“Abril 22–28. Mateo 18; Lucas 10: ‘Anianto ti Aramidek Tapno Matawidko ti Biag nga Agnanayon?’“ Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Abril 22–28. Mateo 18; Lucas 10,” Umaykayo, Sumurot Kaniak—Para kadagiti Indibidual ken Pamilia: 2019
Ti Naimbag a Samaritano, ni Dan Burr
Abril 22–28
Mateo 18; Lucas 10
“Anianto ti Aramidek Tapno Matawidko ti Biag nga Agnanayon?”
Bayat ti sikakararag a panagbasam ken panagutobmo iti Mateo 18 ken Lucas 10, ikasom dagiti naalumamay a parikna ti Espiritu Santo. Ibaganantokkenka no kasano a mayaplikar dagitoy a pannursuro ken estoria kenka. Isuratmo dagiti impresion a maawatmo.
Suratmo Dagiti Impresionmo
No agdamagka iti Apo iti maysa a saludsod, mabalin a makaawatka iti sungbat a dimo ninamnama. Asino ti kaarrubak? Asino man nga agkasapulan iti tulong ken ayatmo. Asino ti kadakkelan idiay pagarian ti langit? Maysa nga ubing. Umdas kadin a pakawanen ti nakabasol iti maminpito a daras? Saan, nasken a mamakawanka iti maminpitopulo-ketpito a daras. (Kitaen iti Lucas 10:29–37; Mateo 18:4, 21–22.) No kalikagumam a gun-oden ti pagayatan ti Apo, saan a “mangikalintegan iti[bagim]” (Lucas 10:29), ngem agsipud ta pudno a kayatmo ti makasursuro Kenkuana, isuronakanto ti Apo no kasano ti agbiag iti wagas nga agturong iti agnanayon a biag Kenkuana.
Dagiti Kapanunotan para iti Bukod a Panagadal iti Nasantuan a Kasuratan
Masapulko ti mangpakawan kadagiti dadduma no nasken nga umawatak iti pammakawan manipud iti Apo.
Ti singasing ni Pedro a mabalinna a pakawanen ti maysa a tao iti maminpito ket mabalin a kasla managpakawan unay , ngem insuro ni Jesus ti maysa a nangatngato a linteg. Ti sungbatna, “Saanko a kuna nga agigga iti maminnpito: no di ket agingga iti mamimpitupulo a pito,” ket mangisursuro a saan a maipapan kadagiti numero ngem ketdi maipapan iti galad a kas ken ni Cristo maipapan iti panagpakawan. Bayat ti panangbasam iti pangngarig ti awan asina nga adipen, utobem dagiti panawen a nariknam ti panangngaasi ken pannakipagrikna ti Dios. Adda kadi maysa a tao nga agkasapulan ti pannakarikna ti asi ken pannakipagrikna manipud kenka?
Insuro ni Elder David E. Sorensen ti Pitupulo: “Kayatko nga ilawlawag a ti pannakapakawan dagiti basol ket saan koma a pakatikawan nasken a di pakatikawan iti panangayon iti dakes. … Nupay nasken a pakawanentayo ti padatayo a tao a nangranggas kadatayo, nasken latta nga agaramidtayo ti nasayaat a mangliklik ti pannakaulit manen dayta a pannakaranggas” (Forgiveness Will Change Bitterness to Love,” Ensign wenno Liahona, Mayo 2003, 12).
Kitaen met iti “Forgiveness,” Gospel Topics, topics.lds.org.
Asino dagiti Pitupulo?
Ti panangsurot iti maysa a pagtuladan a naipasdek kadagiti panawen ti Daan a Tulag (kitaen iti Exodo 24:1; Dagiti Numero 11:16), ni Jesucristo ket “nangtuding iti sabali pay a pitopulo,” kas mainayon Iti Sangapulo-ket-dua nga Apostol, a mangsaksi Kenkuana, mangikasaba Iti ebangheliona, ken tumulong Kenkuana iti aramidna. Agtultuloy daytoy a pagtuladan iti naisubli a Simbaan. Maawagan dagiti Pitopulo a mangtarabay iti Sangapulo-ket-dua iti misionda kas naisangsangayan a saksi ni Jesucristo iti intero a lubong. Mabukel dagiti Pitopulo ikadagiti korum. Ma-set apart dagiti miembro ti umuna a dua a korum kas dagiti General Authority Seventy, kasta met a ma-set apart dagiti miembro ti dadduma pay a korum kas dagiti Area Seventy. (Kitaen meti ti DkK 107:25–26, 33–34, 97.)
Tapno magun-od ti agnanayon a biag, nasken nga ayatek ti Dios ken ayatek ti kaarrubak a kas iti bagik.
Makatulong a manglagip a ti pangngarig maipapan iti naimbag a Samaritano ket ti wagas a pinangsungbat ni Jesus iti saludsod: “Asino ti karrubak?” Bayat ti panangbasam iti daytoy a pangngarig, laglapipem dayta a saludsod. Ania dagiti sungbat a masarakam?
