Ti stained-glass a tawa iti Templo ti Nauvoo Illinois, ni Tom Holdman

Enero 28–Pebrero 3

Mateo 3; Marcos 1; Lucas 3

“Isaganayo ti Dalan ti Apo”

Rugian babaen ti panangbasa iti Mateo 3; Marcos 1; ken Lucas 3. Bayat ti panagkararagmo para iti Espiritu Santo tapno tulongannaka a makaawat kadagitoy a kapitulo, Itednanto kenka dagiti nalawag a pannakaawat a nangnangruna para kenka. Isuratmo dagitoy nga impresion, ket agaramid kadagiti plano nga agtignay kadagitoy.

Suratmo Dagiti Impresionmo

Makapagbalbaliw kenka ni Jesus ken ti ebangheliona. Inadaw ni Lucas ti nagkauna a padto ni Isaias a nailadawan iti mision ni Juan Bautista ken ti adda nga epekto ti yaay ti Mangisalakan: “Amin a baet ti bambantay mapnonto, ket maipababanto amin a bantay ken turod, ket ti nakillo malintegto, ket dagiti dalan a dakes mapalanasdanto” (Lucas 3:5; kitaen met iti Isaias 40:4). Daytoy ti mensahe a para kadatayo amin, agraman dagiti mangipagarup a saanda makapagbalbaliw wenno saanda kasapulan ti agbalbaliw. No mabalin a mapatag ti maysa a banag a permanente kas iti bantay, ngarud awan duadua a tulongannatayo ti Apo a mangilinteg kadagiti nakillo a dalantayo (kitaen iti Lucas 3:4–5). No awatentayo ti awis ni Juan Bautista nga agbabawi ken agbalbaliw, maisaganatayo dagiti pampanunot ken puspusotayo nga umawat ken ni Jesucristo tapno “makita[tayo met] ti panangisalakan ti Dios” (Lucas 3:6).

Dagiti Kapanunotan para iti Bukod a Panagadal iti Nasantuan a Kasuratan

Ti Ebanghelio ni Marcos

Asino ni Marcos?

Maibilang kadagiti awtor dagiti Ebanghelio, kabassitan ti ammotayo maipapan ken ni Marcos. Ammotayo nga isu ti misionario a kadua da Pablo, Pedro, ken ti sumagmamano a dadduma pay a misionario. Adu nga iskolar ti biblia ti mamati a ni Pedro ti nangbilin ken ni Marcos a mangisurat kadagiti pasamak iti biag ti Mangisalakan. Mabalin a ti Ebanghelio ni Marcos ket naisurat sakbay dagiti dadduma a tallo.

Kitaen met iti Pangiwanwan iti Nasantuan a Kasuratan, “Marcos.”

Mateo 3:1–12; Macos 1:1–8; Lucas 3:2–18

Ti panagbabawi ket naisangsangayan a panagbalbaliw ti panunot ken puso.

Mision ni Juan Bautista ti mangisagana iti puspuso dagiti tao nga umawat iti Mangisalakan ken agbalin nga ad-adda pay a kas Kenkuana. Kasano ti panangaramidna iti daytoy? Impakdaarna ti, “Agbabawikayo” (Mateo 3:2). Inusarna dagiti ladawan kas iti bunga ken trigo a mangyunay-unay iti kinapateg ti panagbabawi tapno maawattayo ni Cristo (kitaen iti Lucas 3:9, 17).

Ania dagiti dadduma pay a ladawan a makitayo kadagiti pakaammuan maipapan ti panagministro ni Juan Bautista? Ibilang ti panangmarkam kadagitoy kadagiti nasantuan a kasuratam wenno panangidrowing kadagitoy ladawanda iti adalen a journal. Ania ti maisuro dagitoy a ladawan maipanggep iti doktrina ken kinapateg ti panagbabawi?

Ti napudno a panagbabawi ket “panagbalbaliw iti panunot, napabaro a pannirigan maipanggep iti Dios, maipanggep iti bukod a bagi, ken maipanggep iti lubong. … [Kayatna a sawen] nga iturong ti tao ti puso ken pagayatan[da] iti Dios” (Pangiwanwan iti Nasantuan a Kasuratan, “Agbabawi, Panagbabawi”). Iti Lucas 3:7–14, ania dagiti panagbalbaliw nga inyawis ni Juan nga aramiden dagiti tao tapno agsagana nga umawat ken ni Cristo? Kasano a mayaplikar kenka daytoy a pammagbaga? Kasano a maipakitam a pudno a nagbabawikan? (kitaen itii Lucas 3:8).

Kitaen met iti Patarus ti Joseph Smith, Lucas 3:4–11 (iti Pangiwanwan iti Nasantuan a Kasuratan); Pangiwanwan iti Nasantuan a Kasuratan, “Juan Bautista”; D. Todd Christofferson, “The Divine Gift of Repentance,” Ensign wenno Liahona,Nob. 2011, 38–41.

Mateo 3:7; Lucas 3:7

Asino dagiti Pariseo ken Sadusio?

Dagiti Pariseo ket miembro ti gunglo dagiti Judio a mainaig iti relihion a nagpannakkel iti bagbagida iti naiget a panagtungpal iti Linteg ni Moises . Ayoda nga aramiden a simple ti relihion iti panagtungpal iti adu a kaugalian iti seremonia. Dagiti Sadusio ket babaknang a klase ti Judio nga addaan iti mabigbig a relihion ken impluwensia iti politika. Saanda a namati iti doktrina ti panagungar. Agpada dagitoy a grupo ti simmina manipud kadagiti orihinal a panggep dagiti linteg ti Dios, ket adu kadagiti miembroda ti nagkedked nga umawat iti mensahe ti propeta ti Dios, a ni Juan Bautista.

