Ni Juan Bautista a Mangbumbuniag ken ni Jesus

Ti stained-glass a tawa iti Templo ti Nauvoo Illinois, ni Tom Holdman

Enero 28–Pebrero 3

Mateo 3; Marcos 1; Lucas 3

“Isaganayo ti Dalan ti Apo”

Bayat ti panagbasam ken panagutobmo iti Mateo 3; Marcos 1; ken Lucas 3, isuratmo dagiti impresion a maawatmo. Daytoyto ti mangawis iti Espiritu bayat ti panagsaganam . Umaykayo, Sumurot Kaniak—Para kadagiti Indibidual ken Pamilia ken dagiti sumaganad a kapanunotan ti makatulong kenka a mangparegta kadagiti tao iti klasem tapno mangawat ken mangyaplikar kadagiti doktrina kadagitoy a nasantuan a kasuratan.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Tapno matulongan dagiti miembro ti klase a mangibinglay no kasano a parabur iti biagda ti panagsursuro manipud iti Baro a Tulag, mabalinmo nga isurat ti sumaganad a saludsod iti pisarra: Ania ti maysa a banag nga inaramidyo gapu iti nabasayo iti Baro a Tulag itoy a lawas?

icon iti panangisuro

Isuro ti Doktrina

Mateo 3:1–12; Lucas 3:2–18

Isagana dagiti disipulo ti bagbagida ken dagiti dadduma pay tapno umawat ken ni Jesucristo.

• Kasano nga agsaganatayo para iti isasarungkar ti maysa a napateg a sangaili? Makatulong kenka ti saludsod a kas iti daytoy a mangipakaammo iti panaglilinnawag maipapan ti no kasano nga insagana ni Juan Bautista dagiti tao nga umawat ken ni Jesucristo. Mabalinmo a bingayen ti klase iti tallo a grupo tapno mangbasa iti Mateo 3:1–6; Mateo 3:7–12; ken Lucas 3:10–15, a mangsapsapul no kasano nga insagana ni Juan Bautista dagiti tao nga umawat ken ni Jesucristo iti biagda. Pagsisinnublaten ti tunggal grupo iti panangibinglay no ania ti nasarakanda.

• Kas iti inaramid ni Juan Bautista, tulongannatayo dagiti sibibiag a propeta nga agsagana nga umawat iti Mangisalakan iti biagtayo. Tapno matulongan dagiti miembro ti klase a mangaramid iti koneksion iti nagbaetan dagiti propeta ken ni Juan Bautista, mabalin a subliem nga adalen dagiti pannursuro ni Juan Bautista iti Mateo 3:1–12 ken Lucas 3:2–18 ken ti sumagmamano a balakad manipud iti kaudian a sapasap a komperensia. Kasano a makatulong kadatayo ti panangtungpal iti daytoy a naimpadtuan a balakad nga umawat iti Mangisalakan?

• Patarus ni Joseph Smith, Lucas 3:4–11 (iti Pangiwanwan iti Nasantuan a Kasuratan) ket mangipaay iti nalawag a pannakaammo ken pannakaawat iti mision ni Jesucristo a saan laeng a masarakan iti Lucas 3:4–6. Ania ti masursuro dagiti miembro ti klase manipud kadagitoy a bersikulo maipapan iti Mangisalakan ken ti kasapulantayo nga agbabawi?

  Ni Juan Bautista nga agikaskasaba

  Ni Juan Bautista nga Agikaskasaba iti Langalang, ni Robert T. Barrett

Lucas 3:3–14

Nasken a mangisangbaytayo iti “bungbunga a maikari iti panagbabawi.”

• Iti Lucas 3:8, insuro ni Juan Bautista dagiti tao a sakbay a mabalinda a mabuniagan, nasken nga ipakitada dagiti “bungbunga,” wenno pakakitaan, ti panagbabawida. Kasano a makatulongkayo kadagiti miembro ti klase a mangbigbig iti pakakitaan ti bukodda a panagbabawi? Mabalin a pagsukisokem ida iti Lucas 3:8–14 ken sapulenda no ania ti imbilang ni Juan a “bungbunga” ti panagbabawi. Mabalinda pay a sublien nga adalen ti Moroni 6:1–3 ken Doktrina ken Katulagan 20:37. Mabalinmo ti mangidrowing iti kayo nga agbunga iti pisarra ket panaganam kadagiti miembro ti klase ti bunga iti kayo iti “bungbunga” ti panagbabawi a nasarakanda. Mabalin a daytoy pay ti napintas a gundaway a pagsasaritaan no ania ti kayat a sawen ti sipupudno nga agbabawi. Ilawlawag a ti maysa a wagas a mabalintayo a “palintegen dagiti danana” (Lucas 3:4) ket babaen ti panagbabawi iti ania man a tubeng a manglapped iti Espiritu nga umasideg kadatayo.

