Abril 15–21

Paskua ti Panagungar

“Adino ti Yanna, O Patay, ti Panagballigim?”

Bayat ti panangbasam kadagiti pammaneknek maipapan iti Panagungar ti Mangisalakan iti daytoy a balabala, isuratmo dagiti rikna ken impresion nga umay kenka manipud iti Espiritu Santo.

Suratmo Dagiti Impresionmo

Kabayatan ti maudi a lawas iti biag ti Mangisalakan, adu dagidi Judio iti aglawlawna ti nakipaset kadagiti kannawidan iti Paskua ti Panagungar. Insaganada dagiti makan, nagkankanta ken naguummong a sangsangkamaysa a manglagip iti pannakaispalda iti balay ti Israel manipud iti pannakaadipen kadagiti Egipsio. Dimngeg dagiti pamilia iti estoria maipapan ti manangdadael nga anghel a lumabas kadagiti pagtaengan dagiti kapuonandada a nangmarka kadagiti ridawda iti dara ti karnero. Iti baet amin dagitoy a parambak nga addaan iti nabaknang a simbolismo ti pannakaispal, manmano laeng ti makaammo a ni Jesucristo, ti Kordero ti Dios, ti mangispal kadakuada manipud iti pannakaadipenda iti basol ken patay—babaen ti panagsagabana, ti pannakatayna, ken ti Panagungarna. Uray no kasta, adda dagitay nakailasin ken ni Jesus a kas naikari a Mesiasda, ti agnanayon a Mangisalakanda. Manipun iti dayta nga aldaw, nagpaneknek dagiti disipulo ni Jesucristo iti intero a lubong, “a ni Cristo ket natay gapu kadagiti basbasoltayo … ; ket naitanem ket nagungar iti maikatlo nga aldaw” (1 Taga Corinto 15:3–4).

Dagiti Kapanunotan para iti Bukod a Panagadal iti Nasantuan a Kasuratan

Mateo 21–28

Adda pannakabalin niJesuscristo a makatulong kaniak a mangparmek iti basol, ipapatay, pannubok, ken pagkapsutan.

Maysa a wagas a pangipamaysaan kadagiti bendision ti Pannubbot ti Mangisalakan iti daytoy a lawas ket mangbubos iti oras iti tunggal aldaw iti panagbasa maipapan iti maudi a lawas ti biag ni Jesus (sumaganad ti mabalin nga iskediul iti panagbasa). Ania ti masarakam kadagitoy a kapitulo a makatulong kenka a mangrikna iti ayat ti Mangisalakan? Ania ti masursurom maipapan Iti pannakabalinna a mangispal kenka manipud iti basol ken ipapatay? Ania ti masursurom maipapan iti panagandur kadagiti pannubok ken panangparmek kadagiti pagkapsutan? Kasano nga ar-aramatem ti pammatim iti bilegna iti pannakaisalakan?

• Domingo: Naballigian nga iseserrek iti Jerusalem (Mateo 21:6–11)

• Lunes: Panangldalus iti templo (Mateo 21:12–16)

• Martes: Panangisuro iti Jerusalem (Mateo 21–23)

• Mierkoles: Naituloy ti panangisuro (Mateo 24–25)

• Huebes: Ti Paskua ti Panagungar ken panagsagaba ni Cristo iti Minuyongan ti Getsemani (Mateo 26)

• Biernes: Pannubok, Pannakailansa iti Krus, ken pannakaitanem (Mateo 27:1–61)

• Sabado: Naitanem ti bagi ni Cristo (Mateo 27:62–66) idinto a nag ministro ti Espirituna iti lubong dagiti espiritu (DkK 138)

• Domingo: Ti panagparang ti nagungar a Cristo (Mateo 28:1–10)

Ti Maudi a Pangrabii, ni Carl Heinrich Bloch

Mateo 28:1–10; Lucas 24:13–35; Juan 20:19–29; 1 Taga Corinto 15:1–8, 55

Adu dagiti saksi a nangpaneknek iti Panagungar ni Jesucristo.

Panunotem no ania koma ti kayarigan dagiti disipulo a mangbuya ken ni Jesus a naum-umsi, naparparigat, ken nailansa iti krus. Isuda dagiti saksi ti pannakabalinna, nakarikna iti kinapudno dagiti pannursurona, ken addaan iti pammati nga Isu ti Anak ti Dios. Ti pannakasaksi iti ipapatayna ket nalabit a pannubok ti pammati para iti sumagmamano, ngem iti saan a nabayag nagbalinda a saksi iti naindaklan a milagro ti Panagungarna.

