“Marso 25–31. Mateo 14–15; Marcos 6–7; Juan 5 – 6: ‘Dikayo Agbuteng’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Marso 25–31. Mateo 14–15; Marcos 6–7; Juan 5–6,” Umaykayo, Sumurot Kaniak—Para kadagiti Indibidual ken Pamilia: 2019
Pakanen Ida, ni Jorge Cocco
Marso 25–31
Mateo 14–15; Marcos 6–7; Juan 5–6
“Dikayo Agbuteng”
Bayat ti panangbasam iti Mateo 14–15; Marcos 6–7; ken Juan 5–6, nga agsapul kadagiti kinapudno a napnuan kaipapanan kenka. Mabalinmo a damagen ti bagim dagiti saludsod a kas iti “Kasano a mainaig kaniak dagiti pakaammuan kadagitoy a kapitulo?” “Ania dagiti mensahe a sapulek para iti biagko?” wenno “Ania ti kayatko nga ibinglay iti pamiliak wenno kadagiti dadduma?”
Suratmo Dagiti Impresionmo
Ania koma ti nangparegta ken ni Pedro a pumanaw iti pagtalgendan ti bilogna iti tengnga ti Baybay ti Galilea kabayatan ti maysa a narungsot a bagyo? Ania ti nangiturong kenkuana a mamati a no makapagna ni Jesus iti rabaw ti danum, kabaelanna met koma? Awan duadua a ditayo maammuan, ngem nalabit a naawatan ni Pedro a dimteng ti Anak ti Dios a saan laeng nga agaramid kadagiti nakaskasdaaw a banag para kadagiti tao ngem tapno mapabileg dagiti tao a kas ken Pedro nga agaramid met kadagiti nakaskasdaaw a banag. Ti awis ni Jesus, kalpasan ti amin, ket “Umayka, surotennak” (Lucas 18:22). Inawat ni Pedro daytoy nga awis iti naminsan, ket natallugod idi nga umawat manen, uray no kaipapananna ti panangsango kadagiti butengna ken panangaramid iti maysa a banag a kasla imposible. Nalabit a saanto a kiddawen ti Apo a bumabatayo manipud iti bilog iti katengngaan ti bagyo wenno mangyabuloy ti sangsangkabassit nga abastotayo a tinapay no nasken a mangan dagiti riniwriw a tattao, ngem mabalin a kiddawenna kadatayo nga umawat kadagiti panangiturong uray no saantayo naan-anay a maawatan dagitoy. Ania man dagiti mabalin a yawisna kadatayo, no maminsan dagitoy ket kasla makapasiddaaw wenno nakabutbuteng. Ngem mabalin a mapasamak dagiti milagro no datayo, kas ken Pedro, no ikkatentayonto dagiti butengtayo, dagiti panagduduatayo, ken ti agkurkurang a pannakaawattayo ket sumurot Kenkuana a sipapammati.
Dagiti Kapanunotan para iti Bukod a Panagadal iti Nasantuan a Kasuratan
Dayawen ni Jesucristo ti Amana.
Ti relasion ti Nailangitan nga Ama ken ti tunggal maysa kadagiti annakna ket kaipapananna a maysa a sagrado. Kadagitoy a bersikulo, inted ni Jesucristo kadatayo ti makaparegta a pagwadan a suruten iti relasiontayo iti Nailangitan nga Ama. Basaen ti Juan 5:17–47, ken markaan wenno suratan ti tunggal pagarigan ti balikas Ama. Kasano ti panangdayaw ti Anak iti Ama, ken no kasano a masurotyo ti pagwadanna? Ania ti masursurom maipapan iti no kasano ti rikna ti Ama maipapan iti Anak? Kasano a ti panangpapigsa iti relasionmo iti Nailangitan nga Ama ket mangnayon iti kinatallugodmo nga agsapul ken agtungpal Iti pagayatanna?
Kitaen met iti Juan 17; Jeffrey R. Holland, “The Grandeur of God,” Ensign wenno Liahona, Nob. 2003, 70–73.
Mateo 14:16–21; Marcos 6:33–44; Juan 6:5–14
Mapadakkel ti Mangisalakan dagiti nanumo a datonko tapno maipatungpal dagiti panggepna.
Nariknam kadin a nagkurangka a nangipaay ti amin a kasapulan a makitam iti aglawlawmo—iti pagtaenganyo, kadagiti pannakilangenmo, wenno iti gimong? Mabalin a narikna dagiti disipulo ni Jesucristo ti pagkuranganda idi indawatna kadakuada a mangpakan iti nasurok a lima ribu a mabisbisin a tattao (kitaen iti Mateo 14:21) idinto nga adda laeng lima a tinapay ken dua nga ikan a sidadaan a magun-od. Bayat ti panangbasam maipapan iti milagro a simmaruno a napasamak, utobem no kasano nga usaren ti Dios dagiti nanumo a datonmo iti panagserbi a mangbendision kadagiti adda iti aglawlawmo. Kasano koma ti panangipategna kadagiti panangikagumaanam bayat ti panagserbim iti Simbaan? Ibilang daytoy a palawag manipud ken ni Presidente James E. Faust: “Adu a di nainaganan a tattao nga addaan kadagiti sagut a maipada laeng iti lima a tinapay ken dua a babassit nga ikan ti mangipatpatungpal a nasayaat kadagiti takemda ken agserbi nga awan ti atension wenno pammadayaw , literal a mangpakpakan iti rinibribu” (“Lima Tinapay ken Dua nga Ikan,” Ensign, Mayo 1994, 5).
