“Pebrero 18–24. Mateo 5; Lucas 6: ‘Nagasatkayo’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Pebrero 18–24. Mateo 5; Lucas 6,” Umaykayo, Sumurot Kaniak—Para Kadagiti Indibidual ken Pamilia: 2019
Kaskasaba iti Bantay, ni Jorge Cocco
Pebrero 18–24
Mateo 5; Lucas 6
“Nagasatkayo”
Ikasom dagiti impresion a naawatmo bayat ti panangbasam iti Mateo 5 ken Lucas 6, ken isuratmo dagitoy iti study journal. Makatulong kenka daytoy a balabala a mangilasin iti sumagmamano a kapapatgan ken adda pakainaiganna kadagiti pagbatayan kadagitoy a kapitulo.
Suratmo Dagiti Impresionmo
Iti daytoy a panawen kabayatan ti panagministrona, nalawag a dagiti pannursuro ni Jesus ket saan a kas kadagiti nakairuaman a mangmangngeg dagiti tao iti panawenna. Awatento dagiti napanglaw ti pagarian ti Apo? Tawidennanto dagiti naemma ti daga? Nagasat dagiti mairurumen? Saan nga isursuro dagiti escriba ken Pariseo dagitoy a banag. Ngem kadagiti pudno a nakaawat iti linteg ti Dios, umno dagitoy a doktrina. “Mata supapakan iti mata” ken “guraem ti kabusormo” ket nababbaba a linteg (Mateo 5:38, 43), a naited kadagiti tao a di umannugot nga agbiag iti nangatngato a linteg. Ngem immay ni Jesucristo a mangipatungpal iti nababbaba a linteg ken mangisuro iti nangatngato a linteg (kitaen iti 3 Nephi 15:2–10) naisangrat a mangtulong kadatayo nga iti maysa nga aldaw agbalintayo nga “awan pagkuranganna, a kas ken Ama[tayo] a nailangitan nga awan pagkuranganna” (Mateo 5:48).
Dagiti Kapanunotan para iti Bukod a Panagadal iti Nasantuan a Kasuratan
Sumangbay ti kanayon a ragsak manipud iti panagbiag iti wagas nga insuro ni Jesucristo.
Kayat ti tunggal maysa ti agbalin a naragsak, ngem saan nga agsapsapul amin iti kinaragsak kadagiti agpapada a lugar. Adda dagiti agsapsapul iti daytoy nailubongan a bileg ken posision, adda pay dagiti dadduma nga agsapsapul iti kinabaknang wenno panangpennek kadagiti pagganasan ti bagi. Immay ni Jesuscristo a mangisuro iti dalan ti manayon a kinaragsak, tapno mangisuro no ania ti pudno a kaipapanan ti mabendisionan. Ania ti masursurom maipapan iti pananggun-od iti manayon a kinaragsak manipud iti Mateo 5:1–12 ken Lucas 6:20–26? Kasano a maigiddiat daytoy iti pannirigan ti lubong iti kinaragsak?
Ania dagiti saludsod wenno impresion nga umay iti panunotmo bayat ti panangbasam iti tunggal bersikulo? Ania ti isuro kenka dagitoy a bersikulo maipapan iti panagbalin a maysa a disipulo ni Jesucristo? Ania ti mariknam a makaparegta nga aramidem tapno mapasayaat dagiti kababalin a nailadawan kadagitoy a bersikulo?
Kitaen met iti Juan 13:17; 3 Nephi 12:3–12;“Sermon on the Mount: The Beatitudes” (video, LDS.org).
Apay nga indasig ti Mangisalakan dagiti disipulona iti asin?
Nabayagen a maar-aramat ti asin a mangtaginayon, mangparaman, ken mangpatarnaw. Adda met kaipapanan ti asin iti relihion para kadagiti Israelita. Adda pakainaiganna iti nagkauna a kannawidan a panagisakripisio iti ayupbabaen ti linteg ni Moises (kitaen iti Levitico 2:13; Dagiti Numero18:19). No mapukaw ti raman ti asin, agbalin daytoy a natamnayen wenno “awanen ti kapapaayanna” (Mateo 5:13). Daytoy ti mapasamak no mailaok daytoy wenno marugitan kadagiti dadduma pay nga elemento. Kas disipulo ni Cristo, pagtalinaedentayo ti “ramantayo” babaen ti panangliklik iti naespirituan a pannakarugit manipud iti lubong. Daytoy ti mangipalubos kadatayo a mangipatungpal iti matagtaginayon ken mapatpatarnaw nga aramidtayo kas asin ti daga—kas pagarigan, babaen ti panangibinglay iti ebanghelio ken panagbalin a nasayaat nga impluwensia iti lubong (kitaen iti DkK 103:9--10).
“Dakayo ti asin ti daga” (Mateo 5:13).
Ti linteg ni Jesucristo ti nangsukat iti linteg ni Moises.
