“Pebrero 11–17. Juan 2–4: ‘Masapul Kadakayo ti Mayanak a Mabaliwan” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Pebrero 11–17. Juan 2–4,” Umaykayo, Sumurot Kaniak—Para kadagiti Indibidual ken Pamilia: 2019
Pebrero 11–17
Juan 2–4
“Masapul Kadakayo ti Mayanak a Mabaliwan”
Bayat ti panangbasam iti Juan 2–4, isuronto ti Espiritu Santo kenka dagiti banag maipapan iti bukodmo a pannakapasurot wenno kombersion. Ilistam dagiti Pariknana. Mabalin a masarakam dagiti mainayon a naespirituan a nalawag a pannakaammo ken pannakaawat [insights] manipud kadagiti kapanunotan iti panagadal iti daytoy a balabala.
Suratmo Dagiti Impresionmo
Iti maysa a pasken ti kallaysa idiay Cana, pinagbalin ni Cristo ti danum iti arak—maysa a pasamak nga inawagan ni Juan iti “pangrugian dagiti datdatlag nga aramid” (Juan 2:11). Pudno dayta iti ad-adu ngem maysa a kaipapanan: idinto a daytoy ti immuna a milagro nga inaramid ni Jesus iti kaaduan, daytoy pay ti mangisimbolo iti sabali pay a namilagruan a pangrugian—ti proseso ti pannakabalbaliw dagiti pusotayo bayat ti panagbalintayo nga ad-adda pay kas iti Mangisalakantayo. Mangrugi daytoy a milagro iti unos ti panagbiag nga addaan iti pangngeddeng a mangsurot ken ni Jesucristo, tapno agbalbaliw ken agbiag iti nasaysayaat a biag babaen Kenkuana. Kangrunaanna a daytoy a panagbalbaliw ket makapagbalin a naan-anay a ti “pannakayanak a mabaliwan” ket maysa kadagiti kapintasan a wagas a pangiladawan iti daytoy (Juan 3:7). Ngem ti pannakayanak manen ket pangrugian laeng iti dana ti kinadisipulo. Dagiti balikas ni Cristo iti babai a Samaritano iti abay ti bubon ket mangipalagip kadatayo a no agtultuloytayo iti daytoy a dana, iti kamaudiananna agbalinto ti ebanghelio nga “ubbog ti danum” iti kaunggantayo, nga “agburayok a maipaay iti biag nga agnanayon” (Juan 4:14).
Dagiti Kapanunotan para iti Bukod a Panagadal iti Nasantuan a Kasuratan
Mapagbalbaliwnak ti pannakabalin ni Jesucristo.
Bayat ti panangbasam maipapan iti panamagbalbaliw ti Mangisalakan iti danum iti arak iti Juan 2:1–11, ania dagiti nalawag a pannakaammo ken pannakaawat a magun-odmo maipapan iti pannakabalin ni Cristo a mangbalbaliw kenka?
Magun-odmo dagiti nayon a nalawag a pannakaammo ken pannakaawat babaen iti panangibilang kadagiti pannirigan dagiti nadumaduma a tattao nga adda sadiay, kas kada Maria, dagiti disipulo, ken dadduma pay. Kasano a napasaran dagitoy a tattao ti milagro? Mabalinmo nga idilig no ania ti masursurom maipapan kadagiti milagro kadagitoy a bersikulo iti no ania ti insuro ni Jesus ken ni Nicodemo (kitaen iti Juan 3:1–8) ken ti babai iti abay ti bubon (kitaen iti Juan 4:3–26).
Masapul a mayanakak manen tapno sumrek iti pagarian ti Dios.
Idi immay a nalimed ni Nicodemo ken ni Jesus, naannad ti panagsimisimna. Idin agangay, nupay kasta, sinalaknibanna ni Jesus iti kaaduan (kitaen iti Juan 7:45–52) ket nakitipon kadagiti mamati iti pannakaitanem ti Mangisalakan (kitaen iti Juan 19:38–40). Ania dagiti pannursuro a masarakam iti Juan 3:1–21 a mabalin a nangparegta ken ni Nicodemo tapno surutenna ni Jesus ket mayanak manen?
Insuro ni Propeta Joseph Smith a,”Ti pannakayanak manen, ket maisangbay babaen ti Espiritu ti Dios babaen kadagiti ordinansa” (Teachings of Presidents of the Church: Joseph Smith [2007], 95). Ania ti papel nga akmen ti panagbuniagmo (“mayanak iti danum” [Juan 3:5]) ken ti kumpirmasion (“mayanak iti Espiritu” [Juan 3:5]) iti pannakayanak a mabaliwan? Ania ti ar-aramidem a mangituloy iti daytoy a proseso ti panagbalbaliw? ( kitaen iti Alma 5:11–14).
Kitaen met iti Mosiah 5:7; 27:25–26; “Salvation,” Gospel Topics, topics.lds.org; David A. Bednar, “Ye Must Be Born Again,” Ensign wenno Liahona, Mayo 2007, 19–22.
Ipakita ti Nailangitan nga Ama ti ayatna para kaniak babaen ken ni Jesucristo.
