“Mayo 6–12. Lucas 12–17; Juan 11: ‘Makipagrag-okayo Kaniak, gapu ta Nabirokak ti Napukaw a Karnerok’” Umaykayo Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Mayo 6–12. Lucas 12–17; Juan 11,” Umaykayo, Sumurot Kaniak—Para kadagiti Indibidual ken Pamilia: 2019
Ti Nayaw-awan nga Anak, ni Liz Lemon Swindle
Mayo 6–12
Lucas 12–17; Juan 11
“Makipagrag-okayo Kaniak; gapu ta Nabirokak ti Napukaw a Karnerok”
Bayat ti panangbasam iti Lucas 12–17 ken Juan 11, nainkararagan a sukisokem no ania ti kayat ti Nailangitan nga Ama nga ammuem ken aramidem. Ti panagadalmo kadagitoy a kapitulo ti manglukat iti pusom kadagiti mensahe a nairanta a para kenka.
Suratmo Dagiti Impresionmo
Iti kaaduan a kasasaad, 99 iti 100 ti maibilang a kasayaatan—ngem saan no ibagi dagiti kasta a bilang dagiti ipatpateg nga annak ti Dios (kitaen iti DkK 18:10). Iti dayta a kasasaad, maikari uray ti maymaysa a kararua ti naannad, napasnek a panagsapsapul “agingga [a] masarakan[tayo] daytoy” (Lucas 15:4), iti wagas a pananginsuro ti Mangisalakan iti pangngarig maipapan iti napukaw a karnero. Kalpasanna mabalin nga irugii ti panagragrag-o, ta “ad-addanto ragsak sadi langit gapu iti maysa a managbasol nga agbabawi, ngem kadagiti siam-a -pulo-ketsiam a nasingpet a tao, a dida masapul ti panagbabawi” (Lucas 15:7). No kasla saan a nainkalintegan dayta, makatulong no lagipen nga iti kinapudno, awan ti saan a “makasapul iti panagbabawi.” Kasapulantayo amin ti pannakaispal. Ken mabalintayo amin ti makiraman iti panagispal, sangkamaysa nga agrag-o iti tunggal kararua a naisalakan (kitaen ti DkK 18:15–16).
Dagiti Kapanunotan para iti Bukod a Panagadal iti Nasantuan a Kasuratan
Masapul nga isaganak ti pusok kadagiti agnanayon a napateg a bambanag ngem kadagiti bambanag iti daytoy a lubong.
Apay a kuna ti Dios ti “Nakunengl” iti nagaget, naballigian a lalaki a nangbangon iti dakkel a kamaligna ken pinunnona daytoy iti bungbunga dagiti nagbannoganna? (kitaen iti Lucas 12:16–21). Kadagitoy a kapitulo iti Lucas, isuro ti Mangisalakan dagiti sumagmamano a pangngarig a makatulong kadatayo a mangitalimudok iti panagkitatayo iti labes dagiti nailubongan para iti agnanayon. Sumagmamano kadagitoy a pangngarig ti nailista ditoy. Kasano a gupgopem ti mensahe ti tunggal pangngarig? Ania iti panagkunam a kayat ti Apo a masursuroyo?
-
Ti nakuneng a baknang a lalaki (Lucas 12:13–21)
-
Ti dakkel a pangrabii (Lucas 14:12–24)
-
Ti nayaw-awan nga anak (Lucas 15:11–32)
-
Ti di mapagtalkan a mayordomo (Lucas 16:1–12)
-
Ti nabaknang a lalaki ken ni Lazaro (Lucas 16:19–31)
Kitaen met iti Mateo 6:19–34; 2 Nephi 9:30; Doktrina ken Katulagan 25:10.
Agragrag-o ti Nailangitan nga Ama no masarakan dagita a napukaw.
Napanunotmo kadin no kasano ti marikna ti Nailangitan nga Ama maipapan kadagita a nagbasol wenno “napukaw”? Dinillaw dagiti Pariseo ken escriba ni Jesus iti pannakikaduana iti kakasta a tattao. Kas sungbat, insarita ni Jesus ti tallo a pangngarig, a masarakan iti Lucas 15—dagiti pangngarig maipapan iti napukaw a karnero, ti napukaw a sensilio, ken ti nayaw-awan nga anak.
Bayat ti panangbasam kadagitoy a pangngarig, ibilangmo ti panangaramid iti listaan dagiti pagpapadaan ken paggigiddiatan dagitoy. Kas pagarigan, mabalinmo a sapulen no ania ti napukaw ken apay, kasano a nasarakan daytoy, ken kasano ti reaksion dagiti tao idi nasarakan dagitoy. Ania dagiti adda a mensahe ni Jesus kadagiti “napukaw”—agraman kadagiti saan a mangipagarup nga isuda ket napukaw? Ania dagiti adda a mensahe ni Jesus kadagiti tao nga agsapsapul kadagiti napukaw?
Siempre, kanayon a nasaysayaat ti saan a napukaw. Maipanggep iti Lucas 15:7, insurat ni Elder James E. Talmage, “Awan ti panangikalintegan para iti opinion a ti maysa a nagbabawi a managbasol ket maikkan iti ad-adda nga importansia ngem iti nalinteg a kararua a nangsupring iti basol” (Jesus the Christ [1916], 461). Nupay kasta, agbasoltayo amin ket kasapulan ti pannakaispal, ken ti makaliwliwa a mensahe dagiti pangngarig ti Mangisalakan ket makapagbabawi ti tunggal maysa kadatayo ken makapagsubli iti kinalinteg, gapu ta tarigagayan ti Dios a nasken nga awan ti mapukaw uray maysa a kararua.
