“Mayo 27–Hunio 2. Joseph Smith—Mateo 1; Mateo 25; Marcos 12–13; Lucas 21: ‘Umayto ti Anak ti Tao’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Mayo 27–Hunio 2. Joseph Smith—Mateo 1; Mateo 25; Marcos 12–13 Lucas 21,” Umaykayo, Sumurot Kaniak—Para kadagiti Indibidual ken Pamilia: 2019
Ti Maikadua a Yaay, ni Harry Anderson
Mayo 27–Hunio 2
Joseph Smith—Mateo 1; Mateo 25; Marcos 12–13; Lucas 21
“Umayto ti Anak ti Tao”
Bayat ti panangibasam iti Joseph Smith—Mateo 1; Mateo 25; Marcos 12–1; ken Lucas 21, mabalin a saludsodem, “Ania dagiti mensahe kadagitoy a kapitulo ti para kaniak? para iti pamiliak? para iti takemko?”
Suratmo Dagiti Impresionmo
Mabalin a nakita dagiti disipulo ni Jesus a nakaddadanag ti padtona: ti nabisked a templo ti Jerusalem, ti sentro ti espiritual ken kulrura dagiti tattao a Judio, ket naan-anay a madadaelto nga “awan[to]” ti mabati . …uray ti bato a naituon ti maysa a bato. Gagangay a tinarigagayan dagiti disipulo ti mangammo iti ad-adu pay. Dinamagda, “Inton kaano a mapasamak dagitoy a banag?”. “Ket ania ti pagilasinan ti yaaymo?” (Joseph Smith—Mateo1:2–4). Naipalgak dagiti sungbat ti Mangisalakan a ti Dakkel a a Pannakadadael iti Jerusalem—maysa a padto a naipatungpal idi AD 70—ket bassit laeng no maidasig kadagiti pagilasinan ti yaayna kadagiti maudi nga al-aldaw. Dagiti banag a kasla natibtibker ngem iti templo iti Jerusalem ket mangipaneknek a temporario—ti init, ti bulan, dagiti bituen, dagiti pagilian, ken ti baybay. Ta uray pay “madayyegto dagiti bileg ti langit” (Joseph Smith—Mateo 1:33). No naespirituan nga ammotayo, matulongannatayo daytoy a pannakaburibor nga agtalek iti maysa a banag a napaypayso a manayon. Kas inkari ni Jesus, “mapukawto ti langit ken ti daga; saanto pay la a mapukaw dagiti balikasko. ... Ket asino man a mangipateg iti balikasko, saanto a maallilaw” (Joseph Smith—Mateo 1:35, 37).
Dagiti Kapanunotan para iti Bukod a Panagadal iti Nasantuan a Kasuratan
Joseph Smith—Mateo
Ania ti Joseph Smith—Mateo?
Ti Joseph Smith—Mateo, a masarakan iti Perlas a Kapatgan, ket maysa nga adaw manipud iti Patarus ni Joseph Smith iti Biblia. Naglaon daytoy kadagiti pannakabalbaliw ti maudi a bersikulo ti Mateo 23 ken ti amin a Mateo 24 (kitaen iti Pangiwanwan iti Nasantuan a Kasuratan, “Patarus ni Joseph Smith”). Dagiti naparegta a pannakabalbaliw ti Joseph Smith ti mangisubli kadagiti napateg a kinapudno a napukaw.. Dagiti bersikulo 12–21 ni Joseph Smith—Mateo ket maitudo iti pannakadadael ti Jerusalem idi un-unana; dagiti bersikulo 21–55 naglaon kadagiti padto maipapan kadagiti maudi nga aldaw.
Joseph Smith—Mateo 1:21–37; Marcos 13:21–37; Lucas 21:25–38
Dagiti padto maipapan iti Maikadua a Yaay ti Mangisalakan ti makatulong kaniak a mangsango iti masakbayan nga addaan iti pammati.
Mabalin a nakaddadanag ti mangbasa iti maipapan kadagiti paspasamak a maiturong iti Maikadua a Yaay ti Mangisalakan. Ngem idi impadto ni Jesus dagitoy a pasamak, imbagana kadagiti disipulona a “saankayo a mariribukan” (Joseph Smith—Mateo 1:23). Kasano a “saan[kayo] a mariribukan” no mangngegyo ti maipapan kadagiti ginggined, gubat, pangallilaw, ken panagbisin? Panunotem maipapan iti daytoy a saludsod bayat ti panangbasam kadagitoy a bersikulo. Markaam wenno isuratmo ti ania man a makapanamnama a balakad a masarakam.
Kitaen met iti Doktrina ken Katulagan 29:14–21; 38:30; 45:16–52; 88:86–94; “Second Coming of Jesus Christ,” Gospel Topics, topics.lds.org.
Joseph Smith—Mateo 1:26–27, 38–55; Mateo 25:1–13; Lucas 21:29–36
Nasken a nakasaganaak a kanayon para iti Maikadua a Yaay ti Mangisalakan
Saan nga impalgak ti Dios “ti aldaw wenno oras a yaay ti Anak ti tao” (Mateo 25:13). Ngem dina kayat dayta nga aldaw nga umay kadatayo a “kellaat” (Lucas 21:34), isu a nangted kadatayo iti balakad maipapan iti no kasano ti agsagana.
