Pebrero 25–Marso 3. Mateo 6–7: ‘Insurona Ida a kas Maysa nga Addaan iti Turay’” Umaykayo, Sumurot Kaniak—Para Kadagiti Indibidual ken Pamilia: Baro a Tulag 2019 (2019)
Pebrero 25–Marso 3. Mateo 6–7,” Umaykayo, Sumurot Kaniak—Para Kadagiti Indibidual ken Pamilia: 2019
Ni Jesus a Mangisursuro kadagiti Tao iti Igid ti Baybay, ni James Tissot
Pebrero 25–Marso 3
Mateo 6–7
“Insurona Ida kas Maysa nga Addaan iti Turay”
No mabasatayo dagiti nasantuan a kasuratan nga adda saludsod iti panunottayo ken addaan iti napudno a tarigagay a maawatan no ania ti kayat ti Nailangitan nga Ama a maammuantayo, awisentayo ti Espiritu Santo a mangparegta kadatayo. Bayat ti panangbasam tii Mateo 6–7, ikasom dagitoy nga impression.
Suratmo Dagiti Impresionmo
Ti Kaskasaba iti Bantay ket maysa kadagiti kalalatakan a bitla iti Kristianismo. Nangisuro ti Mangisalakan kadagiti nabaknang nga imahe, kas iti maysa a siudad a naipasdek iti turod, dagiti lirio iti talon, ken dagiti lobo a nagpammarang a karnero. Ngem ti Kaskasaba iti Bantay ket amang nga ad-adayo ngem iti napintas a bitla. Ti bileg dagiti pannursuro ti Mangisalakan kadagiti disipulona ket makapagbalbaliw iti biagtayo, nangnangruna no agbiagtayo a mayannurot kadagitoy. Kalpasanna agbalin dagiti balikasna a saan laeng a balikas; agbalinda a natibker a pundasion para iti biag, a kas iti balay ti masirib a tao, madaeranna dagiti angin ken layus iti lubong (kitaen iti Mateo 7:24–25).
Dagiti Kapanunotan para iti Bukod a Panagadal iti Nasantuan a Kasuratan
Nasken nga isaganak ti pusok para kadagiti nailangitan a bambanag.
Saan a kanayon a nalaka nga ipangpangruna dagiti bambanag a mainaig iti Dios ngem dagiti bambanag iti lubong. Ania kadagiti pannursuro ti Mangisalakan iti Mateo 6–7 ti makatulong kenka a mangipamaysa kadagiti nailangitan a bambanag? Ania dagiti kapanunotan wenno impresion nga adda kenka bayat ti panangadalmo kadagiti balikasna? Ania ti makaparegta nga aramidem? Ibilang ti panangisuratmo kadagiti impresionmo. Kas pagarigan:
|
Nasken nga ad-adda nga ipategko maipapan ti no ania ti panunoten ti Dios kaniak ngem iti no ania ti panunoten dagiti dadduma. | |
Kabaelak ti umas-asideg iti Dios babaen ti napakumbaba, ken napudno a kararag.
Naglaon ti Kaskasaba iti Bantay iti adu a tema, ket madlawyo a dagiti tema ket agpannurayto, uray kaskasano, kadagiti agdama a kasasaad ti biagmo ken no ania ti kayat ti Apo nga idanun kenka.
Ti maysa a tema ti Mateo 6–7 ket kararag. Maaddaanka iti kanito a mangamiris kadagiti kararagmo. Kasano ti riknam iti ar-aramidem a panangikagumaanan nga umas-asideg iti Dios babaen ti kararag? Ania dagiti pannursuro iti Mateo 6 – 7 ti mangpasayaat iti no kasanoka nga agkararag? Isuratmo dagiti impresion a maawatmo babaen ti Espiritu. Kas pagarigan:
|
No agkararagak, nasken a tratuek ti nagan ti Nailangitan nga Ama iti panagraem. | |
|
No agkararagak, nasken a yebkasko ti tarigagayko a maaramidto lti pagayatan ti Dios. | |
Mabalin nga ibilangmo ti panangbasa manen iti Kaskasaba iti Bantay, itoy a gundaway mangkitaka iti sabali a tema a maulit manen wenno mensahe a nangnagruna a maibagay kenka. Isuratmo no ania ti naammuam iti maysa a study journal , a karagpin dagiti kapanunotam ken impresionmo.
Mayasidegtayo iti Dios babaen ti kararag.
Ania ti kayatna a sawen ti agaramat kadagiti “awan kapapayanna a panangulit-ulit” iti kararag?
Masansan a maawatan dagiti tao iti “awan kapapayanna a panangulit-ulit” a kayatna a sawen ti kanayon a panangdagdagullit kadagiti isu met laeng a balikas . Nupay kasta, ti balikas nga awan kapapayanna ket mangladawan iti maysa a banag nga awan pategna. Iti panangusar iti “awan kapapayanna a panangulit-ulit” iti kararag ket mangipapanan iti panagkarkararag nga awanan iti napudno,, ken naimpusuan a rikna (kitaen iti Alma 31:12–23).
Apay a saantayo nga isao ti Kararag ti Apo?
