Pebrero 11–17

Juan 2–4

“Masapul Kadakayo ti Mayanak a Mabaliwan”

Ti panangbasa iti Juan 2–4 ket nasayaat a wagas a pangrugi iti panagsagana a mangisuro. Isuratmo dagiti ania man naespirituan nga impresion a maawatmo, ken usarem daytoy a balabala a mangsarak kadagiti nayon a nalawag a pannakaammo ken pannakaawat ken dagiti kapanunotan iti panangisuro.

Isuratmo Dagiti Impresionmo

Yawis ti Panagbibinninglay

Isurat ti tallo a paulo iti pisarra: Juan 2, Juan 3, ken Juan 4. Ikkan dagiti miembro ti klase iti sumagmamano a minuto a mangsubli a mangadal kadagitoy a kapitulo, ket kalpasanna idawat kadakuada nga isurat iti baba ti tunggal paulo ti maysa a bersikulo a nakatulong kadakuada a makaawat iti doktrina ken pasamak iti dayta a kapitulo. Paglilinnawagan dagiti bersikulo nga insuratda.

Isuro ti Doktrina

Juan 2:1–11

Mabaliwan dagiti biagtayo no surotentayo ni Jesucristo.

• No dadduma makagun-odtayo kadagiti naespirituan a pannakaammo ken pannakaawat babaen iti panangikasotayo kadagiti detalye iti pakaammuan iti nasantuan a kasuratan. Ibilangmo ti panangawis kadagiti miembro ti klase a basaenda ti Juan 2:1–11 ket ilistam dagiti detalye a nangpauneg iti panagyamanda iti milagro iti fiesta ti kallaysa. Kasano nga impakita daytoy a milagro ti dayag ti Dios? (Kitaen iti bersikulo 11).

• Mabalin a makatulong kadagiti miembro ti klase tapno maawatanda daytoy nga estoria no adalenda a nasayaat ti milagro manipud kadagiti naidumduma a pannirigan dagiti tao a nakasaksi iti daytoy. Kasano a maipada dagiti ugalitayo kadagiti ugali dagiti tao iti fiesta ti kallaysa no dadduma—kas pagarigan, kas ken ni Maria, a makaammo nga adda maaramid a milagro, wenno ti agturay, a saan a makaammo nga adda mapasamak a milagro? Ibilangmo ti panangawis iti sumagmamano a miembro ti klase a mangted iti pakaammuan maipapan iti fiesta a kasla isuda ti maysa kadagiti tao a timmabuno.

Juan 2:13–22

Masaluadantayo dagiti sagrado a lugar ken bambanag.

• Kasano a matulongam dagiti miembro ti klase a masursuruan manipud iti pakaammuan maipapan ken Jesus a mangpappapanaw kadagiti agipaspasukat iti kuarta iti templo? Kasano a masaluadanda dagiti sagrado a lugar ken bambanag a kas kadagiti pagtaengan, simbaan, templo, ken nasantuan a kasuratan? Mabalin a makatulong daytoy a palawag manipud ken ni Presidente David O. McKay: “’Diyo aramiden ti balay ti Amak a balay a paglakuan dagiti tagilako.’ (Juan 2:16.) Ti panagurnong ken panagbusbos iti kuarta, … panagsapul iti biddut, ken nangnangruna iti naalas a panagsaosao maipapan kadagiti pada a tao iti balay a pagdaydayawan, ket kangrunaaan a panaglabsing iti daytoy a bilin a naited iti dandani dua ribu a tawenen ti napalabas” (iti Conference Report, Okt. 1956, 7). Kasano a mataginayontayo ti kinasagrado ti templo ken dadduma pay a nasantuan a lugar?

Juan 3:1–21

Masapul a mayanaktayo a mabaliwan tapno makastrek iti pagarian ti Dios.

• Tapno makatulong a maawatan dagiti miembro ti klase ti awis ni Jesus a a mayanak a mabaliwan (kitaen iti Juan 3:3), mabalinmo nga awisen ida a mangibinglay kadagiti pannakaawat a nagun-odda manipud iti insuro ti Mangisalakan ken ni Nicodemo kadagitoy a bersikulo. Ania dagiti balikas ken ragup dagiti balikas nga inusarna? Ania dagiti dadduma pay a nasantuan a kasuratan wenno palawag manipud kadagiti leader ti Simbaan a mangpadakkel iti pannakaawat dagiti miembro ti klase iti daytoy nga awis? (Kitaen iti Topical Guide, “Man, New, Spiritually Reborn” para iti pagarigan iti nasantuan a kasuratan; kitaen iti “Dagiti Nainayon a Resources” para kadagiti palawag manipud kadagiti leader iti Simbaan.)

