Temipale Ketilaní, tā fakatātaaʻi ʻe Al Rounds

30 ʻAokosi–5 Sepitema

Tokāteline mo e Ngaahi Fuakava 94–97

“Ki Hono Fakamoʻui ʻo Saioné”

Fekumi ki ha ueʻi fakalaumālie ke ke ʻilo pe ko e tefitoʻi moʻoni fē mei he vahe 94–97 ke fakamamafaʻi ʻi hoʻo faiakó. Te ke lava ʻo liliu e ngaahi fakakaukau ʻekitivitī maʻá e fānau iiki angé ʻi hoʻo akoʻi e fānau lalahi angé pea mo e ngaahi ʻekitivitī maʻá e fānau lalahi angé ʻi hoʻo akoʻi e fānau iiki angé.

Lekooti Hoʻo Ngaahi Ongó

Fakaafeʻi e Feʻinasiʻakí

Fakaʻaliʻali ki he fānaú ha fakatātā ʻo ha temipale, pea fakaafeʻi kinautolu ke vahevahe e meʻa ʻoku nau ʻilo fekauʻaki mo e ngaahi temipalé. Te nau lava foki ʻo talanoa fekauʻaki mo e ongo ʻoku nau maʻu ʻi he taimi ʻoku nau sio ai ki ha temipalé.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 95:8; 97:15–16

Ko e temipalé ko e fale ia ʻo e ʻEikí.

Naʻa mo e fānau ʻi Ketilaní ne nau tokoni mo kinautolu, ʻi ha fanga kiʻi founga iiki kae ʻuhingamālie, ke langa e Temipale Ketilaní. Tokoni ki he fānau ʻokú ke akoʻí ke fakalahi ʻenau saiʻia he fale toputapu ʻo e ʻEikí.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo e Temipale Ketilaní (vakai, fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Fakaʻaongaʻi ha ngaahi kupuʻi lea mei he Tokāteline mo e Ngaahi Fuakava 95:8 ke akoʻi e fānaú fekauʻaki mo e fekau ʻa e ʻEikí ke langa e temipale ko ʻení. Tuku ke taufetongi e fānaú ʻi hono puke e fakatātaá mo lea “Ko e temipalé ko e fale ia ʻo e ʻEikí”

  

  Naʻe langa ʻe he Kāingalotú ha temipale ke nau ongoʻi ofi ange ai ki he ʻOtuá.

• Talaange ki he fānaú, ʻoku tohi ʻi he temipale kotoa pē ʻa e “Māʻoniʻoni ki he ʻEikí. Ko e Fale ʻo e ʻEikí.” Kapau ʻe lava, fakaʻaliʻali ange ha fakatātā ʻo e ngaahi lea ko ʻení ʻi ha temipale. Ko e hā ʻoku hoko ai e temipalé ko ha feituʻu makehé? Lau e ngaahi kupuʻi lea mei he Tokāteline mo e Ngaahi Fuakava 97:15–16 ʻoku akoʻi ai ko e temipalé ko e fale ia ʻo e ʻEikí, pea vahevahe hoʻo ngaahi ongo fekauʻaki mo e temipalé.

• Fakaafeʻi e fānaú ke pehē pē ʻoku nau tokoni ke langa ha temipale (tutuʻu e papá, tuki e faʻó, vali e holisí, mo e ngaahi alā meʻa peheé). Fakamatalaʻi ange e mahuʻinga ʻo e temipalé ki he ʻEikí, lahi ʻo e ngāue ʻa e Kāingalotú ke langa e Temipale Ketilaní, pea mo e lahi ʻenau feilaulau ki aí (vakai, Kau Māʻoniʻoní, 1:210).

• Hivaʻi fakataha ha foʻi hiva ke tokoni ke ongoʻi ʻapasia e fānaú ki he fale ʻo e ʻEikí, hangē ko e “Fie Siofia ha Temipale” (Tohi Hiva ʻa e Fānaú, 99). Tuku ke vahevahe ʻe he fānaú ʻenau ngaahi ongo fekauʻaki mo e temipalé.

Tokāteline mo e Ngaahi Fuakava 97:8

Te u lava ʻo faitotonu.

ʻI he Tokāteline mo e Ngaahi Fuakava 97:8, naʻe pehē ʻe he ʻEikí ʻoku kau e angatonú ʻi he ngaahi ʻulungaanga ʻo e kakai “ʻoku ou tali ʻa kinautolú.”

