“Hunio 3–9. Juan 13–17: ‘Agtultuloykayo iti Ayatko” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Hunio 3–9. Juan 13–17,” Umaykayo, Sumurot Kaniak—Para kadagiti Indibidual ken Pamilia: 2019
Kas Pakalaglagipan Kaniak, ni Walter Rane
Hunio 3–9
Juan 13–17
“Agtultuloykayo iti Ayatko”
Bayat ti panangbasam kadagiti pannursuro ti Mangisalakan iti Juan 13–17, tulongannakanto ti Espiritu Santo a mangilasin kadagiti mensahe a para kenka. Isuratmo dagiti impresion a maawatmo.
Suratmo Dagiti Impresionmo
Ita awagantayo daytoy iti “Maudi a Pangrabii”, ngem saantayo nga ammo no naan-anay a naamiris dagiti disipulo ni Jesus, idi naguummongda para iti tinawen a fiesta ti Paskua, a daytoy ti maudi a pannakipanganda iti Maestroda sakbay ti ipapatayna. Nupay kasta, ammo ni Jesus, “a dimtengen ti orasna” (Juan 13:1). Asidegen a mapasarannanto ti panagsagaba iti Getsemani, ti pannakaliput ken panaglibak dagiti kasingedan a gagayyemna, ken ti nakatutuok nga ipapatay iti krus. Ngem iti baet dagitoy nga agur-uray iti sanguananna, impamaysa ni Jesus ket saan nga iti Bagina no di ket iti panagserbi kadagiti disipulona. Sipapakumbaba a nangbuggo kadagiti sakada. Insurona kadakuada ti maipapan iti ayat. Ket Impanamnamana kadakuada nga, iti maysa a kaipapanan, saannanto pulos panawan ida ket didanto pulos panawan Isuna. Nakasarak dagiti disipulo idi ken ita iti liwliwa kadagiti karina: “Dikayto baybay-an nga ul-ulila” (Juan 14:18). “No tungpalenyo dagiti bilbilinko, agtaengkayto iti ayatko” (Juan 15:10).
Dagiti Kapanunotan para iti Bukod a Panagadal iti Nasantuan a Kasuratan
Ipakitak ti ayatko para ken ni Jesucristo babaen ti panangtungpalko kadagiti bilinna nga agayat.
Insuro idin ni Jesus a dagiti dua a kadakkelan a bilin ket adda pannakainaigna iti ayat (kitaen iti Mateo 22:34–40). Ti panagtungpal iti daytoy a panangyunay-unay, ti ayat ti kangrunaan a tema kadagiti maudi a panangiwanwanna kadagiti Apostolna. Bayat ti panangbasam iti Juan 13–15, mabalinmo nga isurat wenno markaan ti tunggal pakaaramatan ti balikas nga ayat
Mabalin a madlawmo ti balikas a bilbilin ket masansan a naulit iti pannakikaduana iti balikas nga ayat kadagitoy a kapitulo. Ania ti masursurom maipapan iti pakainaigan ti ayat ken bilbilin manipud kadagiti pannursuro ti Mangisalakan? Ania dagiti dadduma pay a balikas a masarakam a masansan a maulit a kadua ti balikas nga ayat kadagitoy a kapitulo? Batay iti no ania ti nasursurom, ibilangmo nga isurat ti ababa a pakagupgopan dagiti pannursuro ti Mangisalakan maipapan iti ayat.
Kitaen met iti D. Todd Christofferson, “Abide in My Love,” Ensign wenno Liahona, Nob. 2016, 48–51.
Tulongannak ti Espiritu Santo a mangipatungpal iti panggepko kas maysa a disipulo ni Jesucristo.
Ammo ni Jesucristo nga asidegen a panawanna dagiti disipulona, ket ammona a kasapulanda iti naespirituan a suporta apaman a nakapanawen Isuna. Tapno matulonganna ida a makaawat no kasano nga awatenda daytoy a suporta, insurona ida maipapan iti Espiritu Santo. Ania ti masursurom maipapan kadagiti akem ti Espiritu Santo manipud kadagiti balikas ti Mangisalakan kadagiti sumaruno a bersikulo?
Apay a kinasapulan dagidi disipulo ti kastoy a kita ti tulong manipud iti Espiritu Santo? Kasano a naipatungpal ti Espiritu Santo dagitoy nga akem iti biagmo? Bayat ti panagtultuloymo a mangadal ti Baro a Tulag, sapulem dagiti wagas a nangbendisionan ti Espiritu Santo kadagiti disipulo ni Jesucristo. Kasano a naiduma ti biagmo no inawismo ti Espiritu Santo a mangimpluensia kenka iti napigpigsa pay?
Kitaen met iti Mosiah 3:19; 5:1–3; 3 Nephi 27:20; Moroni 8:25–26; 10:5; Doktrina ken Katulagan 11:12–14; Moises 6:61; “Holy Ghost,”Gospel Topics, topics.lds.org.
Bayat ti panagtalinaedko ken ni Cristo, mangisangbayakto iti nasayaat a bunga.
