“Enero 21–27. Juan 1: Nasarakanmi ti Mesias,” Umaykayo, Sumurot Kaniak—Para iti Primary: Baro a Tulag 2019 (2019)
“Enero 21–27. Juan 1,” Umaykayo, Sumurot Kaniak—Para iti Primary: 2019
Enero 21–27
Juan 1
Nasarakanmi ti Mesias
Bayat ti panagbasam iti Juan 1, isuratmo dagiti naespirituan nga impresion a naawatmo. Balabala ita a lawas iti Umaykayo, Sumurot Kaniak—Para Dagiti Indibidual ken Dagiti Pamilya mabalin a makatulong tapno maawatan daytoy a kapitulo. Dagiti sumaganad a naisingasing nga aktibidad ket makaited kenka kadagiti kapanunotan maipapan iti no kasano a matulongam dagiti ubbing a masursuruan kadagiti pagbatayan iti Juan 1. Mabalin nga ibagay dagiti aktibidad para kadagiti ubbing nga in-inauna, no kasapulan, a para kadagiti in-inaudi nga ubbing.
Isuratmo Dagiti Impresionmo
Yawis ti Panagbibinninglay
Tapno matulongan dagiti ubbing a mangibinglay no ania ti ammoda maipanggep ken Jesus, mabalinmo ti mangipakita kadagiti ladawanna a mangipatpatungpal iti sumagmamano kadagiti akemna a nailadawan iti Juan 1. Kalpasanna kiddawem kadakuada a mangiladawan no ania ti mapaspasamak (kas iti pinangparsua iti lubong wenno panangisuro iti ebanghelio).
Isuro ti Doktrina
Dagiti In-inaudi nga Ubbing
Nagnaed ni Jesus iti sidong ti Nailangitan nga Ama sakbay ti pannakayanakna.
Insuro ni Juan a nagnaed ni Jesucristo iti sidong ti Dios sakbay ti mortal a padasna. Nagnaedtayo met iti sidong ti Dios sakbay a nayanaktayo (kitaen iti “Ti Kaamaan: Maysa a Waragawag ti Lubong,” Ensign wenno Liahona, Nob. 2010, 129). Kasano a maisuromto dagiti ubbing iti daytoy a kinapudno?
Dagiti Mabalin nga Aktibidad
-
Ilawlawag a “ti Verbo” iti Juan 1:1 ket maitudo ken ni Jesus. Basaem iti napigsa dagiti bersikulo, ken kiddawen kadagiti ubbing a mangisao iti “Jesus” iti tunggal basaem “ti Verbo.” Ipakita iti linia a drowing iti Biag Sakbay ti Mortal a Biag (LDS.org). Ilawlawag a nagnaed ni Jesucristo iti sidong ti Nailangitan nga Ama sakbay nga immay Isuna iti daga.
-
Isurom kadagiti ubbing a nagnaedtayo met iti sidong ti Dios sakbay nga immaytayo iti daga. Mabalin a kayatmo nga usaren ti ”Pakauna: Ti Plano ti Nailangitan nga Amatayo,” Dagiti Estoria iti Baro a Tulag, 1–5; ti maitutop a video (LDS.org); wenno Pangiwanwan iti Nasantuan a Kasuratan, ”Biag sakbay ti Yaay ditoy Daga,“ scriptures.lds.org.
-
Mangawis iti maysa a naganak a mangitugot iti maladaga iti klase, ket usarem daytoy kas maysa a gundaway a mangisuro a nagnaedtayo iti langit iti denna ti Nailangitan nga Ama kas espiritu nga annak sakbay a nayanaktayo.
Pinarsua ni Jesus dagiti amin a banag.
Gagangay a pagragsakan ti adu nga ubbing a maibilangda kadagiti ipinarsua ti Apo. Ti pannakaammo maipanggep ti akem ni Cristo a kas Namarsua mabalin a makatulong kadakuada a mangipapigsa iti panangdaydayawda Kenkuana.
