Fa’a’ohipa i te Mai, pe’e mai—nō te Ha’api’ira’a Sābati

Fa’aineine nō te ha’api’i i roto i te Ha’api’ira’a Sābati

’Ia riro te tuatāpapara’a ta’ata hō’ē ’e te tuatāpapara’a ’utuāfare ’ei pū nō te ha’api’ira’a ’evanelia. E parau mau te reira nō ’oe ’e nō te mau ta’ata tā ’oe e ha’api’i ra. ’A fa’aineine ai ’oe nō te ha’api’i, ’a ha’amata nā ni’a i te fāri’ira’a i tō ’oe iho ’ite nō ni’a i te mau pāpa’ira’a mo’a. E tupu tā ’outou fa’aineinera’a faufa’a roa a’e ’a haere mai ai ’outou i te Mesia ra, ’imi ai i roto i te mau pāpa’ira’a mo’a, ’e ’a tītau ai i te fa’aurura’a a te Vārua Maita’i.

’Ua riro te Mai, pe’e mai—nō te ta’ata hō’ē ’e te ’utuāfare ’ei tufa’a faufa’a rahi nō tā ’oe iho tuatāpapara’a ’e tā ’oe fa’aineinera’a nō te ha’api’i. E tauturu te reira ’ia noa’a te hāro’aro’a hōhonu a’e nō ni’a i te mau parau tumu o te ha’api’ira’a tumu e ’itehia i roto i te mau pāpa’ira’a mo’a. E noa’a ïa ia ’oe ’ia fa’auru ’e ’ia ani i te mau pīahi ’ia fa’a’ohipa i te Mai, pe’e mai—nō te ta’ata hō’ē ’e te ’utuāfare nō te fa’ananea atu ā i tā rātou iho tuatāpapara’a pāpa’ira’a mo’a ’e tā te ’utuāfare ho’i (nō te tauturu nō te ravera’a i te reira, hi’o « Mau mana’o nō te fa’aitoitora’a i te tuatāpapara’a ta’ata hō’ē ’e te tuatāpapara’a ’utuāfare » i roto i teie mātēria). ’A nā reira ai ’oe, ’a ha’amana’o i te vai ara noa i te mau pīahi ’aita te orara’a ’utuāfare e tauturu nei i te tuatāpapara’a pāpa’ira’a mo’a tāmau ’e te purera’a pō ’utuāfare tāmau.

I roto i tā ’oe fa’aineinera’a, e tae mai te mau mana’o ’e te mau fa’a’itera’a ia ’oe nō ni’a i te mau ta’ata tā ’oe e ha’api’i ra, nāhea te mau parau tumu i roto i te mau pāpa’ira’a mo’a e patu ai i tō rātou fa’aro’o i te Metua i te ao ra ’e ia Iesu Mesia, ’e nāhea e nehenehe ai ia ’oe ’ia fa’auru ia rātou ’ia ’ite i te reira mau parau tumu ’a tuatāpapa ai rātou iho i te mau pāpa’ira’a mo’a.

Mau mana’o nō te ha’api’ira’a

’A fa’aineine ai ’oe ia ’oe nō tē ha’api’i, e nehenehe e noa’a mai te tahi atu ā fa’aurura’a nā roto i te hi’ora’a i te mau arata’i ha’api’ira’a i roto i teie mātēria. ’Eiaha e fa’ariro i teie mau mana’o tauturu ’ei mau ta’ahira’a e rave hō’ē hō’ē, ’ei mau mana’o rā nō te fa’auru ia ’oe iho. ’Ua mātau ’oe i tā ’oe mau pīahi, ’e e riro ’oe i te mātau maita’i atu ā ia rātou ’a ha’api’i ’āmui ai ’outou i roto i te piha ha’api’ira’a. ’Ua mātau ato’a te Fatu ia rātou, ’e e fa’auru mai ’oia i te mau rāve’a maita’i roa a’e nō te tauturu i te mau pīahi ’ia patu i ni’a i te ha’api’ira’a ’evanelia tā rātou e rave nei i tō rātou fare.

E rave rahi atu ā rāve’a tauturu e vai ra nō te tauturu ’ia ’oe ’ia fa’aineine, mai te mau mana’o i roto i te Mai, pe’e mai—nō te ta’ata hō’ē ’e te ’utuāfare ’e te mau ve’a a te ’Ēkālesia. Nō te tahi atu ā ha’amāramaramara’a nō ni’a i teie mau rāve’a tauturu ’e te tahi atu, ’a hi’o i te tuha’a « Te tahi atu mau rāve’a tauturu » i roto i teie rāve’a tauturu.

