“Mayo 20–26. Mateo 21–23; Marcos 11; Lucas 19–20; Juan 12: ‘Adtoy, Umayen ti Ariyo” Umaykayo, Sumurot kaniak—Para kadagiti Indibidual ken Pamilia: Baro a Tulag 2019 (2019)
“Mayo 20–26. Mateo 21–23; Marcos 11; Lucas 19–20; Juan 12,” Umaykayo, Sumurot Kaniak—Para kadagiti Indibidual ken Pamilia: 2019
Ni Zaqueoe iti Kayo ti Sikamoro, ni James Tissot
Mayo 20–26
Mateo 21–23; Marcos 11; Lucas 19–20; Juan 12
“Adtoy, Umayen ti Ariyo”
Sakbay ti panangbasam kadagiti kapanunotan iti daytoy a balabala, basaem ti Mateo 21–23; Marcos 11; Lucas 19–20; ken Juan 12. Isuratmo dagiti impresion a mabalinmo nga ibinglay iti pamiliam wenno kadagiti klasem iti Simbaan.
Suratmo Dagiti Impresionmo
Nabisinan ti Mangisalakan kalpasan ti panagbaniagana manipud iti Betania agingga iti Jerusalem, ket maysa a kayo ti higos iti adayo ti kasla maysa a pagtaudan ti taraon. Ngem idi asitgan ni Jesus ti kayo, nakitana a saan a nagbunga daytoy (kitaen iti Mateo 21:17–20; Marcos 11:12–14, 20). Iti kasta, maipada ti kayo ti higos kadagiti managinsisingpet a dadaulo ti relihion iti Jerusalem: dagiti ubbaw a pannursuroda ken ti akinruar a panangiladawanda iti kinasanto ket saan a mangted iti naespirituan a pannakataraon. Impakita dagiti Pariseo ken escriba a tungtungpalenda dagiti adu a bilin ngem nalibtawanda dagiti dua a kaindaklanan a bilin: ayatenyo ti Dios ken ayatenyo ti padayo a tao a kas iti bagiyo (kitaen iti Mateo 22:34–40; 23:23).
Iti kasupadina, adu a tao ti nangrugi a nakailasin iti nasayaat a bunga kadagiti pannursuro ni Jesus. Idi simmangpet iti Jerusalem, sinaraboda Isuna ket inwagaywayda dagiti sanga a naputed manipud kadagiti kayo a mangwada Iti dalanna, nga agragragsakda ta iti kamaudiananna, a kas kuna ti padto idi ugma “Ti Arim umay kenka” (Zacarias 9:9). Bayat ti panagbasam iti daytoy a lawas, panunotem dagiti bunga dagiti pannursuro ken pangsubbot a sakripisio ti Mangisalakan iti biagmo ken no kasano a makaisangbayka “iti adu a bunga” (Juan 12:24).
Dagiti Kapanunotan para iti Bukod a Panagadal iti Nasantuan a Kasuratan
Mateo 23; Lucas 19:1–10; 20:45–47
Saan a mangukom ti Apo babaen iti akinruar a langa ngem babaen kadagiti tarigagay ti puso.
Idi panawen ni Jesus, adu a tattao ti nangipagarup a dagiti publikano, wenno dagiti agsingsingir ti buis, ket saan a mapagtalkan, ken tinaktakawanda dagiti tattao. Agsipud ta ni Zaqueo, ti pangulo a publikano, ket nabaknang, mabalin nga isu koma ti ad-adda nga inatapda. Ngem nakaturong ti imatang ni Jesus iti puso ni Zaqueo. Ania ti kayat nga ipalgak ti Lucas 19:1–10 maipapan iti panagpuspuso ni Zaqueo? Mabalinmo nga isurat dagiti balikas kadagitoy a bersikulo a mangiladawan no ania ti inaramid ni Zaqueo a mangipakita iti kinapasnekna iti Mangisalakan. Ania dagiti tarigagay ti pusom? Ania ti ar-aramidem nga agkalikagum a mangsapul iti Apo a kas ken ni Zaqueo?
Ti pannakipulapol ti Mangisalakan kadagiti escriba ken Pariseo ket mangbukel iti makaay-ayo a pagsupadian iti pannakipulapolna ken ni Zaqueo. Kas inlawlawag ni Presidente Dieter F. Uchtdorf, “nagtalinaed ken ni [Jesus] ti nalinteg a pungtot a maibusor kadagiti escriba, Pariseo ken Sadusio—dagita aginkukuna a nalintegda tapno magun-odda ti pammadayaw, impluensia, ken kinabaknang ti lubong, idinto nga idaddadanesda dagiti tao a rumbeng koma a bendisionanda”(“On Being Genuine,”Ensign wenno Liahona, Mayo 2015, 81).
Iti Mateo 23, nagusar ti Mangisalakan kadagiti sumagmamano a metapora a pangiladawan iti panaginsisingpet. Ibilangmo ti panangmarka wenno panangilista kadagitoy a metapora ket isurat no ania ti isuro dagitoy maipapan iti panaginsisingpet. Ania ti sabali makaparegta kenka nga aramidem gapu kadagiti pannursuro ti Mangisalakan?
Kitaen met iti Doktrina ken Katulagan 88:62–63; 137:9
Mateo 21:1–11; Marcos 11:1–11; Lucas 19:29–44; Juan 12:12–16
Ni Jesuscristo ti Arik.
