“Mayo 13–19. Mateo 19–20; Marcos 10; Lucas 18: ‘Ania pay ti Pagkurangak?’“ Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Mayo 13–19. Mateo 19–20; Marcos 10; Lucas 18,” Umaykayo, Sumurot Kaniak—Para kadagiti Indibidual ken Pamilia: 2019
Mayo 13–19
Mateo19–20; Marcos 10; Lucas 18
“Ania Pay ti Pagkurangak?”
Basaen ken utoben ti Mateo 19–20; Marcos 10; ken Lucas 18, nga ikasom dagiti parikna [promtings] a maawatmo. Isurartmo dagita a parikna, ken ikeddengmo no kasanom nga agtignaykanto kadagitoy.
Suratmo Dagiti Impresionmo
No addaanka iti gundaway nga agsaludsod iti Mangisalakan, ania koma ti saludsodem? Idi makita ti maysa a baknang nga agtutubo a lalaki ti Mangisalakan iti umuna a gundaway, sinaludsodna, “Ania ti naimbag nga aramidekto, tapno maaddaannak iti biag nga agnanayon?” (Mateo 19:16). Impakita ti sungbat ti Mangisalakan ti agpada a panangbigbig iti pateg kadagiti nasayaat a bambanag nga inaramiden ti agtutubo a lalaki ken napnuan ayat a pammaregta nga agaramid iti ad-adu pay. No utobentayo ti posibilidad nga adda biag nga agnanayon, mabalin a a masdaawtayo no ad-adu pay ti nasken nga aramidentayo. No saludsodentayo, iti bukodtayo a wagas: “Ania pay ti pagkurangak?” (Mateo 19:20), masungbatannatayo ti Apo iti personal a kas met laeng iti sungbatna iti nabaknang nga agtutubo a lalaki. Aniaman ti dawaten ti Apo nga aramidentayo, nga agtignaytayo iti sungbatna ket kanayon nga agkasapulanto nga agtalektayo Kenkuana nga ad-adda pay ngem iti bukodtayo a kinalinteg (kitaen iti Lucas 18:9–14) ken tapno “umawattayo iti pagarian ti Dios a kas maysa nga ubing” (Lucas 18:17; kitaen met iti 3 Nephi 9:22).
Dagiti Kapanunotan para iti Bukod a Panagadal iti Nasantuan a Kasuratan
Ti kallaysa ti lalaki ken babai ket inordenan ti Dios.
Daytoy a panagsarita ti Mangisalakan ken dagiti Pariseo ket maysa kadagiti manmano a naisurat a pasamak a nangisuruan ti Mangisalakan nangnangruna ti maipapan iti kallaysa. Kalpasan ti panangbasam iti Mateo 19:1–9 ken Marcos 10:1–12, agaramidka iti listaan ti sumagmamano a palawag a mariknam a manggupgop kadagiti panirigan ti Apo iti kallaysa. Kalpasanna adalem ti “Marriage” iti Gospel Topics, topics.lds.org, ken nayonam pay kadagiti palawag ii listaam bayat ti panangtaktakuatmo kadagitoy. Kasano a makatulong kenka ti pannakaammom iti plano ti Ama iti pannakaisalakan tapno mangammo no apay a ti kallaysa ti lalaki ken babai ket inordenan ti Dios.
Paset ti plano ti Dios ti agnanayon a kallaysa.
Maam-ammom dagiti tattao a di umanamong wenno mangsuppiat kadagiti pagrukodan ti Apo maipapan iti kallaysa. Para iti makatulong a pannakailadawan ti no kasano a maddaanka iti nadayaw a pannakisarsarita kadakuada, buyaen ti video “Everyday Example: When Beliefs Are Questioned”(LDS.org).
Insuro kadi ni Jesus a di kaano maanamongan ti diborsio wenno nasken a saan nga agkallaysa manen dagiti nagdiborsio a tattao?
Iti maysa a mensahena maipapan iti diborsio, insuro ni Elder Dallin H. Oaks a panggep ti Ama a Nailangitan nga agbalin nga agnanayon ti relasion iti panagasawa. Nupay kasta, maawatan met ti Dios a “gapu iti kinatangken dagiti puspuso[tayo]” (Mateo 19:8), agraman dagiti biddut a panagpili ken kinamanagimbubukod ti maysa wenno agpada nga agassawa, kasapulan ti panagdiborsio no dadduma.
Inlawlawag ni Elder Oaks a ti Apo “palugodanna a mangikallaysa manen dagiti nagdiborsio a tao nga awanan iti mulit ti imoralidad a nadakamat iti nangatngato a linteg. Malaksid no nakaaramid ti nagdiborsio a miembro kadagiti nadagsen a panaglabsing, mabalin isuna a maikari iti temple recommend babaen kadagiti isu met la a pagrukodan ti pannakaikari a mayaplikar iti dadduma pay a miembro” (“Divorce,” Ensign wenno Liahona, Mayo 2007, 70).
Kitaen met iti “Divorce,” Gospel Topics, topics.lds.org.
