“Marso 18–24. Mateo 13; Lucas 8; 13: ‘Ti Adda Lapayagna a Dumngeg, Dumngeg Koma” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Marso 18–24. Mateo 13; Luke 8; 13,” Umaykayo, Sumurot Kaniak—Para kadagiti Indibidual ken Pamilia: 2019
Marso 18–24
Mateo 13; Lucas 8; 13
“Ti Adda Lapayagna a Dumngeg, Dumngeg Koma”
Bayat ti panangbasam iti Mateo 13 ket Lucas 8; 13, panunoten ti maipapan iti no kasano ti panangisaganam iti bagim a “dumngeg” ken mangbigbig iti pateg dagiti pannursuro ti Mangisalakan kadagitoy a pangngarig. Ania ti aramidem tapno mayaplikar dagitoy a pannursuro iti biagmo?
Suratmo Dagiti Impresionmo
Sumagmamano kadagiti nakallalagip unay a pannursuro ti Mangisalakan ket iti porma dagiti simple nga estoria a maawagan kadagiti pangngarig. Dagitoy ket ad-adda pay ngem dagiti makaay-ayo a pagsasao maipanggep kadagiti gagangay a bambanag wenno pasamak. Naglaon dagitoy kadagiti nauneg a kinapudno maipapan iti pagarian ti Dios para kadagiti nakasagana a naespirituan. Maysa kadagiti umuna a pangngarig a nairekord iti Baro a Tulag—ti pangngarig ti agmulmula (kitaen iti Mateo 13:3–23)—awisennatayo a mangamiris ti panagsaganatayo nga umawat iti balikas ti Dios. “Agsipud ta siasino man nga umawat,” impakdaar ni Jesus, “maited kenkuana, ket maaddaan iti ad-adu a kinabaknang” (Patarus ti Joseph Smith, Mateo 13:10 [iti Mateo 13:12, footnote a]). Iti kasta bayat ti panagsaganatayo a mangadal kadagiti pangngarig ti Mangisalakan—wenno ti ania man kadagiti pannursurona—ti nasayaat a lugar a pangrugian ket mangamiris iti puspusotayo ken mangikeddeng no ik-ikkantayo met laeng iti “nasayaat a daga” dagiti balikas ti Dios tapno dumakkel, agbukar, rumang-ay, ken mangted iti bunga a mangbendisionto kadatayo ken dagiti pamiliatayo iti kinawadwad (Mateo 13:8).
Dagiti Kapanunotan para iti Bukod a Panagadal iti Nasantuan a Kasuratan
Ania ti “ti pagarian ti langit” nga intudo ni Cristo iti Mateo 13?
Iti daytoy a kapitulo, “ti pagarian ti langit” ket maitudo iti pudno a Simbaan ni Cristo, nga isu ti pagarian ti langit iti daga. Para iti ad-adu pay nga impormasion, kitaen iti Pangiwanwan iti Nasantuan a Kasuratan, “Pagarian ti langit wenno ti pagarian ti Dios.”
Nasken a maisagana ti pusok a mangawat iti balikas ti Dios.
Apay nga adda dagiti puso a sidadaan nga umawat iti kinapudno idinto a kasla pagkedkedan dagiti dadduma daytoy? Ti panangbasa iti pangngarig ti agmulmula ket makaited iti nasayaat a gundaway a mangpanunot no kasano nga umawatka iti kinapudno manipud iti Apo. Mabalin a makatulong no umuna nga iparis dagiti bersikulo 3–8 ti Mateo 13 kadagiti pannakayulog a naited kadagiti bersikulo18–23. Ania ti mabalinmo nga aramiden a mangtaripato iti “nasayaat a daga” iti bagim? Ania dagiti mabalin a sumagmamano a “sisiit” ti makalapped kenka manipud iti sipupudno a panangdengngeg ken panangsurot kadagiti balikas ti Dios?
Kitaen met iti Lucas 13:34; Mosiah 2:9; 3:19; Alma 12:10–11; 32:28–43; Dallin H. Oaks, “The Parable of the Sower,” Ensign wenno Liahona, Mayo 2015, 32–35.
Dagiti pangngarig ni Cristo ket makatulong kaniak a mangawat ti panagdur-as ken ti pagtungpalan ti Simbaanna.
Insuro ni Propeta Joseph Smith a dagiti pangngarig iti Mateo 13 ket mangiladawan iti panagdur-as ken pagtungpalan ti Simbaan kadagiti ud-udina nga aldaw (kitaen iti Teachings of Presidents of the Church: Joseph Smith [2007], 293–303). Bayat ti panangbasam kadagitoy a pangngarig, isuratmo no ania ti isuroda kenka maipapan iti Simbaan ti Apo (mabalin a kayatmo nga ibasar iti no ania ti insuro ni Propeta Joseph Smith maipapan iti sumagmamano kadagitoy a pangngarig):
-
Ti trigo ken dagiti zizana (13:24–30, 36–43): Aggiddan a dumakkel dagiti nadangkes ken dagiti nalinteg agingga iti panungpalan ti lubong.
