Ti Kaskasabaiti Bantay, ni Jorge Cocco

Pebrero 18–24

Mateo 5; Lucas 6

“Nagasatkayo”

Rugian babaen ti panangbasa iti Mateo 5 ken Lucas 6. Umaykayo, Sumurot Kaniak—Para kadagiti Indibidual ken Pamilia ket makatulong kenka a makaawat kadagitoy a kapitulo, ken daytoy a balabala ti makaited kenka kadagiti kapanunotan iti panangisuro.

Isuratmo Dagiti Impresionmo

Yawis ti Panagbibinninglay

Kiddawen kadagiti ubbing nga agsarita maipapan iti maysa a banag nga inaramidda iti daytoy a lawas a nangibinglay ti silaw ti Apo iti maysa a tao.

Isuro ti Doktrina

Dagiti In-inaudi nga Ubbing

Mateo 5:9

Kabaelak ti agbalin a mamagkappia.

Mabalin a maaddaan iti nabileg nga impluensia ti pagtaengan dagiti ubbing a sursuruam bayat ti panangtratoda kadagiti dadduma iti ayat ken kinasayaat.

Dagiti Mabalin nga Aktibidad

• Basaem ti Mateo 5:9 kadagiti ubbing, ken ilawlawagmo a dagiti mamagkakappia ket maaramidda ti ania man a lugar a maysa a natalna a lugar, sadino man ti yanda. Mangibinglay kadagiti sumagmamano a di nakappapati a senario, ket tulongam dagiti ubbing a mangilasin kadagiti tao maseknan no mamagkakappiada met laeng wenno saan.

• Awisem ti sumagmamano a nagannak dagiti ubbing a bumisita iti klasem ket mangibinglay kadagiti pagarigan ti panawen idi namagkakappia dagiti annakda iti pagtaengan.

• Mangisurat kadagiti piraso ti papel iti adu a sumagmamano a narigat a kasasaad a mabalin a pakaipasanguan dagiti annakda (kas pagarigan, panaggaapa dagiti agkakabsat iti maysa nga ay-ayam). Awisem iti tunggal ubing a mangala iti maysa a piraso kadagiti a papel. Bayat ti panangbasam kadagiti senario, kiddawem ida a mangibinglay no kasano a makapagbalinda a mamagkakappia iti dayta a situasion.

Mateo 5:14–16

Kayat ni Jesus nga agbalinak a silaw kadagiti dadduma.

Mabalin a maaddaan dagiti babassit nga ubbing iti napigsa nga impluensia para iti pagimbagan dagiti dadduma. Kasano a maparegtam ida a mangparaniag iti silawda?

Dagiti Mabalin nga Aktibidad

• Mangipakita kadagiti ubbing iti sumagmamano a banag a mangted iti lawag, a pakairamanan ti maysa a ladawan dagiti ubbing. Basaem ti Mateo 5:14–16, ket ibagam kadagiti ubbing nga addaantayo amin iti lawag iti kaunggantayo. Kasano a mausartayo ti silawtayo a mangyasideg kadagiti dadduma iti Dios?

• Pagsillawem ti maysa a flashlight iti lawlaw ti siled. Kasano a makatulong ti silaw kadatayo? Kasano a makapagbalintayo a silaw iti lubong? Kalubam ti flashlight. Ania ti mapasamak no ditayo ibinglay ti silawtayo wenno no ilemmengtayo daytoy?

• Ilemmengmo ti maysa a flashlight iti siled, ken iddepem ti silaw. Palubosam a sapulen dagiti ubbing daytoy. Subliem nga adalen ti Mateo 5:15, ket isaritam no apay a nasken a ditayo ilemmeng ti silawtayo.

• Pagsilawen ti maysa a flashlight iti pader, ket awisem dagiti ubbing a surotenda ti silaw babaen kadagiti matada . Usarem ti silaw a mangiturong kadagiti matada iti maysa a ladawan ti Mangisalakan. Kiddawen kadagiti ubbing a mangibinglay iti no kasano a makapagbalintayo a silaw a mangiturong kadagiti dadduma ken ni Jesucristo.

• Tulongam dagiti ubbing a mangsapul ken mangkolor kadagiti nailemmeng a kandela iti panid ti aktibidad iti daytoy a lawas.

• Makipagkanta kadagiti ubbing iti “Jesus Wants Me for a Sunbeam,” “Shine On,” wenno “I Am like a Star,” Children’s Songbook, 60–61, 144, 163.

Mateo 5:44–45

Kayat ni Jesucristo nga ayatek ti amin a tao.

Mabalin a rugian dagiti in-inaudi nga ubbing itan a makapagsanay a mangipakita iti ayat, uray no madi ti panangtrato kadakuada dagiti kapadadda wenno kakabsatda. Bayat ti panangbasam iti Mateo 5:44–45, ibilang no kasano a mayaplikar dagiti sursuro ti Mangisalakan kadagiti ubbing a sursuruam.

Dagiti Mabalin nga Aktibidad

• Ilawlawagmo manen ti Mateo 5:44 nga us-usarem dagiti balikas ken kasasaad a maawatanto dagiti ubbing ken mainaig kadakuada. Kiddawen kadagiti ubbing a mangibinglay kadagiti panawen a nangipakitada iti ayat para iti maysa a tao nupay narigat. Kasano ti riknada kadagitoy a padas?

• Kas maysa a klase, kantaenyo ti “I’ll Walk with You,” Children’s Songbook, 140–41. Ania ti nasursurotayo manipud iti daytoy a kanta maipanggep iti panagayat iti dadduma?

