Enero 7–13

Mateo 1; Lucas 1

“Maaramid Koma Kaniak Kas iti Saom”

Rugiam babaen ti panangbasa iti Mateo 1 ken Lucas 1. Umaykayo, Sumurot Kaniak—Para kadagiti Indibidual ken Pamilia ket makatulong kenka tapno maawatam dagitoy a kapitulo, ken daytoy a balabala ti mangted kenka kadagiti kapanunotan iti panangisuro. No kasapulam ti nayon a tulong iti panangisuro kadagiti in-inaudi nga ubbing, kitaen iti “Panangipaay iti Kasapulan dagiti In-inaudi nga Ubbing” iti rugi ti daytoy a resource.

Isuratmo Dagiti Impresionmo

Yawis ti Panagbibinninglay

Kiddawen kadagiti ubbing nga agtugaw iti pasirkulo, ket kalpasanna saludsodem iti maysa nga ubing a mangibinglay iti maysa a banag a nasursurona manipud kadagiti nasantuan a kasuratan iti daytoy a lawas wenno iti sabali pay a panawen. Mangitulid dayta nga ubing iti bola wenno mangitudo iti sabali pay nga ubing iti sirkulo, a bagina met ti mangibinglay.

Isuro ti Doktrina

Dagiti In-inaudi nga Ubbing

Mateo 1:18–25; Lucas 1:26–38

Impakaammo dagiti anghel ti pannakayanak ni Jesus.

Sinarungkaran ti anghel ti tunggal maysa kada Maria ken Jose a nangipakaammo iti pannakayanak ni Jesucristo. Makatulong dagitoy a padas kadagiti ubbing a mangkita no kasano ti kapateg ti pannakayanak ni Cristo.

Dagiti Mabalin nga Aktibidad

• Awisem dagiti nagannak ti maysa nga ubing nga umay iti klase a nakasuot iti bado a kas kada Maria ken Jose. Kiddawem kadakuada a mangibinglay kadagiti padasda kas naisurat iti Mateo 1:18–25 ken Lucas 1:26–38.

• Isarita ti estoria dagiti anghel a nagparang kada Maria ken Jose, kas naisurat kadagitoy a bersikulo. (Kitaen met iti “Kapitulo 2: Ni Maria ken ti Anghel” ken “Kapitulo 4: Ni Jose ken ti Anghel,” Dagiti Estoria iti Baro a Tulag, 8–9, 12, wenno dagiti maitutop a video iti LDS.org.) Mabalinmo nga ipakita ti ladawan iti balabala ita a lawas iti Umaykayo, Sumurot Kaniak—Para kadagiti Indibidual ken Pamilia Awisem dagiti ubbing a mangulit iti daytoy nga estoria kenka.

• Awisem dagiti ubbing a mangidrowing kadagiti estoria a masarakan iti Mateo 1:18–25 ken Lucas 1:26–38

Lucas 1:5–20, 57–63

Sungbatan ti Nailangitan nga Ama dagiti kararagko.

Nalabit a nagkarkararag da Zacarias ken Elisabet iti uneg ti adu a tawen tapno maadaandda iti annak. Iti kamaudiananna sinungbatan ti Nailangitan nga Ama dagiti kararagda babaen ti panangtedna kadakuada iti anak a lalaki, a ni Juan Bautista. Kasano a mausarmo daytoy nga estoria a pangisuro kadagiti ubbing a sungbatan ti Nailangitan nga Ama dagiti kararag?

Dagiti Mabalin nga Aktibidad

• Iti bukodmo a balikas, isaritam ti estoria manipud iti Lucas 1:5–20, 57–63. Mabalin a kayatmo nga uliten ti estoria iti sumagmamano a gundaway. Tudingam dagiti ubbing a mangyakem kadagiti parte ti anghel, ni Zacarias, ken ni Elisabet iti estoria. Yunay-unay a sinungbatan ti Nailangitan nga Ama dagiti kararag da Elisabet ken Zacarias, ket iburaymo ti maysa a padas a sinungbatan ti Nailangitan nga Ama ti kararagmo.