• Kasano a mailawlawag dagiti miembro ti klase iti maysa a tao a sabali ti pammatina no ania ti kayat a sawen ti mayanak a mabaliwan? Kasano nga iramanda ti panagbabawi, panagbuniag, ken kumpirmasion iti daytoy a pagsasaritaan? Ibilangyo ti panangawis kadagiti miembro ti klase a mangsanay no kasano a masungbatanda daytoy a saludsod a kaduada ti tao a katugawda. Mabalin nga inayon ti adaw manipud ken ni Propeta Joseph Smith iti “Dagiti Nainayon a Resources” iti daytoy a panaglilinnawag.

• Mamati ti sumagmamano a tao a ti maysa a tao ket saan a talaga a makapagbalbaliw; nupay kasta, ni Nicodemo ti maysa a pagwadan ti maysa a tao a nagbalbaliw kas bunga ti panangsurotna iti ebanghelio ni Jesucristo. Tapno matulongan dagiti miembro ti klase a makitada daytoy, mabalinmo nga awisen ida a mangsukisok iti Juan 3:1–2; Juan 7:40–52; ken Juan 19:39–40. Ania ti masursurotayo manipud kadagitoy a binatog maipapan kadagiti ugali ken kannawidan ni Nicodemo? Kasano a nakapagbalbaliw isuna idi agangay? Ania dagiti pagarigan a maibinglaytayo maipapan dagiti tao nga am-ammotayo a nakapagbalbaliw gapu iti ebanghelio?

• Ti ikikita iti maysa a maladaga wenno ladawan ti maladaga ket mabalin a mangted iti klasem iti napintas a gundaway a mangidasig kadagiti kababalin ti kayyanak kadagiti kababalin ti maysa a tao a naespirituan a nayanak manen.

Juan 4:6–34

Mangidiaya ni Jesucristo kadatayo iti nabiag a danum ken ti “taraon” iti panangaramid iti trabaho ti Dios.

• Kasapulan dagiti bagitayo ti taraon ken danum iti inaldaw. Intudo ni Jesus dagitoy sapasap a kasapulan idi insurona ti babai a taga Samaria ken dagiti disipulona. Tapno matulongan dagiti miembro ti klase a maawatanda no ania ti isursuro ti Mangisalakan, mabalinmo ti mangipigket kadagiti ladawan ti taraon ken danum iti pisarra ket awisem dagiti miembro ti klase nga isuratda iti baba ti tunggal ladawan dagiti naespirituan a kinapudno nga insuro ni Jesus. Kasano a mapennek ti naespirituan a pannakawawtayo ti panagdaydayawtayo iti Dios? Kasano a mapennek ti naespirituan a pannakawawtayo babaen ti panagaramid iti pagayatan ti Dios?

  

  Mangidiaya ni Jesucristo kadatayo iti nabiag a danum.

• Iti panangpanunot maipanggep iti panagdur-as ti pammaneknek ti babai a taga Samaria maipapan ken ni Jesucristo ket makatulong kadagiti miembro ti klase a mangutob no kasano a naammuanda nga Isu ti Mesias. Kas maysa a klase, sapulenyo dagiti balikas nga inusar ti babai a taga Samaria a nangibasar iti Mangisalakan iti Juan 4:6–30. Ania ti kayat a sawen dagitoy a balikas maipapan ti pannakaammona no asino ni Jesus? Kasano a dimmur-astayo kadagiti pammaneknektayo nga Isu ti Mangisalakantayo?

Yallukoy ti Panagsursuro iti Pagtaengan

Tapno maparegta dagiti miembro ti klase a mangbasa iti Mateo 5 ken Lucas 6, ibagam kadakuada a naglaon dagitoy a kapitulo iti inawagan ni Presidente Joseph Fielding Smith a “ti kaindaklanan a [sermon] a naikasaban, nga ammotayo agingga ita” (Teachings of Presidents of the Church: Joseph Fielding Smith [2013], 234).

Dagiti Nainayon a Resources

Juan 2–4

Dagiti video maipapan dagiti aramid ken pannursuro ni Jesus.