• Mangted kadagiti ubbing kadagiti sinanpuso a papel nga addaan iti naisurat a balikas nga “Ipakitakto ti ayatko para iti tunggal maysa.” Kiddawem kadakuada nga arkosam dagitoy a puso ket isab-it dagitoy iti pagtaenganda kas panglaglagip nga ayatentayo dagiti dadduma.

• Tulongam dagiti ubbing a mangsursuro kadagiti tignay a sumurot iti “Aggiinnayatkayo,,” pagbatayan ti Ebanghelio,” 136–37, kas naisingasing iti Pagbatayan ti Ebanghelio.

Isuro ti Doktrina

Dagiti In-inauna nga Ubbing

Mateo 5:3–12

Makapagragsakak no agbiagak iti wagas nga insuro ni Jesus.

Bayat ti panangbasam iti Mateo 5:3–12, ania dagiti balikas ken ragup dagiti balikas a nalawag kenka? Kasano a bendisionanto dagitoy a pannursuro ti biag dagiti ubbing a sursuruam?

Dagiti Mabalin nga Aktibidad

• Mangaramid iti maysa a tsart iti pisara nga addan iti dua a dasig, nga addaan iti naisurat a Nagasat … ken Bendision. Awisem dagiti ubbing a mangsapul iti Mateo 5:3–12 no siasino ti kuna ni Jesus a nagasat ken dagiti bendision nga inkarina kadakuada.

• Isurat ti tunggal maysa dagiti kababalin ken dagiti mayannatup a bendision manipud kadagitoy a bersikulo kadagiti kard, ken paiparismo kadagiti ubbing dagiti kababalin ken dagiti bendision. Papidutem dagiti ubbing iti maysa kadagiti kababalin kadagitoy a bersikulo a kayatda a padur-asen.

Mateo 5:9, 21–24, 38–47

Kabaelak ti agbalin a mamagkappia.

Insuro ni Jesus a maawaganto dagiti mamagkakappia nga annak ti Dios. Kasano a maparegtam dagiti ubbing nga agbalinda a mamagkakappia?

Dagiti Mabalin nga Aktibidad

• Awisem ti maysa nga ubing a mangbasa iti Mateo 5:9. Kalpasanna saludsodem: Ania ti mamagkappia? Ania dagiti wagas a makapagbalintayo a mamagkakappia kadagiti pamilia ken gagayyemtayo? (Para iti sumagmamano a kapanunotan, kitaen dagiti bersikulo 21–24, 38–47.)

• Kiddawen iti tunggal maysa nga ubing nga agpanunot iti maysa a kasasaad nga agkasapulan iti tulong ti maysa a mamagkappia. Ania ti aramiden iti mamagkappia iti daytoy a kasasaad?

• Awisem dagiti ubbing a mangibinglay kadagiti panawen idi a nangipakitada iti ayat para iti maysa a tao, uray pay no dayta a tao ket maigidiat kadakuada wenno narigat nga ayaten.

Mateo 5:14–16

Ti pagwadak ket mabalin a manglawag iti dalan tapno suroten dagiti dadduma ni Jesus.

Panunotem maipapan dagiti ubbing a sursuruam bayat ti panangbasam kadagitoy a bersikulo. Ania dagiti mabalen a mensahe ti Apo para kadagiti ubbing iti daytoy a binatog?

Dagiti Mabalin nga Aktibidad

• Tulongam dagiti ubbing a mangikabesa iti Mateo 5:16. Isuratmo ti bersikulo iti pisara. Aggigiddankayo a mangbasa iti dayoy iti sumagmamano a gundaway, a mangpugpugas iti sumagmamano a balikas iti tunggal panangbasa. Kalpasan a naikabesa dagiti ubbing ti bersikulo, mabalinyo a kantaen ti “Shine On,” Children’s Songbook, 144.

• Kiddawen kadagiti ubbing nga agdrowing kadagiti banag a mangted kadatayo iti silaw. Basaem ti Mateo 5:14–16. Saludsodem kadakuada no apay a kayat ni Jesus nga agbalintayo a silaw iti lubong.

• Awisem dagiti ubbing a mangidrowing kadagiti banag a mabalinda nga aramiden tapno agbalin a silaw iti dadduma. Mabalin nga ipabuyam ti video a “Light the World: 25 Days of Service” (LDS.org). Awisem ti dua nga ubbing nga agsinnangoda, ket kiddawem iti maysa a padasenna a pagisemen ti maysa a saanna sagsaggiden isuna. Isaritam maipapan iti bileg nga adda kadagiti ubbing a mangyeg iti ragsak kadagiti dadduma.

Yallukoy ti Panagsursuro iti Pagtaengan

Karitem dagiti ubbing a mangsiput iti maysa a tao nga agbalin a mamagkappia itoy a lawas. Iti rugi ti klase ti sumaruno a lawas, awisem ida nga agsarita maipanggep iti no siasino ken no ania ti nakitada.

Panangpadur-as iti Panangisurotayo

Tulongam dagiti ubbing nga agbalin nga aktibo. “Kabayatan ti panangisurom kadagiti ubbing, palubosam ida nga agbukel, agdrowing, agkolor, agsurat, ken agpartuat. Napatpateg pay dagitoy a banag ngem dagiti aktibidad a pagraragsakan—napateg dagitoy iti panagsursuro”(Panangisuro iti Wagas ti Mangisalakan, 25).