Bayat ti panangbasam kadagitoy a bersikulo, mangilasin kadagiti pangngarig ken dadduma pay a panangidilig nga inusar ti Mangisalakan a pangisuro kadatayo a kanayon a nakasagana para Iti Maikadua a Yaayna. Ania ti masursurom manipud kadakuada? Ania ti nakaparegtaam nga aramidem?
Namnamaen ti Nailangitan nga Ama nga usarek a nainsiriban dagiti sagutna.
Iti panawen ti Mangisalakan, ti maysa a “talento” ket maitudo iti kuarta. Ngem maisuro kadatayo ti pangngarig ti Apo maipapan kadagiti talento maipapan ti no kasano ti kayatna a panangusartayo iti ania man kadagiti bendision nga Intedna kadatayo. Namnamaennatayo ti Apo a mangpasayaat iti no ania ti intedna kadatayo. Bayat ti panangbasam iti daytoy a pangngarig, agaramidka iti listaan ti sumagmamano kadagiti bendision ken gundaway nga inted ti Nailangitan nga Ama kenka. Ania ti namnamaenna kenka a mangaramid kadagitoy a bendision? Kasano a mausarmo dagitoy a sagut nga ad-adda a nainsiriban? Kasano a napasayaatmo dagiti talentom bayat ti panagserbim iti Apo?
No agserbiak kadagiti dadduma, agserserbiak iti Dios.
No pinanunotmon no kasano a kednganto ti Apo ti biagmo, basaen ti pangngarig maipapan iti karnero ken dagiti kalding. Ania ti kaskenan iti amin no agtakderkayo iti sanguanan ni Cristo?
Kitaen met iti Mosiah 2:17.
Agtultuloyto ngata dagiti kallaysa kalpasan ti Panagungar?
Masursurotayo manipud iti kabaruanan a paltiing a ti palawag ni Jesus “Inton agungardanto manipud kadagiti natay, saanda nga agassawa, wenno napagasawa” ket maitudo kadagiti saan a simrek iti katulagan ti celestial a kallaysa (kitaen iti DkK 132:15–16). Iti celestial a kallaysa a ti “maysa a lalaki ket [mangikallaysa] iti maysa a babai … babaen ti baro ken agnanayon a katulagan,” ket agpatingganto iti “agnanayon nga awan inggana” no napudno dagiti agassawa kadagiti katulaganda (DkK 132:19).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy dagiti sumagmamano a singasing:
Tapno matulongan ti pamiliam nga agsukisok iti daytoy a kapitulo, awisem ida a mangsapul kadagiti pannursuro ti Mangisalakan maipapan iti no kasano a makapagsaganatayo para iti Maikadua a Yaayna (kitaen, kas pagarigan, kadagiti bersikulo 22–23, 29–30, 37, 46–48). Ania ti maaramid ti pamiliam tapno masurot daytoy a balakad?
Ania ti kayat a sawen ti mangipateg iti balikas ti Dios? Kasano a maaramidtayo daytoy kas maysa a pamilia? Kasano a ti panangaramid iti kasta ket makatulong kadatayo a mangliklik iti pannakaallilaw?
Mabalinmo nga usaren ti ladawan dagiti sangapulo a babbalasang a nairagpin iti daytoy a balabala a mangilawlawag iti Mateo 25:1–13. Ania dagiti detalye a makita dagiti miembro ti pamilia iti ladawan a nailadawan kadagitoy a bersikulo?
Maragsakan ngata dagiti miembro ti pamilia nga agsapul iti lawlaw ti balay kadagiti papel a tedted ti lana nga inlemmengmo? Mabalin nga iragpinmo dagiti tedted a mangibagi kadagiti banag a mabalin nga aramiden dagiti miembro ti pamilia a mangpapigsa kadagiti pammaneknekda ken makapagsagana para iti Maikadua a Yaay, kas kadagiti nasantuan a kasuratan, kawes iti simbaan, wenno maysa a ladawan ti templo.
Ania ti masursuro dagiti miembro ti pamiliam manipud iti pagwadan ti balo a babai? Ania ti insuro ti Mangisalakan kadagiti disipulona maipapan kadagiti daton ? Mangipakita iti papel ti donasion ti apagkapullo, ken paglilinnawaganyo dagiti daton ti pamiliam iti Apo ken no kasano a makatulong dagitoy a daton a mangbangon iti pagarian ti Dios. Adda kadi daton ti pamiliam a saan a mabalin a maisurat iti papel ti apagkapullo?
Ti Sentimo ti Balo a Babai ni Sandra Rast
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Isaganam dagiti aglawlawmo. “Nalaus a makaapekto dagiti aglawlawtayo iti kabaelantayo nga agsursuro ken mangrikna iti kinapudno” (Panangisuro iti Wagas ti Mangisalakan, 15). Padasem ti mangsapul iti maysa a lugar a pagadalan kadagiti nasantuan a kasuratan a mangawisto iti impluensia ti Espiritu Santo. Mabalin pay a mangawis iti Espiritu ti makaparegta a musika ken dagiti ladawan.
Lima Kadakuada ti Masirib, ni Walter Rane