Pakanem Ti Karnerok, ni Kamille Corry

Hunio 24–30

Mateo 28; Marcos 16; Lucas 24; Juan 20–21

“Nagungaren Isuna”

Irugem ti panagsaganam babaen ti panangbasa iti Mateo 28; Marcos 16; Lucas 24; ken Juan 20–21. Umaykayo, Sumurot Kaniak—Para kadagiti Indibidual ken Pamilia ken daytoy a balabala mabalin a makatulong kenka a mangpili kadagiti pagbatayan kadagitoy a kapitulo a makapnek kadagiti ubbing.

Isuratyo Dagiti Impresionyo

Yawis ti Panagbibinninglay

Ti panangkita iti maysa a ladawan ket makatulong dagiti ubbing a manglagip kadagiti banag a nasursuroda iti pagtaengan wenno iti dadduma pay a kasasaad. Nalabit mabalinmo a mangipakita iti ladawan iti balabala ita a lawas iti Umayka, Surotennak—Para kadagiti Indibidual ken Pamilia ken kiddawen kadagiti ubbing nga ibinglayda no ania ti ammoda maipapan kadagiti estoria a naipakita iti ladawan.

Isuro ti Doktrina

Dagiti In-inaudi nga Ubbing

Mateo 28; Marcos 16; Lucas 24; Juan 20:1–23

Agbiagakto manen kalpasan a matayak, kas iti inaramid ni Jesus.

Ti Pannubbot ni Jesucristo, agraman ti Panagungarna, isu ti kapatgan a pasamak iti pakasaritaan, ken isu ti pundasion ti pammati ti Kristiano. Bayat ti panangbasam maipapan iti Panagungar, utobem no kasano a makatulongam dagiti ubbing a mangpapigsa iti pammatida ken ni Jesucristo.

Dagiti Mabalin nga Aktibidad

• Isalaysay ti estoria ti Panagungar ni Jesus iti bukodmo a balikas. Kiddawen kadagiti ubbing nga agsisinnublatda iti panangulit ti estoria kenka. Mabalin a tukoyem ti “Kapitulo 54: Nagungaren ni Jesus,” Dagiti Estoria iti Baro a Tulag, 139–44, wenno ti katupagna a video (LDS.org). Ilawlawag a idi natay ni Jesus, ti espirituna ket pinanawan ti bagina. Idi nagungar Isuna, ti espiritu ken bagina nagtiponda manen.

• Awisem ti adu kadagiti miembro iti ward nga agtignay a kas kadagiti soldado, dagiti anghel, Maria Magdalena, Pedro, Juan, dagiti disipulo, ken Tomas ken ibagam no ania ti nasaksianda kalpasan ti Panagungar ni Jesus.

• Ipakita ti video “Ania ti mapasamak kalpasan ti Ipapataytayo?” (LDS.org), ken ibagam ti maipapan iti maysa a tao nga ammom a natayen. Ibinglay ti pammaneknekmo nga agungarto amin nga tao iti maysa nga aldaw. Awisem dagiti ubbing a mangibinglay kadagiti pammaneknekda.

• Ibilang ti sangsangkamaysa nga kantaenyo ti “Talaga kadi a ni Jesus Nagbiag Manen?” ken “Inton Umay Manen Isuna,”Pagkantaan dagiti Ubbing, 64, 82. Kiddawen dagiti ubbing nga iladawan no ania ti marikna a makita ti nagungar a ni Jesus. Palubosam ida a mangibinglay kadagiti panunotda iti klase.

Juan 20:24–29

Kabaelak a maaddan iti pammati ken ni Jesucristo uray man a saanko makitkita Isuna.

Ibilang no kasano a matulongam dagiti ubbing a maawatan no ania ti pammati ken no kasano nga ipakitada iti pammati iti Mangisalakan.

Dagiti Mabalin nga Aktibidad

• Ipakita iti ladawan Ni Cristo nga Asasitganna ni Tomas(LDS.org) bayat ti panangsalaysaymo maipapan kadagiti padas ti Tomas iti Juan 20:24–29. Uliten ti estoria idi agangay iti leksion, ngem iti daytoy a gundaway kiddawen kadagiti ubbing a mangted iti sumagmamano kadagiti detalye.

• Ipakita iti maysa a kahon nga addaan iti maysa a banag iti uneg a saan a makitkita dagiti ubbing, ken iladawam ti banag kadagiti ubbing. Saludsodem kadakuada no mamatida no talaga nga adda dagitoy a banag iti uneg ti kahon ken apay. Kalpasanna ipakitam daytoy a banag, ken ilawlawagmo a ti pammati ket panangpatpati kadagiti banag a saantayo a makitkita. Ti kapatgan a pammati isu ti pammati ken ni Jesucristo.

Adtoy dagiti Imak, by Jeff Ward

Juan 21:15–17

Kabaelak nga ipakita ti ayatko ken Jesus babaen iti panangserbik kadagiti dadduma.

Kasano a maparegtam dagiti ubbing nga mangayat ken mangtulong kadagiti dadduma iti lawlawda?

Dagiti Mabalin nga Aktibidad

• Basaen ti Juan 21:15–17, wenno ipakita iti video “Pakanem ti Karnerok” (LDS.org). Saan a kayat ni Jesus a ni Pedro ket ibusena ti amin a tiempona nga agkalap. Ngem ketdi, kayatna a ni Pedro ket mangibinglay iti ebanghelio ken mangawis kadagiti amin a tao nga umasideg kenkuana. Mangted iti tunggal maysa kadagiti ubbing iti papel a karnero, ken kiddawem kadakuada nga isurat kadagitoy ti maysa a banag a maaramidda a makatulong a mangpakan kadagiti karnero ni Jesus.

