Hō’ē hōho’a nō te ha’api’ira’a

Tē pe’e nei te arata’i ha’api’ira’a tāta’itahi i roto i teie buka i te hō’ē hōho’a nō te ani-manihini-ra’a, te fa’a’itera’a ’e te ha’api’ira’a i te parau ha’api’ira’a.

Tītau i te mana’o

’Ei tuha’a nō te mau ha’api’ira’a ato’a, ’a ani i te mau pīahi ’ia fa’a’ite mai i tā rātou i ’apo mai ’e te mau ’ohipa i tupu nō rātou i te hepetoma i ma’iri ’a tuatāpapa ai rātou i te mau pāpa’ira’a mo’a ’e ’a rave ai rātou i te mau mea tā rātou i ’apo mai, ’ei ta’ata hō’ē ’e ’ei ’utuāfare. ’A tauturu i te mau pīahi ’ia ’ite ē e mea faufa’a rahi roa tā rātou iho ha’api’ira’a mai i rāpae’au i te piha ha’api’ira’a. E’ita tō rātou fa’afāriura’a ta’ata hō’ē e tae mai nā roto ana’e i te ha’api’ira’a i te mahana sābati, nā roto ato’a rā i te mau mea tā rātou e rave i te mau mahana ato’a. ’Ia fa’aro’o ana’e te mau pīahi i te mau mea i tupu nō te tahi ’e te tahi, ’e te mau ’itera’a pāpū nō te ’evanelia a Iesu Mesia, e mea pāpū ē, e fa’auruhia rātou ’ia ’imi i te mau ’ohipa mai te reira nō rātou iho.

E’ita te tā’āto’ara’a o te mau pīahi e tai’o i te mau pene nō te ha’api’ira’a tāta’itahi, ’e noa atu ē ’ua tai’o rātou, tē vai ra e’ita e au maita’i ’ia fa’a’ite mai i tō rātou mau mana’o. E ha’apāpū ē ’ua ’ite te mau pīahi ato’a ē, e tufa’a faufa’a rātou nō te piha ha’api’ira’a, tē vai ra tā rātou hō’ē mea e fa’a’ite ’aore rā ’aita.

Ha’api’i i te ha’api’ira’a tumu

’Ia fa’atumu ’oe ’e te mau pīahi i ni’a ia Iesu Mesia ’e tāna ha’api’ira’a tumu—te mau parau mau mure ’ore o te ’evanelia—e ’itehia i roto i te mau tuha’a ’īrava tei fa’ata’ahia nō te tai’o. ’A tuatāpapa ai ’outou i te ha’api’ira’a tumu i roto i te mau pāpa’ira’a mo’a, e aha te mau ’īrava, te mau fa’ahitira’a parau, te mau ’ohipa i tupu, te mau uira’a ’e te tahi atu ā mau mātēria tauturu e nehenehe e fa’a’ite atu ? Nāhea ’oe i te fa’a’ohipa i teie mau mātēria nō te tauturu i te mau pīahi ’ia ’ite ’e ’ia ta’a i te mau parau tumu o te ’evanelia ? Nāhea e nehenehe ai ia ’oe ’ia tauturu ia rātou ’ia patu i tō rātou fa’aro’o i te Metua i te ao ra ’e ia Iesu Mesia ?