“Hulio 15–21. Dagiti Aramid 10–15: ‘Ti Sao ti Apo Nagtuloy a Rimmang-ay’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Hulio 15–21. Dagiti Aramid 10–15,” Umaykayo, Sumurot Kaniak—Para kadagiti Indibidual ken Pamilia: 2019
Hulio 15–21
Dagiti Aramid 10–15
“Ti Sao ti Apo Nagtuloy a Rimmang-ay”
Basaen ti Dagiti Aramid 10–15 a siaannad, mangted iti oras para iti espiritu nga agparikna kenka babaen kadagiti panunot ken rikna. Ania dagiti masursurom kadagitoy a kapitulo?
Isuratmo Dagiti Impresionmo
Kabayatan ti mortal a panagministrona, masansan a mangkarit dagiti pannursuro ni Jesucristo kadagiti nabayagen a maang-angay a kannawidan ken pammati dagiti tattao; saan daytoy a nagsardeng kalpasan ti yuulina iti langit—kalpasan ti amin, intuloyna ti nangiwanwan iti Simbaanna babaen ti paltiing. Kas pagarigan, bayat ti panagbiag ni Jesus inkasaba dagiti disipulona ti ebanghelio kadagiti padada laeng a Judio. Ngem nabiit kalpasan a natay ti Mangisalakan ken nagbalin ni Pedro a propeta ti Simbaan, impalgak ni Jesucristo ken ni Pedro a panawenen nga ikasaba ti ebanghelio kadagiti saan a Judio. Ti kapanunotan a panangibinglay ti ebanghelio kadagiti Gentil kadagitoy nga aldaw ket saanen a makapakellaat, isu nga ania ti leksion iti daytoy a pakaammuan a para kadatayo? Nalabit a maysa a leksion ket ti panagbaliw iti pagalagadan ken nakairuaman—iti agpada a kadaanan ken kabaruanan a Simbaan—umay babaen iti paltiing manipud iti Apo kadagiti napili a dadaulona (Amos 3:7; DkK 1:38). Ti agtultuloy a paltiing ket maysa a napateg a sagudayen ti pudno ken sibibiag a Simbaan ni Jesucristo. Kas ken ni Pedro, nasken a natallugodtayo nga umawat iti agtultuloy a paltiing ken agbiag “iti isu amin a balikas ti Dios” (Lucas 4:4), agraman ti “amin nga impalgak[na], amin nga ipalpalgakna” ken “adu pay a naindaklan ken napateg a banag” ipalgaknanto “maipapan iti Pagarian ti Dios”(Pagannurotan ti Pammati 1:9).
Dagiti Kapanunotan para iti Bukod a Panagadal iti Nasantuan a Kasuratan
“Ti Dios saan a mangidumduma kadagiti tao.”
Iti kapkaputotan, namati dagiti Judio a kas maysa a “bukel ni Abraham,” wenno pudno nga an-annabo ni Abraham, kayatna a sawen dayta a tao ket inawat (pinili) ti Dios (kitaen ti Lucas 3:8). Iti siasinoman ket naibilang a “narugit” a Gentil a saan nga inawat ti Dios. Iti Dagiti Aramid 10, ania ti insuro ti Apo ken ni Pedro maipapan iti “no siasino ti awatenna ”? Dagiti Aramid 10:35 Ania a pakakitaan ti masarakam iti daytoy a kapitulo a ni Cornelio ket nagbibiag a nalinteg tapno inawat ti Apo? Apay a napateg daytoy a maammuan a “ti Dios saan a mangidumduma kadagiti tao” (bersikulo 34), kayatna a sawen nga amin a tao ket makaawatto kadagiti bendision ti ebanghelio no agbiagda iti ebanghelio? (Kitaen iti 1 Nephi 17:35).
Kas kadagiti Hudio a nangtagibassit kadagidiay saan a bukel ni Abraham, nakitam kadin ti bagim a nagaramid iti madi wenno di kapkapnekan a panagipapan maipapan iti maysa a tao a maigiddiat kadakayo? Kasano a maparmekmo daytoy a galad? Mabalin a makaparegta ti mangpadas iti simple nga aktibidad iti sumaruno a sumagmamano nga aldaw: Kaanoman a nakipulapolka iti maysa a tao, padasem a panunoten ti bagim, “Daytoy a tao ket anak ti Dios.” No aramidem daytoy, ania dagiti madlawmo a panagbalbaliw ti panagpampanunotmo maipapan ken makipulapol kadagiti dadduma?
Kitaen pay ti D. Todd Christofferson, Ensign wenno Liahona, Nob. 2016, 48–51; 1 Samuel 16:7; “Peter’s Revelation to Take the Gospel to the Gentiles” (video, LDS.org).
Isuronak ti Nailangitan nga Ama babaen ti paltiing.
Idi nakita ni Pedro ti parmata a nailadawan iti Dagiti Aramid 10, nagkarigatan isuna iti damona a maawatantayo daytoy ket “nagduaduada iti bagina iti no ania [ti] nasken a sawen daytoy” (bersikulo 17). Ngem inikkan ti Apo ni Pedro iti dakdakkel a pannakaawat kas kinalikaguman ni Pedro. Bayat ti panangbasam iti Dagiti Aramid 10, 11, ken 15, makitam no kasano nga limmawag ti pannakaawat ni Pedro ti parmatana iti panaglabas ti panawen. Kasano a nagkalikagum ken immawatka iti dakdakkel a pannakaawat manipud iti Dios no addaanka kadagiti saludsod?
