“Hunio 24–30. Mateo 28; Marcos 16; Lucas 24; Juan 20– : ‘Nagungaren’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Hunio 24–30. Mateo 28; Marcos 16; Lucas 24; Juan 20–21,” Umaykayo, Sumurot Kaniak—Para kadagiti Indibidual ken Pamilia: 2019
Pakanem ti Karnerok, ni Kamille Corry
Hunio 24–30
Mateo 28; Marcos 16; Lucas 24; Juan 20–21
“Nagungaren”
Nainkararagan a basaem ti Mateo 28; Marcos 16; Lucas 24; ken Juan 20–21, a pampanunotem maipapan iti rag-o nga adda kenka gapu iti Panagungar ni Cristo. Utobem no kasano a maibinglaymo ti pammaneknekmo maipapan iti daytoy a pasamak kadagiti dadduma.
Suratmo Dagiti Impresionmo
Iti adu nga agpalpaliiw, ti ipapatay ni Jesus ti Nazaret ket mabalin a kasla kasupadi ti pagpatinggaan iti nakaskasdaaw a biag. Saan kadi a daytoy a tao ti nangpagungar ken ni Lazaro manipud kadagiti natay? Saanna kadi a nasarkedan dagiti madagdagullit a pammutbuteng a panagpatay dagiti Pariseo? Impakitana ti pannakabalinna a mangagas iti bulsek, agkukutel ken agkissiw. Mismo a dagiti angin ken baybay ket agtungpal Kenkuana. Ket adtoy Isuna a, nakabitin iti krus, a mangipakpakdaar iti, “Natungpalen” (Juan19:30). Mabalin nga adda napudno a pannakakasdaaw kadagiti manglalais a balikas “Insalakanna dagiti sabali; ti bagina saanna a mabalin nga isalakan” (Mateo 27:42). Ngem ammotayo a ti ipapatay ni Jesus ket saan a gibus ti estoria. Ammotayo a saan nga agbayag ti ulimek ti tanem ket ti panangisalakan nga aramid ni Cristo ket mangrugrugi pay laeng. Masarakan Isuna ita a saan “kadagiti natay” ngem kadagiti sibibiag (Lucas 24:5). Saan a mapaulimek dagiti pannursurona, ta ikasaba dagiti napudno a disipulona ti ebanghelio iti “amin a pagilian,” nga agtaltalek iti karina nga addanto Isuna “[kadakuada] nga agnanayon, agingga iti panungpalan ti lubong” (Mateo 28:19–20).
Dagiti Kapanunotan para iti Bukod a Panagadal iti Nasantuan a Kasuratan
Mateo 28; Marcos 16; Lucas 24; Juan 20
Gapu ta nagungar ni Cristo, agungarakto met.
Kadagitoy a binatog, mabasamto ti maipapan iti maysa kadagiti kapatgan a pasamak iti pakasaritaan ti sangkataw-an: ti Panagungar ni Jesucristo. Bayat ti panagbasam, ipapanmo a maysaka kadagiti tao a nangsaksi kadagiti pasamak a nailikmut iti Panagungar. Kasano ti mabalin a narikna dagitoy a saksi? Kasano ti riknam bayat ti panangbasam maipapan iti Panagungar ti Mangisalakan? Ibilangmo no kasano a naapektuannaka daytoy—ti pannirigam iti biag, dagiti pannakilangenmo kadagiti dadduma, ti pammatim ken ni Cristo, ken ti pammatim iti dadduma pay a kinapudno ti ebanghelio.
Kitaen met iti Pangiwanwan iti Nasantuan a Kasuratan, “Resurrection”; “Resurrection,” Gospel Topics, topics.lds.org.
Mabalintayo nga awisen ti Mangisalakan nga “agtalinaed kadatayo.”
Mabalin nga adda pagpadaan ti padas dagiti dua nga agdaldaliasat a disipulo a simmabat iti nangungar a Mangisalakan iti dalanyo iti kinadisipulo. Ania dagiti makitam a koneksion iti nagbaetan daytoy a pakaammuan ken dagiti padasmo kas maysa a pasurot ni Cristo? Kasano a makipagnaka Kenkuana ita ken mangawis Kenkuana nga “agbati” iti mabayag pay bassit? (Lucas 24:29). Kasano ti pannakailasinmo iti kaaddana iti biagmo? Iti ania a wagwagas a pinaneknekan ti Espiritu Santo ti kinadios ni Jesucristo kenka?
Addaan kadi iti bagi ni Jesucristo?
Babaen kadagiti pakaammuan maipapan iti panagparang ti nagungar nga Apo ken ni Maria Magdalena ken dagiti simmaruno ti pannakipulapolna kadagiti disipulona, masursurotayo a literal ken pisikal ti Panagungar ni Jesus. Addaan iti nagungar, naitan-ok a bagina, nagna, nagsao, ken nakipangan kadagiti pasurotna. Paneknekan pay dagiti dadduma a nasantuan a kasuratan a ni Jesucristo ket addaan iti bagi a nagtagilasag ken nagtagitulang: Taga-Filipos 3:20–21; 3 Nephi 11:13–15; Doktrina ken Katulagan 110:2–3; 130:1, 22.
