Ti stained-glass a tawa iti Nauvoo Illinois Temple, ni Tom Holdman

Enero 28–Pebrero 3

Mateo 3; Marcos 1; Lucas 3

“Isaganayo ti Dalan ti Apo”

Bayat ti panangbasam maipanggep ken ni Juan Bautista ken ti pannakabuniag ni Jesucristo, isuratmo ti ania man a naespirituan nga impresion a maawatmo. Umaykayo, Sumurot Kaniak—Para kadagiti Indibidual ken Pamilia ket makatulong kenka tapno maawatam dagitoy a nasantuan a kasuratan, ken makatulongto kenka a mangsuporta iti panagsursuro dagiti miembro iti klasem nga ar-aramidenda iti bukodda .

Isuratmo Dagiti Impresionmo

Yawis ti Panagbibinninglay

Tapno mangted kadagiti ubbing iti gundaway a mangibinglay iti nasursurodan, mangipakitaka iti ladawan ni Jesus nga agpabuniag, ken kiddawem kadakuada nga ibagada kenka no ania ti mapaspasamak iti ladawan ken no ania ti mariknada maipanggep ti agpabuniag.

Isuro ti Doktrina

Dagiti In-inaudi nga Ubbing

Mateo 3:13–17

Makapagbuniagak kas ken ni Jesus.

Kasano a mausarmo ti pakaammuan iti panagbuniag ni Jesus tapno matulongan dagiti ubbing nga agsagana a mabuniagan?

Dagiti Mabalin nga Aktibidad

• Gupgopem ti estoria maipapan iti panagbuniag ti Mangisalakan (kitaen iti Mateo 3:13–17; kitaen met iti “Kapitulo 10: Mabuniagan ni Jesus,” Dagiti Estoria iti Baro a Tulag, 26–29, wenno ti maitutop a video iti LDS.org). Mamin-adu nga ulitem ti estoria ken awisem dagiti ubbing a mangibinglay kadagiti malagipda a detalye. Ilawlawag a nabuniagan ni Jesus babaen ti panangirarem ti maysa a tao nga addaan iti turay ti priesthood.

• Mangipakitaka iti ladawan ni Jesus nga agpabuniag ken panid ti aktibidad iti daytoy a lawas. Paitudom kadagiti ubbing dagiti pagpapadaan ti dua a ladawan.

• Mabalin a subliem nga adalen dagiti kari nga aramidento dagiti ubbing inton mabuniaganda (kitaen iti Mosiah 18:8–10; DkK 20:37; Pudno iti Pammati, 23). Saludsodem kadakauada no ania kadagitoy a banag ti ar-aramidendan.

• Awisem nga agsarita ti maysa a miembro ti bishopric maipanggep iti interbyu iti panagbuniag a maaramid sakbay a mabuniaganda.

• Kantaen ti “Baptism,” Children’s Songbook, 100–101, a kadua dagiti ubbing. Ibilangmo a kiddawem iti maysa nga ubing a makaammo a nasayaat iti daytoy a kanta tapno mangidaulo bayat ti panagkanta iti dadduma pay nga ubbing.

Kabaelantayo a suroten ti pagwadan ni Jesus babaen iti panagpabuniag.

Mateo 3:11, 16

Tulongannak ti Espiritu Santo.

Kas mainayon iti panangsagana para iti panagbuniag, agsagsagana met dagiti ubbing nga umawat iti sagut ti Espiritu Santo. Kasano a matulongam ida?

Dagiti Mabalin nga Aktibidad

• Usarem ti Mateo 3:11, 16 tapno maisurom kadagiti ubbing a bimmaba ti Espiritu Santo ken ni Jesus idi nabuniagan Isuna (nagparang ti kalapati a kas tanda a mangipakita a napasamak daytoy). Ipakitam ti ladawan Ti Sagut ti Espiritu Santo (Libro ti Arte ti Ebanghelio, blg. 105), ken ilawlawagmo a maawattayo ti sagut ti Espiritu Santo no nakumpirmaantayon.

• Mangitugot iti maysa a kahon a naglaon kadagiti banag a kas maysa a ladawan ni Jesus, makapagin-awa nga ules, ken maysa a kompas. Awisem dagiti ubbing a pumili ti aytem ken kalpasanna ibinglayda no kasano a mangibagi ti tunggal maysa iti wagas a pakatulongan kadatayo ti Espiritu Santo—Paneknekanna ni Jesus, mangliwliwa kadatayo (kitaen iti Juan 15:26), ken mangipakita kadatayo iti umno a dalan (kitaen iti 2 Nephi 32:5).

• Ibinglaymo dagiti bukodmo a padas iti panakaawatmo iti tulong a nagapu iti Espiritu Santo.

• Awisem dagiti ubbing a dumngeg kadagiti wagas a pakatulongan kadatayo ti Espiritu Santo bayat ti panangkantada iti “The Holy Ghost,” Children’s Songbook, 105.

Isuro ti Doktrina

Dagiti In-inauna nga Ubbing

Mateo 3

Nabendisionannak dagiti ordinansa ti Aaronic Priesthood.

Inikutan ni Juan Bautista ti Aaronic Priesthood, isu a nasayaat daytoy a gundaway a mangisuro kadagiti ubbing maipanggep iti Aaronic Priesthood ken makatulong kadakuada a mangbigbig kadagiti bendision ken bileg a maipaay kadagiti lallaki ken babbai babaen iti daytoy a priesthood.

