Ni Jesus a Mangisursuro kadagiti Tao iti Igid ti Baybay, ni James Tissot

Pebrero 25–Marso 3

Mateo 6–7

“Insurona Ida a kas la Adda Pannakabalinna”

Irugi babaen ti panangbasa iti Mateo 6–7 bayat ti panangpanunotmo maipapan kadagiti ubbing a sursuruam. Ania dagiti mensahe manipud kadagitoy a kapitulo a nasken a denggenda? Umaykayo, Sumurot Kaniak—Para Kadagiti Indibidual ken Pamilia ken daytoy a balabala ti makaited kadagiti kapanunotan iti panangisuro no kasapulan.

Isuratmo Dagiti Impresionmo

Yawis ti Panagbibinninglay

Kiddawen kadagiti ubbing nga ibinglayda no ania ti inaramidda kabayatan ti napalabas a lawas tapno agbalinda a silaw wenno pagwadan para iti maysa a tao

Isuro ti Doktrina

Dagiti In-inaudi nga Ubbing

Mateo 6:5–13

Kabaelak ti agkararag iti Nailangitan nga Amak kas iti inaramid ni Jesus.

Kabaelan dagiti ubbing ti agkararag babaen iti panangdenggegda iti panangkararag dagiti dadduma. Kasano a matulongam ida a masursuruan iti kararag ni Jesus kadagitoy a bersikulo?

Dagiti Mabalin nga Aktibidad

• Subliem nga adalen dagiti pannursuro ni Jesus maipapan iti kararag a masarakan iti Mateo 6:5–13. Mabalinmo nga usaren ti “Kapitulo 20: Mangsursuro ni Jesus maipapan iti Kararag,” Dagiti Estoria iti Baro a Tulag, 51–52, wenno ti maitutop a video iti (LDS.org).

• Usarem daytoy a panid iti aktibidad iti daytoy a lawas tapno matulongan dagiti ubbing a manglagip iti nadumaduma a paset ti kararag.

• Ugedam ti ima iti tunggal maysa kadagiti ubbing iti maysa a papel. Isaritam maipapan iti rumbeng nga aramidentayo kadagiti ima ken takiagtayo bayat ti panagkararagtayo. Iti tunggal uged, isurat ti maysa a banag nga aramidentayo tapno maipakita ti panagdaydayaw no agkararagtayo (kas pagarigan, idumog ti ulotayo, ikidem ti matatayo, ken dadduma pay).

• Tulongam dagiti ubbing nga agaramid iti maysa a poster wenno tsart a makatulong kadakuada a manglagip nga agkararag iti bigat ken rabii, ken awisem ida a mangibinglay iti daytoy a kadagiti pamiliada.

• Agkanta iti kanta maipapan iti kararag a kadua dagiti ubbing (kas iti “We Bow Our Heads,” Children’s Songbook, 25), ken iburaymo ti pammaneknekmo maipapan iti bileg ti kararag. Mabalin met nga awisem dagiti ubbing nga ibinglayda dagiti padasda maipapan iti kararag.

Kabaelak ti agkararag iti Nailangitan nga Amak kas iti inaramid ni Jesus.

Mateo 7:12

Nasken a tratuek dagiti dadduma iti wagas a kayatko a pannakatratok.

Ti pannursuro ni Jesus iti Mateo 7:12— a maawagan pay iti Nabalitokan a Pagannurotan—ket mangted iti simple a pangiwanwan para iti no kasano ti panangtrato kadagiti dadduma. Ania ti makatulongto kadagiti ubbing a sursuruam tapno agbiag babaen iti daytoy a pagbatayan?

Dagiti Mabalin nga Aktibidad

• Basaem Mateo 7:12, ket i-paraphrase-mo daytoy iti simple a balikas a maawatan dagiti ubbing . Tulongam dagiti ubbing a mangpanunot iti sumagmamano a wagas a mangileppas iti maysa a binatog a kas iti sumaganad: “Kayatko daytoy no dagiti dadduma para kaniak.” Kalpasan ti tunggal binatog, awisem ida a mangulit iti daytoy kenka, “Isu a nasken para kadagiti dadduma.”