Ngaahi ʻEkitivitī ʻe Ala Fakahokó

• Talaange ki he fānaú naʻe akoʻi ʻe he ʻOtuá ʻi he taimi ʻoku tau faitotonu aí, ʻokú Ne tali ʻa kitautolu (vakai, Tokāteline mo e Ngaahi Fuakava 97:8). Vahevahe mo kinautolu ha ngaahi talanoa nounou ʻe niʻihi ʻe tokoni ke mahino kiate kinautolu e ʻuhinga ʻo e faitotonú. ʻE lava ke maʻu e ngaahi talanoa ko ʻení mei hoʻo moʻuí, mei he moʻui ʻa ha taha ʻokú ke ʻilo, pe mei he Kaumeʻá pe Liahoná. Tokoni ki he fānaú ke nau toe talanoaʻi atu pe vahevahe ha ngaahi aʻusia mei heʻenau moʻuí kau ki he faitotonú.

• Tokoni ki he fānaú ke nau ako e ʻuluaki kupuʻi lea ʻo e tefito ʻo e tui hono hongofulu-mā-tolú: : “ʻOku mau tui ʻoku totonu ke faitotonu.” Tokoni ki he fānaú ke nau fakatātaaʻi ha ngaahi sīpinga ʻo e faitotonú mo e taʻe faitotonú. Hangē ko ʻení, ʻe lava ke fakatātaaʻi ʻe he fānaú ha tokotaha ʻokú ne toʻo ha meʻa mei hano tokoua/tuofefine/tuongaʻane peá ne talaange ki heʻenau mātuʻá ne ʻikai ke ne toʻo ʻe ia. Tokoniʻi leva e fānaú ke nau fakatātaaʻi e meʻa tatau ka ʻoku nau tala ai e moʻoní ki heʻenau mātuʻá. Fakamatalaʻi ange ko e faitotonú ʻeni.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 95:1–3, 8, 11–17; 97:10–17

Ko e temipalé ko e fale ia ʻo e ʻEikí.

Fakalaulauloto ki he founga te ke lava ai ʻo fakaʻaongaʻi e ngaahi veesi ko ʻení ke tokoni ke mahino ki he fānaú e mahuʻinga ʻo e temipalé ki he ʻEikí—pea mo ʻene mahuʻinga kiate kitautolú.

Ngaahi ʻEkitivitī ʻe Ala Fakahokó

• Kole ki he fānaú ke nau talanoa fekauʻaki mo e ngaahi taimi ne totonu ai ke nau fai ha meʻa ka ne ʻikai ke nau fai ia he taimi ko iá. Tokoni ki he fānaú ke nau lau e Tokāteline mo e Ngaahi Fuakava 95:3, 8, pea fehuʻi ki he fānaú pe ko e fekau fē ne pehē ʻe he ʻEikí ne teʻeki talangofua ki ai e Kāingalotú. Lau fakataha e veesi 11. Ko e hā ne fie maʻu ke fakahoko ʻe he Kāingalotú ka nau lava ʻo langa ha temipalé? Ko e hā te tau lava ʻo ako mei he talaʻofa ʻa e ʻEikí kiate kinautolú?

• ʻI ha ngaahi kaati, hiki ha ngaahi tefitoʻi moʻoni fekauʻaki mo e temipalé ʻoku maʻu ʻi he Tokāteline mo e Ngaahi Fuakava 95 mo e 97, fakataha mo e ngaahi potufolofolá, pea faʻo e ngaahi kātí ʻi ha kato. Hangē ko ʻení: ʻOku fie maʻu ʻa e feilaulaú ki hono langa ʻo e ngaahi temipalé (Tokāteline mo e Ngaahi Fuakava 97:11–12) mo e Kuo pau ke tau moʻui taau ke hū ki he temipalé (Tokāteline mo e Ngaahi Fuakava 97:15–17). Vahevahe e fānaú ke nau tauhoa. Tuku ke toho ʻe he hoa takitaha ha kaati mei he kató pea ngāue fakataha ke lau e potufolofola ʻi he kātí mo talanoa fekauʻaki mo e ʻuhinga ʻo e tefitoʻi moʻoní kiate kinautolú. Tokoni ke mahino ki he fānaú e meʻa ʻoku nau laú ʻo fakatatau mo e fie maʻu.

• Fakaafeʻi ha tokotaha kei siʻi mei homou uōtí pe koló kuo ʻosi hū he temipalé, ke vahevahe ʻene aʻusiá pea talaange ki he fānaú e meʻa ʻe lava ke nau fai ke teuteu ai ki he temipalé.

• Fakaʻaongaʻi e foʻi talanoa “Ko Ho Hala ki he Temipalé” (ʻi he Ngaahi Temipale ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní [makasini makehe ʻo e Ensign pe Liahona, ʻOkatopa 2010], 72–75) ke tokoni ke mahino ki he fānaú e meʻa ʻoku hoko ʻi loto he ngaahi temipalé mo e founga te nau lava ʻo teuteu aí. Te ke lava ʻo ʻoange ki he leka takitaha ha konga ʻo e talanoá ke ne lau pea tuku ke nau vahevahe e meʻa ʻoku nau akó.