Dagiti Mabalin nga Aktibidad

• Awisem dagiti ubbing nga agaramid iti listaan dagiti pagrebbengan ti Aaronic Priesthood, nga usaren ti Doktrina ken Katulagan 20:46, 58–60; 84:111. Ilawlawag a dagiti saserdote [priest] iti Aaronic Priesthood mabalin a “mangbuniag, ken mangannong iti sakramento.” Nasken kadagiti saserdote [priest], maestro [teacher], ken diakono [deacon] ti “mangisuro, ken mangawis iti amin nga umasideg ken ni Cristo” (DkK 20:46, 59). Kiddawen kadagiti ubbing a mangsapul iti Mateo 3 dagiti pagwadan ni Juan a mangipatpatungpal kadagitoy a pagrebbengan. Kasano a maawistayo amin dagiti dadduma nga umasideg ken ni Cristo, kas iti inaramid ni Juan?

• Iparang ti sumagmamano a ladawan dagiti Aaronic Priesthood holder a mangan-annong kadagiti ordinansa ti panagbuniag ken ti sakramento (kitaen iti Libro ti Arte ti Ebanghelio, num. 103, 108). Ilawlawag no kasano a maisaganatayo dagitoy nga ordinansa nga umawat ken ni Jesucristo ken ti Pannubbotna.

• Aggigiddan a mangbasa iti Doktrina ken Katulagan 13:1, ken ilawlawag nga insubli ni Juan Bautista ti Aaronic Priesthood ken ni Joseph Smith. Kiddawen kadagiti ubbing no kasano a nabendisionnanna ida gapu ta naisubli ti Aaronic Priesthood.

Mateo 3:13–17; Lucas 3:2–18

Kabaellak a tungpalen dagiti katulagak iti panagbuniag.

Ti pakaammuan ti panagbuniag ni Jesus ket nasayaat a gundaway tapno matulongan dagiti ubbing a mangrebyu kadagiti katulaganda iti panagbuniag ken agkumitda manen a mangtungpal kadagitoy.

Dagiti Mabalin nga Aktibidad

• Kiddawen iti dua nga ubbing a mangbasa iti Lucas 3:7–9, 15–17, a maysa ti mangbasa kadagiti balikas ni Juan Bautista ken ti maysa pay ti mangbasa iti nabati a dadduma pay a balikas. Kalpasan ti tunggal bersikulo, agsardeng ket tulongam dagiti ubbing nga ipaawat no ania ti kaipapanan ti bersikulo.

• Sublian nga adalen dagiti katulagan nga inaramid dagiti ubbing iti panagbuniag, masarakan iti Mosiah 18:8–10 ken Doktrina ken Katulagan 20:37. (Kitaen met iti Pudno iti Pammati, 23–26.) Awisem dagiti ubbing a mangisurat kadagitoy a reperensia iti panid ti aktibidad iti daytoy a lawas.

• Isaganam ti sumagmamano a sagpaparis dagiti kard nga addaan kadagiti maiparis a ragup dagiti balikas wenno dagiti ladawan a mangibagi kadagiti katulagan iti panagbuniag. Ikabil a nakapakleb dagiti kard. Awisem dagiti ubbing nga agsisinnublat a mangbaliktad iti dua a kard iti maminsan, a mangsapul iti agparis. Kalpasan a maaramid ti agpaparis, mangawis kadagiti ubbing a mangibinglay kadagiti wagas a paipatungpalan dayta a katulagan.

• Mangiburay no kasano a nabendisionannaka ti panagtungpal kadagiti katulagam idi nagbuniagka.

Mateo 3:11, 16

Matarabaynak ti Espiritu Santo.

Masursuro dagiti ubbing no kasano ti mangilasin ken mangsurot ti pannarabay ti Espiritu Santo. Kasano a masursuruam ida a ti panagtungpal kadagiti katulagan ti panagbuniag ket makatulong kadakuada nga agbalin a maikari nga umawat iti daytoy a pannarabay?

Dagiti Mabalin nga Aktibidad

• Kiddawem ti tunggal ubing a pumili iti maysa kadagiti sumaganad a nasantuan a kasuratan a basaen ken ilawlawagda no kasano a makisao ti Espiritu Santo kadatayo: Doktrina ken Katulagan 6:23; 8:2–3.

• Kiddawem iti maysa nga ubing a mangbasa iti Mateo 3:11. Kasano a maipada iti apuy ti Espiritu Santo? Kas pagarigan, makaliwliwa ti apuy, ken mangted iti lawag a mangiwanwan kadatayo (kitaen iti Juan 15:26; 2 Nephi 32: 5).

• Kiddawen kadagiti ubbing a ikidemda ti matada ken ingatoda dagiti imada. Kalpasanna silalag-an nga igisigis dagiti dakuplapda ti maysa a dutdot wenno sinulid. Awisem ida a mangibaga kenka no mariknada daytoy. Ania ti isuro daytoy nga aktibidad maipanggep ti panangbigbig kadagiti impresionda iti Espiritu Santo.

• Awisem dagiti ubbing a mangibinglay kadagiti padasda idi adda kadakuada ti Espiritu Santo. Apay a ti panangtungpal kadagiti katulagan ket makatulong kadatayo a maaddaan iti panarabay iti Espiritu Santo?

Yallukoy ti Panagsursuro iti Pagtaengan

Allukoyem dagiti ubbing nga agsaludsod kadagiti nagannak kadakuada wenno dadduma pay a miembro ti pamilia maipanggep iti panagbuniagda.

Panangpadur-as iti Panangisurotayo

Ikarigatam a manggun-od iti bukodmo a pammaregta. Dimo pagarupen a dagitoy a balabala ket kas pangiturong a nasken a surotem bayat ti panangisurom. No di ketdi, usarem dagitoy a kas kapanunotan a mangpapigsa iti bukodmo a pammaregta bayat ti panangutobmo iti kasapulan dagiti ubbing a sursuruam. (Kitaen iti Panangisuro iti Wagas ti Mangisalakan, 7.)