“Hunio 17–23. Mateo 27; Marcos 15; Lucas 23; Juan 19: ‘Natungpalen’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019(2019)
“Hunio 17–23. Mateo 27; Marcos15; Lucas 23; Juan 19,” Umaykayo, Sumurot Kaniak—Para kadagiti Indibidual ken Pamilia: 2019
Ecce Homo, ni Antonio Ciseri
Hunio 17–23
Mateo 27; Marcos 15; Lucas 23; Juan 19
“Natungpalen”
Mateo 27; Marcos 15; Lucas 23; ken Juan 19 ket mangiraman kadagiti pannakailadawan dagiti maudi nga oras ti mortal a biag ti Mangisalakan. Ikalikagummo a riknaen ti ayatna para kenka bayat ti panagadalmo ti maipapan iti sakripisio ken ipapatayna.
Suratmo Dagiti Impresionmo
Iti tunggal balikas ken aramid ,impagwadan ni Jesucristo ti natarnaw nga ayat—nga inawagan ni Apostol Pablo iti panagayat iti pada a tao (kitaen iti 1 taga Corinto 13). Awanen ti panawen a nalawlawag pay ngem daytoy bayat dagidi maudi nga oras ti mortal a biag ti Mangisalakan. Ti nadayaw a kinaulimekna iti sanguanan dagiti palso a pammabasol ket nangipakita nga Isu ket “saan a nalaka nga agluksaw” (1 Taga Corinto 13:5). Ti kinatallugodna nga agtulnog iti pannakasaplit, pannakalalais, ken pannakailansana iti krus—bayat ti pananglappedna iti pannakabalinna a mangigibus kadagiti pammarparigat Kenkuana —nangipakita nga Isu ket “managitured” ken “ituredna ti amin” (1 Taga Corinto 13:4, 7). Ti kinaasina iti Inana ken ti asina kadagiti nangilansa Kenkuana—uray pay kabayatan ti awan kapadana a panagsagabana—nangipakita nga Isu ket “saan nga agimbubukodan” (1 Taga Corinto 13:5). Kadagiti maudi a kanitona iti daga, inar-aramid ni Jesus no ti ania ti inaramidnan iti unos ti mortal a panagministrona—a nangisursuro babaen ti panangipakitana kadatayo. Kinaagpaysona, ti panagayat iti pada a tao ket isu ti “nadalus nga ayat ni Cristo” (Moroni 7:47).
Dagiti Kapanunotan para iti Bukod a Panagadal iti Nasantuan a Kasuratan
Mateo 27; Marcos 15; Lucas 23; Juan 19
Ti kinatallugod ni Cristo nga agsagaba ti mangipakita iti ayatna para iti Ama ken para kadatayo amin.
Nupay adda pannakabalin ti Mangisalakan a mangayab kadagiti “legion dagiti anghel” (Mateo 26:53), sitatallugod a pinilina ti agibtur kadagiti di nainkalintegan a pannubok, naranggas a pananglalais, ken saan a mailadawan a saem ti bagi. Apay nga inaramidna daytoy? “Gapu iti naayat a panangngaasina,” pinaneknekan ni Nephi, “ken ti naunday a panagituredna nga agpaay kadagiti annak ti tattao” (1 Nephi 19:9).
Mabalinmo a rugian ti panagadalmo kadagiti maudi nga oras ti Mangisalakan babaen ti panangbasam iti 1 Nephi 19:9. Sadino iti Mateo 27; Marcos 15; Lucas 23; ken Juan 19 a masarakam kadagiti pagarigan ti tunggal banag a kinuna ni Nephi a sagabaen ni Jesus?
“Kinedngan[da] isuna a kas maysa a banag nga awan kaes-eskanna”
“Sinaplitda isuna”
“Minaloda isuna”
“Tinupraanda isuna”
Ania kadagitoy a binatog ti mangtulong kenka a mangrikna iti “naayat a panangngaasi” ti Nailangitan nga Ama ken ni Jesus kenka? Ania kadagitoy a kababalin nga impakita ti Mangisalakan a nakaparegtaam a naan-anay a sumayaat?
Kitaen met iti “Jesus Is Condemned before Pilate” ken “Jesus Is Scourged and Crucified” (video, LDS.org).
Mateo 27:27–49, 54; Marcos 15:16–32; Lucas 23:11, 35–39; Juan 19:1–5
Saan koma a mangpakapsut iti pammatik ti pannakalalais ti kinapudno ti Dios.
Idinto a naibturan ni Jesus ti pannakalalais iti unos ti panagministrona, ad-adda a kimmaro pay ti panagibturna kabayatan ti pannakasaplit ken pannakailansana iti Krus. Ngem daytoy a pannakalalais ket saan a makapagbalbaliw ti kinapudno a : ni Jesus ti Anak ti Dios. Bayat ti panangbasam maipapan iti pannakaibabain nga inibturan ni Jesus, panunotem ti maipapan iti oposision ken pananglais iti a pakaipaspasanguan ti aramidna iti agdama. Ania dagiti nalawag a pannakaammo ken pannakaawat [insights] a a gun-odem maipanggep iti panagandur iti oposision? Ania ti nakaawisan ti riknam maipanggep iti balikas ti centurion iti Mateo 27:54?
Binaybay-an kadi ti Nailangitan nga Ama ni Jesus iti krus?
