“Abril 29–Mayo 5. Juan 7–10: ‘Siak ti Naimbag a Pastor’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Abril 29–Mayo 5. Juan 7–10,” Umaykayo, Sumurot Kaniak—Para kadagiti Indibidual ken Pamilia: 2019
Isu nga Awanan iti Basol, ni Liz Lemon Swindle
Abril 29–Mayo 5
Juan 7–10
“Siak ti Naimbag a Pastor”
Bayat ti panangbasam iti Juan 7–10, maawatmo dagiti impresion manipud iti Espiritu Santo maipapan kadagiti pagbatayan a mainaig iti doktrina kadagitoy a kapitulo. Ti panangisuratmo kadagiti impresion ket makatulong kenka nga agaramid iti plano nga agtignay a mayannurot kadagitoy.
Suratmo Dagiti Impresionmo
Nupay immay ni Jesucristo a mangisangbay iti “talna [ken] naimbag a nakem kadagiti tattao” (Lucas 2:14), adda napataud a “panagsusupadi dagiti adu a tao gapu Kenkuana.” (Juan 7:43). Immay dagiti tattao a nakasaksi kadagiti isu met laeng a pasamak iti naidumduma unay a panangipapan maipapan iti kinasiasino ni Jesus. Adda dagiti nagkuna, “Isu ket naimbag a tao,” idinto a kinuna met dagiti dadduma, “Inyaw-awanna dagiti tao” (Juan 7:12). Idi pinaimbagna ti bulsek a tao iti Sabbath [Aldaw aPanaginana], adda dagiti nangipapilit, “Saan a naggapu iti Dios daytoy a tao, ta saanna a ngilinen ti aldaw ti panaginana,” kinuna met ti dadduma, “Kasano ti pannakabalin ti maysa a managbasol nga agaramid kadagiti kakasta a milagro?” (Juan 9:16.) Ngem iti baet ti pannakatikaw, mailasin dagiti agsapsapul iti kinapudno ti pannakabalin kadagiti balikasna gapu ta, “uray kaano man awan ti tao a nagsao iti kastoy” (Juan 7:46). Idi kiniddaw dagiti Judio ken ni Jesus nga “ibagam kadakami a silalawag” no Isu met la ti Cristo, impalgakna ti maysa a prinsipio a makatulong kadatayo a mangilasin iti kinapudno manipud iti biddut: “Denggen dagiti karnerok ti timekko,” kinunana, “ket ammok ida, ken surotendak” (Juan 10:27).
Dagiti Kapanunotan para iti Bukod a Panagadal iti Nasantuan a Kasuratan
Bayat ti panangibiagko kadagiti kinapudno nga insuro ni Jesucristo, maammuakto a pudno dagitoy.
Nasdaaw dagiti Judio iti kaadu unay ti ammo ni Jesus idinto ta saan a nagadal(kitaen iti bersikulo 15)—uray bassit laeng, iti wagas a saan a pamiliar kadakuada. 173 trg Kas sungbat ni Jesus, insurona ti sabali a wagas iti panangammo iti kinapudno a sidadaan a gun-oden ti tunggal maysa, ania man ti edukasion wenno nagtaudan. Segun iti Juan 7:14–17, kasano a maammuanyo a pudno ti doktrina nga insuro ni Jesus? Kasano a nakatulong kenka daytoy a proseso a maaddaan iti pammaneknek maipapan iti ebanghelio?
Sidadaan a gun-oden ti amin ti asi ti Mangisalakan.
Idi agsarsarita maipapan iti pannakipulapol ti Mangisalakan iti babai a naidatag iti pannakiabig, kinuna ni Elder Dale G. Renlund : “Awan duadua a saan a kinonsinti ti Mangisalakan ti pannakiabig. Ngem saanna met a kinondena ti babai. Inallukoyna isuna a mangbalbaliw iti biagna. Naguyugoy isuna nga agbalbaliw gapu iti ayat ken asina. Paneknekan ti Patarus ti Joseph Smith iti Biblia a daytoy ti resulta wenno bunga ti kinadisipulona: ‘Ket dinaydayaw ti babai ti Dios manipud iti dayta nga oras ken namati iti naganna’ [kitaen iti Juan 8:11, footnote c] “(“Our Good Shepherd,”Ensign wenno Liahona, Mayo 2017, 30).
Kaano ti pannakariknam a kas iti babai, nga umaw-awat iti asi imbes a panangkondena manipud iti Mangisalakan? Kaano a nagbalinka a kas kadagiti escriba ken Pariseo, a mangpabpabasol wenno mangkedkedngan kadagiti dadduma uray no awananka iti basol? (kitaen iti Juan 8:7). Ania pay ti masursurom manipud iti wagas a pannakipulapol ti Mangisalakan kadagiti escriba ken Pariseo ken iti babai a naduktalan a nakiabig? Ania ti masursurom maipapan iti panangpakawan ti Mangisalakan kabayatan ti panangbasam kadagitoy a bersikulo?