• Ti panangkanta iti himno a “More Holiness Give Me,” Hymns, no. 131, ket makaallukoy iti panaglilinnawag maipapan no kasano a makatulong ti panagbabawi kadatayo nga agbalin nga ad-adda pay a kas iti Mangisalakan. Para iti music video daytoy a himno, kitaen iti mormontabernaclechoir.org.

Mateo 3:13–17

Surotentayo ni Jesucristo no agbuniagtayo ken umawat iti Espiritu Santo.

• Tapno masubli a maadal ti estoria maipapan iti panagbuniag ni Jesucristo, padasem daytoy a kapanunotan: Kiddawem kadagiti miembro ti klase no kasano a mausarda ti Mateo 3:13–17 a mangisuro iti maysa a tao, kas iti ubing wenno maysa a tao a sabali ti pammatina, maipapan iti panagbuniag. (Mabalinda pay nga usaren ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.) Ania dagiti napateg nga elemento ti panagbuniag a yunay-unayda? Mabalinda ti mangsanay kadagiti kapanunotanda babaen ti panangisuro iti tunggal maysa.

• Tapno matulongan dagiti miembro ti klase a manglagip iti bukodda a panagbuniag ken mangpanunot maipapan iti kinapateg ti panagtungpal kadagiti katulaganda,mabalinmo nga awisen ida a mangbasa iti Mateo 3:13–17 ken ti palawag ni Elder Robert D. Hales iti “Dagiti Nainayon a Resources.” Mabalin a paggugusto dagiti miembro ti klase ti mangibinglay kadagiti riknada maipapan iti bukodda a panagbuniag ken kadagiti katulaganda iti panagbuniag. Mabalinda pay a kantaen ti “Come, Follow Me,” Hymns, no. 116.

• Insuro ni Juan Bautista a mabuniagan ti Mangisalakan “iti Espiritu Santo, ken iti apuy” (Mateo 3:11). Mapasamak ti panangbuniag iti apuy no nakumpirmaan ken awatentayo ti sagut ti Espiritu Santo. Apay a nasken nga adda kadatayo ti sagut ti Espiritu Santo tapno dumur-as iti pagarian ti Dios? Ania ti epekto ti panagbuniag iti apuy ken iti Espiritu Santo kadatayo? (kitaen iti Alma 5:14). Ti video “Baptism of the Holy Ghost” (LDS.org) ket makatulong iti daytoy a panaglilinnawag.

• Daytoy ti maysa nga aktibidad a makatulongto kadagiti miembro ti klase nga agtultuloy a mapaglilinnawagan ti doktrina ti panagbuniag. Isuratmo dagiti sumaganad a saludsod iti pisarra ken dagiti reperensia iti nasantuan a kasuratan kadagiti pedaso ti papel. Mangawis kadagiti miembro ti klase a pumili kadagiti pedaso ket kalpasanna basaenyo ti tunggal nasantuan a kasuratan kas maysa a klase. Paglilinnawagan no ania a saludsod ti kasayaatan a masungbatan ti tunggal nasantuan a kasuratan. Adda kadi sabali pay a nasantuan a kasuratan wenno nalawag a pannakaammo ken pannakaawat a makatulong a mangsungbat kadagitoy a saludsod?