• Fakaʻaliʻali ha ngaahi fakatātā ʻo e ngaahi temipalé, pea fakaafeʻi e fānaú ke vahevahe ʻenau ongo fekauʻaki mo e hū ʻi he temipalé ʻi ha ʻahó.

• Hivaʻi fakataha ha foʻi hiva fekauʻaki mo e temipalé, hangē ko e “Fie Siofia ha Temipale ha ʻAho” (Tohi Hiva ʻa e Fānaú 99). Ko e ngaahi kupuʻi lea fē ʻi he foʻi hivá ʻokú ne akoʻi mai e ʻuhinga ʻoku toputapu ai e temipalé?

Tokāteline mo e Ngaahi Fuakava 97:1–2, 8–9, 21

Ko e Saioné “ko e loto maʻa.”

Tokoni ki he fānaú ke mahino kiate kinautolu ʻoku ʻikai ko ha feituʻu pē ʻa Saione; ka ko kinautolu foki ia ʻoku “loto-maʻá” (Tokāteline mo e Ngaahi Fuakava 97:21).

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau e Tokāteline mo e Ngaahi Fuakava 97:21, pea fehuʻi ange pe ko e ʻuhinga ki he hā ʻa e foʻi lea “maʻá.” Ke fakatātaaʻí, fakaʻaliʻali ange ha ipu vai sioʻata maʻa, pea aleaʻi e ʻuhinga ʻoku mahuʻinga ai ke tau inu ha vai ʻoku maʻá. Tānaki ha meʻa ki he vaí ke fakaʻuliʻi ia (hangē ko ha kelekele pe efuefu pe pepa [pepper]). Fakaafeʻi e fānaú ke nau toe lau e Tokāteline mo e Ngaahi Fuakava 97:21 pea tuhu ki he foʻi lea “maʻá.” Ko e ʻuhinga ki he hā ʻa e pehē ke maʻa hotau lotó? Tokoni ke mahino ki he fānaú ʻoku ʻikai ʻuhinga e loto-maʻá he ʻikai ke tau teitei fehalaaki. Ko e hā te tau lava ʻo fai ke toe maʻa ange ai hotau lotó? ʻOku tokoniʻi fēfē kitautolu ʻe he Fakamoʻuí?

• Tokoni ki he fānaú ke nau fekumi ʻi he Tokāteline mo e Ngaahi Fuakava 97:1–2, 8–9, 21, ʻo fakasio e ngaahi foʻi lea pe kupuʻi lea ʻokú ne fakamatalaʻi e founga ke maʻa ai hotau lotó. Kole ange ke nau fili ha foʻi lea pe kupuʻi lea, hiki ia ʻi ha laʻipepa, pea faʻo ʻi ha foʻi hina. Toho tahataha mai e ʻū laʻipepá, pea kole ange ki he fānaú ke nau fokotuʻu atu e ngaahi meʻa te nau lava ʻo fai ke fakaʻaongaʻi ai e foʻi fakakaukau ko iá ʻi heʻenau moʻuí. Hangē ko ʻení, ko e hā te tau lava ʻo fai ke tau “ʻiloʻi [ai] ʻa e moʻoní” (veesi 1) pe toe “angatonu” ange aí (veesi 8)?

Poupouʻi e Ako ʻi ʻApí

Fakaafeʻi ʻa e fānaú ke nau fakaʻaongaʻi e peesi ʻekitivitī ki he uike ní ke vahevahe ki honau ngaahi fāmilí ʻa e meʻa ne nau ako he ʻahó ni fekauʻaki mo e temipalé.

Fakatupulaki ʻEtau Akoʻí

Poupouʻi e fānaú ke nau fai ha ngaahi fehuʻi. “Feinga ke ke ʻiloʻi e ngaahi fehuʻi [e fānaú] ko ha ngaahi faingamālie ia, kae ʻikai ko ha fakahohaʻa pe fakatuta ki hoʻo lēsoní. … ʻOku ʻoatu ʻe he faʻahinga fehuʻi peheé ha ʻilo mahuʻinga kiate koe, ki he meʻa ʻoku fakakaukau mo tokanga ki ai e fānaú, pea mo e anga ʻenau tali e meʻa ʻoku nau akó. Tokoni ke nau ʻilo ʻe lava ke maʻu e ngaahi tali ki heʻenau ngaahi fehuʻí mei he folofolá mo e ngaahi lea ʻa e kau palōfita moʻuí” (Faiako ʻi he Founga ʻa e Fakamoʻuí, 25–26).