“13–19 Sepitema. Tokāteline mo e Ngaahi Fuakava 102–105: ‘ʻO Ka Hili ʻa e Faingataʻa Lahí, ʻe Hoko Mai Leva ʻa e Tāpuakí,’” Haʻu, ʻo Muimui ʻIate Au—Maʻá e Lautohi Faka-Sāpaté: Tokāteline mo e Ngaahi Fuakava 2021 (2020)
“13–19 Sepitema. Tokāteline mo e Ngaahi Fuakava 102–105,” Haʻu, ʻo Muimui ʻIate Au—Maʻá e Lautohi Faka-Sāpaté: 2021
C. C. A. Christensen (1831–1912), Zion’s Camp [ʻApitanga ʻo Saioné], fakafuofua ki he 1878, tā ʻaki e vali temipela ʻi he tupenu māsilini, ʻinisi ʻe 78 × 114. Musiume ʻo e Tā Fakatātaá ʻUnivēsiti Pilikihami ʻIongí, meʻaʻofa ʻa e makapuna ʻo C. C. A. Christensen, 1970
13–19 Sepitema
Tokāteline mo e Ngaahi Fuakava 102–105
“ʻO Ka Hili ʻa e Faingataʻa Lahí, ʻe Hoko Mai Leva ʻa e Tāpuakí”
ʻI hoʻo teuteu ke akoʻi ʻa e Tokāteline mo e Ngaahi Fuakava 102–5, fakafanongo ki he ngaahi ueʻi ʻa e Laumālié. ʻE lava ke Ne tataki koe ki he ngaahi tefitoʻi moʻoni ʻoku ʻikai lave ki ai ʻi he lēsoni ko ʻení ʻa ia ʻe tāpuekina ai ʻa e kakai ʻokú ke akoʻí.
Lekooti Hoʻo Ngaahi Ongó
Fakaafeʻi e Feʻinasiʻakí
ʻE lava ke hiki ʻe he kau mēmipa ʻo e kalasí ha veesi ʻe taha pe ua mei he Tokāteline mo e Ngaahi Fuakava 102–5 ʻa ia ʻoku nau ʻiloʻi ʻoku ʻuhingamālie fakafoʻituitui kiate kinautolu. Hili iá ʻe lava leva ke nau fakafetongi veesi mo ha mēmipa ʻe taha ʻo e kalasí pea fealeaʻaki ʻa e meʻa ne nau ako mei he ngaahi veesi ko ʻení.
Akoʻi ʻa e Tokāteliné
Tokāteline mo e Ngaahi Fuakava 103; 105
ʻOku hanga ʻe hotau ngaahi ʻahiʻahí ʻo akoʻi mai ha ngaahi lēsoni mahuʻinga mo ʻomi ha ngaahi aʻusia kiate kitautolu.
-
ʻE lava ke maʻu ʻe he kau akó ha ngaahi tefitoʻi moʻoni ʻe ala tokoni kiate kitautolu lolotonga e ngaahi taimi ʻo e ʻahiʻahí pe fakafepakí mei heʻenau ako ʻa e vahe 103 mo e 105 ʻi he uike ní; tuku ke nau vahevahe ʻa e meʻa ne nau maʻú. Pe te ke fakaafeʻi ke nau fekumi ki he ngaahi tefitoʻi moʻoni ko iá ʻi he Tokāteline mo e Ngaahi Fuakava 103:5–7, 12, 36; 105:5–6, 9–12, 18–19 (vakai foki, “Ngaahi Maʻuʻanga Tokoni Kehé”). Ko e hā e meʻa ʻoku fokotuʻu mai ʻe he ngaahi tefitoʻi moʻoni ko ʻení fekauʻaki mo e founga ʻe lava ke tau fakafōtunga ai ʻi he taimi ʻoku tau fehangahangai ai mo e faingataʻá pe siva e ʻamanakí? Mahalo naʻa fie vahevahe ʻe he kau mēmipa ʻo e kalasí ʻa e ngaahi aʻusia ʻa ia ne hoko ai e ngaahi tāpuakí ʻi he “hili ʻa e faingataʻa lahí” (Tokāteline mo e Ngaahi Fuakava 103:12).