Ania ti kaipapanan ti “agtalinaed ken [Cristo]”? (Juan15:4). Ania a “bunga” ti mangipakita a naisilpoka iti puon ti ubas, a mangibagi ken ni Jesucristo?
Ibabaet ni Jesuscristo dagiti disipulona.
Dagiti balikas ni Jesus a naisurat iti Juan 17 ket maam-ammo a kas ti Pangibabaet a Kararag. Iti daytoy a kararag, inkararagan ni Jesus dagiti Apostolna ken “idawdawatanna met dagiti mamati [Kenkuana] gapu iti saoda” (Juan 17:20). Kayatna a sawen a nagkarkararag Isuna para kadakayo. Ania ti indawat ni Jesus manipud Iti Amana a para kadakayo ken dagiti dadduma pay a mamati?
Isuro pay daytoy a kararag dagiti nauneg, agnanayon a kinapudno. Ania dagiti kinapudno a masarakam bayat ti panangbasam iti daytoy?
Kasano a maymaysa ni Jesucristo ken ti Nailangitan nga Ama?
Iti kararagna iti Juan 17, inyunay-unay ni Jesus ti pannakikaykaysana iti Ama, ngem saan a kayat a sawen daytoy nga Isu ken ti Amana ket maymaysa ti kinataoda. Idi nagkararag ti Mangisalakan tapno agbalin dagiti disipulona a maymaysa “a kas”—wenno iti Isu met laeng a—Isu ken ti Amana ket maymaysa (Juan 17:22), saanna nga idawdawat ti kinamaymaysa ti kinatao dagiti disipulo. Ketdi, ti tarigagayna ket para kadakuada nga agragsak iti Isu met laeng a pannakikaykaysa nga adda Kenkuana iti Ama—naan-anay a panagkaykaysa ti panggep, puso, ken panunot.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a singasing:
Ania ti masursuro ti pamiliatayo manipud iti pagwadan ti Mangisalakan kadagitoy a bersikulo? Kadagiti ania a wagas a masurottayo ti pagwadanna?
Bayat ti panangilawlawagmo kadagiti pannursuro ti Mangisalakan maipapan iti ayat, ibilangmo pay dagitoy a balikas manipud ken ni Presidente Thomas S. Monson: “Iti agdama a lubong, awan ti natibker a pundasion ti ayat a kasapulan nga ad-adda pay ngem iti pagtaengan. Ken awanen ti nasken a pakasapulan pay ti lubong iti nasaysayaat a pagwadan kadayta a pundasion no di kadagiti pagtaengan dagiti Santo iti Ud-udina nga aldaw a namagbalin iti ayat a kangrunaan a paset ti biag ti pamiliada …. Ti ayat ti kangrunaan a kaipapanan ti ebanghelio, ti kataknengan a kababalin ti kararua ti tao” (“As I Have Loved You,” Ensign wenno Liahona, Peb. 2017, 4–5).
Mabalin a paggugusto dagiti miembro ti pamiliam nga agdrowing kadagiti ladawan wenno agsurat kadagiti papel a sinan-puso iti maysa a banag a magustuanda maipapan iti tunggal maysa. Mabalin nga ipanda dagitoy a sinan-puso iti lawlaw ti balay a kas pammalagip iti panangipakita iti ayat para iti tunggal maysa.
Mabalin a makaay-ayo ti mangbasa kadagitoy a bersikulo iti ruar nga abay ti puon ti ubas, ti kayo, wenno sabali pay a mula. Kasano a makatulong daytoy nga aktibidad kadagiti miembro ti pamiliam a nasaysayaat a makaawat kapannursuro ti Mangisalakan?
Insuro ni Jesus, “Siak ti ubas, dakayo dagiti sanga” (Juan 15:5).
Apay iti panagkunam a binallaagan ni Jesucristo dagiti disipulona iti pannakaidadanes? Kasano a maidaddadanes dagiti disipulo ni Jesucristo ita nga agdama? Kasano a makatulong kadatayo ti balakad ti Mangisalakan kadagitoy a bersikulo iti isasangotayo iti pannakaidadanes?
Kasano a pinarmek ni Cristo ti lubong? Kasano a nangisangbay kadatayo iti kappia ken liwliwa ti Pannubbotna? (kitaen met ti DkK 68:6).
Kasano a makapagbalin ti pamiliam nga ad-adda a nakaykaysa a kas iti panagkaykaysa ni Jesucristo ken ti Nailangitan nga Ama? Apay a kayat ti Apo nga agkaykaysatayo? (kitaen met ti DkK 38:27).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Usarem dagiti audio recording. Bayat ti panangisurom iti pamiliam kadagiti nasantuan a kasuratan, ibilangmo ti idedengngeg iti audio a bersion dagiti nasantuan a kasuratan, a masarakan iti LDS.org wenno ti Gospel Library app. Ti panagdengngeg iti Juan 13–17 ket mabalin aa naipangpangruna a nabileg gapu kadagitoy a kapitulo a naglaon iti adu a balikas ti Mangisalakan.
Ti Maestro nga Agserserbi, niDel Parson