• Makipagkantaka kadagiti ubbing iti “Jesus Said Love Everyone,” Children’s Songbook,, 61, ken agaramid iti simple a tignay a mangkuyog kadagitoy a kanta. Saludsodem dagiti ubbing no ania ti nasursuroda maipapan iti no kasano ti panangtrato iti dadduma manipud iti pagwadan ti Mangisalakan.

• Awisem dagiti ubbing a mangilista kadagiti nasayaat a banag nga aramiden dagiti nagannakda wenno dagiti dadduma pay a miembro ti pamiliada para kadakuada. Basaem ti Mateo 7:12, ken awisem dagiti ubbing nga agaramid iti listaan dagiti nasayaat a banag a mabalinda nga aramiden para kadagiti pamiliada.

Mateo 7:24–27

Makaaramidak ti napigsa a pundasion babaen ti panangsurot ken ni Jesus.

Iti panangusar iti pangngarig ti Mangisalakan maipapan iti panangbangon iti balay iti rabaw ti darat wenno iti rabaw ti bato ket mabalin a nakallalagip a wagas a pangisuro kadagiti ubbing maipapan iti kinapateg ti panagtignay iti no ania ti masursurotayo.

Dagiti Mabalin nga Aktibidad

• Makipagkantaka kadagiti ubbing iti “The Wise Man and the Foolish Man,” Children’s Songbook 281, ket usarenyo dagiti tignay a maigiddan kadagiti balikas.

• Usarem ti Mateo 7:24 tapno maisuro ti paggidiatan maipapan ti masirib a lalaki ken ti maag a lalaki. Awisem dagiti ubbing nga agpammarang nga agar-aramid iti balay. Kasanotayo nga agbalin kas iti masirib a lalaki?

• Pagdrowingem dagiti ubbing ti ladawan iti pangngarig iti masirib nga lalaki ken maag a lalaki.

Isuro ti Doktrina

Dagiti In-inauna nga Ubbing

Mateo 6–7

Naglaon ti Kaskasaba idiay Bantay kadagiti mensahe para kaniak.

Addaan dagitoy a kapitulo kadagiti mensahe a mabalin a mayaplikar kadagiti ubbing a sursuruam. Basaem dagitoy ngaadda dagiti ubbing iti panunotmo. Ania dagiti makitam a napateg kenka?

Dagiti Mabalin nga Aktibidad

• Ipalagip kadagiti ubbing nga agsursuroda maipapan iti no ania ti insuro ni Jesus kabayatan ti Kaskasaba idiay Bantay. Ania dagiti kinapudno a malagipda a nasursuro idi napalabasa lawas?

• Isuratmo iti pisarra ti sumagmamano a ragup dagiti balikas manipud iti Kaskasaba idiay Bantay ken dagiti dadduma pay a ragup dagiti balikas nga awan kadagiti nasantuan a kasuratan. Awisem dagiti ubbing a mangilasin no ania kadagiti a ragup dagiti balikas a naggapu iti Kaskasaba idiay Bantay, ket ibinglay no ania ti nasursuroda manipud kadagitoy.

• Pumili iti sumagmamano a bersikulo manipud iti Mateo 6–7 a mariknam a napategto kadagiti ubbing. Mangisuratda kadagiti reperensia iti nasantuan a kasuratan kadagiti card, ket ilemmeng dagitoy iti intero a siled. Palubosam a saraken dagiti ubbing dagitoy, basaem dagiti bersikulo, ken ilawlawagmo no apay a napateg kadakuada dagitoy a pannursuro.

• Mangibinglay iti paggugustom a binatog manipud iti Mateo 6–7, ket ilawlawagmo no apay a magustuam daytoy. No addaandagiti ubbing iti maysa a binatog a magustuanda, awisem ida a mangibinglay no apay a magustuanda daytoy ken no ania ti nasursuroda manipud iti daytoy.