-
Kapau ʻokú ke ongoʻi ʻe ʻaonga ha niʻihi ʻo e ngaahi puipuituʻa fakahisitōlia pe ngaahi fakamatala fakataautaha fekauʻaki mo e ʻApitanga ʻo Saioné, te ke lava ʻo fakaafeʻi ha taha ke ne toe vakaiʻi ha taha ʻo e ngaahi maʻuʻanga tokoni ko ʻení kimuʻa he kalasí pea vahevahe nounou ʻa e meʻa ne nau akó: Kau Māʻoniʻoní, 1:194–206; pe “Ngaahi Leʻo ʻo Hono Fakafoki Mai ʻo e Ongoongoleleí: ʻApitanga ʻo Saioné” (ʻi he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Kapau ʻe lava ke tau fakafoki e taimí ke talanoa ki he kakai ʻo e ʻApitanga ʻo Saioné, ko e hā nai ha meʻa te tau lea ʻaki ke fakalotolahi kiate kinautolu? Ko e hā nai ha meʻa te nau lea ʻaki ke fakalotolahi kiate kitautolu?
ʻĪmisivaitafe siʻisiʻiNaʻe nofo ʻa e ʻApitanga ʻo Saioné ʻi he ongo kauvai ʻo e Vaitafe Taumātaʻu Īkí, ʻoku faitaaʻi hení.
Tokāteline mo e Ngaahi Fuakava 104:11–18
Ko kitautolu kotoa ko ha “tauhi ki he ngaahi tāpuaki fakamāmaní.”
-
Ke tokoni ke ʻaonga fakataautaha ʻa e ngaahi akonaki ʻi he Tokāteline mo e Ngaahi Fuakava 104:11–18, ki he kau mēmipa ʻo e kalasí, te ke lava ʻo fakaafeʻi ke nau fakakaukauloto ʻoku nau tuku ha meʻa mahuʻinga ki ha taha kehe ke ne tokangaʻi. Ko e hā e meʻa te nau lea ʻaki ki he tokotaha ko iá? Ko e hā e meʻa te nau ʻamanaki ʻe fai ʻe he tokotaha ko iá? Hili iá ʻe lava ke lau ʻe he kau mēmipa ʻo e kalasí ʻa e Tokāteline mo e Ngaahi Fuakava 104:11–18 ke ʻiloʻi ʻa e meʻa kuo fakafalala mai ʻe he ʻEikí ke tau tokangaʻí pea mo e meʻa ʻokú Ne fakatuʻamelie mai ke tau faí. Ko e hā ha founga ʻe uesia ai ʻe he ngaahi veesi ko ʻení ʻa e anga ʻo ʻetau fakakaukau ki he māmaní, hotau ngaahi tāpuakí, pe ko e kakai ʻoku tau feohí?
-
Ke tokoni ke mahino ange ki he kau mēmipa ʻo e kalasí ʻa e founga “kuo tuʻutuʻuni ʻe [he] … ʻEikí, ke tauhi ai ʻa [ʻEne] kau māʻoniʻoní” te ke lava ʻo fakaafeʻi kinautolu ke nau lau ʻa e Tokāteline mo e Ngaahi Fuakava 104:11–18 ʻo kumi ki he meʻa ʻoku tau ako fekauʻaki mo e founga ʻa e ʻEikí ke tauhi ai ʻEne Kau Māʻoniʻoní. Te ke lava foki ke vahevahe ʻa e lea ko ʻeni ʻa Palesiteni Melioni G. Lomenī, ko ha konga ʻo hoʻomou fealeaʻakí: “ʻE malava ʻe he ʻEikí … ke tauhi [ʻa e masivá] taʻe kau ai ʻetau tokoní ʻo kapau ko ʻene taumuʻá ia ke fai pehē. … Ka ʻoku tau fie maʻu ʻa e aʻusia ko ʻení; he ʻoku makatuʻunga pē ʻi heʻetau ako ki he founga ke tokangaʻi ai e niʻihi kehé ʻetau fakatupulaki ʻiate kitautolu ʻa e ʻofa faka-Kalaisí mo e ʻulungaanga ʻoku fie maʻu ke fakafeʻungaʻi ai kitautolu ke tau toe foki hake ki hono ʻaó” (“Living Welfare Principles,” Ensign, Nov. 1981, 92). Tuku ha kiʻi taimi maʻá e kau mēmipa ʻo e kalasí ke nau lekooti ʻenau ongo ki he founga ʻe lava ke nau tokoni ai ke tauhi ʻa e niʻihi kehé ʻi he founga ʻa e ʻEikí.