Apay a napasakitan dagiti Judio idi imbaga ni Jesus, “Idi kasanguanan ti pannakayanak ni Abraham, addaakon”?
Ti “Siak” ket ti balikas nga inusar ni Jehova a nangyaam-ammo iti Bagina ken ni Moises, a kas nairekord iti Exodo 3:14. Isu nga idi kinuna ni Jesus ti, “Siak,” impakaammona ti Bagina a kas Jehova, ti Dios iti Daan a Tulag. Imbilang dagiti Judio daytoy a panagtabbaaw, ket babaen ti linteg ni Moises, ti pannusa ket patay babaen ti panangbato.
Babaen kadagiti karittayo, maiparangarang ti Dios ti Bagina iti biagtayo.
Agsipud ta masansan a dakes ti pagbanagan ti basol, mabalintayo nga ibilang ti sumagmamano a kinadaksanggasattayo kas resulta dagiti biddut nga aramidtayo. Nupay kasta, idi impapan dagiti disipulo ti Mangisalakan a mayanak ti tao a bulsek gapu ta nagbasol dagiti nagannak kenkuana, inatur ni Jesus ida. Kasano a dagiti balikas ti Mangisalakan iti Juan 9:3 ket mangbalbaliw iti pannirigam maipapan kadagiti karitmo ken dagiti karit ti dadduma. Bayat ti panangbasam iti Juan 9, utobem no kasano a dagiti “aramid ti Dios [ket] maiparangarang” (Juan 9:3). Kasano ti pannakaiparangarang dagitoy bayat ti panangsangom kadagiti karit?
Ket kasta met a makaay-ayo nga ammuen a ti saludsod dagiti disipulo iti Juan 9:2 ket naipalgak a namatida iti biag sakbay daytoy a biag, maysa a doktrina a napukaw iti Kristianismo kabayatan ti Dakkel nga ikakalilis iti Kinapudno ngem naisubli babaen ken ni Propeta Joseph Smith (kitaen iti DkK 93:29; Moises 4:1–4; Abraham 3:22–26).
Asino dagiti “sabsabali a karnero” a dinakamat ti Mangisalakan iti Juan 10:16?
Idi sarungkaran ti Mangisalakan ti America kalpasan ti Panagungarna, inlawlawagna no asino dagiti sabsabali pay a karnerona (kitaen iti 3 Nephi 5:21–16:5).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a singasing:
Kasano a matulongam ti pamiliam a makaawat kadagiti pannursuro ni Jesus iti Juan 7:24? Maysa a wagas ket mapanka iti ruar ket rugitam ti maysa a miembro ti pamilia. Ania ti mabalin a panunoten dagiti ganggannaet iti daytoy a miembro ti pamilia babaen ti pannakakitada iti akinruar a langana? Ilistam ti sumagmamano a nasayaat a kababalin daytoy a miembro ti pamilia a saan a makita babaen ti panangkita laeng kenkuana (kitaen met iti 1 Samuel 16:7).
Kasano nga agbalintayo no dadduma nga adipen iti basol? Ania dagiti kinapudno nga insuro ni Jesus a makapagbalin kadatayo a nawaya?
Ni Jesus a Mangag-agas iti Bulsek, ni Carl Heinrich Bloch
Kasano a matulongam ti pamiliam a mangiladawan iti panunotda ti pakaammuan maipapan iti panangagas ni Jesus iti bulsek a lalaki iti Juan 9? Mabalinyo a yakem ti estoria wenno ipakita ti video “Jesus Heals a Man Born Blind” (LDS.org). Isardeng sagpaminsan ti estoria tapno mabasa dagiti miembro ti pamilia dagiti maitutop a bersikulo manipud iti Juan 9. Awisem ida a mangisurat kadagiti uray ania nga adalen a masursuroda manipud iti pakaammuan, a kas iti no ania ti kaipapanan ti agbalin a napasurot iti ebanghelio ni Jesucristo.
Tapno mairaman dagiti miembro ti pamilia iti panagsursuro manipud iti pangngarig maipapan iti Naimbag a Pastor, idawatmo iti tunggal maysa kadakuada a mangidrowing iti ladawan ti maysa kadagiti sumaganad: maysa a mannanakaw, maysa a ridaw, maysa a pastor, maysa a babaonen ( matangdanan a trabahador), maysa a lobo, ken maysa a karnero. Awisem ida a mangbasa iti Juan 10:1–18, 27–29, ket kalpasanna paglilinnawagan kas maysa a pamilia no ania ti insuro ti Mangisalakan maipapan kadagiti banag nga indrowingda.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Sapulem dagiti makaparegta a balikas ken ragup dagiti balikas. Bayat ti panangbasam, mabalin a mangisangbay ti Espiritu iti sumagmamano a balikas wenno ragup dagiti balikas iti imatangmo tapno mangparegta ken mangguyugoy kenka wenno kasla maisurat a para laeng kenka. Ibilangmo ti panangisurat kadagiti ania man a balikas wenno ragup dagiti balikas a mangparegta kenka iti Juan 7–10.
Saanton a Mapukaw, ni Greg K. Olsen