Insuro ni Presidente Russell M. Nelson : “Impakpakauna ti Apo iti kararagna ti panangibagana kadagiti pasurotna a liklikan ti ‘awan kapapayanna a panangulit-ulit [Mateo 6:7] ken agkararag ‘iti kastoy a wagas’ [Mateo 6:9]. Iti kasta, ti kararag ti Apo ket agserbi a kas maysa a pagtuladan a suroten ken saan a kas maysa a banag nga ikabesa ket iyebkas a mauli-ulit. Kayat laeng ti Maestro nga agkararagtayo para iti tulong ti Dios iti bayat ti kanayon a panangikarigatantayo a mangsupring iti dakes ken agbiag a sililinteg” (“Lessons from the Lord’s Prayers,” Ensign wenno Liahona, Mayo 2009, 46–47).
Nasken a mangukomak a sililinteg.
Iti Mateo 7:1, nalabit a kunkuna ti Mangisalakan a nasken a ditayo mangukom, ngem kadagiti sabali a nasantuan a kasuratan (agraman dagiti dadduma pay a bersikulo iti daytoy a kapitulo), ikkannatayo kadagiti pangiturong maipapan iti no kasano ti mangukom. No kasla makatikaw dayta, makatulong ti Patarus ni Joseph Smith iti daytoy a bersikulo: “Saankayo a mangukom iti kinikillo, tapno saankayo a maukom; ngem mangukomkayo iti nalinteg a panangukom” (iti Mateo 7:1, footnote a ). Ania ti masarakam iti Mateo 7:1–5, a katema iti nabati a daddumapay iti kapitulo, a mangtulong kenka a mangammo no kasano ti “mangukom iti nalinteg a panangukom”?
Kitaen met iti “Panangukom kadagiti Dadduma” Napudno iti Pammati, 90–91; Lynn G. Robbins, “The Righteous Judge,” Ensign wenno Liahona, Nob. 2016, 96–98.
Maam-ammok ni Jesucristo babaen ti panagaramidko iti pagayatanna.
Ti ragup dagiti balikas nga “uray kaano dikayo naam-ammo” iti Mateo 7:23 ket nabalbaliwan iti Patarus ni Joseph Smith anga“Iti kaano man didak naam-ammo” (Mateo 7:23, footnote a). Kasano a nakatulong kenka daytoy a pannakabalbaliw tapno nasaysayaat a maawatam ti insuro ti Apo iti bersikulo 21–22 maipapan iti panagaramid iti pagayatanna? Kasano iti panagriknam nga am-ammom a nasayaat ti Apo? Ania ti maaramidmo tapno maam-ammom Isuna a nasaysayaat?
Kitaen met iti David A. Bednar, “If Ye Had Known Me,” Ensign wenno Liahona, Nob. 2016, 102–5.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panangadalmo iti Kaskasaba iti Bantay a kaduam ti pamiliam, makatulong kadakayo ti Espiritu a mangammo no ania dagiti pagbatayan ayunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Maysa a wagas tapno masursuruan manipud iti Mateo 6–7 kas maysa a pamilia ket mangbuya kadagiti video “Sermon on the Mount: The Lord’s Prayer” ken “Sermon on the Mount: Treasures in Heaven” (LDS.org). Mabalin a suroten dagiti miembro ti pamilia kadagiti nasantuan a kasuratan ken pasardengen dagiti video no adda kayatda a pagsasaritaan. Daytoy nga aktibidad ket agtalinaed iti sumagmamano nga aldaw, no kasapulan.
Ania ti masursurotayo maipanggep iti kararag manipud iti wagas a panagkararag ti Apo? Kasano a mausartayo a kas modelo ti kararagna tapno mapasayaat ti bukod ken sangapamiliaan a panagkararagtayo? (Kitaen met iti Lucas 11:1–13.) No addaanka iti in-inaudi nga ubbing, mabalin a sanayenyo ti aggigiddan a panagkararag .
Ania ti kayat a sawen ti “birokenyo … umuna ti pagarian ti Dios”? Kasano nga ar-aramidentayo daytoy kas pamilia?
Mabalinmo nga usaren ti bassit a pirsay ti kayo ken ti maysa a dakkel a pedaso ti kayo tapno mangibagi iti maysa a puling ken pasanggir bayat ti panangilawlawagmo kadagiti pannursuro ti Mangisalakan maipapan iti panangukom kadagiti dadduma. Ibilang ti panangbasa ti serrek iti “Panangukom Kadagiti Dadduma” ti Napudno ti Pammati, 90–91, kas paset daytoy a panangilawlawag.
Tapno matulongam ti pamiliam a maawatan a nasaysayaat ti pangngarig ti Mangisalakan maipapan iti masirib a tao ken ti maag a tao, mabalin a pabuyatmo kadakuada ti danum iti darat kalpasanna iti bato. Kasano ti panangipasdektayo kadagi naespiritualan a pundasion iti rabaw ti bato?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Ibinglay dagiti nalawag a pannakaammo ken pannakaawat. Ti panangilawlawag kadagiti pagbatayan a masursurom manipud iti bukodmo a panagadal ket saan laeng a nasayaat a wagas iti panangisuro iti dadduma; makatulong pay daytoy a mangpapigsa iti bukodmo a pannakaawat. Padasem ti mangibinglay iti maysa a pagbatayan a nasursurom manipud ita a lawas a panagbasa a kadua ti maysa a miembro ti pamilia wenno kadagiti klasem iti Simbaan.
Nagkararagak para Kenka, ni Del Parson