“Hulio 1–7. Dagiti Aramid 1–5: ‘Dakayto ti Saksik’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Hulio 1–7. Dagiti Aramid 1–5,” Umaykayo, Sumurot Kaniak—Para kadagiti Indibidual ken Pamilia: 2019
Aldaw ti Pentecostes, ni Sidney King
Hulio 1–7
Dagiti Aramid 1–5
“Dakayto ti Saksik”
Bayat ti panangadalmo iti Dagiti Aramid 1–5, ti Espiritu Santo ket mabalin a paregtaennaka nga agsapul kadagiti kinapudno nga adda pakainaiganna para iti biagmo. Isuratmo dagiti bersikulo a makaawis kenka, ket sapulem dagiti gundaway a mangibinglay no ania ti nasursurom.
Isuratmo Dagiti Impresionmo
Nasdaawka kadi no ania ti pampanunoten ken marikrikna ni Pedro idi isu, kaduana dagiti dadduma pay nga Apostol, “kimmita a sipapasnek iti langit” kabayatan ti yuuli ni Jesus iti Amana? (Dagiti Aramid 1:10). Ti Simbaan a binangon ti Anak ti Dios ket indauluan ni Jesus babaen ken ni Pedro, ti propeta ti Dios. Ti aramid a mangidaulo iti panagkagumaan nga “adadalan dagiti amin a nasion” nagsadag itan ken ni Pedro (Mateo 28:19). Ngem no nariknana ti panagkurang wenno panagbuteng, ditay masarakan ti ania man a pakakitaan iti dayta a libro ti Dagiti Aramid. No di ket masarakantayo isu dagiti pagarigan dagiti natured a pammaneknek ken pannakapasurot, namilagruan a panangagas, ken naespirituan a parangarang, ken dakkel a panagdur-as para iti Simbaan. Ita, babaen ti sagut ti Espiritu Santo, saanen ti awan adalna a mangngalap ni Pedro a nasarakan ni Jesus iti igid ti Baybay ti Galilea. Wenno saanen met a tay tao a maburiboran nga iti immun-una a lawlawas ket nagsangsangit gapu ta inlibakna nga am-ammona ni Jesus ti Nazaret.
Iti libro Dagiti Aramid, mabasam dagiti nabileg a palawag maipapan ken ni Jesucristo ken ti ebangheliona. Makitamto pay no kasano a mabalbaliwan ti ebanghelio dagiti tao—mairamanka—nga agbalin a maingel a disipulo nga ammo ti Dios a pagbalinanda.
Dagiti Kapanunotan para iti Bukod a Panagadal iti Nasantuan a Kasuratan
Dagiti Aramid 1:1–8, 15–26; 2:1–42; 4:1–13, 31–33
Iturong ni Jesucristo ti Simbaanna babaen ti Espiritu Santo.
Irekord ti libro Dagiti Aramid dagiti panagkagumaan dagiti Apostol a mangipasdek iti Simbaan ni Jesucristo kalpasan ti Yuuli ti Mangisalakan. Nupay awanen ni Jesucristo ditoy daga, inturongna ti Simbaanna babaen ti paltiing babaen ti Espiritu Santo. Ibilangmo no kasano nga iturong ti Espiritu Santo dagiti baro a dadaulo ti Simbaan ni Cristo bayat ti panangrebyum kadagiti sumaganad a binatog: Dagiti Aramid 1:1–8, 15–26; 2:1–42; 4:1–13, 31–33.
Ania dagiti sumagmamano a naituding nga adalen, dagiti takem, wenno pagrebbengan nga inted ti Apo kadakayo? Ania ti masursurom manipud kadagiti padas dagitoy nagkauna nga Apostol maipapan iti no kasano a mabalinmo a pagpannurayan iti Espiritu Santo tapno mangtarabay kenka?
Kitaen met iti Diksionario ti Biblia, “Espiritu Santo.”
Ania ti panggep ti sagut dagiti pagsasao?
No dadduma iladawan ti sagut dagiti pagsasao ti panagsarita iti lengguahe a saan a maawatan ti siasino man. Nupay kasta, intudo ni Propeta Joseph Smith dagiti pasamak iti Dagiti Aramid 2 a mangilawlawag a daytoy a sagut ti Espiritu ket “naited iti panggep a pannakaikasaba [ti ebanghelio] kadagiti saan a maawatan a pagsasaoda; kas iti aldaw ti Pentecostes. … Ti kangrunaan a panggep ti [ti sagut ti] pagsasao ket ti makisao kadagiti ganggannaet” (Teachings of Presidents of the Church: Joseph Smith [2008], 383–84). Ti Piesta ti Pentecostes, ti kangrunaan a nasantuan nga aldaw dagiti Judio, ti nangyeg kadagiti Judio manipud kadagiti adu a pagilian a mapan iti Jerusalem. Ti sagut dagiti pagsasao ti nangipalubos kadagitoy a sumarungkar a makaawat kadagiti sao dagiti Apostol iti nakaisigudanda a pagsasao.