“Nagasat dagiti saan a nakakita, ket namatida.”
Mabalin a narigat a patien a pudno ti maysa a banag no awan ti makita a pisikal a prueba. No dadduma mariknam kas ken ni Tomas, a nagkuna a, “No diak makita … diakto mamati” (Juan 20:25). Kas sungbat, kinuna ti Mangisalakan ken ni Thomas, “Nagasat dagiti saan a nakakita, ket namatida” (Juan 20:29). Kasano a naparaburanka iti panamatim kadagiti naespirituan a banag a saanmo a makita? Ania ti mangtulong kenka a maaddaan iti pammati iti Mangisalakan uray no dimo makita Isuna? Ania dagiti dadduma pay a kinapudno a patiem uray no awan iti pisikal a prueba? Kasano a maituloymo a patibkeren ti pammatim kadagiti “bambanag a di makita, ngem pudno”? (Alma 32:21; kitaen met iti Ether 12:6). Ibilangmo ti panangisurat iti maysa a journal kadagiti padas a nakatulong kenka a mamati ken ni Jesucristo, wenno ibinglaymo dagitoy iti maysa a tao nga am-ammom.
Inawagannak ti Mangisalakan a mangpakan kadagiti karnerona.
Mabalin a makaay-ayo nga idilig ti pannakipulapol ti Mangisalakan kadagiti Apostolna iti Juan 21 iumuna a gundaway a binilinna ida nga ibbatanda dagiti pagkalapda nga iket, a naisurat iti Lucas 5:1–11. Ania dagiti pagpapadaan ken paggigidiatan a masarakam? Ania dagiti nalawag a pannakammo ken pannakaawat [insights] maipapan iti kinadisipulo a masarakam?
Ibilangmo no kasano a mayaplikar kenka dagiti balikas ti Mangisalakan ken ni Pedro iti Juan 21:15–17. . Adda kadi ania man a banag a manglapped kenka manipud iti panagserbim kadagiti karnero ti Apo? Ania koma ti sungbatmo no saludsoden ti Apo kenka ti, “Ay-ayatennak kadi?” Utobem no kasano a maipakitam ti ayatmo para iti Apo.
Kitaen met iti Jeffrey R. Holland, “The First Great Commandment,” Ensign wenno Liahona, Nob. 2012, 83–85.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panangileppasmo a mangbasa kadagiti Ebanghelio iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno maingpaay kadagiti kasapulan ti pamiliam. Dagitoy ti sumagmamano a singasing:
Apay a dagiti balikas nga “awan ditoy: ta nagungaren” ti sumagmamano kadagiti kanamnamaan ken kapatgan a lbalikas a naisaon?
Bayat ti panangbasa ti pamiliam kadagitoy a kapitulo, ikasom dagiti tao a nakipulapol ken ni Jesus iti tunggal pakaammuan. Kas pagarigan, iti maysa a punto mabalin nga ipamaysam dagiti tao a nangsarungkar iti tanem ti Mangisalakan. Iti maysa pay a punto, mabalin a naannad nga adalem dagiti tignay dagiti Apostol wenno dagiti disipulo iti dalan nga agturong ti Emmaus
Kalsada nga agturong iti Emmaus, ni Jon McNaughton
Kas maysa a pamilia, paglilinnawagan ti aramid ni Cristo nga agdawdawat kadagiti Apostolna iti aramidenda. Kasano a makatulongtayo a mangipatungpal iti daytoy nga aramid? Makaibinglayka kadi iti maysa a panawen idi mariknam a ti “Apo tumultulong [kenka]’ a mangipatungpal kadagiti panggepna? (Marcos 16:20).
Ibilang ti panangbasa kadagitoy a bersikulo bayat ti aggigiddan a pannanganyo. Makainayon daytoy iti sumagmamano a kaipapanan kadagiti balikas ti Mangisalakan a “pakanem dagiti karnerok.” Maibatay iti no ania ti insuro ni Jesus maipapan iti karnero iti Baro a Tulag (kitaen, kas pagarigan, iti Mateo 9:35–3; 10:5–6; 25:31–46; Lucas 15:4–7; Juan 10:1–16), apay a ti panangpakan kadagiti karnero ket nasayaat a panangiladawan iti panangtaraon ken panangipateg kadagiti annak ti Dios? Ania ti isuro ti metapora maipapan iti no kasano ti marikna ti Nailangitan nga Ama ken ni Jesus maipapan kadatayo?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Agusar iti musika a mangawis iti Espiritu ken masursuruan iti doktrina Ti panagdengngeg wenno panangkanta kadagiti himno a kas iti “He Is Risen!” wenno “Christ the Lord Is Risen Today,” Hymns, num. 199, 200, ket makaawis iti Espiritu ken matulongannaka nga agsursuro maipapan iti Panagungar ti Mangisalakan.
Woman, Why Weepest Thou? by Simon Dewey