Ti pakaammuan iti Mateo 21:1–11; Marcos 11:1–11; Lucas 19:29–44; ken Juan 12:12–16 ket mangiladawan ti rugi ti maudi a lawas ti biag ti Mangisalakan, agraman ti naballigian nga iseserrekna iti Jerusalem. Impakita dagiti nakabigbig Kenkuana a kas Arida ti kinapasnekda babaen ti panangsapsapoda Kenkuana (kitaen iti Juan 12:1–8), nagilatagda kadagiti lupot ken sangsanga ti palma iti dalanna nga agturong iti Jerusalem, ken nagdirdir-ida iti panagdaydayaw. Ibilangmo no kasano a mangpauneg iti pannakaawatmo dagiti sumaganad a resources kadagiti pasamak a nangrugi iti maudi a lawas ti biag ti Mangisalakan.
-
Ti nagkauna a pagwadan ti pannakalana ti maysa nga ari: 2 Ar-ari 9:1–13
-
Iti nagkauna a padto ti naballigian nga iseserrek: Zacarias 9:9
-
Ti kaipapanan ti balikas a hosana:Pangiwanwan iti Nasantuan a Kasuratan, “Hosana”
-
Dagiti padto maipapan iti no kasano nga umayto manen ti Mangisalakan: Apocalipsis 7:9–10; 19:11–16
Kasano ti panangawatmo iti Mangisalakan a kas Apo ken Arim?
Kitaen met “The Lord’s Triumphal Entry into Jerusalem” (video, LDS.org).
Ti dua a naindaklan a bilin ket ti agayat iti Dios ken agayat iti dadduma kas iti bagik.
No mariknam ti pannakatalipupos bayat ti panagkagumaanmo a mangsurot ken niJesucristo, dagiti balikas ti Mangisalakan iti maestro ti linteg Mateo 22 ket makatulong kenka a mangpalag-an ken mangipamaysa iti kinadisipulom. Ditoy ti maysa a wagas tapno maaramid daytoy: Agaramidka iti listaan ti sumagmamano kadagiti bilin ti Apo. Kasano a mainaig ti tunggal banag iti listaam iti dua a naindaklan a bilin? Kasano a makatulong kenka ti panangipamaysam iti dua a naindaklan a bilin a mangtungpal kadagiti dadduma pay a bilin?
Ania dagiti filacteria?
Dagiti filacteria ket babassit a lalat a kahon a naglaon iti napirsapirsay a a kudil ti ayup a nakaisuratan dagiti binatog iti nasantuan a kasuratan. Isilpo dagiti Judio dagitoy a babassit a kahon iti lalat a begkes ket igalotda iti lawlaw ti mugingda wenno takiag kas maysa a wagas a panglagip kadagiti bilin (kitaen iti Deuteronomio 6:6–8). Gapu iti kinatangig, nagusar dagiti Pariseo iti dadakkel a filacteria tapno makita ti tunggal maysa no kasano ti kadakkel ti panagayatda iti balikas ti Dios.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a singasing:
Kasano nga impakita ni Maria ti ayatna iti Mangisalakan? Kasano nga ipakitatayo ti ayattayo para Kenkuana?
Panangbuggo kadagiti Saka ni Jesus, ni Brian
Kasano nga ipakitatayo ti respeto kadagiti dadduma bayat ti panangipeksa wenno panangsalaknibda kadagiti pammatida iti relihion? Ania dagiti bunga ti kagimongan a mangupay kadatayo no dadduma iti panaangyebkas wenno panangsalaknib iti pammatitayo ken ni Cristo? Para kadagiti pagarigan dagiti tattao a saan a sumuko iti social pressure, kitaen iti Daniel 1:3–20; 3; 6; Juan 7:45–53; 9:1–38; ken Mosiah 17:1–4.
Kasano nga ipakitatayo ti panagrukbab ken panagdayaw iti templo? Ania ti mabalin nga “ikkatentayo” iti biagtayo tapno mapagtalinaed ti panangpadastayo iti templo kas maysa a “balay a pagkararagan” (Mateo 21:12–13) ken maysa a lugar ti naespirituan a pannakaagas? Ibilangyo ti panangkanta iti “I Love to See the Temple,” Children’s Songbook, 95.
Ania dagiti adalen manipud iti pangngarig maipapan iti lalaki nga addaan iti dua nga annak a lallaki a makatulong iti pamiliam? Kas pagarigan, mabalinmo nga usaren ti estoria a mangilawlawag ti kinapateg ti napudno a panagtungpal ken panagbabawi. Nalabit a makaisurat ti pamiliam iti iskrip a mangidrama ti pangngarig ket agsusublatda a mangyakem kadagiti nadumaduma a papel nga akmen.
Ania dagiti sumagmamano a “kukua ti Dios” iti (bersikulo 21) a nasken nga itedtayo Kenkuana?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Usarem ti arte a mangiraman kadagiti miembro ti pamilia. “Ti Libro ti Arte ti Ebanghelio ken iti LDS Media Library iti LDS.org ket naglaon kadagiti adu a ladawan ken video a makatulong [iti pamiliam] a mangiladawan iti panunotda kadagiti konsepto wenno pasamak” (Panangisuro iti Wagas ti Mangisalakan, 22).. Kas pagarigan, ti naipinta a ladawan a naisurot iti daytoy a balabala ket makatulong a mangted biag ti estoria maipapan iti iseserrek ni Cristo iti Jerusalem.
Naballigian nga Iseserrek, ni Walter Rane