• Kantaen ti “I’m Trying to Be like Jesus,” Children’s Songbook, 78–79, a kaduam dagiti ubbing ket isardengmo ti kanta no dumteng iti maysa a ragup dagiti balikas a mainaig iti maysa a pagbatayan a naisuro iti Mateo 6–7 (kas iti “lpanagsursuro nga agserbi kadagiti gayyemko”). Tulongam dagiti ubbing a mangaramid kadagiti koneksion kadagiti banag a sursuruenda manipud kadagitoy a kapitulo.

Matthew 6:5–13; 7:7–11

Denggen ken sungbatanto ti Nailangitan nga Ama no agkararagak.

Bayat ti panangadalmo iti Mateo 6:5–13; 7:7–11, ania ti mariknam a nasken a maawatan dagiti ubbing maipapan iti kararag?

Dagiti Mabalin nga Aktibidad

• Awisem dagiti ubbing a magbasa iti Mateo 6:9–13 iti napigsa ken kalpasanna ilistada dagiti banag a kinuna ti Mangisalakan iti kararagna. Kasano a masurottayo dagiti pagwadanna no agkararagtayo?

• Agkanta iti kansion a maipapan iti kararag a kaduam dagiti ubbing, a kas “Did You Think to Pray?” Hymns, num. 140. Tulongam dagiti ubbing a mangsukisok kadagiti balikas ti kanta tapno mangsarak kadagiti gapu no apay nga agkararagtayo ken dagiti bendision a sumangbay manipud iti kararag.

• Tulongam dagiti ubbing a mangikabesa ti Mateo 7:7 babaen ti panangay-ayam kas iti sumaganad: Isao ti maysa nga ubing ti umuna a balikas wenno ragup dagiti balikas manipud iti bersikulo ket kalpasanna ipasana ti maysa a bola iti sabali nga ubing, a kalpasanna isaona ti sumaruno a balikas wenno ragup dagiti balikas.

• Yakem ti Mateo 7:9–10 a kaduam dagiti ubbing nga usaren dagiti simple a props. Kiddawen kadagiti ubbing a mangibinglay no ania ti isuro kadakuada dayoy maipapan iti kararag.

• Iburaymo iti maysa a padas a nakasungbatan dagiti kararagmo.

Mateo 6:19–21

Kabaelak a gun-oden dagiti agnanayon a gameng imbes a dagiti gameng iti daga.

Kasano a matulongamto dagiti ubbing a sursuruam a mangipateg nga ad-adda pay kadagiti agnanayon a banag ngem dagiti nainlubongan a banag?

Dagiti Mabalin nga Aktibidad

• Mangitugot iti kahon ti “gameng” a napno kadagiti banag wenno ladawan a mangibagi kadagiti banag nga ipatpateg ti lubong—kas pagarigan, dagiti kuarta wenno ay-ayam. Basaenyo ti Mateo 6:19–21 nga aggigiddan, ket kalpasanna saludsodem kadagiti ubbing a tulongandaka a mangpanunot kadagiti nailangitan a gameng a mabalin a mangsukat kadagiti nainlubongan a banag iti kahon.

• Awisem dagiti ubbing a manginagan wenno mangidrowing iti sumagmamano a banag a mabalida nga aramiden tapno “agurnong … iti gameng sadi langit” (Mateo 6:20).

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pamiliada iti paggugustoda a pannursuro manipud ti Kaskasaba idiay Bantay.

Panangpadur-as iti Panangisurotayo

Agkalikagum a mangawat kadagiti miembro ti klasem. Kaam-ammom dagiti ubbing a sursuruam. Dagiti kapanunotan kadagitoy a balabala ket mabalin a mabalbaliwan tapno kasayaatan a maipaay dagiti kasapulan ti klasem. Mabalinmo a sublien nga adalen amin dagiti aktibidad a nakalista iti daytoy a balabala, saan laeng kadagiti aktibidad a naidutok para iti tawen dagiti ubbing a sursuruam, tapno masarakam dagiti kapanunotan para iti klasem. (Kitaen iti Panangisuro iti Wagas ti Mangisalakan, 7.)