• Usarem ti “We Bow Our Heads,” Children’s Songbook, 25, wenno sabali pay a kanta a mangisuro kadagiti ubbing no kasano ti agkararag. Mabalinyo pay nga aggigiddan a mangkanta iti “A Child’s Prayer,” Children’s Songbook, 12–13. Tunggal kanito a kantaen dagiti ubbing dagiti balikas nga “agkararag” wenno “kararag,” awisem ida nga agdumog ken agdalikepkep.

• Kiddawem iti tunggal ubing nga agaramid kadagiti tignay a mangibagi iti maysa a banag a mabalinna nga ikararagan. Bay-am a pugtuan dagiti dadduma pay nga ubbing no ania ti mangibagi kadagiti tignay. Makasarakda kadagiti kapanunotan iti panid ti aktibidad iti daytoy a lawas.

Lucas 1:31–35

Ni Jesucristo ti Anak ti Dios.

Ni Jesus ti Anak ti Nailangitan nga Ama ken ni Maria. Ania iti maaramidmo a makatulong kadagiti ubbing a masursuruan ti maipanggep Kenkuana?

Dagiti Mabalin nga Aktibidad

• Ibagam kadagiti ubbing nga imbaga ti anghel ken ni Maria a maawagan ti maladagana iti Anak ti Dios (kitaen iti Lucas 1:35). Tulongam dagiti ubbing a mangulit iti ragup ti balikas a “Ni Jesucristo Isu ti Anak ti Dios.” Tulongam dagiti ubbing a makaawat no siasino dagiti nagannak ni Jesus babaen ti panangawis kadakuada a mangidrowing iti ladawan iti bukodda a nagannak. Bayat ti panangaramidda iti daytoy, ibagam kadakuada nga addaan met ni Jesus iti nagannak—da Maria ken ti Nailangitan nga Ama. Mainayon pay, a nakiddaw ken ni Jose a salakniban ken aywananna ni Jesus bayat ti panagbiagna iti daga.

• Iburaymo ti pammaneknekmo a gapu ta Anak ti Dios ni Jesus, kabaelanna ti matay para kadagiti basoltayo ket agbiag manen. Mangipakita kadagiti ladawan ti Pannakailansa iti Krus ken Panagungar ni Jesus (kitaen iti Libro ti Arte ti Ebanghelio, blg. 57, 59).

Isuro ti Doktrina

Dagiti In-inauna nga Ubbing

Mateo 1:18–25; Lucas 1:5–37

Iti Dios awan ti imposible.

Dagiti pannakayanak da Jesus ken Juan Bautista nagbalin laeng babaen ti bileg ti Dios. Ti panagsursuro maipapan kadagiti milagro ni Jesus ket makapapigsa iti pammatti dagiti ubbing a ti Dios ket addaan iti bileg a makaaramid kadagiti milagro iti biagda.

Dagiti Mabalin nga Aktibidad

• Bayat ti panangrebyum ken dagiti ubbing iti Mateo1:18–25 ken Lucas 1:5–37, saludsodem kadagiti ubbing kas “Ania ti masaom no sika ni Maria?” wenno “Kasano ti mariknam no sika ni Zacarias?”

• Iti gagangay a balikas, isaritam dagiti estoria maipapan iti pannakayanak da Juan Bautista ken Jesucristo. Kiddawem kadagiti ubbing a mangingato kadagiti imada no makangngegda iti maysa a banag a kasla imposible no awan ti bileg ti Dios. Ania ti dadduma pay nga estoria a mabalin nga ibinglay dagiti ubbing a nagaramidan ti Dios iti maysa a banag a kasla imposible?

• Tulongam dagiti ubbing a mangikabesa iti Luke 1:37. Tapno maaramid daytoy, mabalin nga isuratmo ti bersikulo iti pisarra ken awisem dagiti ubbing a mangisao iti daytoy iti mamin-adu. Kalpasan ti maysa, pugasem ti maysa a balikas.