Nasdaaw dagiti disipulo a nakangngeg iti imbaga ni Jesus a ti kinalintegda ket dakdakkel koma ngem iti kinalinteg dagiti escriba ken Pariseo (kitaen iti Mateo 5:20), a nangipannakkel iti bagbagida no kasano ti kinaanepda a nagtulnog iti linteg ni Moises. Ngem insuro ni Jesus ti nangatngato a linteg a saan laeng a mangitag-ay kadagiti tignaytayo ngem dagiti pay kapanunotan ken rikna a mangparegta kadakuada. Adu-adu pay nga amang ti kasapulan daytoy nangatngato a linteg: ti puso, kararua, ken panunot (kitaen iti Mateo 22:37).
Bayat ti panangbasam iti Mateo 5:21–48 ken Lucas 6:27–35, ibilangmo ti panangmarka iti agpada a dagiti galad a kasapulan iti linteg ni Moises (“Nangngegyo a …”) ken no ania ti insuro ni Jesus a nangitag-ay kadakuada.
Kas pagarigan, ania ti insuro ni Jesus iti Mateo 5:27–28 maipapan ti pagrebbengantayo iti pampanunottayo? Kasano a magun-odmo ti ad-adda a panangtiped kadagiti pampanunot nga umay iti panunotmo ken pusom? Kitaen iti DkK 121:45).
Kitaen met iti “Sermon on the Mount: The Higher Law” (video, LDS.org).
Pudno kadi a namnamaen ti Nailangitan nga Ama nga agbalinak a perpekto wenno awan pagkuranganna?
Insuro ni Presidente Russell M. Nelson:
“Ti balikas a naan-anay ket naipatarus manipud iti Griego teleios, a kayatna a sawen ti ‘kumpleto.’ … Ti infinitive form ti verb ket teleiono, a kayatna a sawen ti ‘mangdanon iti adayo a pagpatinggaan, naan-anay a mapadur-as, pagbalinen a kumpleto, wenno mangileppas.’ Laglagipen a saan a mangipapanan ti balikas iti ‘pannakawayawaya manipud iti biddut’; kaipapananna ti ‘pananggun-od iti adayo a panggep.’ ...
“… Insuro ti Apo, ‘Diyo kabaelan ti agibtur iti sango ti Dios ita ... ; gapuna, ituloyyo a siaanus agingga nga agbalinkayo a naan-anay’ [DkK 67:13].
“Nasken a ditayo maupay no dagiti napasnek a panagkagumaantayo nga agturong iti kinaan-anay ket kasla narigat ken awan patinggana. Ti kinaan-anay ket maur-uray a makumpleto. Mabalin laeng a makumpleto daytoy kalpasan ti Panagungar ken babaen laeng iti Apo. Urayen daytoy ti amin a mangayat kenkuana ken mangtungpal kadagiti bilinna” (“Perfection Pending,” Ensign, Nob. 1995, 86, 88).
Kitaen met iti Taga-Filipos 3:13–15; 2 Pedro 1:3–11; Apocalipsis 3:21–22; 3 Nephi 27: 27; Moroni 10:32–33; Doktrina ken Katulagan 76:69.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti aggigiddan a panagbasa ti pamiliam kadagiti nasantuan a kasuratan, makatulong ti Espiritu kadakayo a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Ania kadagiti pagbatayan a naisuro iti Mateo 5:1–9 ti makatulong iti pagtaenganyo nga agbalin a naragragsak pay a lugar? Mabalinmo nga ipamaysa iti maysa wenno dua bayat ti panangadalmo iti Kaskasaba iti Bantay kadagiti sumaruno a sumagmamano a lawas. Kas pagarigan, ania a pannursuro ti kasapulan dagiti miembro ti pamiliam tapno makatulong kadakuada nga agbalin a mamagkakappia? (kitaen ti Mateo 5:21–25, 38–44). Ania dagiti panggep a tun-oyen a maitudingmo? Kasano ti panangsurnadmonto?
Tapno matulongam ta pamiliam a makaawat no ania ti kaipapanan ti agbalin a “silaw ti lubong,” makapagsukisokka kadagiti sumagmamano a paggapuan ti lawag iti pagtaenganyo, iti karrubayo, ken iti lubong. Mabalin a makatulong ti panangipakita ti no ania ti mapasamak no ilemmengyo ti lawag. Ania ti kayat a sawen ni Jesus idi kinunana, “Dakayo ti silaw ti lubong”? (Mateo 5:14). Asino ti nagbalin a kas maysa a silaw para iti pamiliatayo? Kasano a makapagbalintayo a silaw iti lubong? (kitaen ti DkK 103:9–10).
Apay a kayat ti Dios nga ikararagantayo dagiti natangsit kadatayo? Kasano a matungpaltayo daytoy a pagbatayan iti pamiliatayo?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Agbalin a managpaliiw. Kabayatan ti panangikasom iti no ania ti mapaspasamak iti biag dagiti annakmo, masarakamto dagiti nasayaat a gundaway iti panangisuro. Dagiti masao ken saludsod dagiti annakyo iti agmalem ket makaiturong met iti posible a kanito iti panangisuro. (Kitaen ti Panangisuro iti Wagas ti Mangisalakan, 16.)
“Dakayo ti silaw ti lubong” (Mateo 5:14).