Indiaya ni Elder Jeffrey R. Holland ti sumaganad a nalawag a pannakaammo ken pannakaawat [insight]: “Paneknekak … a saan a binaybay-an ti awan pagkuranganna nga Ama ti Anakna iti dayta nga oras. … Nupay kasta, tapno ti kangatuan a sakripisio ti Anakna ket naan-anay a makumpleto kas iti naaramid a naan-anay nga agmaymaysa, apagapaman nga inikkat ti Ama ti panangliwliwa ti Espirituna manipud ken ni Jesus, ti suporta ti personal a presensiana. ... Tapno agbalin ti Pannubbot [Ti Mangisalakan] nga awan patinggana ken agnanayon, masapul a mariknana no kasano ti matay saan laeng nga iti bagi no di ket iti espiritu, tapno marikna no kasano ti mapanawan iti nadiosan nga Espiritu, a mangpanaw iti maysa a makarikna iti naan-anay, nakaay-ay-ay, nakakaupay a panagmaymaysa” (“None Were with Him,” Ensign wenno Liahona, Mayo 2009, 87–88).
Ti Mangisalakan ti pagwadantayo iti pannakapakawan.
Kasano ti mariknam no basaem dagiti balikas ti Mangisalakan iti Lucas 23:34? (kitaen iti nalawag a pannakaammo ken pannakaawat [insight] a naited iti Patarus ni Joseph Smith iti footnote c). Maipanggep kadagiti balikas ti Mangisalakan, insuro ni Presidente Henry B. Eyring a: “Nasken a pakawanentayo ken awan dakes a pananggandattayo kadagiti mangpaspasakit kadatayo. Inpakita ti Mangisalakan ti pagwadan manipud iti krus. … Saantayo nga ammo ti puspuso dagiti mangpaspasakit kadatayo” (“That We May Be One,”Ensign, Mayo 1998, 68). Kasano a matulungannaka daytoy a bersikulo no mariribukanka a mangpakawan iti maysa a tao?
Ania ti kaipapanan ti “paraiso” iti palawag ti Mangisalakan iti mannanakaw?
Kadagiti nasantuan a kasuratan, ti balikas a paraiso ket gagangay a kaipapananna ti “maysa a lugar nga adda talna ken ragsak iti lubong dagiti espiritu kalpasan daytoy a biag” — maysa a lugar a nailatang para kadagiti nalinteg. Insuro ni Propeta Joseph Smith a ti balikas a paraiso iti Lucas 23:43 “ket saan nga umno ti pannakaipatarusna; ti pudno a kinuna ti Apo ket kumaduanto Kenkuana ti mannanakaw iti lubong dagiti espiritu” (Napudno iti Pammati, 111; kitaen met iti Joseph Smith, Journal, Hunio 11, 1843, josephsmithpapers.org). Iti lubong dagiti espiritu, dumngegto ti mannanakaw iti pannakaikasaba ti ebanghelio.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a singasing:
Nupay personal nga am-ammo ni Judas ni Jesus, isu ket “timmallikud ken ni [Jesus], ket napasakitan gapu kadagiti balikasna” (Patarus ti Joseph Smith, Marcos 14:31 [iti Marcos 14:10, footnote a]). Ania ti mabalin a makaigapu kadagiti tao a kasla addaanda kadagiti napigsa a pammaneknek tapno tumallikudda iti Mangisalakan? Kasano a makapagtalinaedtayo a napudno ken ni Jesucristo?
Mateo 27:11–26; Marcos 15:1–15; Lucas 23:12–24; Juan 19:1–16
Apay nga inyawat ni Pilato ni Jesus a mailansa iti krus, uray pay ammona nga awan ti basol ni Jesus? Ania dagiti adalen a masursurotayo manipud iti padas ni Pilato maipanggep iti panangitakdertayo iti no ania ti ammotayo nga umno? Mabalin a makatulong para iti pamiliam ti panangyakem kadagiti buya a mangpalugod kadakuada a a mangitakder iti no ania ti umno.
“Ket rimmuar a sibabaklay iti krusna agingga iti … Golgota” (Juan 19:17).
Nalabit a mabalinmo a tudingan ti maysa wenno ad-adu pay kadagiti palawag nga inaramid ti Mangisalakan iti krus, a masarakan kadagitoy a bersikulo, iti tunggal miembro ti pamilia ken kiddawem kadakuada a mangibinglay no ania ti masursuroda maipapan iti Mangisalakan ken ti misionna.
Kasano a ti panangbasa maipanggep iti Pannakailansa iti krus ket nangpatibker kadagiti pammaneknektayo a ni Jesus ti “Anak ti Dios”?
Ania ti masursurotayo manipud kadagitoy a bersikulo maipanggep iti no kasano a nasken nga ayaten ken suportarantayo dagiti miembro ti pamilia?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Tuladen ti Biag ti Mangisalakan “Makatulong ti panangadal kadagiti wagas iti panangisuro ti Mangisalakan—dagiti pamay-an nga inusarna ken dagiti banag nga insaona. Ngem ti bileg ti Mangisalakan a mangisuro ken mangparegta kadagiti dadduma ket naggapu manipud … iti kita ti kinataona. Ti napaspasnek a panagkagumaanam nga agbiag a kas ken ni Jesuscristo, ad-adda a kabaelamto ti mangisuro a kas Kenkuana” (Panangisuro iti Wagas ti Mangisalakan, 13).
Ni Cristo iti Krus, ni Carl Heinrich Bloch