“Hunio10–16. Mateo 26; Marcos 14; Lucas 22; Juan 18: ‘Saan a ti Pagayatak, no di ket ti Pagayatam’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019(2019)
“Hunio10–16. Mateo 26; Marcos 14; Lucas 22; Juan 18,” Umaykayo, Sumurot Kaniak—Para kadagiti Indibidual ken Pamilia: 2019
Ket Rabii Idin, ni Benjamin McPherson
Hunio 10–16
Mateo 26; Marcos 14; Lucas 22; Juan 18
‘Saan a ti Pagayatak, no di ket ti Pagayatam’
Bayat ti panangbasam maipapan kadagiti pasamak a nailadawan iti Mateo 26; Marcos 14; Lucas 22; ket Juan 18, ikasom dagiti ania man nga impresion a maawatmo, nangnangruna kadagiti parikna a makaaramid kadagiti panagbalbaliw iti biagmo.
Suratmo Dagiti Impresionmo
Adda tallo laeng a mortal a saksi iti panagsagaba ni Jesucristo iti Minuyongan ti Getsemani—ket naturogda iti kaaduanna ditoy. Iti dayta a minuyongan ken iti agangay iti krus, inawat ni Jesus iti bagina dagiti basbasol, saem, ken panagsagaba ti tunggal tao a nagbiag, nupay dumani awan a pulos ti sibibiag iti dayta a kanito ti makaammo ti no ania ti mapaspasamak. Ngem kalpasanna, masansan a mapalabas dagiti kapatgan a pasamak iti kinaagnanayon nga awanan iti adu a nainlubongan a panangikankano. *Nupay kasta, ammo ti Dios Ama. Nangngegna ti panagpakaasi ti napudno nga Anakna: “Ama, no pagayatam, yadayum kadi daytoy a kopa kaniak: nupay kasta saan koma a maaramid ti pagayatak, no di ti pagayatam. Ket nagparang ti maysa nga anghel iti langit, a nangpabileg Kenkuana”(Lucas 22:42–43). Idinto a saantayo mismo a nakaimatang a nangsaksi iti daytoy nga aramid ti saan a managimbubukod ken panangtallugod, iti kaipapananna, makapagbalintayo amin a saksi ti Pannubbot ni Jesucristo. Tunggal kanito nga agbabawi ken umawattayo iti pannakapakawan dagiti basoltayo ken tunggal kanito a mariknatayo ti mangpappapigsa a bileg ti Mangisalakan, mapaneknekantayo ti no ania ti napasamak iti Minuyongan ti Getsemani.
Dagiti Kapanunotan para iti Bukod a Panagadal iti Nasantuan a Kasuratan
Mateo 26:17–30; Marcos 14:12–26; Lucas 22:7–39
Ti sakramento ket maysa a gundaway a manglaglagip iti Mangisalakan.
Ania ti aramidem a manglaglagip kadagiti tao a napateg iti biagmo? Idi yam-ammo ti Mangisalakan ti sakramento kadagiti disipulona, kinunana, “Aramidenyo daytoy a panglaglagip kaniak” (Lucas 22:19; kitaen met iti 3 Nephi 18:7). Kasano a makatulong kenka ti tinapay, danum, ken dadduma pay nga elemento daytoy nga ordinansa tapno manglaglagip Kenkuana ken ti panagsagabana? Utobem daytoy a saludsod bayat ti panangbasam maipapan iti umuna a sakramento. Kasta met, a kitaem dagiti rebision a masarakan iti Patarus ti Joseph Smith (kitaen dagiti footnote ken Bible appendix).
Mangala iti sumagmamano nga oras a mangutob iti padasmo kabayatan ti sakramento iti tunggal lawas. Ania ti maaramidmo tapno mapagbalinmo a napatpateg daytoy? Nalabit a mabalinmo nga isurat dagiti sumagmamano a banag a nariknam a naparegtaka a manglagip maipapan iti Mangisalakan—dagiti pannursurona, dagiti aramidna a a panagayat, dagiti kanito a nariknam ti kinasingedmo Kenkuana, wenno ti panangaklonna iti Bagina kadagiti basbasol ken saem para kenka.
Kitaen met iti 3 Nephi 18:1–13; Doktrina ken Katulagan 20: 76–79; “Sacrament,”Gospel Topics, topics.lds.org; “Always Remember Him” (video, LDS.org).
Mateo 26:36–46; Marcos 14:32–42; Lucas 22:40–46
Ti Mangisalakan ket nagsagaba para kaniak idiay Getsemani.
Inawisnatayo ni Presidente Russell M. Nelson a “mangipaay iti oras a mangsursuro maipapan iti Mangisalakan ken ti pangsubbot a sakripisiona” (“Drawing the Power of Jesus Christ into Our Lives,” Ensign wenno Liahona,Mayo 2017, 40).
Ibilangmo no anianto ti aramidem a mangawat iti awis ni Presidente Nelson. Mabalin a rugiam babaen ti nainkararagan a panangutob iti panagsagaba ti Mangisalakan sadiay Getsemani, a kas nailadawan kadagitoy a bersikulo, ken panangisurat kadagiti impresion ken saludsod nga umay iti panunot.