Dagiti Mabalin nga Aktibidad
-
Basaen ti Juan 1:3 a kaduam dagiti ubbing, ken ipakitam ti ladawan manipud iti balabala iti daytoy a lawas iti Umaykayo, Surmurot Kanak—Para Kadagiti Indibidual ken Pamilia. Tulongam dagiti ubbing a mangikabesa iti ragup ti balikas ”pinarsua ni [Jesucristo] ti amin a banag.”
-
Itugot dagiti ubbing nga agpagnapagna iti ruar. Bay-an nga agsisinnublat dagiti ubbing a mangiladawan iti makitada a banag a naparsua, ken saludsodem iti klase a pugtuanda ti mailadladawan.
-
Kiddawen kadagiti ubbing a mangpanunot kadagiti wagas a pakaaywananda kadagiti naparsua iti lawlawda (kas pagarigan, panagbalin a naasi kadagiti dinguen).
Pinarsua ni Jesucristo ti lubong ken ti amin a banag iti daytoy.
Maawisko dagiti dadduma nga umasideg ken ni Jesucristo ken agsursuro iti maipanggep Kenkuana.
Juan 1 naglaon kadagiti pakaammuan dagiti disipulo a nangawis kadagiti tao nga ”umaykayo ken kitaenyo” a ni Jesus iti Anak ti Dios. Mabalin a suroten uray dagiti babassit nga ubbing daytoy a pagwadan.
Dagiti Mabalin nga Aktibidad
-
Iladawanmo no kasano nga insuro ni Juan ni Andres maipanggep ken Jesus, ket isaritam no kasano nga insuro met ni Andres ni Pedro (kitaen iti Juan 1:35–42). Ibinglay no kasano a naammuam ti maipanggep iti Simbaan, wenno mangawis iti maysa a baro a miembro a mangibinglay no kasano a naammuanna ti maipanggep iti Simbaan.
-
Ibinglay ti estoria ni Felipe a mangaw-awis ken ni Natanael nga “umay ken kitaenna” (Juan 1:43–51). Ilemmeng ti maysa a ladawan ni Jesus iti maysa a kahon, ken mangawis iti maysa nga ubing nga ”umay ken kitaenna” daytoy ken kalpasanna ibagana kadagiti dadduma pay nga ubbing no ania ti nakitana.
-
Bay-an a koloran dagiti ubbing ti panid ti aktibidad iti daytoy a lawas, ken allukoyem ida a mangusar iti daytoy a mangawis iti maysa kadakuada a masursuruan iti maipanggep ken Jesus.
-
Kiddawem ti maysa nga ubing a mangisarita maipanggep iti panawen idi a nangibinglay iti maysa a banag, kas maysa nga ay-ayam wenno regalo, iti maysa a tao. Kasano a makaibinglaytayo iti ebanghelio? Isarita ti estoria maipapan iti ubing a nangibinglay iti ebanghelio iti maysa a gayyem, kas iti estoria ni Elder M. Russell Ballard maipanggep ken ni Josue (”Following Up,” Ensign wenno Liahona, Mayo 2014, 78–81).
Isuro ti Doktrina
Dagiti In-inauna nga Ubbing
Nagnaed n Jesuscristo iti sidong ti Nailangitan nga Ama sakbay ti pannakayanakna.
Uray sakbay a nayanak Isuna, inaramid ni Jesus dagiti napateg nga akemna iti plano ni Nailangitan nga Ama. Bayat ti panangbasam iti Juan 1:1–5, ania ti makaawis kenka maipanggep iti aramid ni Cristo iti biag sakbay ti yaay iti daga?
Dagiti Mabalin nga Aktibidad
-
Saludsodem kadagiti ubbing no ammoda ti ania man a banag maipanggep ti inaramid ni Jesus sakbay a panakayanakna. Awisem ida a mangsapul kadagiti sungbat iti Juan 1:1–5. Mabalin a makatulong a sapulen iti Patarus ni Joseph Smith, Juan 1:1–5 (iti Bible appendix).