Ngaahi Maʻuʻanga Tokoni Kehé
Ko e mālohi faifakamaʻa ʻo e ngaahi ʻahiʻahí.
Naʻe akoʻi ʻe ʻEletā ʻOasoni F. Uitenī: “ʻOku ʻikai taʻeʻaonga ʻa e mamahi ʻoku hoko mai kiate kitautolú, pea mo e faingataʻa ʻoku tau aʻusiá. ʻOku tokoni ia ki hotau akoʻí, ki hono fakatupulaki ʻo e ngaahi ʻulungaanga lelei hangē ko e kātakí, tuí, loto-mālohí, pea mo e loto-fakatōkilaló. Ko e ngaahi meʻa kātoa ʻoku nau fakamamahiʻi kitautolú mo e ngaahi meʻa kātoa ʻoku tau kātakiʻí, kae fakatautefito pē kapau te tau kātakiʻi ia ʻi he faʻa kātaki fuoloa, ʻoku nau langa hake hotau ʻulungāngá, fakamaʻa hotau ngaahi lotó, fakatupulaki ʻa ʻetau moʻuí, ngaohi kitauotlu ke tau angavaivai mo toe manavaʻofa ange, mo tau taau ange ai ke ui kitautolu ko e fānau ʻa e ʻOtuá … pea ko e ʻilo ko ia naʻa tau omi ke maʻu ʻi he māmaní ʻoku fakafou ia ʻi he mamahí mo e faingataʻaʻiá, ngāué mo e ʻahiʻahí, ʻa ia te ne ngaohi kitautolu ke tau hoko ʻo tatau ange mo ʻetau Tamai pea mo ʻetau Faʻē ʻi hēvaní” (ʻi he Spencer W. Kimball, Faith Precedes the Miracle [1972], 98.)
Naʻe pehē ʻe ʻEletā Tēvita A. Petinā: “ʻE ʻi ai ha taimi ʻi heʻetau moʻuí ʻe fakaafeʻi ai ke tau laka ʻi hotau ʻApitanga ʻo Saioné. ʻE feliliuaki pē ʻa e taimi ʻo e ngaahi fakaafé, pea ʻe kehekehe pē ʻa e ngaahi faingataʻa te tau fehangahangai mo ia ʻi heʻetau fonongá. Ka ko ʻetau tali hokohoko maʻu pē ki he ui pau ko ʻení ʻe iku pē ke ne ʻomi e tali ki he fehuʻí ‘Ko hai ʻoku ʻi he tafaʻaki ʻo e ʻEikí?’“ (“ ʻI he Tafaʻaki ʻo e ʻEikí: Ngaahi Lēsoni mei he ʻApitanga ʻo Saioné,” Liahona, Siulai 2017, 35).
Fakatupulaki ʻEtau Founga Akoʻí
Ngāue fakataha mo e kau mēmipa ʻo e fāmilí. “Koeʻuhí ko ʻapi ʻa e tefitoʻi feituʻu ʻoku moʻui ʻaki mo ako ai e ongoongoleleí, ʻe ola lelei ange hoʻo ngaahi feinga ke fakamālohia ha mēmipa ʻo e kalasí, ʻi he taimi ʻokú ke ngāue fakataha [ai] mo ha … kau mēmipa ʻo [hono] fāmilí.” (Ko e Faiako ʻi he Founga ʻa e Fakamoʻuí, 8–9).