“Hulio 22–28. Dagiti Aramid 16–21: ‘Ti Dios Inayabannakami a Mangikasaba ti Ebanghelio“’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Hulio 22–28 Dagiti Aramid 16–21,” Umaykayo, Sumurot Kaniak—Para kadagiti Indibidual ken Pamilia: 2019
Hulio 22–28
Dagiti Aramid 16–21
“Ti Dios Inayabannakami a Mangikasaba ti Ebanghelio”
Bayat ti panangbasam maipapan iti panagkagumaan ni Pablo a mangikasaba iti ebanghelio, maiparikna ti Espiritu kenka dagiti panunot wenno rikna. Isuratmo dagitoy a parikna, ket agaramid kadagiti plano a mangtignay kadagitoy.
Isuratmo Dagiti Impresionmo
Dagiti naudi a balikas ti Apo kadagiti Apostolna ket ti bilin a, “Inkayo ngarud, ket pagbalinenyo nga adadalan dagiti amin a nasion, a bautisaranyo ida iti nagan ni Ama, ken ti Anak, ken ti Espiritu Santo:nga insursuroyo kadakuada nga aywananda dagiti isuamin a banag nga inbilinko kadakayo” (Mateo 28:19–20). Idinto a di unay naaramid dagiti Apostol iti amin a pagilian, Dagiti Aramid 16–21 ket mangipakita a ni Pablo ken dagiti kaduana ket nagaramid iti nakaskasdaaw a panagdur-as iti pannakabangon ti Simbaan. Nagisuro, nagbautisar, ken insaadda ti sagut ti Espiritu Santo. Nagaramidda kadagiti milagro, uray pay ti ibabangon ti tao manipud iti patay, ken nagipadto ti Dakkel nga Ikakalilis iti Kinapudno (Dagiti Aramid 20:7–12; 20:28–31). Nagtultuloy dagiti aramid nga inrugida ket agtultuloy kadagiti sibibiag nga Apostol ita nga agdama, kaduada dagiti napasnek a disipulo kas kadakayo, a dagiti tumultulong a mangipatungpal iti nakaawagan ti Mangisalakan iti wagas a di inarapaap ni Pablo iti kaano man. Nalabit nga ammom dagiti tao a di makaammo iti Amada a Nailangitan wenno ti ebangheliona . Nalabit a nariknam a ti “espiritum ket narubroban [kenka]” tapno maibinglaymo kadakuada ti no ania ti ammom maipapan Kenkuana (Dagiti Aramid 17:16). No surotem ti pagwadan ni Pablo ti kinapakumbaba ken kinatured iti panangibinglay iti ebanghelio, masarakam ti maysa a tao “nga addaan iti puso a linuktan[en] ti Apo” (Dagiti Aramid 16:14).
Dagiti Kapanunotan para iti Bukod a Panagadal iti Nasantuan a Kasuratan
Tarabayennakto ti Espiritu kadagiti panagkagumaanko a mangibinglay iti ebanghelio.
Kasapulan ti tunggal maysa ti ebanghelio ni Jesucristo ngem ad-adda a nakasagana dagiti sumagmamano a tattao ngem iti dadduma nga umawat.. Daytoy ti maysa a gapu a kasapulantayo ti Espiritu Santo no mangibinglaytayo ti ebanghelio—tapno tarabayennatayo kadagiti nakasagana. Bayat ti panangbasam iti Dagiti Aramid 16–21, kitaem dagiti gundaway a tinarabay ti Espiritu ni Pablo ken dagiti kaduana. Ania dagiti bendision a simmangbay gapu ta sinurotda ti Espiritu? Kaano kadi a nariknam ti parikna ti Espiritu kenka iti panagkagumaanmo a mangibinglay ti ebanghelio?
Kitaen met iti Alma 7:17–20; Dallin H. Oaks, “Sharing the Restored Gospel,,” Ensign wenno Liahona, Nob. 2016, 57–60; Preach My Gospel, 92–93.
Mabalin nga ipakdaarko ti ebanghelio iti amin a kasasaad.
Ti pannakabalud gapu iti pannakaikasaba ti ebanghelio ket kasla maysa a maawatan a rason nga isardeng ti panagkaskasaba. Ngem kada Pablo ken Silas, nagbalin daytoy a gundaway a nangkumbert iti manangibalud (kitaen iti Dagiti Aramid 16:16–34). Iti intero ti Dagiti Aramid 16–21, sapulem dagiti dadduma pay a pagwadan ni Pablo ti kinatallugodna a mangibinglay ti pammaneknekna iti tunggal maysa. Apay a mapanunotmo a natured ken awanan ti buteng isuna? Ania dagiti masursurom manipud iti pagwadan ni Pablo?
Adda pay ad-adu a mensahe maipapan iti panangibinglay ti ebanghelio iti kapitulo 16–21. No kitaem a naimbag, mabalin a makasarakka iti sumagmamano a nangnangruna a mayaplikar kenka. Padasem a basaen dagitoy a kapitulo a sipapanunot nga addaan iti panggep a tun-oyen. Ania dagiti masarakam?
“Kaputotannatayo ti Dios.”
