Disiembre 31–Enero 6

Responsabletayo para iti Bukodtayo a Panagsursuro

Bayat iti panangbasam kadagiti nasantuan a kasuratan iti daytoy a balabala, isurat dagiti ania man a nasantuan nga impresion a maawatmo. Madlawmonto nga addaan ti tunggal balabala iti daytoy a pagbasaan iti aktibidad para kadagiti in-inaudi nga ubbing ken in-inauna nga ubbing, ngem mabalinmo met nga ibagay ti ania man nga aktibidad para iti klaseyo.

Isuratmo Dagiti Impresionmo

Yawis ti Panagbibinninglay

Iti rugi ti tunggal klase, mangtedka kadagiti ubbing kadagiti gundaway a mangibinglay iti ania man a masursuroda maipapan iti ebanghelio. Kas pagarigan, ita a lawas mabalinmo nga awisen ida a mangibinglay iti paggugustoda nga estoria maipapan ken Jesucristo.

Isuro ti Doktrina

Dagiti In-inaudi nga Ubbing

Kayat ni Jesuscristo a surotek Isuna.

Mabasamto ken dagiti ubbing ti adu nga estoria manipud iti biag ni Jesucristo iti daytoy a tawen. Tulongam dagiti ubbing a maawatanda a ti rason nga ad-adalentayo dagitoy nga estoria ket tapno masurottayo a nasaysayaat ti naan-anay a pagwadan ni Jesuscristo.

Dagiti Mabalin nga Aktibidad

• Basaen ti awis ti Mangisalakan,”Umaykayo, Sumurot Kaniak,” a masarakan iti Lucas 18:22. Agay-ayam iti ay-ayam a pagtignayan ti maysa nga ubing ken kalpasanna ibaganna kadagiti dadduma nga ubbing, ”Umaykayo, Sumurot Kaniak” Awisem dagiti dadduma pay nga ubbing nga ulitenda daytoy a tignay.

• Mangipakita kadagiti ladawan dagiti tao a sumursurot iti Mangisalakan iti nadumaduma a wagas, kabayatan ti mortal a panagministrona ken iti aldawtayo. Masarakam dagiti ladawan iti Libro ti Arte ti Ebanghelio wenno kadagiti magasin ti Simbaan. Mabalin met nga ipabuyam ti video a “Light the World” (LDS.org). Palubosam dagiti ubbing a mangammo no kasano ti panangsurot dagiti tao ti Mangisalakan.

• Tulongam dagiti ubbing nga agpanunot kadagiti banag nga ar-aramidenda tapno masurot ti Mangisalakan. Ti panangkanta ti “Seek the Lord Early,” Children’s Songbook, 108, ket makaited kadakuada iti sumagmamano a kapanunotan. Bay-am ida a mangidrowing kadagiti ladawan ti bagbagida a mangar-aramid kadagitoy a banag.

Pudno dagiti nasantuan a kasuratan.

Makagun-od dagiti ubbing iti pammaneknek a pudno dagiti nasantuan a kasuratan sakbay a kabaelanda a mangbasa kadagitoy. Bayat ti panagadalmo kadagiti nasantuan a kasuratan a kadua dagiti ubbing ita a tawen, mabalin a tulongam ida a mangammo para iti bagbagida a pudno dagiti nasantuan a kasuratan.

Dagiti Mabalin nga Aktibidad

• Awisem dagiti ubbing a mangisarita maipapan kadagiti paggugustoda a sagut a naawatda para iti panagkasangayda wenno sabsabali pay a pasken. Mangitugot ti nabungon a sagut a kopia dagiti nasantuan a kasuratan, palubosam ti maysa nga ubing a manglukat iti daytoy, ken paneknekam a dagiti nasantuan a kasuratan ket sagut kadatayo manipud iti Nailangitan nga Ama.

• Ipakitam kadagiti ubbing ti sumagmamano a libro a naglaon kadagiti parparbo nga estoria, ket saludsodem kadakuada maipanggep kadagiti paggugustoda nga estoria. Ipakitam kadakuada dagiti nasantuan a kasuratan, ken paneknekam a dagiti nasantuan a kasuratan ket aglaon iti balikas ti Dios para kadatayo ken isaritam maipapan kadagiti tao a pudno a nagbiag ken dagiti pasamak a pudno a naaramid.

