Agballigi ni Cristo ken ni Satanas

Agballigi ni Cristo ken ni Satanas, ni Robert T. Barrett

Pebrero 4–10

Mateo 4; Lucas 4–5

“Adda Kaniak ti Espiritu ti Apo”

Bayat ti panangadalmo iti Mateo 4 ken Lucas 4–5, isuratmo dagiti naespirituan nga impresionmo. Daytoyto ti mangyawis iti inspirasion maipapan ti no kasano a kasayaatan a maipaay dagiti kasapulan ti klasem. Mabalin met nga ibilangmo ti panangusar iti Umaykayo, Sumurot Kaniak—Para kadagiti Indibidual ken Pamilia kasta met daytoy a balabala tapno mangsarak kadagiti nayon pay a kapanunotan.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Iraman daytoy a lawas ti panagbasa iti daytoy a palawag: “Pagsidsiddaawanda ti isursurona: ta ti saona adda pannakabalinna” (Lucas 4:32; kitaen met iti Marcos 1:22). Ania dagiti bersikulo a maibinglay dagiti miembro ti klase manipud kadagitoy a kapitulo a nakatulong kadakuada a makarikna iti dayta bileg a mainaig iti doktrina para iti bagbagida?

icon iti panangisuro

Isuro ti Doktrina

Mateo 4:1–11; Lucas 4:1–13

Inikkannatayo ti Nailangitan nga Ama iti pannakabalin a mangkedked iti sulisog.

• Ti pakaammuan maipapan ti Mangisalakan a mangkedked ken ni Satanas ket makatulong kadagiti miembro ti klase a mangbigbig kadagiti wagas a panggandatan ni Satanas a mangsulisog kadakuada. Mabalin a pumili dagiti miembro ti klase iti maysa kadagiti pannulisog iti Mateo 4:1–11 wenno Lucas 4:1–13 ket mangpanunot maipapan dagiti kabaruanan, mainaig a sulisog (mabalin a makatulong dagiti palawag iti “Dagiti Nainayon a Resources”). Apay a makatulong a mangammo a naipasango ti Mangisalakan kadagiti isu met la a pannulisog a sangsanguentayo ita? Apay a kabaelan ni Cristo ti nagkedked iti pannulisog? Para iti dadduma pay a pagarigan dagiti tao iti nasantuan a kasuratan a nagkedked ken ni Satanas, kitaen iti Genesis 39:7–20; 2 Nephi 4:16–35; ken Moises 1:10–22.

• Maysa a wagas a mangyallukoy iti panaglilinnawag maipapan iti Mateo 4:1–11 ken Lucas 4:1–13 ket mabalin a mangisurat iti dua a saludsod iti pisarra: Ania ti masursurotayo maipapan ken ni Cristo manipud iti daytoy nga estoria? ken Ania ti masursurotayo maipapan ken ni Satanas? Kalpasanna awisem dagiti miembro ti klase a mangsukisok kadagiti binatog tapno mangsarak iti sungbat kadagitoy a saludsod ket isurat dagiti sungbatda iti pisarra.

• Ania ti makatulong iti klasem a mangkedked iti sulisog? Mabalinmo nga idawat kadagiti miembro ti klase tapno sublienda nga adalen dagiti pagarigan iti Mateo 4:1–11 wenno Lucas 4:1–13 a nakatulong iti pannakaammo ti Mangisalakan kadagiti nasantuan a kasuratan Kenkuana tapno masungbatanna ni Satanas (babaen ti panagkunana iti, “Naisurat”). Mangted ti miembro ti klase panawen tapno mangsapul ken mangibinglay kadagiti nasantuan a kasuratan a mabalin a mangpatibker ken mangpapigsa kadakuada no mariknada a nasulisogda. (Para kadagiti kapanunotan, mabalinda a kitaen iti serrek ti Pangiwanwan iti Nasantuan a Kasuratan maipapan iti “Sulisog.”)

Lucas 4:16–30

Ni Jesucristo ti naipadto a Mesias.