-
Ibinglay ti “Pakauna: Plano ti Nailangitan nga Amatayo,“ Dagiti Estoria iti Baro a Tulag, 1–5, kadagiti ubbing wenno ipabuya ti maitutop a video (LDS.org). Saludsodem kadagiti ubbing no ania ti nasursuroda maipanggep ken ni Jesucristo.
-
Awisem ti sumagmamano nga ubbing nga umay iti klase a nakasagana a mangipakita wenno mangiladawan iti maysa a banag a pinartuatda. Ipakitam dagiti ladawan ti sumagmamano a pinarsua ti Apo, ken usarem ti Juan 1:3 a mangilawlawag a pinarsua ni Jesus ti amin a banag.
Ni Jesucristo ti silawko.
Makatulong ti simbolismo ti silaw kadagiti ubbing a makaawat iti Mangisalakan ken iti ebangheliona. Kasano a maparegtam dagiti ubbing nga agsapul iti silaw ti Mangisalakan no kasla nasipnget ti lubong?
Dagiti Mabalin nga Aktibidad
-
Awisem dagiti ubbing a mangbasa iti Salmo 27:1; Juan 1:4–9; Mosiah 16:9; ken Doktrina ken Katulagan 39:1–2, nga agsapsapul iti ragup dagiti balikas a pagpapadadaan dagitoy nasantuan a kasuratan. Kasano a mayarig ni Jesucristo ti silaw?
-
Mangipakitaka iti ladawan ti Mangisalakan ken ti sumagmamano a banag a mangted iti silaw, a kas iti flashlight. Kasano a mayarig ni Jesus kadagitoy a banag? Kasano a maibinglaytayo ti silawna kas kadagiti dadduma? Aggigiddan a mangkanta iti “The Lord Is My Light,” Hymns, no. 89, wenno sabali pay a kanta maipapan iti silaw ti ebanghelio.
-
Saludsodem kadagiti ubbing no ania ti aramidenda no addada iti kasipngetan ken agbubutengda. Paneknekam a mabalinda a kanayon ti umasideg iti Mangisalakan no mabutengda.
Kas pasurot ni Jesucristo, awisek ti dadduma a sumurotda Kenkuana.
Ibilangmo no kasano a mausarmo dagiti pagwadan iti Juan 1:35–51 a mangyallukoy kadagiti ubbing a mangawis kadagiti dadduma nga agsursuro maipanggep iti Mangisalakan.
Dagiti Mabalin nga Aktibidad
-
Tulongam dagiti ubbing a mangsukisok iti Juan 1:35–51 tapno mangsapul kadagiti banag a kinuna dagiti tao a mangawis kadagiti dadduma nga agsursuro maipanggep iti Mangisalakan. Palubosam ida a mangsanay no ania ti mabalinda nga isao a mangawis iti maysa a gayyem nga agsursuro maipanggep Kenkuana.
-
Kiddawen kadagiti ubbing nga usarenda ti panid ti aktibidad iti daytoy a lawas a mangaramid iti awis a mabalinda nga usaren a mangawis iti maysa a gayyem wenno miembro ti pamilia a masursuruan iti ad-adu pay maipanggep ken Jesucristo.
-
Mangted dagiti ubbing iti gundaway a mangisarita iti klase maipanggep iti maysa a banag nga ipatpategda. Tulongam dagiti ubbing a mangkita no kasano a ti panangibinglay iti ebanghelio ket kas iti panangibinglay iti dadduma pay a banag nga ipatpategtayo. Mabalin nga ipabuyam ti video “Good Things to Share” (LDS.org).
Yallukoy ti Panagsursuro iti Pagtaengan
Allukoyem dagiti ubbing a mangawis iti maysa a tao nga ay-ayatenda tapno agsursuro iti ad-adu pay maipanggep ken ni Jesucristo.
Panangpadur-as iti Panangisurotayo
Tulongam dagiti ubbing a mangiladawan iti panunotda maipapan iti estoria. Mangsapul kadagiti wagas a mangipartuat ti imahe ti estoria, agraman ti arte ti ebanghelio, dagiti drowing, video, puppet wenno pannakayakem.