• Mangibinglay kadagiti mensahe a masarakan iti 2 Timoteo 3:15 ken Moroni 10:3–5, a mangtultulong kadagiti ubbing a mangulit iti sumagmamano a ragup dagiti balikas. Tulongam ida a makaawat a mabalinda a maammuan dagiti nasantuan a kasuratan para iti bagbagida.

• Ilemmeng ti maysa a ladawan ti Mangisalakan, ken ikkam dagiti ubbing iti pagilasinan a makatulong kadakuada a mangsapul iti daytoy. Tulongam dagiti ubbing a makaawat no kasano a ti panangsukisok kadagiti nasantuan a kasuratan ket makatulong kadatayo a mangam-ammo ken ni Jesucristo. Pagsisinnublatem dagiti ubbing a mangilemmeng iti ladawan ken mangted kadagiti pamugtuan iti dadduma pay nga ubbing.

• Sangsangkamaysa a kantaenyo ti “Seek the Lord Early” ken “Search, Ponder, and Pray,” Children’s Songbook, 108–9, ken tulongam dagiti ubbing a mangaramid kadagiti tignay a kagiddan dagiti balikas. Mangibinglay kadagiti ubbing iti maysa wenno dua kadagiti paggugustom a nasantuan a kasuratan, ken ibagam kadakuada no kasano a naammuam a pudno dagiti nasantuan a kasuratan. No addaan dagiti ubbing iti paggugustoda a nasantuan a kasuratan wenno estoria iti nasantuan a kasuratan, awisem ida a mangibinglay.

Makagun-od dagiti ubbing iti bukodda a pammaneknek maipapan dagiti kinapudno a mainaig iti nasantuan a kasuratan.

Isuro ti Doktrina

Dagiti In-inauna nga Ubbing

Kayat ni Jesucristo nga agsursuroak ti maipapan Kenkuana ken sumurotak Kenkuana.

Panunotem no kasano a naam-ammom ni Jesucristo. Ania ti maaramidmo a makatulong kadagiti ubbing a makasursuro ti maipapan Kenkuana ken sumurot Kenkuana?

Dagiti Mabalin nga Aktibidad

• Awisem dagiti ubbing nga agsarita maipanggep iti asideg a gayyem nga am-ammoda ken isalaysayda no kasano a nagbalin a gayyem daytoy a tao. Basaen ken paglilinnawagan ti Juan 5:39 ken Juan 14:15 a mangsapul kadagiti wagas a pakaariknaantayo nga asidegtayo ken ni Jesus. Kiddawen kadagiti ubbing a mangibinglay kadagiti panawen idi nariknada nga asidegda Kenkuana.

• Itugotmo ti klasem nga agpagpagna iti lawlaw ti balay a pagmimitingan. Awisem dagiti ubbing a mangingato kadagiti imada no iti pannagnada ket makakitada iti maysa a banag a mangipalagip kadakuada iti wagas a makapasurot kadakuada iti Mangisalakan kas iti puente a pagbuniagan wenno maysa a ladawan).

• Makipagkanta kadagiti ubbing iti “Come, Follow Me” Hymns, no. 116. Awisem dagiti ubbing a mangibinglay kadagiti panawen idi sinurotda ti pagwadan ti Mangisalakan.

Makapagadalak kadagiti nasantuan a kasuratan para iti bagik.

Bayat ti panangbasam kadagiti nasantuan a kasuratan a kadua dagiti ubbing ken panangdamagmo kadakuada kadagiti saludsod, mapabilegmo iti panagtalekda a makasursuroda manipud kadagiti nasantuan a kasuratan ken masarakanda dagiti napateg a gameng ti pannakaammo.

Dagiti Mabalin nga Aktibidad

• Basaen iti napigsa ti Juan 5:39 ken Dagiti Aramid 17:10–11, ken damagem kadagiti ubbing no ania ti nasursuroda maipanggep iti no kasano ti agadal kadagiti nasantuan a kasuratan.

• Pumilika kadagiti sumagmamano a simple, nabileg a nasantuan a kasuratan manipud iti Baro a Tulag, isuratmo iti tunggal maysa iti piraso ti papel, ken ilemmengmo dagiti papel. Mangaramidka kadagiti pamugtuan a mangiturong kadagiti ubbing iti “panangbirok kadagiti gameng” iti uneg ti klase wenno iti uneg ti pasdek ti simbaan a mangsarak kadagitoy a nasantuan a kasuratan. Kalpasan a nasarakanda ti tunggal nasantuan a kasuratan, ilawlawagmo no ania ti kaipapanan dagiti nasantuan a kasuratan ken no apay kasta a gameng daytoy.

