolu ke hiki ʻi he palakipoé e meʻa ʻoku nau ako fekauʻaki mo e ngaahi fatongia ʻo ha niʻihi ʻo e kau taki ko ʻení. Ko e hā ʻoku tau houngaʻia ai ʻi heʻenau fakahinohinó? Fevahevaheʻaki e founga naʻá ke maʻu ai ha fakamoʻoni ki he kau palōfitá mo e kau ʻaposetoló.

• Hiki ʻi he palakipoé e ngaahi foʻi lea loto-falala, tui, mo e lotu. Fehuʻi ki he fānaú e founga te tau lava ai ʻo poupouʻi e Kau Palesitenisī ʻUluaki ʻo e Siasí ʻaki ʻetau loto-falalá, tuí mo e lotú (vakai, Tokāteline mo e Ngaahi Fuakava 107:22). Ko e hā ʻoku mahuʻinga ai ke tau poupouʻi e kau tamaioʻeiki ʻa e ʻEikí kuo filí?

Tokāteline mo e Ngaahi Fuakava 108:3

ʻI heʻeku moʻui tokanga ʻaki ʻeku ngaahi fuakavá, ʻokú ne ʻomi ha ngaahi tāpuaki.

Fakalaulauloto ki he founga te ke lava ai ʻo tokoniʻi e fānau ʻokú ke akoʻí ke nau “tokanga lahi ange … ʻi hono tauhi [ʻenau] ngaahi fuakavá.” ʻE tāpuekina fēfē kinautolu ʻi he taimí ni mo e kahaʻú ʻi heʻenau fai ʻení?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau fakahoko ha meʻa ʻe fie maʻu ai ke nau tokanga ka nau lavameʻa, hangē ko ha feinga ke fakafonu ha ipu ʻo ʻikai mahua ha meʻi vaí. Ko e hā ʻoku hoko ʻi he taimi ʻoku ʻikai ke tau tokanga aí? Fakaafeʻi kinautolu ke nau lau e Tokāteline mo e Ngaahi Fuakava 108:3 pea kumi e meʻa naʻe kole ke fakahoko tokanga ʻe Laimani Selamaní. Lisi mo e fānaú e ngaahi palōmesi ʻoku nau fakahoko mo e Tamai Hēvaní ʻi heʻenau papitaisó mo hono maʻu e sākalamēnití. Tokoniʻi kinautolu ke fakakaukau ki ha ngaahi founga te nau lava ai ʻo tokanga ʻi hono tauhi e ngaahi palōmesi ko ʻení.

• Hivaʻi mo e fānaú ha foʻi hiva fekauʻaki mo hono tauhi ʻo e ngaahi fuakavá, hangē ko e “Te u Loto-toʻa” (Tohi Hiva ʻa e Fānaú, 85). Tokoni kiate kinautolu ke faʻu ha fakaʻilonga mo ha kupuʻi lea mei he foʻi hivá te ne fakamanatu ange ke tauhi ʻenau ngaahi fuakavá, pea poupouʻi kinautolu ke fakaʻaliʻali ʻenau fakaʻilongá ʻi ʻapi.

• ʻOange ki he fānaú ha ngaahi konga ʻo e lea ʻa Sisitā Peki Kuleiveni ko e “Tokangá mo e Fakavaʻivaʻingá” (Ensign pe Liahona, Mē 2019, 9–11), pea kole ange ke nau vahevahe ha meʻa ʻokú ne ueʻi kinautolu ke nau toe tokanga ange ʻi hono moʻui ʻaki ʻenau ngaahi fuakavá.

Poupouʻi e Ako ʻi ʻApí

Fetuʻutaki maʻu pē ki he mātuʻa ʻa e fānau ʻokú ke akoʻí ke poupouʻi kinautolu ʻi heʻenau feinga ke akoʻi e ongoongoleleí ʻi ʻapí. ʻE lava ke ke talaange kiate kinautolu ha meʻa ne vahevahe ʻe heʻenau fānaú ʻi he Palaimelí ʻa ia ne nau ako ʻi ʻapi.

Fakatupulaki ʻEtau Akoʻí

Liliu ʻa e ngaahi ʻekitivitií ke feau e ngaahi fie maʻú. ʻOua te ke vakai ki he ngaahi fokotuʻutuʻu ko ʻení ko ha ngaahi fakahinohino kuo pau ke ke muimui ki ai. Ka ke fakaʻaongaʻi kinautolu ko ha maʻuʻanga fakakaukau ke fakatupu ai ha ueʻi fakalaumālie kiate koe ʻi hoʻo fakalaulauloto ki he ngaahi fie maʻu ʻo e fānau ʻokú ke akoʻí. Mahalo te ke ongoʻi fakalaumālie ʻi ha taimi ʻe niʻihi ke fulihi ha ʻekitivitī pe tefito maʻá e fānau iiki angé ke akoʻi ki he fānau lalahi angé, pe ko e fulihi e ʻekitivitī maʻá e fānau lalahi angé ki he fānau iiki angé.