Para iti uray naun-uneg a panagadal maipapan iti Mangisalakan ken ti Pannubbotna, padasem ti panangsukisok kadagiti dadduma pay a nasantuan a kasuratan para iti sungbat kadagiti saludsod kas kadagitoy:
-
Apay a kasapulan ti Pannubbot ti Mangisalakan? (Kitaen iti 2 Nephi 2:5–10, 17–26; 9:5–26; Alma 34: 8 16; 42:9–26.)
-
Ania ti napadasan ti Mangisalakan bayat ti panagsagabana? (Kitaen iti Isaias 53: 3–5; Mosiah 3:7; Alma 7:11–13; DkK 19:16–19.)
-
Kasano nga apektuan ti panagsagaba ni Cristo ti biagko? (Kitaen iti Juan 10:10–11; Hebreo 4:14–16; 1 Juan 1:7; Alma 34:31; Moroni 10:32 33; Dallin H. Oaks, “Strengthened by the Atonement of Jesus Christ,” Ensign wenno Liahona, Nob. 2015, 61–64.)
-
Dagiti dadduma pay a saludsodko:
Bayat ti panagsursurom maipapan iti no ania ti napasamak iti Getsemani, mabalin a makaay-ayo a maaammuan a ti Getsemani ket maysa a minuyongan dagiti kayo ti olibo ken addaan iti pagdapilan ti olibo, a nausar a panglebbek kadagiti olibo ket mapaadda ti lana nga usaren iti pagsilawan ken taraon kasta met a pagagas (kitaen iti Lucas 10:34). Ti proseso ti panangusar iti nadagsen a timbang a mangpaadda iti lana ti olibo ket mabalin a mangisimbolo iti dagsen ti basol ken saem a sinagaba ti Mangisalakan para kadatayo (kitaen iti D. Todd Christofferson, “Abide in My Love,” Ensign wenno Liahona, Nob. 2016, 50–51).
Marcos 14:27–31, 66–72; Lucas 22:31–32
Ti pannakapasurot wenno kombersion ket maysa nga agtultuloy a proseso.
Panunotem ti maipapan kadagiti padas ni Pedro iti Mangisalakan—dagiti nasaksianna a milagro ken ti doktrina a nasursurona. Apay ngarud a kinuna ti Mangisalakan ken ni Pedro, “Inton makapagbabawikan, pabilgem dagiti kakabsatmo”? (Lucas 22:32; nainayon dagiti nagiray a balikas). Ania ti insuro ni Elder David A. Bednar a pagdumaan ti kaadda ti pammaneknek ket panagbalin a pudno a napasurot? (kitaen iti “Converted unto the Lord,” Ensign wenno Liahona, Nob. 2012, 106–9). Bayat ti panangbasam maipapan kadagiti padas ni Pedro iti Marcos 14:27–31, 66–72, panunotem maipapan iti bukodmo a pannakapasurot wenno kombersion. Ania dagiti adalen a masursurom ken ni Pedro? Bayat ti panagtultuloymo a mangbasbasa iti Baro a Tulag, ania ti pakakitaam a masarakam iti pannakapasurot ni Pedro ken dagiti panagkagumaanna a mangpapigsa kadagiti dadduma? Ania ti adda nga epekto ti sagut ti Espiritu Santo iti pannakapasurotna? (kitaen ti Juan 15:26–27; Dagiti Aramid 1:8; 2:1–4).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagtultuloyyo a mangbasa iti maipapan iti maudi a lawas ti biag ti Mangisalakan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Ania ti padas ti pamiliam kabayatan ti sakramento iti tunggal lawas? Ti panagbasa maipapan iti umuna a sakramento ket makaparegta iti panaglilinnawag maipapan iti kinapateg ti sakramento ken dagiti wagas a pakaaramidan dagiti miembro ti pamilia a napatpateg ti panagdaydayawda. Ibilang ti panangipakita iti ladawan Panangiwaras iti Sakramento (Libro ti Arte ti Ebanghelio, num. 108) ken panagbibinninglay kadagiti kapanunotan iti tunggal maysa maipapan iti no ania ti maaramidyo sakbay, kabayatan, ken kalpasan ti sakramento.
No basaen ti pamiliam dagitoy a bersikulo, mabalinda nga ibinglay no ania ti nasursuroda bayat ti panagadalda kadagiti nasantuan a kasuratan a naisingasing iti benneg iti bukod a panagadal iti nasantuan a kasuratan “Nagsagaba ti Mangisalakan para kaniak iti Getsemani.”
Ania ti masursurotayo maipapan ken ni Jesus manipud iti daytoy a padas?
Diyo Ipalubos a Kasta ti Kapautna, ni Walter Rane
Ania ti masursurotayo manipud kadagiti balikas ti Mangisalakan?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Adalem dagiti balikas dagiti propeta ken apostol iti ud-udina nga aldaw. Basaen ti insuro dagiti propeta ken apostol iti ud-udina nga aldaw maipapan kadagiti kinapudno a masarakam kadagiti nasantuan a kasuratan. Kas pagarigan, iti isyu ti kaudian unay a sapasap a komperensia ti Ensign wenno Liahona, mabalinyo a sukisoken ti topic index para iti “Atonement” (kitaen iti Panangisuro iti Wagas ti Mangisalakan, 21).
Saan a ti Pagayatak, no di ket ti Pagayatam, ni Walter Rane