• Mangibinglay iti sumagmamano a nasantuan a kasuratan ken ipalawagmo no apay a napnuan kaipapanan kenka dagitoy. Kas maysa a klase, agaramidka iti listaan dagiti napapateg a nasantuan a kasuratan a nasarakan dagiti ubbing iti Baro a Tulag ita a tawen—iti pagtaengan wenno kabayatan ti Primary.

• Maaddaan iti panaglilinnawag kadagiti ubbing maipanggep iti no apay a no dadduma narigat ti mangbasa kadagiti nasantuan a kasuratan. Kiddawem kadagiti ubbing a mangibinglay iti balakad iti tunggal maysa maipapan iti panagadal kadagiti nasantuan a kasuratan. Kiddawem pay kadakuada a mangibinglay kadagiti positibo a padasda kadagiti nasantuan a kasuratan.

• Tulongam dagiti ubbing nga agaramid iti simple a kalendario a mabalinda nga usaren a pangmarkaan a no kasano ti kasansan ti panagbasada kadagiti nasantuan a kasuratan. Dagitoy a kalendario ket mangipalagip kadakuada iti inaldaw a panagbasada kadagiti nasantuan a kasuratan.

Kasapulak iti bukodko a pammaneknek.

Kasapulanto dagiti ubbing a sursuruam dagiti bukodda a pammaneknek no nasken a pagtalinaedenda a napigsa ti pammatida no dumteng ti rigat. Ania ti mabalin nga aramidem tapno maparegtam ida iti panagsursuroda ti kinapudno para iti bagbagida?

Dagiti Mabalin nga Aktibidad

• Ibinglay ti estoria maipapan kadagiti sangapulo a birhen(kitaen iti Mateo 25:1–13; kitaen met iti “Kapitulo 47: Dagitii Sangapulo a Birhen,” Dagiti Estoria iti Baro a Tulag, 118–20, wenno ti maitutop a video iti LDS.org). Saludsudem kadagiti ubbing: Kasano a dagiti pammaneknektayo a kas dagiti pagsilawan? Apay a napateg nga addaantayo iti bukod a pammaneknek?

• Ipalawag no ania ti maaramidtayo a mangpapigsa kadagiti pammaneknektayo. Para kadagiti kapanunotan, awisem dagiti ubbing a mangsukisok iti Juan 7:17 ken Moroni 10:3–5. Awisem ida a mangibinglay kadagiti banag nga ammoda a pudno.

• Kiddawen kadagiti ubbing a tulongandaka a mangmarka kadagiti building blocks kadagiti ragup ti balikas a mangiladawan kadagiti banag a maaramidtayo tapno pumigsa ti pammaneknektayo, a kas iti panagkararag. Bay-am dagiti ubbing a mangaramid iti banag a mangibagi iti maysa a pammaneknek babaen iti panangusar kadagiti blocks.

Yallukoy ti Panagsursuro iti Pagtaengan

Kasano nga allukoyem dagiti ubbing ken dagiti nagannakda nga agsursuro manipud iti Baro a Tulag iti pagtaengan? Kas pagarigan, mabalinmo nga allukoyen dagiti ubbing a mangyulo ti maysa kadagiti nasantuan a kasuratan a nailawlawag iti klase (makatulong no mayababa iti ragup dagiti balikas ti nasantuan a kasuratan ) ken mangibinglay dagiti bersikulo kadagiti pamiliada.

Panangpadur-as iti Panangisurotayo

Ibagay dagiti aktibidad para iti tawen dagiti ubbing nga sursuruam. Kasapulan dagiti in-inaudi nga ubbing dagiti detaliado a panakailawlawag ken masursuruan iti nadumaduma a pamay-an ti panangisuro. Ad-adu ti maitulong dagiti ubbing no nataenganen ken mabalin a nasaysayaat pay ti panangibinglayda kadagiti kapanunotanda. Mangted kadakuada iti gundaway a mangibinglay, mangpaneknek, ken makiraman, ken mangipaay iti tulong no kasapulan. (kitaen iti Panangisuro iti Wagas ti Mangisalakan, 25-26.).)