  • Ania ti isuro dagiti nasantuan a kasuratan maipapan iti kasapulan ti panagbuniag? (3 Nephi 11:38)

  • Ania ti isimbolo ti panagbuniag babaen ti pannakairarem? (Taga Roma 6:3–5)

  • Kasano a balbaliwan dagiti katulagak iti panagbuniag ti wagas a panagbiagko? Mosiah 18:8–10

  • Apay a ditayo buniagan dagiti maladaga? (Moroni 8:8–12)

  • Apay a napateg a maannong ti panagbuniag babaen iti maysa a tao nga addaan iti turay, saan laeng iti napudno a panggep? (Hebreo 5:4)

  • No nabuniaganakon iti sabali a simbaan, apay a nasken a mabuniaganak manen? (DkK 22:1–4)

  • Apay a nasken a sarunuen ti panagbuniag ti panangawat iti sagut ti Espiritu Santo? (Juan 3:5)

icon iti panagsursuro

Yallukoy ti Panagsursuro iti Pagtaengan

Tapno maallukoy dagiti miembro ti klase a mangadal iti Mateo 4 ken Lucas 4–5 iti pagtaengan, awisen ida a mangpanunot iti sulisog a pakaipasanguanda, ket ibaga kadakuada nga isuronto dagitoy a kapitulo kadakuada no ania ti inaramid ti Mangisalakan idi naipasango kadagiti sulisog.

resources icon

Dagiti Nainayon a Resources

Mateo 3; Marcos 1; Lucas 3

Ti kaipapanan dagiti katulagantayo iti panagbuniag.

Insuro ni Elder Robert D. Hales:

“No maawatantayo ti katulagantayo iti panagbuniag ken ti sagut ti Espiritu Santo, daytoyto ti mangbalbaliw iti biagtayo ken mangipasdek iti naan-anay a kinapudnotayo iti pagarian ti Dios. Napateg unay ti iseserrek iti pagarian ti Dios isu a nabuniagan ni Jesus tapno ipakita kadatayo ti ‘kinaakikid ti dalan’ [2 Nephi 31:9]. …

“No surotentayo ti pagwadan ni Jesus, maipakitatayo met nga agbabawitayonto ken agbalin a managtungpal kadagiti bilin ti Amatayo iti Langit. Agpakumbabatayo nga addaan iti nasneban a puso ken napnuan babawi nga espiritu no bigbigentayo dagiti basbasoltayo ken agkiddaw iti pannakapakawan dagiti nagbiddutantayo [kitaen iti 3 Nephi 9:20]. Makitulagtayo a siaayat nga awatentayo iti bagbagitayo ti nagan ni Jesucristo ken kanayon a manglaglagip Kenkuana. ]…

“Babaen ti panangpilitayo nga agindeg iti pagarian ti [Dios], isinatayo—saan nga ilasin—ti bagbagitayo manipud iti lubong. Agbalinto a disente ti panagkawestayo, natarnaw ti pampanunottayo, nadalus ti panagsasaotayo. Makaparegtanto dagiti sine ken telebision a buyaentayo, ti musika a denggentayo, dagiti libro, magasin, ken pagiwarnak a basaentayo. Pilientayonto dagiti gagayyem a mangparegta kadagiti agnanayon a panggep a tun-oyen, ken tratuentayonto dagiti dadduma iti kinasayaat. Adaywantayonyo dagiti bisio ti imoralidad, panagsugal, tabako, arak, ken maiparit a druga. Dagiti aktibidadtayo iti Domingo ti mangyanninawto iti bilin ti Dios a manglaglagip a mangngilin a nasantuan iti aldaw ti Sabbath. Surotentayonto ti pagwadan ni Jesucristo iti wagas a panangtratotayo kadagiti dadduma. Agbiagtayonto a maikari a sumrek iti balay ti Apo” (“The Covenant of Baptism: To Be in the Kingdom and of the Kingdom,” Ensign, Nob. 2000, 7–8).

Panangpadur-as iti Panangisurotayo

Isuro ti kangrunaan a doktrina. Insuro ni Hyrum Smith, “Ikasabayo dagiti umuna a pagbatayan ti Ebanghelio—ikasaba kadakuada manen; matakuatanyonto nga iti inaldaw maipalgakto kadakayo dagiti baro a kapanunotan ken nayon a lawag. Mabalinmo a padur-asen kadakuada ti pannakaawat a silalawag kadakuada. Kalpasanna kabaelamto ti mangaramid kadakuada a nalawlawag a maawatandaka dagiti sursuruam.” (Manuscript History of the Church, vol. E-1, p. 1994, josephsmithpapers.org).