“Marso 4–10. Mateo 8–9; Marcos 2–5: “Pinaimbagnaka ti Pammatim’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Marso 4–10. Mateo 8–9; Marcos 2–5,” Umaykayo, Sumurot Kaniak—Para kadagiti Indibidual ken Pamilia: 2019
Pannakapaimbag kadagiti Payakna, ni Jon McNaughton
Marso 4–10
Mateo 8–9; Marcos 2–5
“Pinaimbagnaka ti Pammatim”
Bayat ti panangbasam iti Mateo 8–9 ken Marcos 2–5, agbalin a managrikna kadagiti impresion a maawatmo manipud iti Espiritu Santo. Ibilangmo ti panangisurat kadagiti parikna a maawatmo ken dagiti banag a mabalinmo nga aramiden kadagita a parikna.
Suratmo Dagiti Impresionmo
Narigat a basaen ti Baro a Tulag no awan pannakaawis iti imatang kadagiti adu a pakaammuan maipanggep iti Mangisalakan a mangag-agas iti masakit ken agsagsagaba—tunggal maysa manipud iti maysa a babai nga addaan iti gurigor agingga iti maysa nga ubing a babai a naibagan a natay. Ania dagiti mensahe a mabalin nga adda para kadatayo kadagitoy a milagro iti panangagas iti bagi? Awan duadua a ti maysa a nalawag a mensahe ket ni Jesucristo ti Anak ti Dios, nga addaan iti pannakabalin kadagiti amin a bambanag, agraman kadagiti saem iti bagi ken pagkurangantayo. Ngem masarakan ti sabali pay a kaipapanan kadagiti balikasna kadagiti agduadua nga escriba: “Tapno maammuanyo a ti Anak ti tao ket adda pannakabalinna ditoy daga a mamakawan kadagiti basbasol” (Marcos 2:10). Isu a no basaem ti maipapan iti bulsek a tao wenno ti agkukutel a napaimbag, mabalin a mapanunotmo ti panangpaimbag—agpada a naespirituan ken pisikal—a maawatmo manipud iti Mangisalakan ken mangngegmo ti saona kenka, “Ti pammatim insalakannaka” (Marcos 5:34).
Dagiti Kapanunotan para iti Bukod a Panagadal iti Nasantuan a Kasuratan
Mapaimbag ti Mangisalakan dagiti sagubanit ken saksakit.
Naisurat kadagitoy sumagmamano a kapitulo iti adu a gundaway iti namilagruan a panangagas nga inaramid ti Mangisalakan. Bayat ti panagadalmo kadagitoy a panagagas, sarakem dagiti mabalin a mensahe a para kenka. Mabalin a saludsodem ti bagim: Ania ti isuro ti pakammuan maipanggep iti pammati? Ania ti isuro ti pakaammuan maipanggep iti Mangisalakan? Ania ti kayat ti Dios a sursuruek manipud iti daytoy a milagro?
-
Ti agkukutel (Mateo 8:1–4)
-
Ti adipen ti centurion(Mateo 8:5–13)
-
Ti katugangan a babai ni Pedro (Mateo 8:14–15)
-
Dua a bulsek a lallaki (Mateo 9:27–31)
-
Ti lalaki a saan a makagunay (Marcos 2:1–12)
-
Ti lalaki a linungogan dagiti dakes nga espiritu (Marcos 5:1–20)
-
Ti anak a babai ni Jairo (Marcos 5:22–23, 35–43)
-
Ti babai nga agsagaba iti panagbulos ti dara (Marcos 5:24–34)
Kitaen met ti Dallin H. Oaks, “Healing the Sick,” Ensign wenno Liahona, Mayo 2010, 47–50.
Ni Jesus a Mangag-agas iti Masakit, ni Joseph Brickey, kalpasan ni Heinrich Hofmann
Mabalinko a kalikaguman a gun-oden ti tulong ti Dios uray no mariknak ti diak pannakaikari.
Ti centurion, a maysa a Gentil, ket nariknana a saan a maikari iti Mangisalakan iti pagtaenganna. Ti babai nga agsagaba iti panagbulos ti dara ket maibilang a narugit ken naisina manipud iti gimong ti Judio. Ngem binendisionan ti Mangisalakan ida nga agpadpada. Ania ti nasursurom manipud kadagitoy dua a apakaammuan maipanggep ti panagkalikagum a manggun-od iti tulong manipud iti Apo?
Ti panagbalin a maysa a disipulo ni Jesucristo ket kayat na a sawen nga nga umuna nga ipangpangrunak Isuna iti biagko.
Kadagitoy a bersikulo, insuro ni Jesus a ti panagbalin adisipulona, maidawat kadatayo nga umuna nga ipangrunatayo Isuna iti biagtayo, nga uray no dadduma ket masapul nga isakripisiotayo dagiti dadduma a bambanag nga ipatpategtayo. Bayat ti panangadalmo kadagitoy a binatog, utobem ti bukodmo a kinadisipulo. Apay a nasken nga agtallugod dagiti disipulo a mangipangpangruna nga umuna ti Mangisalakan? Ania ti mabalin a nasken nga isukom tapno umuna a maipangpangrunam ni Cristo? (Kitaen met Lucas 9:57–62.)