• Tapno matulongan dagiti miembro ti klase a maawatanda a nasaysayaat daytoy a pakaammuan, mabalinmo nga ilawlawag a dagiti awag a Mesias ken Cristo ket agpada a kayatna a sawen “ti pinulotan.” Bayat ti panangbasada iti Lucas 4:18–21, kiddawem kadakuada a mangpanunot maipapan iti no ania ti kaipapanan ti agkuna a ni Jesus ti Cristo, ti Mesias, wenno ti Maysa a Napulotan. Mabalin a makitada a makatulong pay daytoy a basaen ti “Annointed One” iti Bible Dictionary. Kasano nga ipakdaar ni Jesus nga Isu ti Mesias ita? Awisem dagiti miembro ti klase a mangibinglay no kasano a naammuanda a ni Jesucristo ti Mangisalakanda.

• Mabalin nga adda sumagmamano a makatulong nga adalen a sursuruen babaen ti panangsukisok no apay a saan nga inawat dagiti tao ti Nazaret ni Jesus a kas naipadto a Mesias. Maysa a wagas tapno maaramid daytoy ket mabalin a pagdasigen dagiti ugali ni balo Zarepat ken ni Naaman iti Daan a Tulag. Mabalinmo a kasarita a nasapsapa ti sumagmamano a miembro ti klase ket kiddawem kadakuada nga umay a nakasagana a manggupgop iti tunggal maysa kadagitoy a pakaammuan (kitaen iti 1 Ar-ari 17:8–24; 2 Ar-ari 5:1–17; Lucas 4:16–30). Ania ti isuro kadatayo dagitoy a pakaammuan maipapan dagiti milagro ken isusungbat kadagiti katulongan ti Dios? Makita kadi dagiti miembro ti klase ti ania man a mensahe para kadagiti agdama a miembro iti Simbaan iti balikas ti Mangisalakan kadagiti tao ti Nazaret?

Mateo 4:18–22; Lucas 5:1–11

Ti panagkumit a sumurot ken ni Cristo ket kaipapananna ti panangawat iti pagayatanna ken pananglipat iti bukodtayo.

• No dadduma ti pangiturong ti Apo nga itedna kadatayo ket awan kaipapananna iti damo. Mabalin a sukisoken dagiti miembro ti klase ti Lucas 5:1–11, a mangsapsapul no ania ti indawat ti Mangisalakan ken ni Pedro ken no apay a nalabit a nagduadua ni Pedro kadagiti pammilinna. Kasano a maaringan daytoy a padas dagiti pannirigan ni Pedro maipapan iti Mangisalakan ken ti bagina? Mabalinmo nga awisen dagiti miembro ti klase a mangibinglay kadagiti padas a nangipakitaanda iti pammatida iti nadiosan a pannarabay, iti baet ti saan a kaadda ti naan-anay a pannakaawat. Ania ti bungana idi inusarda ti pammatida?

  Aw-awagan ni Jesus da Pedro ken Andres iti igid ti baybay

  “Umayka surotennak, ket pagbalinenkayto a dumakdaklis kadagiti tao” (Mateo 4:19).

• Kas kadagiti agdakdaklis “pinanawanda amin” tapno sumurot ken ni Jesucristo (Lucas 5:11), adda dagiti banag a tallikudan tapno agbalin a disipulona. Ania ti kayat nga ipaawat ti Mateo 4:18–22 maipapan dagiti ugali ken pammati da Pedro, Andres, Santiago, ken Juan? Mabalin a makatulong a mangitugot iti iket iti klase ket mangawis kadagiti miembro ti klase a mangisurat kadagiti banag a kayatda a tallikudan wenno natallikudandan tapno sumurot ken ni Cristo ket ikabilda dagitoy iti iket. Ibilangmo ti panangawis iti sumagmamano a miembro ti klase a mangibinglay no kasano a nagbalbaliwen ti biagda gapu ta pinilida a tallikudan ti amin tapno sumurot iti Mangisalakan.

icon iti panangsursuro

Yallukoy ti Panagsursuro iti Pagtaengan

Tapno maparegta dagiti miembro ti klase a mangbasa iti Juan 2–4 kabayatan ti umay a lawas, mabalin a pautobmo kadakuada no ania iti panagkunada ti kaipapanan ti “mayanak manen.” Ibagam kadakuada a makatulongto kadakuada ti panagbasa iti umay a lawas a mangsungbat iti daytoy a saludsod.

resources icon

Dagiti Nainayon a Resources

Mateo 4; Lucas 4–5

Ni Jesus ti Mesias.