Mateo 14:22–33; Marcos 6:45–52; 6:15–21
Awisennak ni Jesucristo nga ikkatek dagiti butengko ken duduak ket aramatek ti pammatik Kenkuana.
Iladawam dita panunotmo dagiti detalye ti buya a nailadawan iti Mateo 14:22–33; Marcos 6:45–52; ken Juan 6:15–21. Panunotem ti maipapan kada Pedro ken dagiti dadduma pay a disipulo no kasano ti mabalin a nariknada. Ania ti masursurom maipapan iti kinadisipulo manipud kadagiti balikas ken tignay ti Mangisalakan kadagitoy a bersikulo? Ania ti masursurom manipud kadagiti balikas ken tignay ni Pedro? (Kitaen met iti 1 Nephi 3:7.) Ania ti yaw-awis ti Apo nga aramidem a mabalin a kasla bumabbabaka a rummuar iti bilog? Ania ti masarakam kadagitoy a bersikulo a mangted kenka iti tured a mangaramat iti pammatim ken ni Jesucristo?
Kas disipulo ni Jesucristo, nasken a natallugodak a mamati ken umawat ti kinapudno, uray no narigat nga aramiden.
Daydi aldaw kalpasan a namilagruan a nangted ni Jesus iti tinapay iti dakkel nga ummong iti let-ang, nasarakan Isuna dagiti pasurotna ket nagkiddaw iti ad-addu pay a taraon. Nupay kasta, naupayda ken napasakitanda ketdi idi indiaya ti Apo ti naespirituan a kita ti taraon—ti “tinapay ti biag” (Juan 6:48). Adu ti nakakita iti daytoy a kas “narikut a sao” (Juan 6:60).
Naaddaankayo kadin iti padas idi nariknayo nga ania man nga isuro ti Apo wenno maysa kadagiti katulonganna ket “narikut” wenno narigat a doktrina nga awaten? Panunotem maipapan dagita kasta a padas bayat ti panagbasam iti daytoy a pakaammuan, nangruna kadagiti sao ni Pedro kadagiti bersikulo 68–69. Ania dagiti sumagmamano a “sao ti biag nga agnanayon” (Juan 6:68) a mangtulong kenka nga agtalinaed a naikumit iti panangsurot iti Mangisalakan?
Kitaen met iti M. Russell Ballard, “To Whom Shall We Go?” Ensign or Liahona, Nob. 2016, 90–92.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a singasing
Bayat ti panangbasayo maipapan ti panangpakan iti lima a ribu, mabalinyo ti mangan iti sumagmamano a tinapay ken ikan ket panunoten no kasano ti kaadu ti maipakanyo iti lima a ribu a tattao. Kasano a naespirituan a pinakan ni Cristo ti pamiliayo? Kasano nga inusarnakayo a mangpakan kadagiti dadduma?
Namilagruan a pinakan ni Jesus ti 5,000 a tattao iti lima a tinapay ken dua nga ikan.
Mabalin a magustuan ti pamiliam ti mangyakem manen iti estoria kadagitoy a bersikulo. Apay a nagbuteng dagiti disipulo? Apay a kinabaelan ni Pedro a nangparmek iti butengna ket pimmanaw iti bilog? Kasano nga impakitana ti pammatina uray idi mangrugin a lumned isuna? Kasano a maipadatayo no dadduma ken Pedro?
Awisem dagiti miembro ti pamilia a mangisurat kadagiti pagarigan ti ragup ti balikas a “pinaimbag” kadagitoy a bersikulo. Kadagiti ania a wagas a pinaimbag ni Jesucristo dagiti tattao? Kaano ken kasano ti panangpaimbagna kadatayo?”
Mangted kadagiti tunggal miembro ti pamilia iti tinapay a kanenda, ken paglilinnawagan dagiti pagsayaatan a maawattayo manipud iti tinapay ken dagiti dadduma pay a makapasalun-at a taraon. Kalpasanna aggiddan a sukisokenyo dagitoy a bersikulo, a kitaenyo no apay nga inawagan ni Jesucristo ti Bagina iti “tinapay ti biag” (Juan 6:35)
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Kalikagumam a gun-oden dagiti bukodmo a naespirituan a pannakammo ken pannakaawat [insights]. Iti bukod ken sangapamiliaan a panagadalmo, saanmo a limitaran ti bagim kadagiti binatog ti nasantuan a kasuratan a naipaay kadagitoy a balabala. Nalabit nga adda dagiti mensahe ti Apo a para kenka kadagitoy a kapitulo a saan a nailawlawag ditoy. Sikakararag a kalikaguman a gun-oden dagitoy .
Panangsurngi iti Angin, ni Liz Lemon Swindle