Sadiay Atenas, nasarakan ni Pablo ti tattao nga addaan kadagiti sabasabali a kapanunotan ken pannirigan iti relihion. Kanayon ti panagkalikagumda a “dumngeg iti sumagmamano a baro a banag,” ket no ania ti adda nga ipaay ni Pablo sigurado a baro kadakuada (kitaen iti Dagiti Aramid 17:19 –21). Nagdaydayawda kadagiti adu a dios, agraman iti maysa nga inawaganda iti “Dios a di ammo” (Dagiti Aramid 17:23), ngem namatida a dagita a dios ket bileg wenno puwersa, saan a nabiag, makaay-ayo a parsua, ket sigurado a saan a ti Amatayo. Basaen ti no ania ti kinuna ni Pablo a makatulong kadakuada a mangammo iti Dios, ket ilistam dagiti kababalin ti Dios a masarakam. Ania ti kayat na a sawen kenka ti agbalin a “kaputotan ti Dios”? (Dagiti Aramid 17:29). Iti kapanunotam, kasano a ti panagbalin a maysa nga anak ti Dios ket maigiddiat iti panagbalin a maysa laeng kadagiti parsuana? No nagtakderka koma iti abay ni Pablo bayat ti panagpampaneknekna, ania koma ti imbagam kadagiti nagkauna a Griego maipapan iti Amatayo a Nailangitan? Adda kadi maysa nga am-ammom a mabalin a mairanud manipud iti panagdengdengngegna iti pammaneknekmo?
Ti Pateg ti Maysa a Kararua, ni Liz Lemon Swindle
Kitaen met iti Taga Roma 8:16; 1 Juan 5:2; “Datayo ti Kaputotan ti Dios” (video, LDS.org).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Tapno matulongan dagiti pamiliayo a mangiladawan iti mapaspasamak kadagitoy a kapitulo, mabalin a naragsak, ti panaggigiddanyo nga agbasa, a mangmarka iti mapa dagiti siudad a sinarungkaran ni Pablo (kitaen iti mapa iti gibus daytoy a balabala).
Kasano nga agbalintayo a kas kadagiti Santo kadagitoy a nasantuan a kasuratan? Kasano a ti inaldaw a panagad-adal kadagiti nasantuan a kasuratan ket mamagbalin kadatayo nga ad-adda a “natan-ok”? (Dagiti Aramid 17:11). Ania ti maaramidtayo tapno agbalin a “ nabileg kadagiti nasantuan a kasuratan”? (Dagiti Aramid 18:24).
Mabalin a makatulong dagitoy a pannursuro manipud ken ni Propeta Joseph Smith iti pamiliam a paglilinnawagan ti Dagiti Aramid 19:1–7: “Ti panagbuniag iti danum ket kagudua laeng ti panagbuniag, ket awan kaes-eskanna no awan tay kaguduana—nga isu, ti panagbuniag iti Espiritu Santo. … ‘Ti pannakayanak iti danum ken iti Espiritu’ ket nairanta a mairarem iti danum para iti pannakaugas dagiti basbasol, ken panangawat ti sagut ti Espiritu Santo kalpasanna. Naited daytoy babaen ti pannakaipatay dagiti dakulap ti maysa nga addaan turay nga inted kenkuana ti Dios” (Dagiti Pannursuro dagiti Panguluen ti Simbaan: Joseph Smith, 95). Ania dagiti bendision nga umay kadatayo manipud iti panangawattayo iti sagut ti Espiritu Santo?
Ania ti nangparegta kadagiti tao kadagitoy a bersikulo a nangpuor kadagiti libroda nga agpateg iti “limapulon a ribu a bagi ti pirak”? (Dagiti Aramid 19:19) Adda kadi dagiti nailubongan a sanikua wenno aktibidad a kasapulantayo nga isuko tapno umawat kadagiti nailangitan a bendision?
Kaano a napadasan ti pamiliam ti pannursuro ni Cristo a “nasaysayaat ti mangted ngem ti umawat”? Dagiti Aramid 20:35 Adda kadi maysa a tao a mabalin a mairanud manipud iti panagserbi, oras, wenno sagut a mabalin nga ited ti pamiliam? Kas maysa a pamilia, paglilinnawagan ti sumagmamano a kapanunotan ket agaramid iti plano nga agserbi iti maysa a tao. Ania ti mariknatayo no pagserbiantayo ti dadduma? Kasano a nasaysayaat ti mangted ngem ti umawat ?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Isuratmo dagiti impresionmo. Isuratmo dagiti umay nga impresion wenno nauneg a pannakaammo ken pannakaawat. Kas pagarigan, mabalinmo nga isurat dagiti kapanunotam iti mardyin dagiti nasantuan a kasuratam, iti Gospel Library app, wenno iti maysa a diurnal iti panagadal. “Ti panangisuratmo kadagiti naespirituan nga impresion, ipakitam iti Apo nga ipategmo ti panangiturongna ket ad-adda a bendisionannaka iti ad-adda a masansan a paltiing” (Panangisuro iti Wagas ti Mangisalakan, 12; kitaen met iti 30).
Dagiti panagdaliasat ni Apostol Pablo a kas misionario.