• Kiddawen a nasapsapa dagiti adu nga ubbing a mangibinglayda kadagiti banag nga araramiddenda a panagayat ken panagserbi kadagiti dadduma, wenno dagiti wagas a dagiti dadduma ket nagserbi kadakuada.

• Isurat ti nagan ti tunggal ubing iti klasem kadagiti pedaso ti papel a naputed iti sukog ti karnero, ken iwarawara kadagitoy a karnero iti lawlaw ti siled. (Iraman ti nagnagan dagiti ubbing saan nga agatendar a kanayon.) Awisem dagiti ubbing nga ummongeda dagiti karnero babaen iti panangsapulda ti maysa nga addaan iti naganda iti daytoy. Ania ti mabalintayo nga aramidden tapno agserbitayo kadagiti naawawan a karnero nga ammotayo?

Isuro ti Doktrina

Dagiti In-inauna nga Ubbing

Mateo 28; Marcos 16; Lucas 24; Juan 20:1–23

Gapu ta ni Jesus ket nagungar, agungarto met amin a tattao.

Gagangay para kadagiti ubbing a masmasdaawda no ania ti mapasamak kalpasan ti ipapataytayo. Ibilang no kasano nga isurom ti maipapan iti Panagungar iti wagas a mangpapigsa ti pammatida.

Dagiti Mabalin nga Aktibidad

• Awisem dagiti ubbing nga ikeddemda dagiti matada ken iladawanda a nakatugawda iti tanem ni Jesus kabayatan ti panangbasam ti Juan20:1–17 wenno gupgoppem ti estoria maipapan iti Panagungarna (kitaen met iti “Kapitulo 54: Nagungaren ni Jesus,” Dagiti Estoria iti Baro a Tulag, 139–44, wenno ti katupagna a video iti LDS.org). Ania ngata koma ti kasasaad a makita ti nangungar a Mangisalakan?

• Kiddawem iti tunggal ubing nga adalen ti padas ti maysa a tao a nakita ti nangungar a Mangisalakan ken ibinglayda kadagiti dadduma no ania ti naadalda.

• Buyaem ti maysa wenno ad-adu kadagitoy a video kadua dagiti ubbing: “Ni Jesus Naikabilda iti Tanem,” “Nagungar ni Jesus” “Agparparang ni Jesus ti Kalsada nga Agturong ti Emaus”, ken “Agparparang ti Napagungar nga Apo kadagit Apostol” (LDS.org).

Juan 20:24–29

Kabaelak a maaddan iti pammati ken ni Jesucristo uray man a saanko makitkita Isuna.

Ania ti araramidden dagiti ubbing a sursuruam tapno mapapigsada ti pammatida ken ni Jesus? Kasano a matulongam ida?

Dagiti Mabalin nga Aktibidad

• Awisem ti sumagmamano nga ubbing nga agsisinnublatda nga agbasa dagiti bersikulo iti Juan 20:24–29. (Kitaen met iti video a “Nagasat Dagiti Saan a Nakakita, ket nupay Namatida,” LDS.org.)

• Isuratka iti tunggal balikas iti sasao a “Nagasat dagiti saan a nakakita, ket nupay namatida” iti nagsisina a pedaso ti papel. Awisem dagiti ubbing nga urnosenda dagitoy a balikas. Awisem ida a mangibaga kadagiti padasda a nariknada ti ayat ti Mangisalakan uray pay a saanda a nakita Isuna.

• Awisem dagiti ubbing a mangidrowing kadagiti banag a mabalinda nga aramidden a mangpapigsa iti pammatida. Kabayatan iti panangdrowingda, ibinglaymo ti naaramidmo a nangpapigsa iti pammatim ken Jesucristo.

Juan 21:1–17

Kabaelak ipakita ti ayatko ken Jesus babaen iti panangpakanko ti karnerona.

Dakkel ti impluensia dagiti ubbing kadagiti dadduma iti aglawlawda. Kasano a maparegtam ida a makapapigsa kadagiti dadduma iti ebanghelio?

Dagiti Mabalin nga Aktibidad

• Sakbay ti panangbasa iti Juan 21:1–17 a sangsangkamaysa, saludsudem kadagiti ubbing no napadasanda nga agkalap idi. Ania ngata ti riknam? Saludsodem no adda siasinoman a nakakkalap iti “adu unay nga ikan” (Juan 21:6).

• Basaen ti Juan 21:15–17, ngem sukatam ti nagan ni Simon iti nagan dagiti ubbing. Asino dagiti karnero ni Jesus? Kasanotayo a pakanen dagiti karnerona?

• Mangiranud ti simple a merienda kadagiti ubbing. Bayat ti pananganda, saludsodem ida no kasano a ti panangibinglay iti ebanghelio iti maysa a tao ket kas panangpakan kadakuada.

Yallukoy ti Panagsursuro iti Pagtaengan

Awisem dagiti ubbing nga usaren ti panid ti aktibidad ita a lawas a mangisuro dagiti pamiliada maipapan iti maudi a lawas ti biag ti Mangisalakan.

Panangpadur-as iti Panangisurotayo

Surnadan dagiti awis nga agtignay No awisem dagiti ubbing nga agtignay iti no ania ti nasursuroda, agsurnad kadagiti awismo kabayatan ti sumaruno a klase. Mangipakita daytoy kadagiti ubbing a maseknanka maipanan iti no kasano ti panangbendision ti ebanghelio iti biagda. Bayat ti panangibinglayda kadagiti padasda, mapapigsadanto ken makatulongto nga iyaplikar ti ebanghelio.