Te tahi mau mea e ha’amana’o noa

• ’Ei ’orometua ha’api’i, e hōpoi’a faufa’a rahi tā ’oe nō te pāturu, nō te fa’aitoito ’e nō te patu i te ha’api’ira’a ’evanelia a te mau pīahi iho ’e a te ’utuāfare. E riro te tahi mau pīahi i te ’ore e tuatāpapa tāmau i te ’evanelia i te fare ; e nehenehe tā ’oe e fa’atupu i te ’ohipa ta’a ’ē rahi nā roto i te fa’aitoitora’a ’e te tauturura’a ia rātou ’ia fa’ariro i tō rātou fare ’ei pū nō te ha’api’ira’a ’evanelia.

• E hōhonu atu ā te fa’afāriura’a o te mau pīahi i te ’evanelia a Iesu Mesia ’a hāro’aro’a ai rātou ’e ’a fa’a’ohipa ai i te ha’api’ira’a tumu mau. ’A fa’aitoito ia rātou ’ia pāpa’i ’e ’ia rave mai te au i te mau mana’o e tae mai nō ’ō mai i te Vārua Maita’i.

• ’Ua hau atu te ha’api’ira’a i te a’o–noa–ra’a, ’ua hau ato’a rā te reira i te arata’i–noa–ra’a i te hō’ē tāu’ara’a parau. Te tahi tuha’a o tā ’oe ’ohipa, ’o te fa’aitoitora’a ïa ia rātou ’ia parau mai i tō rātou mana’o ma te fa’atumu i ni’a i te mau pāpa’ira’a mo’a. ’Ia fa’a’ite ato’a ’oe i te mau mana’o fa’auru tā ’oe i ’apo mai i te tuatāpapara’a ’oe i te mau pāpa’ira’a mo’a.

• ’A ha’amana’o ē, e rave rahi mau pīahi e fāri’i nei i te mau ’itera’a faufa’a nā roto i te tuatāpapara’a pāpa’ira’a mo’a i te fare. E nehenehe ’oe e pāturu i tā rātou ’apora’a mai i te ’evanelia nā roto i te hōro’a–pinepine–ra’a ia rātou i te mau rāve’a ’ia fa’a’ite mai i te mau mea tā rātou e ha’api’i mai nei i te fare ’e e nāhea te reira i te ha’aputapū i tō rātou orara’a.

• Tē hina’aro nei te Metua i te Ao ra ’ia manuia ’oe ’ei ’orometua ha’api’i. ’Ua hōro’a mai ’oia e rave rahi mātēria nō tē tauturu ia ’oe ’ia manuia, ’o te mau rurura’a ’āpo’ora’a ’orometua ha’api’i ato’a ïa. I roto i teie mau rurura’a, e nehenehe tā ’oe e ’āpo’o ’e te tahi atu mau ’orometua ha’api’i nō ni’a i te mau fifi tā ’oe e fa’aruru nei. E nehenehe ato’a tā ’oe e tuatāpapa ’e e fa’a’ohipa i te mau parau tumu nō te ha’api’ira’a mai tā te Mesia te huru.

• E ha’api’i maita’i mai te tahi mau ta’ata ’ia fāna’o ’oia i te rāve’a nō te ha’api’i i te ta’ata. I te tahi taime, e nehenehe e fa’ati’a i te mau pīahi, te feiā ’āpī ato’a, ’ia ha’api’i i te hō’ē tufa’a o te ha’api’ira’a. ’A rave i teie fa’aotira’a ’ia au i te mau hina’aro ’e te mau ’aravihi o te mau pīahi. Mai te mea e ani ’oe i te hō’ē pīahi ’ia ha’api’i, ’a fa’ata’a i te taime nō te tauturu iāna ’ia fa’aineine ātea ma te fa’a’ohipa i te mau mana’o e ’itehia i roto i teie mātēria tauturu ’e i roto i te Mai, pe’e mai—nō te ta’ata hō’ē ’e te ’utuāfare. ’A ha’amana’o ē, ’ei ’orometua ha’api’i i pi’ihia, tei ia ’oe te hōpoi’a nō te mea e ha’api’ihia i roto i te piha ha’api’ira’a.

• I roto i teie rāve’a tauturu tē vai ra te mau arata’ira’a ha’api’ira’a nō te hepetoma tāta’itahi o te matahiti. I te mau Sabati ’aita e fa’atupuhia te Ha’api’ira’a Sābati, e tāmau noa te mau ’utuāfare i te tai’o i Te Parau Ha’api’ira’a ’e te mau Parau Fafau i te fare ’ia au i te tārena i fa’ata’ahia i roto i te Mai, Pe’e mai— nō te ta’ata hō’ē ’e nō te ’utuāfare. E nehenehe ’oe e ’ōu’a i te mau ha’api’ira’a e tano i ni’a i te hō’ē hepetoma ’aita e ha’api’ira’a sābati, ’aore rā, e nehenehe ’oe e ’āmui e rave rahi ha’api’ira’a i roto hō’ē sābati.