Kitaen met iti Mateo 23:27; Juan 1:19–24; Pangiwanwan iti Nasantuan a Kasuratan, “Pariseo” ken “Sadusio.”

Mateo 3:13–17; Macos 1:9–11; Lucas 3:15–16, 21–22

Nabuniagan ni Jesucristo tapno “ipatungpal ti amin a kinalinteg.”

Idi nabuniaganka, sinurotmo dagiti pagwadan ti Mangisalakan. Idilig no ania ti masursurom manipud kadagitoy a pakaammuan maipapan ti panagbuniag ti Mangisalakan iti no ania ti napasamak kabayatan ti panagbuniagmo.

Asino ti nangbuniag ken ni Jesus, ken ania ti turay nga iggemna?	Asino ti nangbuniag kenka, ken ania ti turay nga iggemna?
Sadino ti nagbuniagan ni Jesus?	Sadino ti nagbuniagam?
Kasano ti pannakabuniag ni Jesus?	Kasano ti pannakabuniagmo?
Apay a nabuniagan ni Jesus?	Apay a nabuniaganka?
Kasano ti panangipakita ti Nailangitan nga Ama a naragsakan Isuna ken ni Jesus?	Kasano ti panangipakita ti Nailangitan nga Ama a naragsakan Isuna idi nagpabuniagka? Kasano ti panangipakitana iti yaanamongna manipud idin?

Insuratni Nephi ti sumagmamano a napapateg a pannursuro maipapan iti panagbuniag ti Mangisalakan. Ania dagiti balikasna iti 2 Nephi 31 nga isurona kenka? Ibilangmo ti panangisurat iti padasmo iti panagbuniagmo iti maysa a journal.

Kitaen met iti Juan 1:32–33; Mosiah 18:8–11; Doktrina ken Katulagan 13:1; 20:37, 68–74;“The Baptism of Jesus” (video, LDS.org).

Mateo 3:16–17; Marcos 1:9–11; Lucas 3:21–22

Isuro kadi ti Biblia a tallo a nagsisina a kinatao ti Kinadios [Godhead]?

Aglaon ti Biblia iti adu a pakapaneknekan a dagiti kameng ti Kinadios [Godhead] ket tallo a nagsisina a kinatao. Kas pagarigan, ti pakaammuan maipapan ti panagbuniag ti Mangisalakan ket mangsuporta iti doktrina a ti DIos Ama, ni Jesucristo, ken ti Espiritu Santo ket tallo a nagsisina a kinatao. Nagsao ti Dios Ama manipud iti langit, ken ti Espiritu Santo (nga ibagian ti kalapati) ket bimmaba iti Mangisalakan bayat ti pannakabuniagna. Dagitoy ti sumagmamano a nasantuan a kasuratan a mangisuro iti daytoy isu met la a kinapudno: Genesis 1:26–27; Mateo 17:1–5; Juan 17:20–23; Dagiti Aramid 7:55–56; ken Doktrina ken Katulagan 130:22.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a singasing:

Mateo 3

Iggem ni Juan Bautista ti Aaronic Priesthood. Ania ti masursurotayo maipanggep iti Aaronic Priesthood bayat ti panagadaltayo maipanggep kenkuana Kasano a makatulong dagiti pagwadan ni Juan kadagiti agig-iggem iti Aaronic Priesthood a mangipatungpal kadagiti pagrebbenganda? (kitaen met iti DkK 13:1; 20:46–60.)

Mateo 3:11–17; Marcos 1:9–11; Lucas 3:21–22

Iti panangisuro kadagiti miembro ti pamilia maipanggep iti panagbuniag ken ti sagut ti Espiritu Santo, ibilang ti panangi-display iti narugit a banag ket pabugguam daytoy iti danum kadagiti miembro ti pamiliam. Kasano a mangibagi daytoy nga aktibidad iti panagbuniag? Kalpasanna saludsodem kadagiti miembro ti pamilia a pagsasaritaanda maipapan iti sumagmamano kadagiti pangdalus a kababalin ti apuy. Apay a nailadawan ti Espiritu Santo a kas “panagbuniag iti apuy”? (Kitaen iti Pangiwanwan iti Nasantuan a Kasuratan, “Espiritu Santo”)

No nabuniagantayon, naugasanen dagiti basoltayo.

Mateo 3:17; Macos 1:11; Lucas 3:22

Kaano ti pannakariknatayo a naragsakan ti Dios kadatayo? Ania ti mabalintayo nga aramiden kas maysa a pamilia a mangparagsak iti Dios?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Bukod a Panagadal

Agpatulongka iti Apo. Naited dagiti nasantuan a kasuratan babaen ti paltiing, ket tapno pudno a maawatan dagitoy,kasapulantayo ti bukod a paltiing. Inkari ti Apo, “Agdawatkayo ket maikkankayto, agsapulkayo ket makasarakkayto, umawagkayo ket mailukatankayto” (Mateo 7:7).

Ni Juan Bautista a Mangbumbuniag ken ni Jesus, ni Greg K. Olsen