Roksinkil Kim, Taaqehin—Choq’ re li Dominkil Tzoleb’aal

Xkawresinkil aawib’ re k’utuk sa’ li Dominkil Tzoleb’aal

Tento naq li ochoch a’anaq tz’aqal li na’ajej re xtzolb’al li evangelio, sa’ junesal ut jo’ junkab’al. Yaal a’in choq’ aawe laa’at jo’ ajwi’ choq’ reheb’ li tzolb’ileb’ aab’aan. Naq nakakawresi aawib’ re k’utuk, taatikib’ rik’in li k’a’ru nakak’ul laa’at rik’ineb’ li loq’laj hu. Li kawresink-ib’ li q’axal aajel ru taak’ulmanq naq taachalq rik’in li Kristo, taatzoleb’ li loq’laj hu, ut taasik’ aamusiq’ankil xb’aan li Santil Musiq’ej.

Aajel ru li hu Kim, Taaqehin—Choq’ reheb’ li komon ut li junkab’al sa’ li tzolok nakab’aanu aajunes ut sa’ xkawresinkil aawib’ choq’ re li k’utuk. Tatxtenq’a chixtawb’al chik aana’leb’ chirixeb’ li tzol’leb’ re li evangelio li neke’tawman sa’eb’ li loq’laj hu. Taaruuq ajwi’ taak’eheb’ xch’ool ut taab’oqeb’ li komon sa’ li tzoleb’aal chiroksinkil Kim, Taaqehin—Choq’ reheb’ li komon ut li junkab’al re taachaab’ilo’q li tzolok neke’xb’aanu xjuneseb’ ut sa’ junkab’al (re aatenq’ankil chixb’aanunkil a’in, chi’ilmanq “Li na’leb’ re xb’oqb’aleb’ chi tzolok xjuneseb’ ut sa’ junkab’al” sa’ li hu a’in). Naq nakab’aanu chi jo’kan, chiwanq sa’ aach’ool naq te’wanq komon sa’ laa tzoleb’aal li wankeb’ sa’eb’ li ochoch b’ar wi’ ink’a’ naru na’ux xtzolb’aleb’ li loq’laj hu sa’ junkab’al.

Naq yookat chixkawresinkil aawib’, te’chalq li na’leb’ ut li eek’ahom aawik’in chirixeb’ li ani yookat chixtzolb’al, chan ru naq eb’ li na’leb’ sa’eb’ li loq’laj hu te’xkawob’resi lix paab’aaleb’ chirix li qaChoxahil Yuwa’ ut li Jesukristo, ut chan ru naru taatenq’aheb’ chixtawb’aleb’ li na’leb’ a’an naq neke’xtzol xjuneseb’ li loq’laj hu.

Li na’leb’ re k’utuk

Naq yookat chixk’uub’ankil aana’leb’ re k’utuk, naru taataw chik aana’leb’ rik’in li aatin li tusub’anb’il sa’ li hu a’in. Maak’oxla naq tento xtaaqenkileb’ li aatin a’in chi tzoltzo jo’ tz’iib’anb’il; a’an b’an tenq’ re tat-ok chixk’ulb’al li na’leb’ chi musiq’anb’il. Laa’at nakanaw ruheb’ li tzolb’ileb’ aab’aan, ut xkomon chik taatzol chirixeb’ naq nekextzolok sa’ komonil sa’ li tzoleb’aal. Li Qaawa’ naxnaweb’ ajwi’ ru, ut a’an tatxmusiq’a re xnawb’al chan ru us xtenq’ankileb’ li komon sa’ li tzoleb’aal chi kab’lak sa’ xb’een li tzolok chirix li evangelio li yookeb’ chixb’aanunkil sa’ rochocheb’.

Wankeb’ naab’al chik li k’anjeleb’aal naru taawoksi naq nakakawresi aawib’, jo’eb’ li na’leb’ neke’tawman sa’ Kim, Taaqehin—Choq’ reheb’ li komon ut li junkab’al ut sa’eb’ li hu puktesinb’il xb’aan li Iglees. Re xtawb’al chik aana’leb’ chirixeb’ li k’anjeleb’aal a’in ut xkomoneb’ chik, chi’ilmanq li raqal “Xkomon chik li k’anjeleb’aal” sa’ li hu a’in.

