“Abril 1–14. Mateo 16–17; Marcos 9; Lucas 9: ‘Sika ti Cristo’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Abril 1–14. Mateo 16–17; Marcos 9; Lucas 9,” Umaykayo, Sumurot Kaniak—Para kadagiti Indibidual ken Pamilia: 2019
Ti Panagbalbaliw-Langa, ni Carl Heinrich Bloch
Abril 1–14
Mateo 16–17; Marcos 9; Lucas 9
“Sika ti Cristo”
Kabayatan ti sumaruno a dua a lawas, utobem ti pammaneknek ni Pedro, a masarakan iti Mateo 16:15–17, ken kadagiti pammaneknek dagiti propeta ken apostol a mangngegmonto kabayatan ti sapasap a komperensia.
Suratmo Dagiti Impresionmo
Saan kadi a karkarna nga idawat dagiti Pariseo ken Sadusio a mangipakita ni Jesus kadakuada iti “maysa a tanda nga aggapu sadi langit”? Saan kadi nga umdas dagiti adu ken nalatak a milagrona? Ania pay dagiti nabileg a pannursurona wenno dagiti adu a wagas a Nangipatungpalanna kadagiti nagkauna a padto? Ti dawatda ket tinignay ti saan a kaawan dagiti pagilasinan ngem ti saanda a panagtulok a “mangrikna kadagiti pagilasinan” ken mangawat kadagitoy. (Kitaen iti Mateo 16:1–4.)
Kas kadagiti Pariseo ken Sadusio, nasaksian ni Pedro dagiti milagro ti Mangisalakan ken nangngegna dagiti pannursurona. Ngem ti umisu a pammaneknek ni Pedro, “Sika ti Cristo, ti Anak ti sibibiag a Dios,” saan nga immay babaen kadagiti pisikal a rikna— ti “lasag ken darana.” Ti pammaneknekna ket impalgak kenkuana ti “Amatayo sadi langit.“Ti paltiing ket ti bato a nangbangonan ti Mangisalakan iti Simbaanna idi ken ita—paltiing manipud iti langit ken dagiti katulonganna. Ket daytoy ti bato a pakabangonan ti kinadisipulotayo—paltiing a ni Jesus ti Cristo ken dagiti katulonganna ti agiggem kadagiti “tulbek ti pagarian.” Idi nabangontayo iti daytoy a pundasion, “dagiti ruangan ti impierno ket saan nga agballigi [kadatayo].” (Mateo 16:15–19.)
Dagiti Kapanunotan para iti Bukod a Panagadal iti Nasantuan a Kasuratan
Umay ti pammaneknek maipapan ken ni Jesucristo babaen ti paltiing.
No saludsoden ni Jesucristo dagiti tao ita nga agdama, “Asino iti panagkuna dagiti tao a siak ti Anak ti Tao?” maigiddiat dagiti sungbatda kadagiti sungbat nga inted dagiti tattao idi panawenna. Ania dagiti kabaruanan a kababalin a maiturong ken ni Jesus a nadlawmo? Kasano ti panangsungbatmo no saludsoden ni Jesus kenka, “Siasinoak iti panagkunayo?” (Kitaen iti Mateo 16:13–15.)
Utobem ti pammaneknekmo maipapan iti Mangisalakan ken no kasano nga inawatmo daytoy. Ania ti masursurom manipud iti Mateo 16:15–17 a mangpapigsa iti daytoy? No kayatmo a sursuruen ti ad-adu pay maipapan iti pammaneknek ken bukod a paltiing, agsukisok kadagitoy a nasantuan a kasuratan: Juan 15:26; 1 Taga Corinto 12:3; 2 Nephi 31:18; Alma 5:45–48; ken Doktrina ken Katulagan 8:2–3.
Mateo 17:1–9; Marcos 9:2–10; Lucas 9:28–36
Ania ti napasamak iti Bantay ti Panagbalbaliw-langa?
Idi innala ni Jesus da Pedro, Santiago, ken Juan iti “nangato a bantay,” nagbalbaliw-langana (wenno naitan-ok) iti sanguananda. Nagparang met da Moises ken Elias (Elijah) ket insagutda dagiti tulbek ti priesthood kadagiti Apostol. Dagitoy a tulbek ti nangpabael kadakuada a mangidaulo iti Simbaan ni Cristo iti daga kalpasan ti panagungarna (kitaen iti Pangiwanwan iti Nasantuan a Kasuratan, “Panagbalbaliw-Langa.”). Naisubli met dagitoy a tulbek iti panawentayo (kitaen iti DKK 110).
Ania dagiti “tulbek ti pagarian ti langit”?
Dagiti “tulbek ti pagarian ti langit” nga inkari ti Mangisalakan nga ited ken ni Pedro ket dagiti tulbek ti priesthood (Mateo 16:19). “Dagiti tulbek ti priesthood ti turay nga inted ti Dios kadagiti dadaulo ti priesthood tapno mangiiturong, mangkontrol, ken mangituray iti panangusar iti priesthoodna iti daga. Ti panangaramat iti turay ti priesthood ket iturayan dagiti agig-iggem kadagiti tulbek daytoy (kitaen ti DkK 65:2; 81:2; 124:123). Addaan dagiti agiggem kadagiti tulbek ti priesthood iti karbengan a mangidaulo ken mangiturong ti simbaan iti beddeng ti maysa a lugar a masakupan” (Handbook 2: Administering the Church [2010], 2.1.1).