Insuro ni Elder Jeffrey R. Holland, “Ti umuna a naindaklan a kinapudno ti amin a kinaagnanayon a ti Dios ay-ayatennatayo iti amin a puso , kabaelan, panunot, ken pigsana” (“Tomorrow the Lord Will Do Wonders among You,” Ensign wenno Liahona, Mayo 2016, 127). Kasano ti pannakariknam iti ayat ti Dios babaen ti sagut ti Anakna?
Ti sakramento ket mangipaay iti oras a mangutob iti ayat ti Dios ken ti sagut ti Anakna. Ania dagiti himno ti makatulong kenka tapno mariknam daytoy nga ayat? Ibilangmo ti panangbuya iti video ti Mormon Tabernacle Choir a mangkankanta iti “I Stand All Amazed” (LDS.org). Ania ti mabalin nga aramidem tapno mapagbalin a napatpateg ti sakramento?
Maysa kadi nga Espiritu ti Dios?
Mabalin nga adda dagiti matikaw iti palawag ni Jesus a ti Dios ket maysa nga espiritu. Ti Patarus ni Joseph Smith iti daytoy a bersikulo ket mangted iti napateg a pannakailawlawag: “Ta adda nangikarian ti Dios iti Espirituna” (iti Juan 4:24, footnote iti). Isuro met ti kabaruanan a paltiing a ti Dios ket addaan iti bagi a nagtagilasag ken nagtagitulang (kitaen iti DkK 130:22–23; kitaen met iti Genesis 5:1–3; Hebreo 1:1–3).
Indiaya ni Cristo kaniak Ti nabiag a danumna.
Ania ti mabalin a kayat a sawen ni Jesus idi imbagana iti Samaritano a babai a siasino man nga uminum iti danum nga idiayana ket dinto pulos mawaw? Kasano a maipada iti ebanghelio iti sibibiag a danum?
Ti ebanghelio ni Cristo ti nabiag a danum a mangtaraon iti kararuatayo.
Maysa kadagiti mensahe ti Mangisalakan iti babai a Samaritano ket ti no kasano ti panagdaydayawtayo ket napatpateg ngem iti no sadino ti pagdaydayawantayo (kitaen iti Juan 4:21–24). Ania dagiti ar-aramidem tapno “agdaydayaw iti Ama iti espiritu ken iti kinapudno”? (Juan 4:23).
Kitaen met iti Pangiwanwan iti Nasantuan a Kasuratan, “Agdaydayaw”; Dean M. Davies, “The Blessings of Worship,” Ensign wenno Liahona, Nob. 2016, 93–95.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a kapanunotan:
Bayat ti panangbasa ti pamiliam kadagitoy a kapitulo ita a lawas, nangnangruna nga ikasom no kasano nga inusar ti Mangisalakan dagiti inaldaw a banag—pannakayanak, angin, danum, ken taraon—a pangisuro kadagiti naespirituan a kinapudno. Ania dagiti bambanag iti pagtaenganyo ti mabalinmo nga usarem a mangisuro kadagiti naespirituan a kinapudno?
No liklikam dagiti banag a mamagbalin a pisikal ken espiritual a narugit ti pagtaenganyo, agbalin daytoy a sagrado a lugar—a kas iti templo. Ania ti nasken a saan a pagtalinaeden ti pamiliam iti pagtaenganyo tapno agbalin daytoy a sagrado a lugar? Ania ti aramidem tapno saan a mapagtalinaed dagitoy a banag?
Kiddawem kadagiti miembro ti pamilia a mangpanunot maipanggep iti milagro ti panagsikog ken panagpasngay—ti proseso ti panagparsua iti sibibiag, aggargaraw, nasaririt a tao. Insuro ni Cristo a masapul a mayanaktayo manen sakbay ti iseserrek iti pagarian ti Dios. Apay a ti pannakayanak manen ket napintas a pangiladawan iti panagbalbaliw a kasapulantayo sakbay a makastrektayo iti pagarian ti Dios? Kasano a napadasantayon ti proseso ti naespirituan a pannakayanak manen?
Awisem dagiti miembro ti pamilia a mangisarita iti daytoy a bersikulo iti bukodda a balikas a kasla ilawlawagda daytoy iti maysa a gayyem. Kasano a nakatulong ni Cristo kadatayo a mangrikna iti ayat ti Dios iti biagtayo?
Ania ti insursuro kadatayo ti Mangisalakan idi indiligna ti Ebangheliona iti nabiag a danum? Ibilang ti panangiggem iti maysa a baso ti danum ken panangidawatmo iti pamiliam a mangiladawan kadagiti kalidad ti danum. Apay a kasapulantayo ti uminum iti danum iti inaldaw? Apay a naidasig ni Jesucristo ti ebangheliona iti “ubbog ti danum nga agburayok a maipaay iti biag nga agnanayon”? (Juan 4:14).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Agsapul kadagiti simbolo. Masansan nga usaren dagiti nasantuan a kasuratan dagiti banag, pasamak, tignay, wenno pannursuro a mangibagi kadagiti naespirituan a kinapudno. Mapabaknang dagitoy a simbolo ti pannakaawatmo iti doktrina a maisursuro. Kas pagarigan, inyarig ti Mangisalakan ti pannakapasurot wenno kombersion iti pannakayanak manen.
Ti Nabiag a Danum, ni Simon Dewey