Idi panawen ni Jesus, ti sinnupanget itii nagbaetan dagiti Judio ken Samaritano ket nagpaut iti adu a siglo. Dagiti Samaritano ket kaputotan dagiti Judio nga agnanaed iti Samaria a nakiasawa kadagiti Gentil. Narikna dagiti Judio a nagbalin a dakes dagiti Samaritano gapu iti pannakipulapolda kadagiti Gentil ken timmallikudda iti kinapudno. Nagbaniaga dagiti Judio iti adu a milia iti ruar ti dalanda tapno maliklikanda ti pananglabas iti Samaria. (Kitaen met iti Lucas 9:52–54; 17:11–18; Juan 4:9; 8:48.)
Apay iti panagkunam a pinili ti Mangisalakan ti Samaritano, maysa a tao a kagurgura dagiti Judio, kas maysa a pagwadan ti panangngaasi ken panagayat iti kaarruba ti maysa a tao? Ania ti maaramid daytoy a pangngarig a mangparegta kenka tapno mangipakita iti ad-adu pay a panangngaasi kadagiti dadduma?
Kitaen met iti Mosiah 2:17; “Parable of the Good Samaritan”(video, LDS.org); “Lord, I Would Follow Thee,” Hymns, no. 220.
Pilientayo “dayta nasayaat a bagi” babaen ti panagaramid kadagiti pili a mangiturong iti biag nga agnanayon.
Insuro ni Sister Bonnie D. Parkin, sigud a Relief Society General President: “Datayo da Maria ken Marta . … Inayat dagitoy dua ti Apo ken kayatda nga ipakita dayta nga ayat. Iti daytoy a pasken, para kaniak kasla impeksa ni Maria ti ayatna babaen iti panagdengngeg iti balikasna, idinto nga impeksa ni Marta ti ayatna babaen ti panagserbi Kenkuana. … Saan a di inkankano ni Jesus ti pakaseknan ni Marta, ngem ketdi pinabalbaliwanna ti pokusna babaen ti panagkunana a pilien ‘dayta nasayaat a bagi.’ Ken ania dayta? … Ti maysa a banag a kasapulan ket ti mangpili ti biag nga agnanayon [kitaen iti 2 Nephi 2:28]. Agpiltiayo iti inaldaw””(“Choosing Charity: That Good Part,” Ensign wenno Liahona, Nob. 2003, 104). Kasano ti pananggupugopmo iti balakad ti Apo ken ni Marta iti bukodmo a balikas? Amirisem ti iskediulmo—adda kadi maysa a banag a “kasapulan” nga ad-adda a makasapul ti atensionmo?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a singasing:
Ania dagiti himno a mabalin a kantaen ti pamiliam a mainaig kadagiti kinapudno nga naisuro kadagitoy a kapitulo? Dua a pagarigan ti “Lord, I Would Follow Thee” ken “Have I Done Any Good?” Hymns, nos. 220, 223, ngem adu dagiti dadduma pay. Kasano a makatulong iti pamiliam dagiti balikas kadagitoy a himno a nasaysayaat ti pannakaawatda kadagiti pannursuro ti Mangisalakan?
Apay a kayat ni Jesus nga agbalintayo a kas maysa a bassit nga ubing? Ania dagiti sumagmamano a kababalin dagiti ubbing a mamagbalin kadatayo nga ad-addaa kas ken ni Cristo no inayontayo dagitoy iti biagtayo? (kitaen iti Mosiah 3:19).
Kayat ni Jesus nga agbalin dagiti disipulona a kas babassit nga ubbing.
Ania ti mamagbalin iti pangngarig ti naimbag a Samaritano a kasla ad-adda ti pakainaiganna iti pamiliam? Magustuanda ngata ti agaruat iti costume ket mangyakem iti daytoy? Penken a tulungam dagiti miembro ti pamilia a mangkita no kasano nga agbalinda a kas iti naimbag a Samaritano. Adda kadi maysa a tao iti pagadalan wenno simbaan nga agkasapulan a mabalin a nabaybay-antayo? Ania ti maaramidtayo para iti daytoy a tao?
Narigat kadi latta nga iraman dagiti naespiritualan a bambanag iti iskediul ti pamiliam? Maparegta ti estoria maipapan kada Maria ken Marta ti maysa a family council wenno family home evening maipapan iti no kasano nga aramiden daytoy. Kas maysa a pamilia, mabalin nga agaramidkayo iti listaan dagiti wagas a pumili iti “dayta nasayaat a bagi” (kitaen iti Lucas 10:42).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Mangpatanor iti maysa a naayat nga aglawlaw. Ti wagas a pakariknaan ken pakatratuan ti tunggal maysa kadagiti miembro ti pamilia ket makaimpluensia unay iti espiritu iti pagtaenganyo. Tulungam amin dagiti miembro ti pamilia nga aramidenda ti pagrebbenganda a mangipasdek iti naayat, madaydayaw a pagtaengan tapno mariknanto ti tunggal maysa a natalged a mangibinglay kadagiti padas, saludsod, ken pammaneknek. (Kitaen ti Panangisuro iti Wagas ti Mangisalakan, 15.)
Ni Cristo iti Pagtaengan da Maria ken Marta, ni Walter Rane