Dagiti “tulbek ti pagarian ti langit” ket dagiti tulbek ti priesthood.
Naisubli dagiti tulbek ti priesthood a naited kada Pedro ken dagiti dadduma pay nga Apostol iti Bantay tiPanagbalbaliw-langa iti panawentayo (kitaen iti DkK 110:11–16). Mairaman kadagiti agiggem kadagiti tulbek ti priesthood ti Umuna a Panguluen ken ti Korum dagiti Sangapulo-ket-dua nga Apostol ken dadduma pay a General Authority; dagiti presidente ti templo, mision, stakea, ken district; ken dagiti bishop, branch president, ken presidente ti korum.
Kitaen met iti Neil L. Andersen, “Power in the Priesthood,” Ensign wenno Liahona, Nob. 2013, 92–95; Napudno iti Pammati, 126–27;“Priesthood Keys: The Restoration of Priesthood Keys” (video, LDS.org).
Mateo 17:14–21; Marcos 9:14–29
No agsapsapulak iti dakdakkel a pammati, nasken nga umuna a kumpetak iti pammati nga addan kaniak.
Ti ama anadakamat iti Mateo 17 ken Marcos 9 ket addaan kadagiti rason nga agduadua no maagasan ni Jesus ti anakna a lalaki Indawatna kadagiti disipulo ni Jesus a paimbagenda ti anakna, ket saanda a kabaelan. Ngem idi inawis ti Mangisalakan a mangaramat iti pammatina, saanna nga impamaysas dagiti panagduaduana. “Apo,mamatiak,” kinunana, ket kalpasanna, iti panangbigbigna a nga agkurang ti pammatina, innayonna, “Tulungam ti ti kurang ti pammatik,”
Ania ti insuro ti Espiritu kenka bayat ti panangbasam maipapan iti daytoy a milagro? Kasano a natulongannaka ti Nailangitan nga Ama a mangdakkel iti pammatim? Ania ti maaramidmo a mangpapigsa iti pammati nga addan kenka? Nalabit a mabalinmo ti mangipenpen iti listaan dagiti nasantuan a kasuratan, dagiti mensahe ti komperensia, wenno dagiti padas a nangpatibker iti pammatim.
Kitaen met iti Jeffrey R. Holland, “Lord, I Believe,” Ensign wenno Liahona, Mayo 2013, 93–95.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a singasing:
Tapno maisuro kadagiti ubbing maipapan dagiti tulbek ti priesthood, mabalinmo nga isarita ti estoria maipapan iti pannakakandado ni Elder Gary E. Stevenson iti ruar ti kotsena (kitaen iti Where Are the Keys and Authority of the Priesthood?” Ensign wenno Liahona, Mayo 2016, 29–32). Mabalin a pausarmo kadagiti annakmo dagiti tulbek a mangilukat iti balay, ti kotse, wenno dagiti dadduma a kandado. Ibilang ti panangipakita iti ladawan ti Presidente ti Simbaan ken panangipaneknek nga iggemna amin dagiti tulbek ti priesthood, kas iti inaramid ni Pedro.
Dagiti propeta nga addaan iti pammati ken ni Jesucristo ket mapagkusukosda dagiti bantay (kitaen ti Jacob 4:6; Moises 7:13). Ti sumaganad a pammaneknek manipud ken ni Bishop Richard C. Edgley ket makatulong manginaig daytoy a bersikulo iti pamiliam: “Diak pay nakaimatang iti pannakaikkat ti pudno a abantay. Ngem gapu iti pammati, adun ti nakitak a bantay ti panagduadua ken pannakapaay a naikkat ket nasukatan iti namnama ken panangnamnama. Gapu iti pammatik, personal a naimatangak ti bantay ti basol ket nasukatan iti panagbabawi ken pannakapakawan. Ket gapu iti pammatik, personal a naimatangak ti bantay ti saem a nasukatan iti talna, namnama, ken panagyaman. Wen, nakitak dagiti bantay a naikkat” (“Faith—the Choice Is Yours,” Ensign wenno Liahona, Nob. 2010, 33). Ania dagiti sumagmamano a bantay kadagiti biagtayo a kasapulan a maikkat? Kasano a maipakitatayo ti pammati iti pannakabalin ti Dios a tumulong kadatayo a mangikkat kadagitoy a bantay?
Ania ti kayat a sawen ti tumaliaw iti likudan kalpasan nga immiggemtayon ti arado? Apay koma a daytoy a galad ket isut mamagbalin kadatayo a di maikanatad iti pagarian ti Dios?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Masansan nga Aguummongtayo. Insuro ni President Henry B. Eyring: “Saanyo iti kaano man a libtawan ti maysa a gundaway a mangummong a sangsangkamaysa kadagiti annakyo nga agadal iti doktrina ni Jesucristo. Manmano laeng dagita a kanitono idasig kadagiti panangikagumaan ti kabusor” (“The Power of Teaching Doctrine,” Ensign, Mayo 1999, 74).
Maestro, Inyegko Kenka ti Anakko, ni Walter Rane