Mateo 19:16–22; Marcos10:17–22; Lucas 18:18–23
No saludsodek ti Apo, isuronanto kaniak no ania ti kasapulan nga aramidek tapno agtawid iti agnanayon a biag.
Ti pakaammuan maipapan iti nabaknang nga agtutubo a lalaki ket makaited iti gapu ti pakaseknan uray pay iti napudno, ken nabayagen a disipulo. Bayat ti panangbasam iti Marcos 10:17–22, ania ti pakakitaan a masarakam iti kinapudno ken kinasinseridad ti agtutubo a lalaki?
Kas iti nabaknang nga agtutubo a lalaki, saantayo amin a perpekto ken naan-anay, isu a kas disipulo nasken a saludsodenentayo ti, “Ania pay ti pagkurangak?” — ket nasken a saludsodentayo daytoy iti unos ti panagbiagtayo. Kitaen a naited ti sungbat nga addaan iti ayat manipud iti Maysa a kumitkita kadatayo no ania ti pudno a kinasiasinotayo (kitaen iti Marcos 10:21). Ania ti maaramidmo nga agsagana tapno saludsodem iti Apo no ania ti pagkurangam— ken tapno awatem ti sungbatna?
Kitaen met iti Larry R. Lawrence, “What Lack I Yet?” Ensign wenno Liahona, Nob. 2015, 33 – 35; S. Mark Palmer, “Then Jesus Beholding Him Loved Him,” Ensign wenno Liahona, Mayo 2017, 114--16.
Makaawat ti tunggal maysa iti bendision ti biag nga agnanayon, malaksid no awatenda ti ebanghelio.
Mainaigyo kadi iti biagyo iti padas ti asino man kadagiti mangmangged iti kaubasan? Ania dagiti adalen a masarakam para iti bagim iti daytoy a binatog? Ti mensahe ni Elder Jeffrey R. Holland a “The Laborers in the Vineyard” (Ensign wenno Liahona, Mayo 2012, 31–33) ket mabalin a makatulong kenka a mangkita kadagiti baro a wagas a pakayaplikaran daytoy a pangngarig. Ania dagiti nayon a parikna nga ited ti Espiritu kenka?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a singasing:
Makaipaay kadi iti pagimbagan iti pamiliam ti panangilawlawag kadagiti pannursuro ti Dios maipapan iti panagasawa ken pamilia? No kasta, mabalinyo a basaen “Ti Kaamaan: Maysa a Waragawag iti Lubong”(Ensign wenno Liahona, Nob. 2010, 129). Kasano a makatulong dagiti pannursuro iti waragawag a mangikkat iti pannakatikaw ken dagiti kinaulbod kadagiti mensahe ti lubong maipanggep iti panagasawa ken pamilia?
Ania ti pagdumaan ti kaadda kadagiti kinabaknang ken panagtalek kadagiti kinabaknang? (kitaen iti Marcos 10:23–24). Bayat ti panangbasam iti bersikulo 27, mabalin a kayatmo nga ilawlawag ti Patarus ti Joseph Smith: “Kadagiti tao nga agtalek kadagiti kinabaknang, saan a mabalin daytoy; ngem saan a mabalin kadagiti tao nga agtalek iti Dios ken mangpanaw iti amin para iti pagimbagak, iti kasta amin dagitoy a bambanag ket mabalin” (iti Marcos 10:27, footnote ).
Tapno mailadawan dagiti pagbatayan iti Mateo 20:1–16, mabalin a mangangayka iti maysa a simple a salisal, kas iti ababa a linnumbaan, ken ikari nga addanto premio ti mangabak. Kalpasan a maileppas ti tunggal maysa ti salisal, ikkan ti tunggal maysa ti isu met laeng a premio, a mangrugi iti naudi a nakalpas ken igibus iti tao nga immuna a nakalpas. Ania ti isuro daytoy kadatayo maipapan iti no asino ti umawat kadagiti bendision ti agnanayon a biag iti plano ti Nailangitan nga Ama?
Ania ti kaipapanan ti ragup ti balikas a “siasino man nga agayatto nga isu ti umuna kadakayo, isunto ti adipenyo”? (Mateo 20:27). Kasano nga impagwadan ni Jesucristo daytoy a pagbatayan? Kasano a masurottayo ti pagwadanna iti pamiliatayo, iti ward wenno branchtayo, ken iti sangakarrubaantayo?
Ania ti masursurotayo maipapan iti kararag manipud iti dua a pangngarig kadagitoy a bersikulo?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Mangkita iti oras a mayannatup para kenka. Masansan a kalakaan ti agsursuro no makapagadalka kadagiti nasantuan a kasuratan a saan a masingsinga. Mangkita iti oras a mayannatup para kenka, ken aramidem ti kabaelam nga agtultuloy nga agadal iti dayta nga oras iti tunggal aldaw.
Ni Cristo ken ti Baknang nga Agtutubo nga Agturay, ni Heinrich Hofmann