Mateo 1:21–25; Lucas 1:30–35, 46–47

Ni Jesucristo ti Anak ti Dios.

Ni Jesus ti Anak ti Nailangitan nga Ama ken ni Maria. Kasano a matulongam dagiti ubbing a masursuruan iti daytoy a kinapudno.

Dagiti Mabalin nga Aktibidad

• Kiddawen kadagiti ubbing a mangbasa iti Lucas 1:30–35, a mangsapul kadagiti sungbat kadagitoy a saludsod: “Asino ti ina ni Jesus?” ken “Asino ti Ama ni Jesus?” Tulongam ida a makaawat a ni Jesucristo laeng ti tao a ti pisikal nga amana ket ti Nailangitan nga Ama (kitaen met iti 1 Nephi 11:18–21).

• Bayat ti panagbasam kadagitoy a bersikulo, awisem dagiti ubbing a mangsarak kadagiti nagan weno dagiti pangawag ken ni Jesucristo. Ania ti kayat a sawen dagitoy a nagan, ken ania ti isuro kadatayo dagitoy maipapan ken Jesus?

• Ibinglaymo ti pammaneknekmo maipapan ken Jesucristo ket awisem dagiti ubbing a mangibinglay kadagiti pammaneknekda.

Ti Panangiwaragawag, ni John Scott

Lucas 1:5–25, 57–80

Dengdenggen ken sungsungbatan ti Nailangitan nga Ama dagiti kararagko.

Sungsungbatan ti Dios dagiti kararag ngem saan a kanayon iti wagas a mabalin a namnamaentayo. Kasanom a mausar ti pakaammuan kada Zacarias ken Elisabet tapno maisuro kadagiti ubbing daytoy a kinapudno?

Dagiti Mabalin nga Aktibidad

• Kiddawen kadagiti ubbing no ania ti maibagada iti maysa a tao a nagkararag para iti maysa a bendision ngem dina pay naawat daytoy. Awisem ida a mangpanunot maipapan iti daytoy a saludsod bayat ti aggigiddan a panagbasada iti Lucas 1:5–25, 57–80. (Kitaen met iti “Kapitulo 1: Da Elisabet ken Zacarias” ken “Kapitulo 3: Mayanak ni Juan Bautista,” Estoria iti Baro a Tulag, 6–7, 10–11, wenno dagiti maitutop a video iti LDS.org.) Ania ti mabalin nga ibaga da Zacarias ken Elisabet iti maysa a tao a nakarikna a saan a nasungbatan ti kararagna?

• Isapsapam nga awisem ti sumagmamano nga ubbing a mangibinglay kadagiti padas idi nasungbatan ti Nailangitan nga Amatayo dagiti kararagda. Ibinglaymo ti maysa a panawen a nariknam a nasungbatan dagiti kararagmo iti saan a ninamnama a wagas.

• Awisem dagiti ubbing a mangidrowing iti ladawan ti maysa a panawen idi sinungbatan ti Nailangitan nga Ama ti kararag—nangnangruna ti maysa a bukodda. Paibinglaymo kadakuada dagiiti drowingda iti klase.

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti naidrowingda a ladawan kadagiti pamiliada ken kalpasanna idawatda kadagiti miembro ti pamiliada a mangibinglay kadagiti panawen idi sinungbatan ti Dios dagiti kararagda.

Panangpadur-as iti Panangisurotayo

Tulongam dagiti babassit nga ubbing a makasursuro manipud kadagiti nasantuan a kasuratan. Tapno matulongan dagiti babassit nga ubbing a makasursuro manipud kadagiti nasantuan a kasuratan, agpokuska iti maysa a bersikulo iti nasantuan a kasuratan wenno uray maysa laeng a kangrunaan a ragup ti balikas. Mabalinmo nga awisen dagiti ubbing a tumakderda wenno ingatoda dagiti imada no mangngegda daytoy a balikas wenno ragup ti balikas. (Kitaem ti (Panangisuro iti Wagas ti Mangisalakan, 21.)