Kitaen met iti Doktrina ken Katulagan 18:10–16; Jeffrey R. Holland, “The Other Prodigal,” Ensign, Mayo 2002, 62–64.
Ti Napukaw a Pedaso ti Pirak, ni James Tissot
Ania ti isursuro ni Cristo iti pangngarig maipapan iti mayordomo a di mapagtalkan?
Inlawlawag ni Elder James E. Talmage ti maysa nga adalen a masursurotayo manipud kadagiti pangngarig: “Agbalinkayo a napasnek; agsipud ta asidegen a mapasamak ti aldaw a mabalinyo nga usaren dagiti naindagaan a kinabaknangyo. Agsursurokayo uray manipud kadagiti ulbod ken dakes; no naannadda unay a mangipaay itikakaisuna a masakbayan a panunotenda, anianto ket kadakayon, a mamati iti agnanayon a masakbayan, mangipaay ngarud! No saanmo a nasursuro ti kinasirib ken kinaannad a mangusar iti ‘saan a pudno a kinabaknang,’ kasano a mapagtalkanka iti ad-adu pay a manayon a kinabaknang?” (Ni Jesus a Cristo, 464).
Ti panagyamanko kadagiti bendision ti mangiyasidegto nga ad-adda kaniak iti Dios.
No maysaka kadagiti sangapulo nga agkukutel, iti panagkunam agsublika ngata tapno agyaman iti Mangisalakan? Ania dagiti nayon a bendision a naawat ti managyaman nga agkukutel gapu iti panagyamanna? Kasano a naespirituan nga apektuannaka ti panangipeksa iti panagyaman? Mabalin a pakairanudam a mangirugi iti panagsurat no ania dagiti pagyamanam iti maysa a journal, kas inladawan ni Presidente Henry B. Eyring iti mensahena iti “O Remember, Remember” (Ensign wenno Liahona, Nob. 2007, 66–69).
Ni Jesucristo ti Panagungar ken ti Biag.
Ti milagro ti panangpagungar ken ni Lazaro manipud kadagiti natay ket maysa a nabileg ken di mailibak a pammaneknek a ni Jesus ket pudno nga ti Anak ti Dios ken ti naikari a Mesias. Ania dagiti balikas, ragup dagiti balikas, wenno detalye iti Juan 11:1–46 a tapno mapapigsa tipammatiyo a ni Jesucristo “ti panagungar, ken ti biag”? Kasano a maimpluensiaan daytoy a pannakaammo ti biagmo ken dagiti pilim?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a singasing:
Maawatan ngata dagiti miembro ti pamiliam no aniao ti rikna ti mapukawan iti maysa a banag—wenno ti mapukaw? No pagsasaritaan ti maipapan kadagiti padasda ket mangirugi iti panaglilinnawag maipapan kadagiti pangngarig maipapan ti napukaw a karnero ken ti napukaw a sensilio. Wenno mabalinyo ti agay-ayam ti maysa nga ay-ayam a paglemmengen ti maysa a tao ken padasen dagiti dadduma pay a miembro ti pamilia timangsapul kenkuana. Kasano a makatulong kadatayo daytoy nga aktibidad a mangawat kadagitoy a pangngarig?
Kasanotayo a makapagbalin a kas iti ama iti daytoy nga estoria no addaantayo kadagiti ipatpateg a napukaw? Ania ti masursurotayo manipud iti padas ti in-inauna nga anak a makatulong kadatayo nga ad-adda nga agbalin a kas ken Cristo? Iti ania a wagwagas a maipada ti ama iti daytoy a pangngarig iti Nailangitan nga Amatayo?
Tapno makatulong kadagiti miembro ti pamilia a mangyaplikar iti pakaammuan maipapan iti sangapulo nga agkukutel, mabalinyo nga awisen ida nga agsurat kadagiti nalimed a surat ti panagyaman ket ikabil dagitoy iti intero a balay. Mabalin pay nga aggigiddan a kantaenyo ti “Count Your Blessings,” Hymns, no. 241, ket paglilinnawagan dagiti bendision a naawat ti pamiliam.
Mabalin a buyaen dagiti miembro ti pamilia ti video a “Lazarus Is Raised from the Dead” (LDS.org) ken mangibinglay kadagiti pammaneknekda maipapan ken ni Jesucristo.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Agusar kadagiti estoria ken pagarigan a mangisuro kadagiti pagbatayan ti ebanghelio Masansan a mangisuro ti Mangisalakan maipapan kadagiti pagbatayan ti ebanghelio babaen ti panangusar kadagiti estoria ken pangngarig. Mangpanunot kadagiti pagarigan ken estoria manipud iti bukodmo a biag a makapagbalin kadagitoy a pagbatayan ti ebanghelio para iti pamiliam (kitaen iti Panangisuro iti Wagas ti Mangisalakan, 22).
Sadino ti Ayan Dagiti Siam, ni Liz Lemon Swindle