“Jesus Turns Water into Wine,” “Jesus Cleanses the Temple,” “Jesus Teaches of Being Born Again,” “Jesus Teaches a Samaritan Woman” (LDS.org)

Ania ti kayat a sawen ti mayanak a mabaliwan.

Insuro ni Propeta Joseph Smith: “Mabalinmo a buniagan ti sangasako a darat a kas iti maysa a tao, no ti panagbuniag ket saan a naaramid iti panggep a para iti pannakaugas dagiti basol ken pananggun-d iti Espiritu Santo. Ti panagbuniag babaen iti danum ket kagudua laeng ti panagbuniag, ken awan ti serbina no awan ti sabali pay a kaguduana—a dayta ti, panagbuniag ti Espiritu Santo” (Teachings of Presidents of the Church: Joseph Smith [2007], 95).

Insuro ni Elder David A. Bednar: Ti pannakapasurot wenno kumbersion … ket naindaklan, saan a bassit— maysa a naespirituan a pannakayanak manen ken kangrunaan a panagbalbaliw iti no ania ti marikna ken tarigagayan, no ania ti panunoten ken aramidentayo, ken no aniatayo. Kinapudnona, ti kaipapanan ti ebanghelio ni Jesucristo ket agkasapulan iti kangrunaan ken manayon a panagbalbaliw iti mismo a kinataotayo a naaramid a posible babaen iti panagpannuraytayo iti ‘pammateg, ken panangngaasi, ken parabur ti Nasantuan a Mesias’ (2 Nephi 2:8). No pilientayo ti sumurot iti Maestro, pilientayo ti agbalbaliw—naespirituan a mayanak manen” (}“Ye Must Be Born Again,” Ensign wenno Liahona, Mayo 2007, 20).

Insuro ni Elder D. Todd Christofferson: “Mabalin a saludsodem: “Apay a saan a nadardaras a mapasamak kaniak daytoy naindaklan a panagbalbaliw? Nasken a laglagipenyo a kasta dagiti nakaskasdaaw a pagwadan dagiti tao ni Ari Benjamin, ni Alma, ken ti sumagmamano a dadduma pay iti nasantuan a kasuratan—nakaskasdaaw ken saan a gagangay. Para iti kaaduan kadatayo, in-inut dagiti panagbalbaliw ken mapasamak iti panaglabas ti panawen. Ti pannakayanak a mabaliwan, saan a kas iti pisikal a pannakayanaktayo, ket ad-adda pay a maysa a proseso ngem iti maysa a pasamak. Ket ti pannakiraman iti dayta a proseso isu ti kangrunaan a panggep ti mortalidad” (“Born Again,” Ensign wenno Liahona, Mayo 2008, 78).

Insuro ni Elder Dallin H. Oaks:

“Nayanaktayo a nabaliwan idi sumrektayo iti katulagan iti pannakinaig iti Mangisalakan babaen ti pannakayanak iti danum ken iti Espiritu ken babaen ti panangawattayo iti nagan ni Jesucristo. Mabalintayo a pabaruen dayta a pannakayanak manen iti tunggal Sabbath no makiranudtayo iti sakramento.

“Impatalged dagiti Santo iti Ud-udina nga Aldaw a dagiti nayanak a nabaliwan iti kastoy a wagas ket naespirituan nga annak a lallaki ken babbai ni Jesucristo (kitaen iti Mosiah 5:7; 15:9–13; 27: 25). Nupay kasta, tapno maamiris dagiti naisangrat a bendision daytoy a kasasaad ti pannakayanak a nabaliwan, nasken latta nga agtungpaltayo kadagiti katulagantayo ken agibtur agingga iti panungpalan. Kabayatanna, babaen ti parabur ti Dios, nayanaktayo manen kas baro a parsua iti baro a naespirituan a nagannak ken manamnama a masakbayan ti nagloriaan a tawid” (“Have You Been Saved?” Ensign, Mayo 1998, 56).

Panangpadur-as iti Panangisurotayo

Saan a nalalaing ti mannursuro ngem iti agad-adal. Napateg ti akemmo a kas maysa a mannursuro, ngem saan a sika laeng ti pagtaudan ti inspirasion iti klase. Tulongam dagiti miembro ti klase a masursuruan manipud iti Espiritu ken agbibinninglay iti tunggal maysa no ania ti nasursuroda.