Dagiti Aramid 2:36–47; 3:13–21
Matulongannak dagiti umuna a pagbatayan ken ordinansa ti ebanghelio nga umasideg ken ni Cristo.
Nariknam kadin a “napaladingitan [ti] pusom,” kas kadagiti Judio iti aldaw ti Pentecostes? (Dagiti Aramid 2:37). Nalabit a nakaaramidka iti maysa a banag a pagbabawyam, wenno nalabit a gagangay a kayatmo ti mangbalbaliw iti biagmo. Ania ti rumbeng nga aramidem no adda kenka dagitoy a rikna? Masarakan dagiti balakad ni Pedro kadagiti Judio iti Dagiti Aramid 2:38. Kitaen no kasano a dagiti umuna a pagbatayan ken ordinansa ti ebanghelio (agraman ti pammati, panagbabawi, panagbuniag, ken ti sagut ti Espiritu Santo—wenno no ania ti dadduma a maitudo a kas doktrina ni Cristo) ket inaringanna dagitoy a nakomberte, kas nairekord iti Dagiti Aramid 2:37–47.
Mabalin a nabuniagankan ken naawatmon ti sagut ti Espiritu Santo, isu a kasanom nga itultuloy nga mangyaplikar iti doktrina ni Cristo? Ibilangmo dagitoy a balikas manipud ken ni Elder Dale G. Renlund: “Mabalintayo a naan-anay babaen iti madagdagullit a … panangaramat iti pammati ken ni [Cristo], panagbabawi, pannakiranud iti sakramento tapno pabaruem dagiti katulagan ken bendision ti panagbuniag, ken panangawat iti Espiritu Santo kas maysa a kanayon a kadkaduatayo iti dakdakkel a tukad. No aramidentayo daytoy, agbalintayo nga ad-adda pay a kas ken ni Cristo ken makabael nga agibtur agingga iti panungpalan, agraman dagiti amin a saklawenna iti dayta” (“Latter-day Saints Keep on Trying,”Ensign wenno Liahona, Mayo 2015, 56).
Kitaen met iti 2 Nephi 31; 3 Nephi 11:31–41; 27; Brian K. Ashton, “Ti Doktrina ni Cristo,”Ensign wenno Liahona, Nob. 2016, 106–9.
Ania “dagiti aldaw ti bang-ar ” ken “ kadagiti aldaw ti pannakaisubli dagiti amin a banag”?
Tukoyenna “dagiti aldaw ti bang-ar” ti Milenium, inton agsubli ni Jesucristo iti daga. Tukoyenna “Dagiti pannakaisubli dagiti amin a banag” ti Pannakaisubli ti ebanghelio iti ud-udina nga aldaw
Dagiti Aramid 3; 4:1–31; 5:12–42
Maikkan dagiti disipulo ni Jesucristo iti bileg a mangaramid kadagiti milagro iti naganna.
Mangnamnama ti pilay a lalaki nga umawat iti kuarta manipud kadagiti immay iti templo. Ngem ad-adu pay ti itedda dagiti katulongan ti Apo kenkuana. Bayat ti panangbasam iti Dagiti Aramid 3; 4:1–31; and 5:12–42, ibilangmo no kasano a ti napasamak a milagro ket inaringanna:
Ti pilay a lalaki
Da Pedro ken Juan
Dagiti saksi iti templo
Dagiti nangato a padi ken agturay
Dadduma pay a Santo
Kitaen met dagiti videos “Peter and John Heal a Man Crippled Since Birth,” “Peter Preaches and Is Arrested”(LDS.org
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Kaano kadi a nariknatayo a “napaladingitan ti puso[tayo]” idi mangisursuro ti maysa a tao iti ebanghelio? Ania ti kaipapanan daytoy a rikna? Apay a napateg a sawen ti, “Anianto ti aramidentayo?” no addaan iti kasta a rikna?
Kasano a nabendisionan ti lalaki iti templo a naiduma iti namnamaenna? Kasano a naimatangantayo dagiti bendision ti Nailangitan nga Ama a sumangbay kadatayo iti saan a ninamnama a wagas?
Ti Adda Kaniak Isu ti Itdek Kenka, ni Walter Rane
Ania ti makaay-ayo kenka maipapan iti kinapudno da Pedro ken Juan? Kasano a makapagbalintayo a natured iti pammaneknektayo ken ni Jesuscristo?
Nalabit a magustuan ti pamiliam a yakem ti pakaammuan da Ananias ken Safira.nga addaan kadagiti simple a kawes ken sumagmamano a sensilio. Ania dagiti adalen a masursurotayo manipud iti daytoy nga estoria? Depende kadagiti kasapulan ti pamiliam, mabalin a paglilinnawaganyo ti kinapudno, panangkanunong kadagiti dadaulo ti Simbaan, wenno panangikonsagrar.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Mangpili iti topiko. Pagsisinnublatem dagiti miembro ti pamilia a mangpili iti topiko manipud iti Dagiti Aramid 1–5 nga aggigiddan nga adalen.
Ti Yuuli ti Apo, ni William Henry Margetson