Ania ti masursurom manipud kadagiti pakaammuan dagitoy a nakasaksi iti Ngungar a Mangisalakan? Markaan wenno isurat ti padas ti tunggal tao iti Mateo 28:1–10; Lucas 24:13–35; Juan 20:19–29; ken 1 Taga Corinto 15:1–8, 55. (Laglagipen a masarakan dagiti dadduma pay a saksi ti nagungar a Cristo iti 3 Nephi 11; Mormon 1:15; Ether 12:38–39; Doktrina ken Katulagan 76:19–24; 110:1–10; ket Joseph Smith — Pakasaritaan 1:15–17.) Kadagitoy a pakaammuan, ania ti mangpapigsa iti pammatim iti pudno a Panagungar ti Apo? Kalpasan ti Panagungar ti Mangisalakan, nagungar ken nagparang pay dagiti dadduma iti kaadduan (kitaen iti Mateo 27: 52 – 53; 3 Nephi 23:9). Apay a mariknam a napateg daytoy a naisurat iti agpada a Biblia ken ti Libro ni Mormon?

Kitaen met ti “Jesus Is Resurrected,” “The Risen Lord Appears to the Apostles,” “Blessed Are They That Have Not Seen, and Yet Have Believed” (videos, LDS.org).

1 Pedro 1:3–11

Ni Jesucristo ti mangted kaniak iti namnama ken rag-o.

Ti balasang nga anak ni Elder Paul V. Johnson a ni Alisa, a nagsagaba iti terminal kanser ken nagibtur iti adu nga operasion, ket nangipagwadan iti “inanama a sibibag” nga inladawan ni Pedro iti 1 Pedro 1:3–11. Imbinglay ni Elder Johnson ti surat ni Alisa nga insuratna iti naminsan a Paskua ti Panagungar, iti nabiit sakbay a pimmusay: “Ti Paskua ti Panagungar ket maysa a palagip ti amin a namnamaek para iti bagik. Nga iti maysa nga aldaw ket maagasanakto ken iti maysa nga aldaw maimbaganakto. Iti maysa nga aldaw awanto ti ania man a metal wenno plastic iti unegko. Iti maysa nga aldaw ket nawayanton ti pusok iti buteng ken nawayanton ti panunotko kadagiti panagdandanag. … Naragsakak unay ta sipupudno a mamatiak iti maysa a napintas nga biag kalpasan ti ipapatay” (“And There Shall Be No More Death,” Ensign wenno Liahona, Mayo 2016, 121).

Ania a balikas wenno ragup dagiti balikas iti 1 Pedro 1:3–11 ti mangted kenka iti namnama gapu ken ni Jesucristo? Kaano a nariknam dayta a namnama? Kasano a maibinglaymo ti namnama nga adda kenka babaen ken ni Jesucristo kadagiti ay-ayatem?

Kitaen met iti Alma 27:28; 36:1–24; 3 Nephi 9:11–17; Moroni 7:40–41.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a singasing:

Mormon.org

Ti “Holy Week” a benneg iti mormon.org/easter ket addaan iti time line ken panangiladawan iti no ania ti napasamak iti tunggal aldaw iti maudi a lawas ti biag ti Mangisalakan. Tunggal aldaw ti lawas mabalin a sublien nga adalen ti pamiliam dagitoy a panangiladawan tapno kitaen no ania ti inaramid ti Mangisalakan iti dayta nga aldaw, wenno mabalinmo a basaen maipapan tii maudi a lawasna kadagiti nasantuan a kasuratan kas maysa a pamilia (kitaen iti naisingasing a listaan iti benneg a “Dagiti Kapanunotan para iti Bukod a Panagadal iti Nasantuan a Kasuratan’).

Hymns ken Children’s Songbook

Ibilang ti aggigiddan a panangkansion kadagiti kanta maipapan iti Pannubbot ken Panagungar ti Mangisalakan kabayatan daytoy a lawas, agraman ti sumagmamano a saan unay a pamiliar kadakayo (kitaen iti topics index ti Hymns wenno Children’s Songbook, iti babaen dagiti topiko a kas iti “Atonement,” “Easter,” or “Resurrection”). Tapno makatulong kadagiti miembro ti pamilia a mangsursuro kadagiti kanta, mabalinmo ti mangipakita kadagiti ladawan a maigiddan kadagiti balikas.

“Ti Sibibiag a Cristo: Ti Pammaneknek dagiti Apostol”

Kas maysa a pamilia, basaen ti “Ti Sibibiag a Cristo: Ti Pammaneknek dagiti Apostol” (Ensign wenno Liahona, Abr. 2000, 2–3; kitaen met iti LDS.org), ken mangawis iti tunggal miembro ti pamilia a pumidut iti maysa a mensahe ti Paskua ti Panagungar manipud iti daytoy a pammaneknek nga ibinglay kadagiti dadduma. Kas pagarigan, mabalinmo ti agaramid kadagiti poster tapno ipakita iti social media, iti sango ti ridawyo, wenno iti tawayo.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Bukod a Panagadal

Mangitudingka kadagiti nalaklaka a gun-oden a panggep a tun-oyen [goal]l. Ti panangbubos uray sumagmamano laeng a minuto iti tunggal aldaw a panagadal kadagiti nasantuan a kasuratan ket mangbendision iti biagmo. Agkumit iti panagadal iti tunggal aldaw, mangsapul iti wagas a mangipalagip iti bagim iti panagkumitmo, ken aramidem ti amin a kabaelam a mangsurot iti daytoy. .

Getsemani, ni Adam Abram