Ni Jesucristo ket addaan iti pannakabalin a mangipaay iti kappia iti baet dagiti bagyo ti biag.
Nariknam kadi ti wagas nga inaramid dagiti disipulo ni Jesus iti bagyo iti baybay—a mangbuybuya kadagiti dalluyon ti danum a nangpunno iti bilog ket nagsalsaludsod, “Mannursuro, awan kadi ti aniamanna kenka no mapukawtayo?”
Iti Marcos 4:35–41, masarakamto ti uppat a saludsod. Ilistam ti tunggal maysa, ket utobem no ania ti isuro daytoy kenka maipapan iti panangsango kadagiti karit ti biag nga addaan iti pammati ken ni Jesucristo. Kasano a mangyeg iti talna ti Mangisalakan kadagiti bagyo iti biagmo?
Masalaknibak ti pammatik babaen ti panangisuro kadagiti pudno a pagbatayan.
Narigat no dadduma nga ammuen no kasano ti sumungbat kadagiti tattao a mangdillaw kadagiti pammati ken kannawidantayo amainaig iti relihion. Bayat ti panangbasam iti Mateo 9:1–13 ken Marcos 2:15–17, sapulem dagiti panagdillaw dagiti agpabpabasol ken dagiti sungbat ti Mangisalakan. Ibilangmo ti panangmarka kadagiti panagdillaw ken dagiti sungbat iti nadumaduma a maris wenno panangisuratmo kadagitoy. Ania ti nadlawmo maipapan iti wagas a panangisuro ti Mangisalakan? Kasano a ti panangsurot iti pagwadanna ket makatulong kenka no nasken a salaknibam ti maysa a pagbatayan ti ebanghelio wenno kannawidan iti Simbaan?
Kitaen met iti video “Everyday Example: When Beliefs Are Questioned” (LDS.org).
Gapu iti panagbabawi, mabalinko ti manginanama.
Idi adda maysa a di makagunaya lalaki nga inyasidegda iti Mangisalakan, madalw iti kaaduan a kasapulanna ti pannakaagas iti bagi. Ngem immuna nga impaay ni Jesus ti dakdakkel a kasapulan ti lalaki—ti pannakapakawan dagiti basolna. Uray no saan a naagasan ti sakit ti bagi ti lalaki, sinurotna latta ti balakad ni Jesus a “manginanama” (Mateo 9:2). Kaano ti pannakariknam iti rag-o gapu ta napakawankan? (Kitaen met ti Alma 36:18–24.)
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagtultuloymo nga agadal maipapan iti panagministro ti Mangisalakan a kaduam ti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Ibilang ti panagaramid iti listaan dagiti milagro a nailadawan kadagitoy a kapitulo ken panagsapul kadagiti ladawan ti sumagmamano kadagitoy (kitaen iti Libro ti Arte ti Ebanghelio wenno LDS.org). Mabalin a saludsodem iti tunggal maysa a miembro ti pamilia a mangisarita maipapan iti maysa kadagiti milagro (nga usarem iti ladawan no adda a magun-od) ket ibinglayda no ania ti masursuroda manipud iti daytoy. Mabalin a mangibinglayka iti sumagmamano a pagarigan dagiti milagro a nasaksiam wenno nabasam maipapan iti pakasaritaan ti Simbaan iti kabaruanan nga aldaw.
Ania ti masursurotayo manipud iti wagas ti Mangisalakan a nangtrato kadagiti publikano ken managbasol, a lbinaybay-an dagiti dadduma?. Kasano a masurottayo ti pagwadanna bayat ti pannakipulapoltayo iti dadduma a tao?
Kasano a matulongam ti pamiliam a makaawat iti pakaasi ti Mangisalakan para iti ad-adu pay nga agtrabaho a tumulong a mangibinglay iti ebanghelio? Mabalinmo nga aramiden ti maysa a banag a simple kas iti panagtitinnulong nga agaramid iti maysa a trabahoa nabaybayag koma nga aramiden ti maysa a tao, kas iti panagdalus iti kiusina kalpasan ti pangrabii. Ania ti mabalintayo nga aramiden a mangibinglay iti mensahe ti ebanghelio?
Makatulong kadi daytoy a pakaammuan kadagiti miembro ti pamilia no mariknada ti agbuteng? Nalabit a mabalinda a basaen ti bersikulo 39 ken mangibinglay kadagiti padas idi tinulongan ida ti Mangisalakan a makarikna iti talna kadagiti panawen ti pannakariribuk wenno panagbuteng.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Agbalin nga Available ken Accessible Sumagmamano kadagiti kapintasan a kanito iti panangisuro ket mangrugi kadagitisaludsod wenno pakaseknan iti puso dagiti miembro ti pamilia. Ipakaammomkadagiti miembro ti pamilia babaen kadagiti balikas ken tignaymo a nagagarka a dumngeg kadakuada (kitaen iti Panangisuro iti Wagas ti Mangisalakan, 16).
Ni Cristo ken ti Lalaki, a Di Makagunay ni J. Kirk Richards