tamaitai ma alii i le vasega

O Le Faaaogaina o le Sau, Mulimuli Mai ia te A’u—Mo Le Aoga Sa

Sauniuni e Aoao Atu i le Aoga Sa

E tatau ona avea suesuega a le tagata lava ia ma faaleaiga i le fale ma totonugalemu o le aoaoina o le talalelei. E moni lenei mea mo oe ma i latou e te faiaoga ai. A o e sauni e aoao atu, amata i le mauaina o ni ou lava aafiaga i tusitusiga paia. O lau tapenaga aupito taua lava o le a tupu a o e sau ia Keriso, suesue i tusitusiga paia, ma sailia ia musumusuga a le Agaga Paia.

O le Sau, Mulimuli Mai ia te A’u—Mo Tagata Taitoatasi ma Aiga o se vaega taua o lau suesuega patino faapea ma lau tapenaga e aoao atu. O le a fesoasoani ia te oe e maua ai se malamalama loloto atu o mataupu faaleaoaoga faavae o loo maua i tusitusiga paia. O le a mafai foi e oe ona musuia ma valaaulia tagata o le vasega e faaaoga le Sau, Mulimuli Mai ia te A’u—Mo Tagata Taitoatasi ma Aiga e faalautele ai a latou suesuega faaletusipaia faaletagata lava ia ma faaleaiga (mo se fesoasoani e faia lea mea, tagai “Manatu mo le Faamalosiauina o Suesuega a le Tagata Lava Ia ma Faaleaiga” i le punaoa lenei). A o e faia, manatua ia nofouta i tagata o le vasega atonu o tulaga o o latou aiga e le lagolagoina ai suesuega faaleaiga o tusitusiga paia ma afiafi faaleaiga.

I le taimi o au tapenapenaga, o le a oo mai mafaufauga ma lagona uunai ia te oe e uiga i tagata e te faiaoga ai, pe faapefea ona faamanuiaina o latou olaga i mataupu faavae o loo i mau, ma pe mafai faapefea ona e musuia i latou e sue na mataupu faavae a o latou suesueina mo i latou lava tusitusiga paia.

Manatu e Aoao Atu Ai

A o e saunia e aoao atu, e te ono maua ni lagona musuia faaopoopo e ala i le suesueina o otootoga e aoao atu i lenei punaoa. Aua e te mafaufau i nei manatu faapea o ni faatonuga o lea sitepu ma lea sitepu, ae o ni fautuaga e uunai ai au lava musumusuga. E te iloaina tagata o lau vasega, ma o le a e iloaina atili i latou ao outou aoao faatasi i le vasega. E silafia foi i latou e le Alii, ma o le a Ia musuia oe i auala sili e fesoasoani ai i tagata o le vasega e atinae i luga o le aoaoina o le talalelei o loo latou faia i o latou fale.

E tele isi punaoa o loo maua mo oe e faaaoga a o e tapenapena, e aofia ai manatu o i le Sau, Mulimuli Mai ia te A’u—Mo Tagata Taitoatasi ma Aiga ma mekasini a le Ekalesia. Mo nisi faamatalaga e uiga i nei punaoa ma isi, tagai i le vaega e faaautu “Punaoa Faaopoopo” i lenei punaoa.

O Ni Mea e Manatua

• I le avea ai ma faiaoga, ua ia te oe se tiutetauave taua e lagolago ai, faamalosiau, ma atinae i luga o le aoao ai i le talalelei a tagata o le vasega ma le aiga. A’o le mafai e nisi o tagata o le vasega ona suesueina le talalelei i aso uma i le aiga, e mafai ona e faia se eseesega tele i le uunaia ma fesoasoani ia i latou e faia o latou aiga ia totonugalemu i le aoaoina o le talalelei.

• O le a loloto atu le liua o tagata o le vasega i le talalelei a Iesu Keriso pe a latou malamalama ma faaaoga aoaoga faavae moni. Fautuaina i latou e faamaumau ma faatino lagona uunai latou te maua mai le Agaga Paia.

• O le aoao atu e sili atu nai lo le lauga atu, ae e sili atu foi i le na ona faatautaia o se talanoaga. O se vaega o lau matafaioi o le faamalosiauina lea o le auai lea e faamalamalamaina ai ma e faavae i luga o tusitusiga paia. E tatau foi ona e faasoa atu manatu musuia e te maua ao e suesueina tusitusiga paia.

• Manatua e tele tagata o le vasega e maua aafiaga mamana ao latou suesue i tusitusiga paia i le aiga. E mafai ona e lagolagoina la latou aoaoina o le talalelei e ala i le tuuina atu ia i latou o avanoa e faasoa ai mea ua latou aoaoina i le fale ma le ala ua faatosina ai i o latou olaga.

• E finagalo le Tama Faalelagi ia faamanuiaina oe o se faiaoga. Ua Ia saunia le mau punaoa e fesoasoani ia te oe, e aofia ai ma fonotaga a aufono a faiaoga. I nei fonotaga e mafai ona e fefautuaai ma isi faiaoga e uiga i luitau atonu o feagai ma oe. E mafai foi ona e talanoaina ma faata’ita’i ia mataupu faavae o le aoao atu e faapei o Keriso.

• E sili ona aoaoina tagata pe a latou maua avanoa e aoao atu ai. E i ai taimi, mafaufau e faataga tagata o le vasega, e aofia ai ma le autalavou e aoao atu se vaega o le lesona. Ia faavae lenei faaiuga i luga o manaoga ma tomai o tagata o le vasega. Afai e te valaauliaina se tagata o le vasega e faiaoga, faaalu se taimi e fesoasoani ai ia te ia e vave saunia e ala i le faaaogaina o manatu o loo maua i lenei punaoa ma i le Sau, Mulimuli Mai ia te A’u—Mo Tagata Taitoatasi ma Aiga. Manatua i le avea ai ma faiaoga ua valaauina, ua ia te oe le tiutetauave atoa mo mea e aoao atu i le vasega.

• O lenei punaoa ua aofia ai otootoga e aoao atu mo vaiaso taitasi o le tausaga. O Aso Sa e le faia ai le Aoga Sa, e mafai e aiga ona faaauau le faitauina o le Mataupu Faavae ma Feagaiga i le fale e tusa ai ma le faasologa ua otooto atu i le Sau, Mulimuli Mai ia te A’u—Mo Tagata Taitoatasi ma Aiga. E mafai ona e filifili e misi lesona ia e pau i le vaiaso e le faia ai ni Aoga Sa, pe mafai foi ona e aoao atu lesona e tele i le taimi o se vasega e tasi.