“Jesus Declares He Is the Messiah” (video, LDS.org)

Dagiti kita ti sulisog.

Kalpasan ti panangisaona kadagiti kita ti sulisog a nakaipasanguan ti Mangisalakan iti let-ang, insuro ni Presidente David O. McKay:

“Tunggal sulisog nga umay kadakayo ken kaniak ket umay a sangkamaysa iti tallo a porma:

“(1) Sulisog iti pagganasan wenno pagtarigagayan;

“(2) Panangpatgan iti palangguad, pagusuan, wenno parammag;

“(3) Panagtarigagay kadagiti nailubongan a kinabaknang wenno bileg ken panangituray kadagiti daga wenno naindagaan a tagikua dagiti tao” (Teachings of Presidents of the Church: David O. McKay [2003], 82).

No pagsaritaan ti padas ni Jesus iti Mateo 4, insuro ni Elder Jeffrey R. Holland:

“’No sika ti Anak ti Dios, ibilinmo a dagitoy a bato nga agbalin a tinapay.’ …

“Ti sulisog ket saan a pannangan. … Ti sulisog, ti laeng paset a tarigagayak nga ipamaysa, ket maaramid iti kastoy a wagas, mangala iti tinapayna—ti pannakapnek iti bagina, panangpatgan iti ganasna a mangan—ti nalaka a wagas, babaen ti panangabuso iti bileg ken awan panagtallugod nga aguray iti umno a panawen ken iti umno a wagas. …

“‘No sika ti Anak ti Dios, tumappuakka’ manipud iti kangatuan daytoy a templo. …

“Ti sulisog ditoy ket nasiksikap ngem iti immuna. Daytoy ti sulisog ti espiritu, iti bukod a bisin a pudpudno ngem iti panagkasapulan iti tinapay. Isalakanto kadi isuna ti Dios?… Apay a diyo gun-oden ti naespirituan a pammatalged, gun-oden ti napudno a kongregasion, ket sungbatan daytoy a diablo a mangrabrabak—ti amin nga agkaykaysa iti dawat iti bileg ti Dios? …

“Ngem nagkedked ni Jesus iti pannulisog ti espiritu. Ti panaglibak ken panangkedked ket paset pay ti nadiosan a panangsagana. … Nasken nga agsagana uray pay ti Anak ti Dios. Ti Mannubbot a di pulos mangipaay iti nalaka a parabur iti dadduma ket saan a nalabit nga agkiddaw iti ania man para iti bagina. …

“… ‘Amin dagitoy itdekto kenka, no agrukbabka nga agdayaw kaniak.’

“Ni Satanas … [agsaludsod], ‘Ania ti gatadmo? Pagkedkedanyo ti nalaka a tinapay. Pagkedkedanyo ti nababa iti moralidadna a drama a mainaig iti Mesias, ngem awan ti tao a mangkedked itoy a kinabaknang ti lubong. Ibagam ti gatadmo.’ Mangrugrugin ni Satanas iti babaen ti kinaawan pammatina—ti napigsa ken nalawag unay a pammati a makagatangka iti ania man a banag itoy a lubong para iti kuarta.

“Agturayto ni Jesus iti lubong iti maysa nga aldaw. Iturayannanto ti tunggal gobierno ken ti bileg iti daytoy. Isunto Ari dagiti Ari ken Apo dagiti Appo. Ngem saan iti kastoy a wagas” (“The Inconvenient Messiah,” Ensign, Peb. 1984, 68–71).

Panangpadur-as iti Panangisurotayo

Agyamanka kadagiti sursuruam. “Saan koma a nakaipamaysa unay ti pasnekmo iti adalen tapno malipatam ti agyaman kadagiti agad-adal kadagiti kontribusionda. Nasken a maammuanda a pagyamanam ti kinatallugodda a mangiburay kadagiti nalawag a pannakaawat ken pannakaammoda [insights] ken pammaneknekda” (Panangisuro iti Wagas ti Mangisalakan, 33).