-
Ti bukel ti mustasa (13:31–32):
-
Ti lebadura (13:33):
-
Ti nailemmeng a gameng ken ti napateg unay a perlas (13:44–46):
-
Ti iket (13:47–50):
-
Ti ama ti sangakabbalayan (13:52):
Kalpasan ti panangutobmo kadagitoy a pangngarig, ania ti mariknam a makaparegta nga aramiden tapno naan-anay a makiraman iti aramid ti Simbaan ni Cristo iti ud-udina nga aldaw? Ania dagiti saludsod a mapanunotmo a makatulong kenka a mangyaplikar kadagitoy a pangngarig? Kas pagarigan, “Ania ti natallugodko nga isakripisio para iti Simbaan?”
Kitaen met iti Pangiwanwan iti Nasantuan a Kasuratan, “Lebadura,” “Dagiti Pangngarig.”
Ti ebanghelio ni Jesucristo ket maysa a “napateg unay a perlas” (Mateo 13:46).
Nasken a dumakkel dagiti nalinteg a kagiddan dagiti nadangkes agingga iti panungpalan ti lubong.
Maysa a wagas a pangamirisan iti daytoy a pangngarig ket ti mangidrowing iti ladawan daytoy ken isurat ditoy dagiti kayulogan iti Mateo 13:36–43 ken Doktrina ken Katulagan 86:1–7. Ti zizana ket “makasabidong a ruot, nga, agingga nga agdawa daytoy, maipada ti langana iti trigo” (Pangiwanwan iti Nasantuan a Kasuratan, “Ruruot”). Ania dagiti kinapudno iti daytoy a pangngarig a mangparegta kenka tapno agtalinaed a napudno iti pammati iti baet ti kinadangkes iti lubong?
Iti ania a wagas a nakapagserbi dagiti “dadduma a babbai” iti Mangisalakan?
“Nakipagdaliasat dagiti babbai a disipulo ken ni Jesus ken ti Sangapulo-ket dua, a nagsursuro a naespirituan manipud ken [Jesus] ken nagserbida Kenkuana para iti agdama laeng. … Kas nayon iti panangawat iti panagserbi ni Jesus—dagiti naimbag a damag ti ebangheliona ken dagiti bendision ti bileg ti panagpaimbagna —nagserbi dagitoy a babbai Kenkuana, a nangibingay iti kinabaknang ken kinapasnekda” (Daughters in My Kingdom [2011], 4). Dagiti babbai a simmurot iti Mangisalakan ket nangiburay met iti nabileg a pammaneknekda maipapan Kenkuana (kitaen iti Linda K. Burton, “Certain Women,” Ensign wenno Liahona, Mayo 2017, 12–15).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening.
Bayat ti panangadalmo kadagiti pannursuro ti Mangisalakan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Kabayatan ti panangbasa dagiti miembro ti pamiliam kadagiti pangngarig ti Mangisalakan, mabalin a maragsakanda a mangpampanunot kadagiti bukodda a pangngarig a mangisuro kadagiti isu met la a kinapudno maipapan iti pagarian ti langit (ti Simbaan), babaen ti panangusar kadagiti banag wenno kasasaad a pamiliar kadakuada.
Ania ti mabalintayo nga aramiden a kas pamilia a mangtaripato iti “nasayaat a daga” iti puspusotayo ken iti pagtaengantayo. (Mateo 13:23). No addaankayo iti babassit nga ubbing iti pamiliayo, pakaragsakan ti mangawis kadagiti miembro ti pamilia a mangakem iti nadumaduma a wagas a mangisagana kadagiti pusotayo a dumngeg iti balikasti Dios idinto a pugtuan dagiti dadduma a miembro ti pamilia no ania ti ar-aramidenda.
Kasano a matulongam dagiti miembro ti pamiliam tapno maawatanda ti kinapateg ti natallugod a panangawat iti balikas ni Cristo? Kas pagarigan, mabalin nga abbongam dagiti lapayag ti maysa a miembro ti pamiliam bayat iti naulimek a panagbasayo iti Mateo 13:13–16. Ania ti naawatan dayta a miembro ti pamilia manipud kadagiti bersikulo? Ania ti akem a maaramid dagiti mata, lapayag, ken puspusotayo iti panangawat iti balikas ti Dios? Ania dagiti wagas a pangiserraantayo kadagiti mata, lapayag, ken puspusotayo iti balikas ti Apo?
Ania ti adda a nagpadaan dagitoy dua a lallaki iti pangngarig? Adda kadi dagiti mainayon a bambanag a nasken nga aramidentayo a kas indibidual ken kas pamilia tapno umuna nga ipangpangrunatayo ti pagarian ti Dios iti biagtayo?
Kasano a masurottayo ti pagwadan ti Mangisalakan ken maisalakantayo dagiti tao manipud iti pannakaadipen?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Mangyulo iti maysa a nasantuan a kasuratan. Pumilika iti maysa a binatog iti nasantuan a kasuratan a nangnangruna a napnuan kaipapanan iti pamiliam, ken mangawis kadagiti miembro ti pamilia a mangyulo iti daytoy. Insuro ni Elder Richard G. Scott, “Ti maysa a nayulo a nasantuan a kasuratan ket agbalin a kanayon a gayyem a saan nga agkapsut iti panaglabas ti panawen” (“The Power of Scripture,” Ensign wenno Liahona, Nob. 2011, 6).
Ti Pangngarig ti Agmulmula, ni George Soper