Junjunq li na’leb’ li tento taawanq sa’ aach’ool

• Jo’ aj k’utunel, wan jun aanimla k’anjel re xtenq’ankil ut xwaklesinkileb’ li komon, ut kab’lak sa’ xb’een li tzolok chirix li evangelio li neke’xb’aanu a’an sa’ junesal ut sa’ junkab’al. Us ta wankeb’ li komon moko rajlal ta neke’tzolok sa’ rochocheb’, naru taatenq’aheb’ naq taawaklesi xch’ooleb’ chixtzolb’al li evangelio sa’ li ochoch.

• Taachamo’q lix paab’aaleb’ li komon sa’ li tzoleb’aal chirix lix evangelio li Jesukristo a’ yaal jo’ neke’xtaw ru ut neke’xk’anjela li yaalil na’leb’. Waklesiheb’ xch’ool chixtz’iib’ankil ut chixyu’aminkil li na’leb’ neke’xk’ul rik’in li Santil Musiq’ej.

• Li k’utuk maawa’ yal aatinak, ut maawa’ ajwi’ yal xtikib’ankil jun seraq’. Jun laa k’anjel a’an naq taa’uxq li aatinak li nawaklesin aamej, ut rik’in lix k’utumeb’ li loq’laj hu. Tento ajwi’ taawotzeb’ li musiq’anb’il na’leb’ neke’chal aawik’in naq yookat chixtzolb’aleb’ li loq’laj hu.

• Jultikaq aawe naq naab’al reheb’ li komon neke’wan xmusiq’ejil numsihom naq neke’xtzol li loq’laj hu sa’ kab’l. Naru taatenq’aheb’ sa’ xtzolb’al li evangelio wi taak’eheb’ xhoonal chixwotzb’al k’a’ru neke’xtzol sa’ rochocheb’ ut chan ru naq yoo chixjalb’al xyu’ameb’.

• Li qaChoxahil Yuwa’ taaraj naq us tat-elq jo’ aj k’utunel. A’an xk’e k’iila k’anjeleb’aal re aatenq’ankil chi usaak, jo’eb’ li ch’utam reheb’ laj k’utunel. Sa’eb’ li ch’utam a’in naru taak’ul aana’leb’ rik’ineb’ li jun ch’ol chik chi aj k’utunel chirixeb’ li ch’a’ajkilal li yookat chirilb’al. Naru ajwi’ tex’aatinaq chirix li k’utuk jo’ li Kristo, ut teeyal xb’aanunkil.

• Eb’ li komon mas wi’chik neke’tzolok naq neke’ru chi k’utuk. Yalaq jo’q’e naru taakanab’eb’ li komon sa’ laa tzoleb’aal chixk’utb’al jun raqal re li tzolom, ut naru ajwi’ te’xb’aanu li toj saajeb’. Naru taab’aanu a’in a’ yaal jo’ tixtenq’aheb’ li komon, ut a’ yaal jo’ te’ruuq chixb’aanunkil. Wi nakab’oq jun reheb’ li komon sa’ li tzoleb’aal chi k’utuk, numsi li hoonal re xtenq’ankil chixkawresinkil rib’ chi rub’elaj, rik’in roksinkil li na’leb’ sa’ li hu a’in ut sa’ Kim, Taaqehin—Choq’ reheb’ li komon ut li junkab’al. Chijultiko’q aawe naq laa’at li b’oqb’ilat jo’ aj k’utunel, ut wan sa’ aab’een laa’at li k’a’ru taak’utmanq sa’ li tzoleb’aal.

• Li hu a’in naxk’e jun tzolom choq’ re li junjunq xamaan re li chihab’. Sa’eb’ li domingo maak’a’ wi’ jun li Dominkil Tzoleb’aal, eb’ li junkab’al toj te’ril li Tzol’leb’ ut Sumwank sa’ rochocheb’ jo’ chanru tz’iib’anb’il resil sa’ Kim, Taaqehin—Choq’ reheb’ li komon ut li junkab’al. Naru taaq’ax jun li tzolom naq maak’a’ li Dominkil Tzoleb’aal, malaj taajunaji wiib’ oxib’ li tzolom.