Dagiti Aramid 10, 11ken 15 ket manglagip kadagiti gundaway nga inturong ti Apo dagiti katulonganna babaen ti paltiing . Makatulong ti mangisurat iti no ania ti nasarakan a paltiing bayat ti panangbasam kadagitoy a kapitulo. Kasano a makisarita ti Espiritu kenka?
Kitaen pay ti “Revelation,” Gospel Topics, topics.lds.org; Ronald A. Rasband, “Let the Holy Spirit Guide,” Ensign wenno Liahona, Mayo 2017, 93–96; “The Jerusalem Conference” (video, LDS.org).
Maysaak a Kristiano gapu ta mamatiak ken surotek ni Jesucristo.
Ania ti ipasimudaag maipapan iti maysa a Kristiano? (Kitaen iti Dagiti Aramid 11:26). Ania ti kayatna a sawen kenka ti maamuan a kas maysa a Kristiano wenno awatem ti bagim ti nagan ni Jesucristo? (Kitaen iti DkK 20:77 Ibilangmo ti ipasimudaag dagiti nagan. Kas pagarigan, ania ti kaipapanan ti apiliedom kenka? Apay a napateg ti nagan ti Simbaan iti agdama? Kitaen ti DkK 115:4
Kitaen pay ti Mosiah 5:7–15; Alma 46:13–15; 3 Nephi 27:3–8; M. Russell Ballard, “The Importance of a Name,” Ensign wenno Liahona, Nob. 2011, 79–82.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay dagiti kasapulan ti pamiliam. Dagitoy ti sumagmamano a singasing:
Naaddaantayo kadin kadagiti naespirituan a padas ket idi agangay nagduadua no ania ti narikna wenno nasursurotayo? Ania a balakad a mabalin a maitedtayo iti tunggal maysa a mabalin a makatulong kadatayo a mangrimbaw iti panagduaduatayo? (Kitaen ti Ronald A. Rasband, “Lest Thou Forget,” Ensign wenno Liahona, Nob. 2016, 113–15.)
Idi naipisok ni Pedro iti pagbaludan, naguummong dagiti miembro, ket nagkararagda para kenkuana. Adda ngata maysa a tao a naregta a marikna ti pamiliam nga ikararagan, kas maysa a lider ti Simbaan wenno maysa a mangipatpateg? Ania ti kaipapanan ti “awan sardayna” a panagkararag? (Dagiti Aramid 12:5).
Naisalakan ni Pedro manipud iti Pagbaludan , ni A. L. Noakes
Bayat ti aggigiddan a panangbasayo iti daytoy a kapitulo,mabalin dagiti sumagmamano a miembro ti pamilia ti agisurat kadagiti bendision a dimteng kadagiti disipulo ken ti Simbaan, idinto a dagiti sabali a miembro ti pamilia ket isuratda ti pagsusupadian wenno dagiti pannubok a napadasan dagiti disipulo . Apay nga ipalubos ti Dios a mapasamak dagiti narigat a banag kadagiti nalinteg a tao ?
Iladawan dagitoy a bersikulo ti saan a panagkikinnaawatan iti Simbaan maipanggep iti no dagiti gentil (saan a Judio) a kumbert ket masapul a makugit kas pagilasinan ti katulaganda. Narisut ti di panagkikinnaawatan kalpasan a nagkikita dagiti Apostol tapno ibilangda daytoy a saritaan ket kalpasanna nakaawatda iti naparegta a sungbat. Mabalin a nasayaat daytoy nga oras a mangisuro iti pamiliayo a ti isu met laeng a pagtuladan ket mayaplikar iti agdama. Kas maysa a pamilia, pumidot iti maysa a saludsod maipapan iti ebanghelio a kayatyo tapno aggigiddan a mabirukan ti sungbat. Aggigiddan a mangsarak kadagiti nauneg a pannakaamo ken pannakaawat [insights] kadagiti nasantuan a kasuratan ken dagiti pannursuro dagiti kabaruanan a propeta ken apostol. (Makatulong ti Topical Guide ken ti topic index ti isyu ti kumperensia dagiti magasin ti Simbaan.)
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Mangidrowing iti maysa a ladawan. Makatulong dagiti ladawan kadagiti miembro ti pamilia nga iladawandagiti pannursuro iti nasantuan a kasuratan ken estoria. Mabalin a basaem ti sumagmamano a bersikulo ket kalpasanna mangilatang iti oras para kadagiti miembro ti pamilia a mangidrowing iti maysa a banag a mainaig iti no ania ti nabasada. Kas pagarigan, mabalin a magustuan dagiti miembro ti pamilia nga idrowing dagiti ladawan ti parmata ni Pedro iti Dagiti Aramid 10.
Ti namilagruan a parmata ken panagdaliasat ti centurion a ni Cornelio tapno maam-ammona ni Pedro ket mangipakita a “Ti Dios saan a mangidumduma kadagiti tao” (Dagiti Aramid 10:34).